Manipur a COVID-19 a mi 3 thibe; achesa nidan 24 sunga security...

Manipur a COVID-19 a mi 3 thibe; achesa nidan 24 sunga security personnel 18 panna a positive mi 47 kimu be

35
0
SHARE

Manipur a COVID-19 a mi 3 thibe; achesa nidan 24 sunga security personnel 18 panna a positive mi 47 kimu be

Imphal, July 30(ET): Manipur a COVID 19 jeh a pasal khat athi e, tia athi masapen thu akisei jou Thursday nikho a COVID 19 natna jeh a mithum athi be in, hiche toh kilhon a gamsunga natna jeh a thi mi 4 alhing tai, tin official thulhut in aseiyin ahi.

Athi pasal mithum hohi kum 48, 47 leh 60 cheh ahiuvin, Leimakhong, Kangpokpi district a kon, Langol, Imphal West district a kon chule Moijing, Thoubal district a kon ahiuvin, RIMS leh JNIMS hospital a kijen u ahi. Amaho hi COVID 19 positive ahina chung uva natna adang chom chom jong aneiyu ahi.

Tuni a thi COVID 19 positive thum holah a mikhat hi ‘in house patient’ (admit) ahi in, chule khat hi RIMS emergency ward a akijen na a thi ahi. COVID 19 positive ahi hi test abol jou uva ahetdoh u ahi in, ahivanga hospital a admit kibol athi mikhat pa hin RIMS a akijen sunga natna akilah son ahi.

Thursday jingkah nidan 2.40 don a COVID 19 jeh a thi kum 48 a upa pasal khat hi Chronic Kidney leh lung infection chule adang dang anei jeh a achesa June nisim 8 nikho a kon Nephrology department a kijen pan ahi in, amahi Leimakhong ho ahi. Attendant khat COVID 19 positive ahi akihetdoh jouva natna nei attendant khat ache na department jouse tobang a umho ‘mass testing’ abol u ahi. Achesa July nisim 26 nikho a COVID 19 positive ahi kihedoh a, hiche a kon COVID Care Center RIMS a kijen ahi.

Thursday nikho jingkah nidan 10.30 don a thi COVID 19 positive pa hi Langol area a kon ahi in, kum 47 a upa ahi. Hai khoplouna anei jeh a RIMS Emergency ward a Wednesday nilhah a apuiyu ahi. Thulhut dungjuiya, RIMS a doctor hon COVID 19 test akibol dinga thuhilna apeh uva, hiche dungjuiya Babina Diagnostic Center a test kibol a, inn kile ahi. Atahsa alel lhah cheh cheh jouva tuni jingkah a RIMS emergency ward a apui kit uva, hiche mun a thi ahi. RIMS authority hon COVID 19 positive ahi ahetdoh ahi, tin thulhut in aseibe in ahi.

Achesa Wednesday nikho a kon hai lel jeh a dammo a Thursday jingkah nidan 10 don a RIMS casualty a apuiyu ahi. Thulhut dungjuiya, Wednesday jan nidan 7 don a Shija Hospital a dialysis kibol ahi in, ahivanga, jingkah nidan 10 don a RIMS a achon u ahi. COVID 19 test akibol na result hi athi jouva kimu a, positive ahi kihedoh ahi.

Achesa phat phabep RIMS hospital a dialysis kibol ahi in, Nephrology department, RIMS akikha jeh a Wednesday ni a Shija Hospital a dialysis kibol ahi. Shija mun a dialysis abol nauva ajen le ho PPE protection lhingset a kivon u ahi, tin thulhut chom khat in aseiyin ahi. Ahin kilhonpi mithum ho RIMS a ‘observation’ a akoiyu ahitai.

Thursday nilhah nidan 4.55 don a kum 60 a upa Moijing, Thoubal district a kon adamlou mikhat JNIMS Hospital a akijenna a athi in ahi. Amahin hai khop lel chule ehkho anei jeh a Hospital a admit abol u ahi in, JNIMS VRDL a test abol nauva COVID 19 positive ahi kihedoh ahi.

Prof. Ch. Arunkumar, Medical Superintendent, RIMS in hitobang thina hi COVID 19 jeh ahi, tia seithei ahipoi, ajeh chu natna khohtah tah aneisa u ahi, tin aseiyin ahi. Achesa Wednesday nikho a jong kum 56 a upa damlou khat ‘multiple organ failure’ leh ‘Covid 19’ jeh a thi ahi. Athi pa hi Khongjom kho, Thoubal district mi ahi in, Manipur gam a Covid 19 nei athi masapen hi ahi.

Anesthesia department, RIMS hospital a resident doctor ni Wednesday nikho a Covid positive ahi hetdoh ahitai. Tuchan geiya doctor ho panna a hospital a staff agom a mi 22 coronavirus positive hi ahitai.

Alangkhat a Thursday jan nidan 6.30 chan, achesa nidan 24 sunga Manipur a COVID 19 positive case 47 akimudoh be in, hiche lah a numei 10 leh pasal 37 pang ahi. Hiche toh kilhon a gamsunga positive case agom a 2505 lhing a hiche lah a active case 829 um ahi. Natna anei kihet doh be mi 47 ho lah a mi 18 hi security personnel ahi in, hiche lah a mi 14 hi Imphal East district mi, Imphal West district mi 13, Senapati district mi 10, Churachandpur district mi 5, Thoubal leh Kangpokpi district mi 2 cheh chuleh Tengnoupal district mikhat ahi.

Amaho lah a Thoubal district a kon mi 2 chule Imphal West district mi 13 hi Manipur gam pam a kholjin doh lou ahiuvin, abon uva Covid care facility a achon tauvin ahi. Chuleh angaicha ‘containment’ leh ‘contact tracing’ hojong kipan ahitai.

Achesa nidan 24 sung ma ma a CCC chom chom a kijen Covid 19 positive mi 19 adamdoh tauvin ahi. RT PCR test akibol kit jouva positive hi a mi 19 holah a mi 7 hi RD Wing a kijen, mi 4 hi JNIMS a kijen, mithum hi Ukhrul a kijen, Meitram leh Kakching a mi 2 kijen chule Kamjong a mikhat kijen ahi. Gamsunga coronavirus natna a kon damdoh tua hi 1672 lhing ahitan chule recovery rate hi 66.90 percent lhing ahitai.

COVID 19 positive apunbe cheh cheh jeh a August 6 chan Lockdown suhsaobe hita

IMPHAL, JulY 30(ET): Manipur a COVID 19 case sangtah a akal jeh a state sorkar in ahung lhung ding August nisim 6 nikho chan gamsung pumpi a ‘lockdown’ chule curfew che jom pi dinga thuphon anei uvin, nikho 7 asuhsaobe u ahi.

Disaster Management Act 2005 section 20(2) (a) noiya thaneina kipe a Chairman, State Executive Committee, State Disaster Management Authority leh Chief Secretary Dr J Suresh Babu in Thursday nikho a hiche chungchang a order asodoh ahitai. Gamsunga Covid 19 natna hi local transmission aum jeh a state sorkar in achesa July nisim 23 nikho a ‘complete lockdown’ avel a phondohna anei kit ahi.

Order dungjuiya, lockdown umjom ding chule Deputy Commissioner hon ama ama district a curfew chejom pi dinga order asodoh diu ahi. Manipur High Court in Central government leh state government guidelines dungjuiya ama order leh guidelines asodoh ding ahi.

Lockdown sunga akiphal ding hohi- angaicha khoh thil ho home delivery bol ding, bongnoi chule bongnoi thil ho sem a joh thei ding, vengsunga um me, ngaichat khoh, sa leh nga kijohna dukan ho district jouse a jingkah nidan 6 a kon nidan 10 sung (Sunday nikho tilou) kihong ding ahi. Hijong leh gari lhai kiphal louding ahi.

Thil pohna gari ho Mao, Jiribam leh Jessami a interstate border agalkai ding kiphal ding ahi. Truck chule thil kipohna gari dang ho a driver ni leh helper khat kiphal ding, truck semphatna workshop chule highway a dhaba ho akihon ding kiphal ding, hijong leh social distancing ajui diu ahi.

Hospital, nursing home, clinic leh dispensary ho, chemist, pharmacy leh Jan Aushadhi Kendra panna a lou kijohna jouse, medical laboratory leh collection centre ho, veterinary hospital, dispensary, clinic leh pathological laboratory chule vaccine supply kibolna leh akijohna ho akihon ding kiphal ding ahi.

LPG home delivery, postal service, telecommunication leh internet service, twi/ santitation, power supply leh waste management ho kihong ding petrol pump jong CAF & PD Department in notify abol ho a dinga kihong ding, airport leh airlines hojong akihon ding kiphal ahi.

Thinglhang gam a loubol mihon phailei a na atoh ding, Farmer Producers company panna a agriculture leh horticulture produce lahna a pang agency ho kiphal ding ahi. Nga vahna, nga an semna, gancha vahna, vohcha chule bongnoi thil ho, gancha neh ding kisemna mun ho jong lockdown sunga kilha ong ding ahi.

Reserve Bank of India, bank branch leh ATM, Business Correspondent ho kihong ding hijong leh staff aumsa lah a 30 percent khel hithei louding ahi. LIC a staff aumsa jat a kon 10% chunglang kikhom theilou ding ahi. Children/disabled/mentally challenged/senior citizen/destitute/women/widow, Observation Home, Juvenile Home ho kihong ding, Angawadi centre honjong beneficiary ho chan ding dol ho a inn kot chan a athah peh diu kiphal ding ahi.

Print leh electronic media, courier service, private security service, food processing unit, bottled water manufacturing and distribution ho ahop tha louding, MSME panna a lamlen leh railway project kisahna ho kiphal ahi. Private gari hi medical leh veterinary case panna a emergency service ho a bou kiphal ahi. Kin khoh toh kisaiya natong Central leh state government office natong ho kihong ding, Under Secretary rank officer jouse, Administrative Secretary/Head of Department in aseilhah staff 10 percent ho jong kikhah louding ahi, ati.

National Education Policy, 2020 hin gamsunga Education sector a kikhelna apohlut ding ahi: Dr Th. Radheshyam

Imphal, July 30(ET): Education Minister Dr. Thokchom Radheshyam in National Education Policy (NEP), 2020 Union Cabinet in phatsahna anei akipapi na thu aseiyin, Manipur sorkar in hiche policy hi themjilna akhantou nadinga bulhing set a achepi ding ahi, tin aseiyin ahi.

Conference Hall, SSA Babupara mun a Minister pa in ahoulimna a asei ahi. Kikhopna a Commissioner, Education (S) T. Ranjit Singh; Commissioner, Higher & Technical Education, M. Harekrishna; Director Education (S) Th. Kirankumar; Director, University & Higher Education,  Kh. Diana; Director, SCERT, Dr. M. Meenakumari chule mopohna nei official ho jong apang uvin ahi.

Minister pa in NEP, 2020 athupi dan aseiyin, hiche hi kum 34 lhing National Policy on Education, 1986 khel a kichepi ding 21st century a dinga Education Policy masapen ahi, ati. School chule higher education sector a kikhelna lentah sem nading lampi ahi. Policy hi khompi nga- ‘Access, Equity, Quality, Affordability leh Accountability’ a kingam ahi in, India gamsung hi hetna neitah society chule hetna chihna a superpower ahi nadinga akithopi hiding ahi, tin jong aseiyin ahi.

Policy hi akichepi pan teng leh education sector a apha langa kikhelna umding chule gamdang a higher education sim dinga simlai che jat jong nem ding ahi. Gamsung chapang hon talent chule boltheina lentah anei diu, NEP, 2020 hi abolthei nau semjang pehna a kimang ding ahi, ati. NEP 2020 hi themjilna apha langa akikhel nadinga thupi tah ahi, tin aseiyin chule gamsung mihon ahetthem diuvin jong temna aneiyin ahi.

Chapang jouse hin ama ama thepna chom cheh anei ahi in, policy hi akichepi teng leh chapang ho athepna lampi uva kisem theiding ahi, ati. Policy a hi Pre-Primary kum thum jong amasapen a kipan sah ahi. Simlai hon grade 5 chan anu pao/agam pao a lekha asim theiyu hi grade 8 chan hithei ding ahitai, ati.

Centre leh State in Education sector a public investment 3% noilang GDP umhi 6% alhin nadinga pan alahkhom ding ahi. Education a sum kisumang akal a ahileh education sector a jilkung lhahsam, infrastructure lhahsamna ho vettupna chule alhangpi a khantou machalna hiding ahi, tin Minister pa in aseibe in ahi.

 

Niangtuahkim thina toh kisai’a aloipa in amakhut nung ahidan Police ho heng’a phongdoh

B.Lalboi Gangte

CCpur. July 30 (ET): Churachandpur District sung Muallum kho kom’a Niangtuahkim (28) W/o Sianmuansang of Joshua Road, Zion Veng, New Lamka kitha jouva lampi pam’a longdamsa ana kidalhah chu tuni jingkah nidan 6:00 vel in S. Haijang kho sung mihon anamudoh uvin ahi. Hiche phat chun Police hetsah uvin Singngat Police in amun anadellut pai in chuleh Hasby Haokip, MPS, Additional SP (IUCAW) lamkai nan Inspector Chinneilam, OC Women Police leh police personnel hon jong anadellut uvin ahi.

Hiche thilsoh chung’a District Police in Imphal akon Forensic Expert ho akou uvin hiche achun Bijoy Kumar, MPS, SDPO Churachandpur lamkai nan Expert team khat thilsoh na mun kholchil na nei ding in anapui uvin ahi. Thulhut kimu dungjui’a Niangtuahkim in ajipa/aloipa Sianmuansang natoh na Sinzawl kho agapha in nikho phabep aum jou nung in inn lam jon’a Activa mang cha’a ahung lhon na’a lamkah’a  thaotwi bei jeh’a ajipa thaotwi hol dia apotdoh kah’a hitobang thilsoh lhung ahidan in akiseiyin ahi. Chule Niangtuahkim hi half naked in aum in ahin jacket sil anakikhu khum in ahi. Atahsa chung’a chemcha’a kisut na maha nung aum in chuleh thilong umna akipat meter phabep sung in songkhol noi leh slipper ho jong anamudoh uvin ahi. Hiche naban’a thilsoh namun kimvel’a ju donna’a kimang kho leh bottle jong mudoh in aum in ahi.

Alangkhat’a Niangtuahkim hi aji patoh achen khom lhonna sot loulai ahi in ajipa hi VDF ahi. Covid-19 jeh’a Mizoram toh ki gamgi na mun vetup ding’a Sinzawl kho’a posting ahi. Niangtuahkim longdamsa tunin District morgue, District Hospital mun’a akikoi in chuleh apoimo dungjui’a Imphal a forensic test ding’a kipo ding ahi.

Hiche toh lhon’a CCpur  Police in thina thilsoh toh kisai’a thudoh nei ding’a Sianmuansang chu Police Station a apui uvin thudoh anei nao’a ajinu thina chung’a amakhut nung jao ahidan jong aphongdoh in ahi.  Ahin Police in ama khutnung ahidan hatchet ahi nading leh atha na jeh kholchil na nei ding in thudoh anei jing uvin ahi. Thilsoh toh kisai’a CCpur  Police in FIR No. 07(07)2020 Women Police Station-Churachandpur Under Section 302 IPC noi’a Sianmuansang chung’a melchit na ajih khum uvin chuleh Sianmuansang jong Women Police khut’a pehdoh in aum tan ahi.

 

Saitu Gamphazol area a ‘With Love’ kiti khangthah kiloikhom hon exam a losam simlai ho dinga ‘career counseling’ gon peh

KANGPOKPI, JULY 30(UNA): Exam a pachanna neiho dinga kin akibol peh hi kija dinga kimu jing ahi in, ahin, Saitu Gamphazol area, Kangpokpi District a khangthah (intellectual) phabep in exam a losam gamkaiya um simlai ho tilkhou nadinga ‘career guidance and career counseling’ kin agon peh uvin chule phatthei thum pehna taona jong anei uvin ahi.

Kin hi ‘Towards inspiring the Youth’ thupi a ‘With Love’ kiti kiloikhom hon abol u ahi in, Proverb 16:3 a ‘Commit your work to the Lord’ kiti Bible thucheng a kitilkhouna aneiyu ahi. Pastor Khuptinlal Hangshing, KBC No. 4 leh Letginlen Doungel, Research Scholar, Delhi University resource person a apang in ahi.

With Love member Lalcha Haokip in, HSLC leh HSE exam result akiphon chan seh leh nu leh pa chule simlai kiloikhom leh adang dang chuleh NGO hon lolhinna nei simlai hobou akipapi uvin, alosam simlai ho ding hi koiman agel lou ahi, tin aseiyin ahi. Lolhinna nei simlai ho kipapi hi angaina chule ahisa ahi in, alolhing joulou simlai ho ding akigel lou hin society a simlai atamjo lungthim atohkhah a, insung leh society dinga panna bei dan a kigelna aneiyu ahi in, thilse sodoh na thei ahi, ati.

Alolhing jou louva simlai ho hahsatna leh athoh lel nau hi nu leh pa, lamkai chule loi leh gol honjong ahetpeh louvu, akhonung ding uva pohgih kibe na ahi, ati. Hiche jeh a alolhing joulou simlai ho tilkhouna dinga tohgon nei dinga kigel lhahna kaneiyu ahi in, khonung a amaho career ding hetsahna jong kinei ahi, ati.

Pastor Khuptinlal Hangshing injong simlai ho tilkhouna thu aseiyin, losamna hi mihem hina ahi in, ahivanga hiche jeh a I khonung I suhset a ahileh Pathen lungdei hilou ahi, ati. Themvetna a kitahna kaneiyu hi adih louva na lolhin sang uva Pathen lunglhaina joh ahi, tin aseiyin chule Pathen mitmu a dihtah a na atoh diuvin temna aneibe in ahi.

Letginlen Doungel, Research Scholar, Delhi University in losamna hi lolhinna dinga kalson be na ahi, tin aseiyin chule simlai ho khonung ding thu ahil in, tilkhouna thu jong aseiyin ahi.

Thingnoimi hon 5 AR ho abulu na a sepai 3 thi, 5 sangtah a kisukha; MNPF, PLA leh ULFA-I hon kiphonna neiyu

IMPHAL, JULY 30(ET): Thal choi thingnoi kiloikhom hon Indo-Myanmar gamgi kom Chandel district a Wednesday nilhah a 4th Assam Rifle ho ana bulu uvin, thilsoh a Assam Rifles sepai 3 athi in chule mi 5 sangtah a akitongkha in ahi.

Manipur Naga People’s Front (MNPF), Revolutionary People’s Front (RPF) chule United Liberation Front of Asom- Independent (ULFA-I) thingnoimi hon thakhat a buluna thilsoh toh kisaiya thuso anei nauva kiphonna anei uvin ahi.

Gal manchah kichoi thingnoimi hon Chakpikarong Police station noiya um Sajik Tampak mun a routin duty bol a che 4th Assam Rifles ho jan nidan 6 don a remote control device a kisupoh bomb aman uva abulu masat u ahi, tin thulhut in aseiyin ahi. Bomb thum asuhpoh nauva Havildar Pranay Kalita, Rifleman YM Konyak chule Rifleman Ratan Salam panna a Assam Rifles sepai thum thi ahi.

Thulhut dungjuiya, thingnoimi hon bomb asuhpoh jou uva automatic rifle leh lethod gun a sepai ho abulu kit u ahi. AR convoy hohi amaho base camp a akile lang uva thingnoimi hon abulu ahi. Bomb hal in asekhah chule meichang a AR personnel 5 jong sangtah a kisukha ahi. Akisukha Assam Rifles personnel hohi Nguikhotil Haokip (54 yrs), SikanderSingh , Anish Kumar Singh (27 yrs), Niyul Sarah (39 yrs) chule Sandeep Kumar (35 yrs) ahi.

Alangkhat a, MNPF, RPF leh ULFA-I thingnoimi hon thuso anei nauva, buluna thilsoh hi India in gamsung alo douna leh chamlhatna ding ahi, tin asei uvin ahi. Ruichumhao, Defence Secretary, MNPF, MM Ngouba , Chief of Army, PLA leh Poresh Asom, Vice Chairman chule Chief of Army Staff , ULFA (I) in soi akaina thuso a chun, vannoi muntin a gam kilahbe na khang akichai tah vanga India gam a umjom nalai ahi, ati.

“Vannoi pumpi in gam kehletbe na ding lunggel adoudal ahi in, WESEA mihon jong India in gam alahbe adoudal ahi. Hiche jeh a WESEA mihon India vaipoh a kon chamlhatna dinga gal asat jing ahi”, tin thuso chun aseiyin chule Manipur Naga People’s Front (MNPF), Revolutionary People’s Front (RPF) chule United Liberation Front of Asom- Independent (ULFA-I) kitho a July nisim 29 nikho a Sajik Tampal area a IOF (Indian Occupation Forces) douna a buluna apat ahi, ati.

Buluna thilsoh a IOF personnel 4 vel athi in chule tamtah akisukha e, tin aseibe uvin ahi. Thingnoi kiloikhom thum hon buluna thilsoh a vangsetna toh WeSEA sopi ho insung mite henga nommo asah nau thu jong asei uvin ahi.

“Indian Occupation Force a pan hi sopi kahlah a kitomona ahijeh a hiche a pan ding hi adihlou kahet u ahi. Hiche jeh a WeSEA sopi pasal leh numei hon lungset tah a India sepai a napan nauva kon haina nanei uva, eiho chamlhatna dinga India douna gal sat a napan joh diuva temna kaneiyu ahi. WeSEA miho India sepai ho a kon akikangse diuva jong kouna kaneiyu ahi, ajeh chu amaho hi natna kilason to thei Coronavirus (COVID 19) natna the jal lentah hiu ahi”, tin thuso chun aseibe in ahi.