Manipur a ‘Community transmission kipan ahitan’, mijousen mopohna anei ahi: Y Khemchand

Manipur a ‘Community transmission kipan ahitan’, mijousen mopohna anei ahi: Y Khemchand

156
0
SHARE

Manipur a ‘Community transmission kipan ahitan’, mijousen mopohna anei ahi: Y Khemchand

Imphal, Aug 2(ET): Manipur Legislative Assembly Speaker Yumnam Khemchand in Sunday nikhon Manipur gam a Covid 19 natna hi sorkar leh mopohna nei department hon aphondoh loulai vanga community level a natna kilason to ahitai, tin aseiyin ahi.

Community Quarantine Center, Manipur College, Singjamei mun a ‘valedictory ceremony’ a Speaker Y Khemchand in ahoulimna a virus hi Community level a thang ahitan, sorkar in achang a natna avetkol jou tahlou ding ahi in, mipi panlah na jal a virus hi kijou ding ahi, ati. “Pandemic douna a mijousen mopohna kibang tah a ikilah diu ahi”, tin Khemchand in aseiyin chule pandemic jeh a thi aumtan, test kibol lou natna nei adang jong um nalai ding ahi, ati.

Kin goun hi Quarantine Management Committee, Manipur College, Singjamei in agon ahi in, akisei quarantine center hi May nisim 3 nikho a kipan a chule Sunday nikho a kikhah ahi. Singjamei MLA jong hi a Khemchand in COVID 19 natna nei hi achesa lha thum sunga gamdang a tangden asang a sim ho akipuilut a kon kal jing ahi in, natna jeh a thi jong kal cheh cheh ahi, ati.

Tuchan geiya gamsunga Covid 19 positive case 2,756 um a chule Saturday nikho chan a natna jeh a mi 6 thi ahitai. COVID 19 jeh a thi na toh hi akal jing in, hijong leh Covid 19 natna akisei pat na China gam in natna hi avetkol jouva, Covid 19 status ranking a anoilang a um ahitai. Sorkar natoh bou ngah louva gamsung mihon jong natna douna a pan alah ngai ahi, tin Khemchand in aseiyin ahi.

Natna a kon damdoh hohi lou aneh jeh uva ahipon, immune system athahat sah jouvu jeh a damdoh u ahi, ati. Manipur College a quarantine center hi lhathum vel kihong ahi in, center kivetkol dan hi mipin pachatna sangtah anei ahi. Khemchand in jong center a volunteer ho akipapina thu aseiyin ahi. Chule gamdang a kon hung kile ho vetkol nadinga pan alah nau chunga jong kipathu aseiyin ahi.

Hiche center a hi agom a mi 316 um ahi in, positive case khatcha kimudoh lou ahi. Hiche jeh a Khemchand leh jin gun a pang adang dang hon center a umho certificate pehdohna jong aneiyu ahi.

Covid-19 positive jeh’a thi mi 7 lhingta; Covid-19 case thah kimudoh ho lah a travel history neilou mi 48 pang

Imphal, Aug 2(ET): Chandel district a kon kum 20 a upa khangthah numei khat Sunday nikhon Covid 19 toh kisai natna jeh a athi in, hiche toh kilhon a Manipur a coronavirus natna jeh a thi mi 7 alhing tan ahi.

Tahsan umtah thulhut in asei dungjuiya, numeinu hi paralysed ahi in chule phat sottah lupna a lum ahitai. Phat chomkhat a dinga achenna Checkon, Imphal East district a thi ahi in, athi jouva swab sample alah uva Rapid Antigen Test abol uleh COVID 19 positive ahi kihedoh ahi, tin thulhut in aseiyin ahi.

Numeinu hi achesa Thursday jan a Catholic Medical Center (CMC) Hospital, Koirengei, Imphal a Covid 19 natna leh nat chom chom kop a kum 76 a upa athi pa dinga atu nu ahi in, apu pa jong hi athi jou Friday ni a Covid 19 positive ahi kihedoh ahi.

Sunday nilhah a COVID 19 Control Room a kon thulhut in asei dungjuiya, achesa nidan 24 sunga pasal 25 leh numei 36 panna a agom a mi 61 covid 19 positive ahi akihedoh be in, chule Central Armed Police Force (CAPF) 14 jong COVID 19 positive ahi kihetdoh be ahi. CRDL, RIMS a mi 47, JNIMS a mi 9 chule Babina Diagnostic Centre a mi 5 test kibol ahi.

Covid positive ahi athah a kihetdoh be holah a mi 42 hi Imphal West district mi, Thoubal mi 9, Kangpokpi mi 5, Senapati mi 3, Churachandpur 1 chule Chandel district mi 1 ahi. Chule achesa nidan 24 sunga agom a mi 38 akijenna mun uva kon discharged abol tauvin ahi. RIMS a kijen mi 1, JNIMS a mi 2, CCC, Meitram a 18, Thoubal a 3, Kakching a 4, Moreh a 2 chule RD Wing a kijen mi 8 hi RT PCR test abol jou uva negative ahi phat uva akijen nau mun a kon discharged abol u ahitai.

Manipur a positive case kisei lah a natna nei 1,737 dam doh a chule case 1,087 hi tu leh tua a COVID 19 natna jeh a kijen ahi. Athah a case kimube holah a mi 65 hi milham ahi in, hiche lah a mi 48 hi gamdang a kon hung kile hilou ahi. Chule case 14 hi CAPF sunga kisei ahi in, abon uva COVID 19 care facility a achon u ahitai.

Mi 38 adam doh kit toh kilhon a Recovery rate jong 61.07 per cent a kal ahitai. Manipur a Covid 19 positive case hi agom a 2831 ahi in, active case 1087 chule adam doh 1737 ahi. Chule Covid 19 toh kisai natna jeh a thi mi 7 lhing ahitai.

India a Covid-19 positive case 1.75 million val ta; natna a kon dam doh jong 1.14 million val ta

New Delhi, Aug 2: India gam a Sunday nikho chan a coronavirus positive case 1.75 million aval tan, January lha kichaiya Kerala gam a Covid 19 case masapen akisei ni 180 jou ahi, tin Union Health Ministry in aseiyin ahi.

Kerala gam a achesa January nisim 30 nikho a Covid 19 case masapen akisei nikho 110 jouva India gam a Covid case 100,000 val ahitai. July nisim 31 chan a India a natna nei hi 1.6 million ahi in, nithum masanga 1.5 lakh ana kisei ahi. Gamsunga tuchan geiya natna nei jat akisei 65.48% hi July lha a bou kimudoh ahi.

Union Health Ministry in jingkah nidan 8 a update abol dungjuiya, achesa nidan 24 sunga covid 19 case athah 54,735 kimube a, natna nei agom a 1,750,725 lhing ahitai. Covid 19 positive kimube 50,000 aval na ni li kijomna ahitai. Saturday leh Sunday jingkah kikah a natna a mi 853 thi a, natna jeh a thi jong 37,364 lhing ahitai.

Achesa nidan 24 sunga natna nei mi 51,255 adamdoh in, nidan 24 sunga adamdoh atamna pen ahitan, hiche toh kilhon a adam doh agom a 1,45,629 lhing ahitai. Active case 567,730 um a chule adamdoh jat 577,899 lhing ahi. Recovery rate hi tua 65.43 % lhing ahi.

“Containment, testing leh standardized clinical management protocol ho phatah a akichepi jeh a nikhat a mi 30,000 val damdoh jou ahi”, tin Health Ministry in aseiyin ahi. India a Case Fatality rate (CFR) hi June lha kim a kon 3.33% a kon 2.15% a kemsuh ahi. Global platform a sei dinga India hi Covid 19 mortality rate a anemlang hijong nalai ahi.

India gam a dinga Maharashtra gam hi Covid 19 case tamna pen ahi in, natna nei mi 422,118 lhing a chule natna jeh a 14,994 thi ahitai. Aban a Tamil Nadu gam ahi in, Covid positive 245,859 um a, natna jeh a 3,935 thi ahi. Chule Delhi a case 135,598 um a, natna a mi 3,963 thi ahitai. Data dungjuiya, Andhra Pradesh, Karnataka, West Bengal leh Uttar Pradesh hi hotspot mun thah a kisei ho ahi in, hiche gam ho a coronavirus case kal jing ahi.

 

Sorkar in MPS officer Brinda chunga action alah louleh tribal ho lunghanna ato ding ahi, tia ATSUM in gihna nei

Imphal, Aug 2(ET): All Tribal Students’ Union Manipur (ATSUM) in MPS officer Th Brinda gihna anei uvin, tribal ho lunghanna ding thu aseilou ding chule achonchan a avetsah lou dinga asei uvin ahi.

Th Brinda in Facebook a comment abolna a tribal officer ho ‘Quota oriented people’ tia asei thu ATSUM in adonbutna a, hiche thu asei hi tribal miho lunghanna sangtah soh ahi, ati. Athu sei hi nam bungkhenna chule tribal miho kinoise na ahi”, tin ATSUM thuso chun aseiyin ahi.

Sorkar, judiciary leh police department pumpi ama chunga ‘The SC and ST (protection against discrimination) Act noiya action lahkhom ding akicha tobang a kimu ahi, ati. Tribal ho amoh noise sanga ipijeh a India gam a weaker section ho reservation leh quota kipe ham ti akikhol ngai ahi. Thusim masa a kon tribal hohi thinglhang gam a cheng advantage neilou hiu ahi in, akhantou loujeh uva themjilna chule nopsahna ho chang louvu ahi. Soh banga kibol a, min atoh nomlou ho atoh u ahi. Hiche jeh a constitution sem hon imalam jouse a khangtou lou tribal miho hi gamdang miho toh kibanga akhantou thei nadinga pan alah a, schedule tribes tia kihe u ahi. Kum asanga sim tribal hohi athenglou, aboh, haomacha tia kiseiya milah a alhah diu kiphal lou ahi. Hiche jeh a amaho dinga themjilna mun, sorkar natohna mun leh legislature a quota kipe ahi in, age relaxation, cut-off marks jong kisuhnem peh ahi, ati.

Th Brinda thusei hi uniform service khat sei dinga kilom loutah chule dem dinga lomtah ahi in, ipijeh a sorkar thipbeh a um ahi. Uicha mihap banga amu jouse ahap a, kiphin jing a, government, police department leh judiciary asuhboi soh ahi in, sorkar in achunga action alah louva ahileh koiyin sorkar chunga tahsanna anei ding ham tihi thudoh ahi, ati. Sorkar in dan dungjuiya gotna apeh louleh ATSUM chule kiloikhompi unit hon pan alah ding ahi, tin gihna aneibe uvin ahi.

 

Myanmar akon hung lut mi 2 QC a kikoi

Tengnoupal, Aug 2: Myanmar aon hung potdoh Manipuri 2 inspection Bungalow Moreh Forest Department  Quarantine centre a akikoi in ahi. Sub–district Hospital covid Care center akon hung kipui doh teni chu le Moreh college community Quarantine centre a kikoi mi khat tilou in Moreh block sung quarantine centre ho a koima aum tapon ahi akiti.

Hiche hetsah na chu Dr. Cecil Ahongsangbam District Nodal officer Tengnoupal District in ana nei ahi. Sub–district Hospital covid Care center a ana um mi ni chu jani a JNIMS akon test result hung toh lhon a Negative ahi hetdoh a anaum tohlhon a tuni a discharge ana kibol lhon ahi. Aimol setu kho akon nu chu akhosung community Quarantine centre a akikoi nalai in ahi akiti. Moreh ward no 5 akon Bihari pa chu Moreh college community Quarantine centre a akikoi nalai in ahi akiti.

Home Minister Amit Shah Covid-19 +ve hi

NEW DELHI, AUG 2: Union Home Minister Amit Shah Covid-19 +ve ahitoh lhon’a Doctor ho thupeh dungjui’a New Delhi Hospital mun’a admitted anakibol tan ahi. Chuleh Union Minister in aseina’a nikho 2 masang’a kei kom’a hung kha ho jouse Covid-19 test akibol ding uvin temna anei in ahi.

Hetthei khat chu Amit Shah positive ahi ahung kihedoh nahi Union Health and Family Welfare Ministry in tuni hi nikho khat sung’a ding’a Covid-19 +ve kimudohna tampen (51,255) nikho ahi ti’a aphongdoh jou nidan khat jou’a Minister pa +ve ahi hung kihedoh ahi. Chuleh tuni chan’a adamdoh jat 1,45,6529 alhing tan ahi.

 

India tohgon One Nation One Ration Card plan a Manipur, Nagaland panna a state/UT 4 kilahlut be

Imphal, Aug 2(ET): Centre sorkar in ‘One Nation One Ration Card’ plan abol na a state/UT li- Manipur, Nagaland, Uttarakhand leh Jammu and Kashmir gam apan sah be tauvin ahi.

Union Minister of Consumer Affairs, Food and Public Distribution Ram Vilas Paswan in Saturday nikho a One Nation One Ration Card plan velvetna anei ahi, tin Consumer Affairs, Food and Public Distribution Ministry in thuso aneina a aseiyin ahi. Jammu and Kashmir, Manipur, Nagaland leh Uttarakhand gam a technical a kigotna umho thu Food & Public Distribution Department in hetpehna aneiyin ahi.

State/UT li plan a akikoibe toh kilhon a One Nation One Ration Card noiya um state/UT agom a 24 alhing tan, August 1, 2020 a kon state li kilahbe kichepi pan ahi, tin Ministry in aseiyin ahi. State/UT 24 holah a Northeast a um – Manipur, Mizoram, Nagaland, Sikkim, Tripura gam pang ahi.

National portability scheme noiya um state adang holah a Andhra Pradesh, Bihar, Dadra & Nagar Haveli, Daman & Diu, Goa, Gujarat, Haryana, Himachal Pradesh, Jammu & Kashmir, Jharkhand, Karnataka, Kerala, Madhya Pradesh, Maharashtra, Odisha, Punjab, Rajasthan, Telangana, Uttar Pradesh leh Uttarakhand gam pang ahi.

Hiche toh kilhon a NFSA population agom a 65 crore (80%) in national portability ration card noiya hiche state/UT ho a anchang (foodgrain) amu thei diu ahitan, state adang dang hojong March 2021 kah a national portability a lahlut dinga tohgon um ahi, tin Ministry in aseibe in ahi.

One Nation One Ration Card scheme hi National Food Security Act, 2013 (NFSA) noiya beneficiary ahop jouse DoFPD in neh leh chah peh nadinga tupna anei scheme ahi. Hiche system a kon migratory NFSA beneficiary (achenna mun khel jing) hon achan ding dol u anchang quota hi amaho deilhen na pen gamsung hoilai mun hijong leh biometric/Aadhaar a akisem u ration card a Fair Price Shop (FPS) hoilai mun hijong leh akilah thei diu ahi.

 

DU professor Hany Babu  in Manipur galguh bol KCP le adang dang hotoh kigui jopna anei e tia NIA in sei

New Delhi, Aug 2: National Investigation Agency (NIA) in tuni in Delhi University Professor Hany Babu M T in Manipur a galguh bol  Kangkeipak Communist Party-Military Council (KCP-MC) toh kigui jopna anei dan phondoh na ana nei uvin ahi. Agency ina sei na a DU professor pa hin Manipur akon galguh bol hotoh kihou na anei jing in ahi tin jong tahlang na ahin nei uvin ahi.

Hany Babu thudoh anakinei toh lhon in  NIA team khat in Noida a um a inn jong raid ana bol uvin ahi akiti, Raid kibol pat chun a innei pi Miranda house a oja nu jong aum in ahi akiti. A innei pi Jenny Rowena chu Miarnda House a jilkung ahi akiti. Babu hi NIA  in Bhima-Koregaon case a ana mat u toh lhon a thudoh anei jing u ahi.

Hetthei khat chu KCP hi Northeast akon galguh bol govt office akon sum hunam a lajing a gamsung boina a panla jingkiloikhomna hi ahi.  Hiche kiloikhomna hi Manipur, Myanmar le Nepal akon busa ahiuvin ahi akiti. Maho hin Naxal hotoh kigui jopna anei dan u jong tahlang na ana kinei toh lhon in gal manchah toh kisai a kihtoto na anei jing dan u jong tahlang na ana kinei in ahi. NIA akon thuso kimu dungjui in Hany Babu hin KCP-MC toh kitho a Naxal ho natoh le Maoist ideology chepi na anei jing ahi akiti. Kholchilna kinei dungjui in Hany Babu in Paikhomba Meitei, Secretary Information and Publicity, Military Affairs, Kangkeipak Communist Party (MC) toh kihou na anei jing in ahi akiti. CPI (Maoist) leader Pallath Govindankutty kilahdoh chung in Hany Babu in Rona Wilson toh kitho in sumle pai lam in kihtokhomna ana nei uvin ahi akiti.

Hany Babu, Rona Wilson, Anand Teltumbde, P Varavara Rao le Surendra Gadling in committee sem a G N Saibaba kilahdoh na ding a panlah na ana nei dan u jong tahlang na ahung kinei in ahi. Delhi University Teachers Association (DUTA) president Rajib Ray in asei na a govt in jilkng ho le themjil na chung a natongho ang a hitabang daan in aphal lou natoh ho hi abol na louding uvin hetsah na ahin nei toh lhon in themjil na toh kisai a natong hoc hung a kholchil na hitabang a kinei hohi ngah ahina ding in temna ahin nei in ahi.

MP Leishemba Sanajaoba in Union cabinet muding

New Delhi, Aug 2: PM Narendra Modi makai na govt noi a cabinet minister suhtamding tohgon aum toh lhon in Manipur MP Leishemba Sanajoaba in union Cabinet ahin muding in aum in ahi akiti. Hetthei khatchu Rajya Sabha MP ding a tu naicha a lhendoh na ana kinei Leishemba Sanajoaba MP hina ding a kihatsel na ana nei jou a BJP national president JP Nadda  le PM Narendra Modi in cabinet pehding a hetsah na ana nei lhon ahi akiti.

Mizoram a Covid-19 +ve case thah 55 kimdudoh; adamdoh mi 253 lhing ta

AIZAWL, AUG 2: Mizoram a Covid-19 +ve case thah tuni 55 akimudoh toh lhon’a agom’a 468 case alhing tan ahi. Health Department akon thulhut kimu dungjui’a case kimudoh 55 lah’a 54 hi Aizawl District akon chuleh khat hi Lunglei District akon ahi. Chuleh hiche 55 lah’a 47 hi security force personnel ho chuleh adang hi milham ahi. Tuni chan’a Covid-19 case lah’a 230 (49.14%) hi security force personnel leh National Disaster Response Force (NDRF) staff chuleh 238 (50.85) hi milham ahi.

Hiche toh lhon’a Mizoram a Covid-19 natna akon tuni chan’a 253 adamdoh toh lhon’a active case 215 aum tan ahi.