Manipur a Covid-19 case akal cheh cheh jeh a Cabinet in Lockdown...

Manipur a Covid-19 case akal cheh cheh jeh a Cabinet in Lockdown leh Curfew phondohna neita; Dan palkeh ho leu dinga seiyu

40
0
SHARE

Manipur a Covid-19 case akal cheh cheh jeh a Cabinet in Lockdown leh Curfew phondohna neita; Dan palkeh ho leu dinga seiyu

Imphal,  Jul 22(ET): Gamsunga Covid 19 positive case atam cheh cheh jeh a State Cabinet in July nisim 23, nilhah nidan 2 a kon ni sagi (7 days) sung Lockdown leh curfew bulhing set a chepi kit dinga thulhuhna anei tauvin ahi.

Chief Minister Cabinet Hall mun a CM N Biren Singh lamkaina a Emergency Cabinet meeting aneiyu ahi. CM Bungalow mun a Chief Minister N Biren in thuso miho akihoupi na a, state sorkar in thi nathei virus a kon mihem hinkho huhdoh nadinga Lockdown leh Curfew avel a akoi kit ahi, tin aseiyin ahi.

Tamtah in Lockdown sunga curfew kikoi chule SOP leh protocol chom chom jui dinga asem ho ajuilou jeh a state sorkar in hitobang pan alah ahi in, mihem hinkho huhdoh ding hi sorkar in gelkhoh pen ahi, ati. Dinmun vetkol na dinga ni 7 sung Lockdown leh curfew kiphongdoh ahi in, dinmun akhohset a ahileh ni sagi kisuhsaobe ding ahi, tin CM in aseibe in ahi.

Chule sorkar in asem safety protocol leh guidelines asem palkeh ho leu sah (penalty) dinga jong Cabinet in thulhuhna anei ahi. Quarantine centre a um dan palkeh aumleh dangka 1000 leu diu chule dukan, petrol pump leh mipi lah mun chom chom a face mask bol lou leh social distancing juilou ho dangka 200 a leu diu ahi. Public place a dum thil leh kuwa ho ne a chil set aumleh dangka 500 leu ding, chule akiphal jat kalval a kikhopna a mi kikhop doh atam leh dangka 10,000 leu diu ahi.

Gamsunga Covid 19 case akal cheh cheh jeh a Cabinet in lha gup sung COVID Care Centre a natong ding doctor 100 lah dinga phatsahna anei uvin, amaho hin nikho tha a dangka 2500 amu diu ahi. Tu masanga State cabinet in MPSC a kon doctor 300 lah dinga phatsahna anei ahi. Cabinet in Covid Care centre a nikho tha a peh ding nurse 90 leh Multi Tasking staff 60 lah dinga jong kihou lhahna ananei ahi.

Coronavirus jeh a state phabep a athi tamtah kisei ahijeh a hiche hi bailam cha lahlou ding ahi, tin Chief Minister in aseiyin, social distancing, face mask, thenna hinkho man ding chule safety protocol ho phatah a jui ding hi virus a kon kivenna ding alampi phapen ahi, ati.

Lockdown sunga medical, police, media leh adang dang ho kilha ong ding chule government office a attendance atam ding jong kikhah ahi, ati. Gamsunga Covid 19 natna a kon damdoh a (recovery rate) hi 68 percent ahi in, chule natna jeh a athi umlou lai ahi, tin CM in aseibe in ahi.

Chief Minister in ahoulimna a, Covid Care Centre ho a agom a lupna 1289 um ahi, tin aseiyin ahi. Covid Care Centre (CCC), Lamboikhongnangkhong, Imphal West a lupna 300-500 kikah, CCC Jiribam leh Kangpokpi a lupna 100 umna CCC jong kisa jou vah ding ahitai, ati.

Institutional Quarantine Centre a mi 8000 vel quarantined kibol a chule Community Quarantine Centre a mi 1700 vel quarantined kibol ahi, tin CM in aseiyin chule Cabinet in doctor 100, nurse 90 leh multi tasking staff 60 hi lha gup sunga COVID 19 nat douna dinga nikho tha sim peh tho a lah dinga thulhuhna anei ahi, tin aseibe in ahi.

Wednesday nikho chan a pasal 40 leh numei 5 panna a agom a mi 45 athah a COVID 19 positive ahi kihetdoh be ahi in, VRDL JNIMS a mi 21, Jiribam district hospital a 13, Thoubal a 4 chule Ukhrul district hospital a mi 7 in natna anei kihet be ahi. Manipur a Covid 19 case photchenna um hi 2,060 lhing ahitan, hiche lah a active case 642 um a chule mi 1,418 hi natna a kon kijen dam ahitai.

Lockdown ding jeh a mipin thil kichoh khol pan kit ta

Imphal, July 22(ET):  Gamsunga Covid 19 pandemic atam cheh cheh jeh a state sorkar in nikho 14 lhing lockdown aphondoh ding ahi, akiti jeh a gamsung mihon angaicha khoh thil ho, adeh a petrol thil ho apun pun a acho pan tauvin ahi.

Imphal khopi a um petrol pump atamjo a gari neo leh gari len ani a queue saotah tah a akigol uvin ahi. Achesa ni phabep sunga Covid 19 boina hi sang cheh cheh a, akholjin khalou mi phabep injong natna anei kihet doh be jing ahi.

Lilong chule Thoubal district mun tamtah a kholjin khalou mi phabep Covid 19 positive hiuva chule RIMS kiti health service centre a staff ho jeng jong positive ahi kihedoh ahi.

Manipur a Covid-19 positive 2060 lhingta; mi 1418 kijendam

Imphal, July 22(ET): Manipur a Wednesday nilhah nidan 7:00 achesa nidan 24 sung in Covid-19 positive case thah 45 (Pasal 40 le numei 5) akimube in ama ho test kibolna chu VRDL JNIMS a mi 21, DHs Jiribam a 13, Thoubal a 4 le Ukhrul akon 7 ahi.

Tuni case thah kimu mi 45 ho chu Churachandpur akon mi 12, Imphal East akon 4, Jiribam akon 13, Thoubal akon 4, Senapati akon 5 leh Ukhrul akon mi 7 ahiuvin abon uvin Covid care facily a chon ahitaovin ahi. Amaho lah a Thoubal district akon mi 4 tilou adangse hi gampam akon hung kile ahiuve.

Chukitleh achesa nidan 24 sung mama in natna nei mi 34 adamdoh in discharged akibol tan amaho chu CCCs Meitram, I/W akon 23, JNV, Kangpokpi akon 3, Covid Card Facilities, RIMS akon 2 leh JNIMS akon 6 ahiuvin amaho cheng hi RT PCR test abol uva Covid-19 negative ahijeh uva kisoldoh ahi tai.

Wednesday nikho chan in gamsung’a Covid-19 natna veikha mi 2060 aphatan chule tu le tua natna vei vetkol a um mi 642 ahin, mi 1418 hi kijendam ahi toh kilhon in recovery rate 68.83 percent aphatan ahi.

Alangkhat ah gamsung’a Covid-19 jeh in Assam Rifles khat in thina atoh e kiti hi thudih ahipon amapa hi achesa July 19, 2020 nikho a Silchar Medical College a thi ahin, Pailapul Cachar District, Assam a posting ahi.

Alangkhat ah Thoubal district sung a local transmission aum toh lhon in masang a volunteer ho khat insungmi holeh aki naipi mi phabep sample test ana kibol chu tuni chun positive ahidan hetdoh ahitan ahi. Thoubal District Hospital a sample 225 test kibolna achun mi 9 positive amudoh uvin chule Thoubal Moijing High School a sample 41 test kibolna achun mi 3 positive ahidan amudoh kit uvin ahi. Janni chan chun Thoubal district sung a case 134 aum in hiche lah achun mi active case 74 aum in midang 60 ho adamdoh tauvin ahi.

Leng phunggui Leishemba Sanajaoba in Rajya Sabha member dinga kihahselna nei ta

New Delhi, July 22: Leishemba Sanajaoba in Wednesday nikhon Rajya Sabha a Member of Parliament dinga kihahselna anei tan ahi. Nam von a kivon a chule del kang akisil a, Manipuri pao a kihahselna alah ahi.

Parliament session aumlou jeh a House chamber sunga kitepna (oath) la a member 43 ho lah a Sanajaoba jong pang ahi. Sanajaoba in, Indian Constitution chule India Integrity ventup dinga Lainingthou Sanamahi, Ebudhou Pakhangba leh Shri Shri Govindaji min a kihahselna aneiyin chule kitah tah a na toh dinga jong kitepna aneiyin ahi.

Sanajaoba hin achesa June 19 ni a vote kipe 52 lah a vote 28 amu a Manipur Rajya Sabha seat khat seh um a hi BJP candidate a election kai doh ahi. Achesa March nisim 13 nikho a Manipur Legislative Assembly secretariat, Imphal a Rajya Sabha election a dinga nomination paper apehlut ahi in, election atet kigot hi gamsunga um kiloikhomna (CSO) tamtah in adoudal a chule Manipur leng phung achan na alahdoh ding chan a thumna aneiyu ahi. Ahivanga, Rajya Sabha election ajo jouva tuni chan a ama panlah doudalna a kiphinna sangtah umlou ahi. Ceremony hi April lha a umding ahi in, ahivanga March lha kichai langa kon lockdown akikoi jeh a chelha thei louva June lha a abol u ahi.

Kin goun a BJP 18, Congress 10, YSRCP 4, BJD 4 jong apang uvin chule TMC leh DMK kiti party ho pandemic jeh a pang louvu ahi. Oath taking ceremony a insung mi khat khat bou apan ding kiphal a chule gallery a atou sah u ahi.

Covid 19 natna nei hidinga ginmo staff khat MU A-Block a che

Imphal, July 22(ET): Manipur University Administrative Block a staff phabep in anu COVID 19 positive hi a peon natong khat in MU authority ahilouleh atohkhompi ho hetsahna nei louva office ache a block alhun thu a Coronavirus chungchang a kiginmo na anei uvin ahi.

Alangkhat a, Ukhrul district a um DIPR a staff khat insung mite khat Covid 19 positive ahi jouva ‘quarantine’ bol dinga thuhilna aume, tin thulhut in aseiyin ahi. DIPR staff hon asei dungjuiya, ni phabep masanga mikhat hin account section avil ahi in, ahivanga, hiche nikho tilouva Head office a chelou ahi. Ache nikho a akimupi hon natna akilah thei dinga staff phabep in alunggel asei ahi. Tuchan geiya DIPR account section hi sanitized kibol lou chule Manipur University A-Block a jong kivenna ding natoh ima chelha lou ahi.

Achesa ni phabep sunga Thoubal district a akholjin khalou mi phabep coronavirus positive ahi akihet jouva ‘community level’ a natna kila son to hidinga ginmona um ahi. Natna hitia akilah son to dan hin ‘lateral transmission’ kalval a natna chal hidinga ginchatna um ahi.

Administrative Block a peon natong mikhat hi Thoubal district mi ahi in, anu hi positive hi ahi, tin thulhut in aseiyin ahi. Peon pa hi janni a kon office che talou chule test kibol dinga thuhilna aneiyu ahi.

Nagaland a Covid-19 positive case 57 kimube toh lhon a natna nei 1087 phata

Kohima, July 22: Nagaland a tujingkah a Covid-19 positive case thah 57 mudohbe ahitoh kilhon in tuhin state sung’a natna nei 1,087 aphatan tuni kimudoh case thah ho chu sample 513 test bol ding’a kithot ho lah a kon kimudoh ahi.

State health minister S Pangnyu Phom in thuso abolna ah tuni case thah 57 ho chu Dimapur akon 23, Kohima kon 18, Zunheboto akon 7, Pren akon 5, Mon le Mokokchung districts akon 2 cheh ahi ati.

Wednesday ni a case thah 57 kimube jeh in tuhin state sung’a Covid-19 positive case 1087 aphatan tu le tua vetkol aum mi 602 ahin mi 485 akijendam tan ahi.

Tuesday nikho chan chun RT-PCR test bol ding’a sample 19,118 kithohdoh ho lah in 18,246 sample ahungdoh in hiche lah a chu sample 11,446 hi BSL-3 lab, Naga Hospital Authority Kohima (NHAK) a test ahin sample 340 hi positive ahi. BSL-2 Lab CIHSR, Dimapur a sample 2,946 test kibol ho lah a 285 positive ahi. Sample 12,664 Truenat a test kibol ho lah a sample 11,931 negative hi a sample 391 positive hi ahin photchetna nei ding’a RT-PCR a test bol ding’a kithot sonkit ahi.

Pallel- Chandel lamlen setna khohse jing

Chandel July 22(ET):  Pallel akon Chandel District Headquarter kikah lamlen hatah a aset toh lhon in che le vaa le ahah sa lheh tan ahi akiti.

Hiche lamlen agan na thei pen a semphat ahi na ding in Chandel akon Social Activist Ts Beton Anal in govt hetsah na ahin nei in ahi. Kanankhu Village Chandel akon Social Activist Ts Beton in Sulam Area Anal Chief Association (SAACA) Chandel District toh kitho khom a lampi vetlhah na ana neina uva Pallel le CHandel kikah a km 18 bou gamlha lampi hi COngres govt in achesa 2013-14 chun ana sem uvin, hinlah hiche black topping chi ana pat vaal jeh in chomkhat jong ana ki ngeng pon ahi akiti.

Achesa Kum a Chief Minister in CHandel vilna ahung neiding jeh in lampi a ase themkhat anaki huh bit in hinlah semphat na ana kinei loutoh lhon in tu le tu  in che le vaa le ahah lheh tan ahi akiti. CHuh go ahung lon toh lhon bon ahung tam kit in mipi hoc hung a hahsat na ahin pohlut dan thu jong Ts Beton Anal in tahlangna an anei toh lhon in gov tin akin thei pen a vetlhah na ahin nei ding uvin temna ana nei in ahi.

ATRPFM in Noney district a NH-37 lamlen kisem jeh a munchim na mun vil; thilsoh aset cheh kah a mopohna nei authority hon pan alah diuva seiyu

Imphal, July 22(ET): All Tribal Rights’ Protection Forum Manipur (ATRPFM), Rongmei Naga Student Organization Manipur (RNSOM), Longmai Bazar Board (LBB) chule Longmai Area Village Authority Council (LAVAC) in NH-37 juiya um Noney district noiya um Longmai-III kho sung miho avil uvin, NH-37 a thil kisah (construction) jeh a munchim in indan 2 a sang, room 8 umna pucca building khat sangtah a asuhset amu uvin ahi.

Munchim in asuhset gam hi Rongphun Rongmei a ahi in, dangka lakh 30 vel hiding thil asuhset ahi in, hiche holah a hi muchi chivo hojong pang ahi. Chule inmun jong khi keh a, indan achungnung pa asuhset ahi. Mopohna nei authority hon hiche hi avettup louva chule aset be nadinga pan alah louva ahileh Houin khat panna a inmun 30 vel hi munchim in akailhah soh dinga um ahi in, hiche hi akisei lamlen a thil kisah jeh hi ahi.

Mihem hinkho jong atohkhah thei ahi, tin James Haokip, Secretary, ATRPFM in thuso aneina a aseiyin ahi. Lamlen hi khosung lailung a kisa ahi in, achung leh anoi aban a phailei hojong munchim in akai set thei ahi, ati. Mopohna nei authority hon Environment Impact Assessment (EIA), Social Impact Assessment (SIA), Forest Clearance leh adang dang abol diu hi tahsan lelna um ahi, ajeh chu akisa thil hi sangtah a boi ahi.

Tua sorkar in ‘Thinglhang leh Phaicham mi thakhat ahi’ chule thinglhang leh phaicham a khantouna kibang aume, tia asei hi lungdon umtah ahi in, amin mai maiya kisei ahi. Ajeh chu lamlen, kijahto na leh adang dang a thinglhang leh phaicham sangtah a kikhe ahi. Tu naicha adamlou khat bonlhoh dimna lamlen a khosung mihon go a ahin poh uva, hospital ahin lhut u ahi.

Ache hon lamlen khel a um khosung jong avil uvin, lamlen kisa hin khosung tamtah atohkhah thei dinga amu u ahi. Avaigei masanga authority hon mihem hinkho huhdoh nadinga pan alah diuvin asei uvin ahi. Go ajuh jom a ahileh dinmun khohse cheh cheh ding ahi. Lamlen a gari aja a sim lhai ahi in, Manipur a dinga neh kipohna lamlen khat hi ahi.

NH hi NHIDCL in asah ahi in, phatah a kivetup lou, protocol chom chom khohsahna kipe lou ahi. Hiche jeh a mopohna nei authority hon pan alah diuva kiloikhomna chule lamkai hon ngehna anei vanga, tuchan a donbutna umlou ahi. Hiche jeh a akisei kiloikhomna hon July nisim 23 nikho a kon ni 5 sunga mopohna neiho, adeh a NHIDCL in pan alah dinga ngehna kinei ahi in, ahilouleh National Highway a gari len alhai ding kikhah ding ahi, tin thuso chun aseibe in ahi.

 

CCpur Dist a Covid-19 positive thah 12 kimudoh; Community Transmission hi District sung’a jong um thei ahi ti’a CMO/CCpur in sei

B.Lalboi Gangte

CCpur, July 22(ET): Manipur ah Covid-19 toh kisai’a Community transmission um ahidan phondoh  in um hih lai jong leh Dr. Vumchinpau Tonsing, CMO/CCpur in tunin hiche akon kivendoh ding dan tahlangna anei in ahi. Chuleh hiche chung thu’a Dr. J. Suresh Babu, Chief Secretary in thuso aneina’a Thoubal District pumpi leh akijot matpi District ho jouse ajong service kiti ta phot kha hi ding chuleh maban’a Community transmission um thei ding’a akilang jeh in Imphal akipat Dr. Rosy toh kihoumat na anakinei dungjui’a Manipur pumpi Total Lockdown hung um thei ding ahidan jong atahlang in ahi.

Hiche toh lhon’a  Thoubal sung’a Travel History nei lou mi tamtah Covid-19 positive ahi jeh in mipi lah’a kilahson na um khat hitam tinjong aginmo na aphongdoh in ahi. Chuleh Thoubal ah Community Transmission aum khah leh Thoubal District sung bou hilouva Imphal khopi jong gangtah’a ahin phah ding ahi naban’a tu jeng in jong Imphal khopi’a Lab Technician phabep jong Covid positive kimudoh pan tan ahi ati. Hiche ahi jeh chun jing (July 23) nikho akon Imphal khopi sung Total lockdown ding in phondoh in aum tan ahi tin Chief Secretary chun aseiyin ahi. Alangkhat’a CCpur District jong athengsel’e tina thei ding mun jong aum thei chompon ajeh chu tuhin mundang akon hung lhung mi 5,234 sample kilah nalah’a positive 166 aum in ahi tin Dr. Vumchinpau Tonsing in aseiyin ahi. Chuleh positive 166 lah’a 140 adamdoh tah jeh uvin discharge jong anakibol tan ahi. Chuleh Polymerase Chain Reaction (PCR) test kibol na’a negative ho jong 70% negative tah tah hinam ti akiphochen ngam pon ahi. Chuleh 30% hi technical lam dihlou jeh leh Timing dihlou jeh’a positive ding jong negative result apot aum thei in chuleh positive mudoh’a um ho jong symptom neilou ngen ahi naoban’a returnees mi 5,234 vel inn kisol ho akon jong jalhang’a kilahson na umthei ahi. Hijeh chun CCpur District sung hi Community Transmission akipat akithengsel in ahi akiti ngampon ahi tinjong aseibei.

Dr. Vumchinpau Tonsing in aseibena’a Covid-19  akon kivendoh na ding’a akisei ho ABC akipat athahbeh’a mipin Social distancing leh mask bol ding phatah’a ajui cheh ding uvin temna anei in ahi. Chuleh tunin (July 22) CCpur District sung’a Covid +ve case thah 12 akimudoh in tun agom’a case 78 alhing tan ahi. Case thah kimudoh 12 ho lah’a 11 hi 113 Bn BSF/STC akon ahi.

India a nidan 24 sung’a Covid-19 a kon damdoh jat record hi; coronavirus case lakh 12 nailam ta

New Delhi, July 22: India gam a achesa nidan 24 sunga Covid 19 natna a kon kijen dam hi asan na pen ahitan, adamlou mi 28,472 hi natna a kon damdoh ahilouleh discharged kibol ahi, tin Health Ministry in Wednesday nikhon aseiyin ahi.

India gam a coronavirus case athah achesa nidan 24 sunga 37,724 kimube a, hiche toh kilhon a Covid 19 positive hi lakh 12 nailam ahitai. Natna a kon adamdoh agom a mihem lakh 7.53 ahi, tia Union Health Ministry data in asei ahi. Recovery rate hi 63 percent lhing ahitai. Wednesday nikho a kipe data update dungjuiya Covid 19 case hi 11,92,915 lhing ahitai.

India pumpi a active case 4,11,133 um a, chule natna a kon mi 7,53,049 damdoh a chule mikhat agam a kile ahitai. Achesa nidan 24 sunga damlou mi 28,472 adamdoh e, tia phondohna um ahi. COVID 19 active case leh natna a kon kijen dam hi 3,41,916 a kikhet be ahitai.

ICMR in asei dungjuiya, achesa July nisim 21 nikho chan agom a sample 1,47,24,546 test kibol ahitan, chule Tuesday nikho a sample 3,43,243 test kibol ahi. Alangkhat a Delhi khopi a sero-prevalence study in asei dungjuiya, khopi a cheng hop 23 vel hi novel coronavirus natna nei ahi, ati ahi, tin Union Health Ministry in aseibe in ahi.

Director, National Centre for Disease Control (NCDC) Dr Sujeet Kumar Singh in adang 77 percent hi natna jeh a dammo thei dinmun a um nalai ahiuvin, containment measure phatah a chejom pi ngai ahi, ati. Vannoi pumpi a coronavirus case hi 14.6 million lhing ahitan chule natna jeh a thi 609,198 lhing ahitai.