Manipur a BJP candidate RK Sanajaoba in Rajya Sabha election a goljona...

Manipur a BJP candidate RK Sanajaoba in Rajya Sabha election a goljona neita; Ibobi lamkaina SPF hon Governor kimupi

60
0
SHARE

Manipur a BJP candidate RK Sanajaoba in Rajya Sabha election a goljona neita; Ibobi lamkaina SPF hon Governor kimupi

Imphal, Jun 19(ET): BJP candidate RK Sanajaoba (Manipur leng phunggui) in Manipur a Rajya Sabha seat khat seh a goljona anei tan ahi. Nilhah nidan 5 a vote kisim ding hi aphat cha chelha thei louva vaigei tah a abol u ahi.

Ruling BJP candidate in akitetpi Congress candidate T Mangibabu hi vote 4 a ajo ahi in, BJP in vote kipe 52 lah a vote 28 amu a chule Congress in vote 24 amu ahi. Friday jingkah nidan 9 a State Legislative Complex mun a security khoutah noiya vote pehna anei pan u ahi.

Hetthei khat chu achesa ni 2 masanga NPP cabinet minister 4 panna a MLA 9 in BJP coalition government a kon haina anei jeh a politics a boina um ahi. Manipur a Rajya Sabha seat a dinga vote kisimna hi NPP polling agent hon Returning Officer henga hehna asem jeh uva aphatcha kisim theilou ahi.

Hehna asem nauva agent hon BJP MLA le State Assembly Speaker hi a Khemchand Singh le Ngamthang Haokip (Congress) in ‘voting secrecy’ apalkeh e, tia ngohna aneiyu ahi. RO (returning officer) M Ramani Devi in hehna thu aseilhah na a, ‘secrecy’ akipalkeh na aumpon chule hehna hi abul umlou ahi, tin aseiyin ahi. “Election process sunga kaum ahi in, video recording a kon ngohna kisem thu ho vet chenna kanei kit ahi. ‘Secrecy’ akipalkeh na aumpoi, tihi katahsan in, hehna hi abul umlou ahijeh a kisumang ahitai”, tin RO in order aso jouva vote kisim pan thei ahi.

Jan nidan 8 a vote kisim pan a chule nidan 8.30 a result kiphong doh ahi. Polling hi jingkah nidan 9 a kon nilhah nidan 4 chan chelha ahi. Hehna kisem hi Election Commission of India (ECI) hetsahna anei jou uva asuhmang u/asan peh louvu ahi, tin thulhut in aseiyin ahi.

Manipur Rajya Sabha seat khat hi candidate ni- RK Sanajaoba, BJP le T Mangibabu, Congress kitet ahi in, agom a vote 52 kipe ahi. ‘Disqualification case’ kisem khum a party a kon jamdoh MLA 7 ho lah a mi 4 in vote apeh ding phalna apeh u ahi.

Manipur High Court in thutanna (order) anei dungjuiya disqualification case kisem khum MLA 7 ho thu hi Assembly Tribunal Speaker in thutanna anei kahse a abon uva Assembly complex sunga lut theilou dinga khamgahna anei ahi. Election kipat masanga Speaker in akisei lha loulai ‘disqualification’ case thu a thutanna aneiya, Thursday ni a High Court in order chom asodoh vanga Congress camp a kile kit MLA 3 ho ‘Disqualify’ abol ahi.

Speaker in ‘disqualification case’ a hearing bol nading nikho avoh naiya June 18 ni a abol jouva Court in thutanna hi tuni chan a phondoh lou dinga thupeh anei ahi. Hiche masanga Speaker in hearing hi June 22 teng bol dinga ana sei ahi.

Election abol kon uva BJP lamkaina coalition government tosotna a kon haina neiya AITC MLA khat ‘disqualify’ akibol hijong thusoh khat ahi. Speaker in ‘disqualify’ abol jouva vote apeh thei tahlou ahi. June 18 nikho chan a MLA khat ‘disqualify’ akibol a chule 7 Assembly complex a lut theilou dinga court in thutanna aneiya chule BJP MLA thum in party a kon haina aneiya Congress a alut toh kilhon a state Assembly strength hi 49 bou hi ahi.

Election kon tah chule election sunga politics kikhelna aumhi film thusim tobang hi ahi. Alangkhat a Congress lamkaina a athah a kisemdoh Secular Progressive Front (SPF) hon O Ibobi Singh lamkaina a tuni nilhah nidan 5 a Raj Bhavan mun a Governor nu akimupi uvin ahi. Ibobi tilouva Congress lamkai phabep, NPP thalheng a state unit president Thangminlien Kipgen le party legislator lamkai Y Joykumar jong pang ahi.

Nidan khat tobang kihouna anei uvin, ahin, kihouna a pang hon iti kihou lhahna anei uham ti Raj Bhavan maiya ngah jing thuso miho henga asei doh loulai ahi. SPF in Governor henga BJP lamkaina sorkar douna a ‘no-confidence motion’ bol nadinga ‘special session’ akou dinga lekhathot jong tu masanga apeh u ahi.

Alangkhat a, Rajasthan gam a Congress in Rajya Sabha seat 2 a goljona aneiyin, BJP in seat khat bou a goljona anei uvin ahi. Congress candidate KC Venugopal le Neeraj Dangi chule BJP candidate Rajendra Gehlot in Rajya Sabha election a goljona anei ahi. Hiche toh kilhon a Rajasthan a Congress MP 3 lhing a chule BJP member 7 um ahi.

Andhra Pradesh a YSR Congress in Rajya Sabha seat li abon a goljona aneiyin ahi. Deputy CM Pilli Subhash Chandra Bose, Minister Mopidevi Venkata Ramana, Industrialist Parimal Nathwani le Realtor Ayodhya Rami Reddy (YSRC) in vote 38 cheh amu ahi a, election ajo ahi.

Madhya Pradesh a BJP in candidate Jyotiraditya Scindia le Sumer Singh Solanki in seat 2 a goljona aneiya chule veteran Congress lamkai Digvijay Singh in seat khat a goljona anei ahi. Jharkhand a BJP le JMM khat cheh in election ajo ahi. BJP candidate Deepak Prakash le JMM candidate Shibu Soren in goljona aneiyin ahi.

Gujarat gam a jong Congress in Election Commission henga BJP vote ni san lou dinga asei jeh a vote kisimna aphat chan achelha thei tapon ahi. Opposition lamkai Paresh Dhanani in BJP MLA Kerisnh le Bhupendrasinh vote lahlou dinga Congress in thumna anei ahi, ati. Athu hi EC observer in ‘reject’ abol a chule Delhi office in thulhuhna anei dinga athot u ahitai.

Meghalaya gam a Meghalaya Democratic Alliance (MDA) candidate Dr WR Kharlukhi in agamsung seat khat seh a lolhinna aneiya, Congress candidate Kennedy Khyriem ajo ahi. Mizoram gam a jong seat khat bou um ahi in, K Vanlalvena, Mizo National Front in ajo ahi.

Arunachal Pradesh gam a BJP candidate Nabam Rebia in Rajya Sabha seat khat a goljona anei ahitai. Chule Karnataka gam a BJP candidate Ashok le Iranna B Kadadi, JDC candidate HD Deve Gowda chule INC candidate Mallikarjun Kharge in goljona anei tan ahi.

Delimitation Act 2002 noiya 2001 Census dungjuiya Manipur a Delimitation exercise bol ding thu’a ATRPFM in President lekhathot pe

Imphal, June 19(ET): Manipur gam a Parliamentary le Assembly Constituency ho a Delimitation kibol hi Delimitation Act 2002 noiya 2001 census dungjuiya bol ding thu a ATRPFM in President henga memorandum apelut uvin ahi.

Joseph Rongmei, President, ATRPFM in kiloikhomna thalheng a lekhathot apehna a, Manipur gam a population hi 22,93,896 ahi in, hiche lah a thinglhang gam mi 8,82,130 hiya chule phaicham district a mihem 14,11,766 um ahi, tin aseiyin ahi. Manipur Legislative Assembly a member 60 um a, hiche lah a phaicham a seat hi 41 hia chule seat 19 bou Scheduled Tribe a ahi. Population le seat jat hi ivet a ahile assembly constituency khat a population 38,231.6 tina ahi in, population agom a hi seat 40 a divide ibol a ahile constituency khat a 35,295.15 tina ahi. Hiche hi constituency a sim a (per) 2,937.45 lhasam ahi.

Thinglhang district a 882,130 hi seat 20 a ihop (divide) a ahile constituency khat a 46,427.89 tina ahi in, constituency khat a 8,196.29 val ahi. Hill district hi 20,000 sq.km val ahi in, MLA 20 bou um a chule phaicham hi 2,000 sq km bou hiya seat 40 um ahi. Thinglhang district hi mun hahsa, munchim jing na le thing kiphuh jingna ahi in, lamlen semna dinga fund tamtah thinglhang mihon angaichat ahi.

Thinglhang constituency a MLA khat in 1,000 sq,km val avetkol dinga um ahi in, ahivanga phaicham a MLA khat hin 50 sq.km bou avetsui ding a um ahi. Phaicham a hi munchim, thingphung lhu umlou ahijeh a lamlen sem phat jing ngailou ahi, ati.

Akisei population hi 2001 Census dungjui ahi in, adihlou ho semphatna um ahitan, ahivanga O Ibobi Singh chairman hina a state sorkar le political party jousen  2001 Census a adihlou aume tia ngohna anei jing uhi thudih ahipoi, tin ATRPFM in aseiyin chule 2001 Census final population document ho jong apeh tha uvin ahi.

1976 kum chan a Lok Sabha, Rajya Sabha le state assembly a Indian Census jouse hi gamsung pumpi a seat khat a kon population kibang aumthei nadinga ‘re-distribute’ abol u ahi’in, hiche apportionment hi thumvei- 1951,1961 le 1971 kum a kibol ahi. Athu hi kiseikhom a India sorkar le Delimitation Commission in September 21, 2005 ni a CM anahi O Ibobi Singh lamkaina noiya Cabinet meeting aneina a Existing Assembly Constituency status quo hi chepi dinga thulhuhna anei ahi.

October 5, 2005 kum a jong political party jouse panna a hiche thu kiseikhom a, status quo chepi ding ahiloule aumsa constituency tongkha louva district sunga adjust bol a Delimitation exercise bol dinga kisei kit ahi, tin atosot nadinga document hojong apeh tha uvin ahi. Ibobi lamkaina sorkar in 18-11-2005 ni a Chairman, Delimitation Commission henga adih louva ngohna thu ho pansatna a aneiya Delimitation bol louva status quo chejom pi dinga lekha apehlut ahi.

Valley district a kon constituency 3 aman a, hill district in amu ding, delimitation akichepi a ahile ‘law and order’ a boina umding chule Census 2001 figure tahsan lelna aume, tia thudih louva asei ahi. Hiche asei Secretary, Delimitation Commission in Associate Members ho August 5, 2007 ni a donbutna aneina a, adih louva kinona chule thilse soh dinga gihna le ngohna umho hi abul umlou chule angaicha lou ahi, tia asei ahi. Mipi lamkai khat in hitobang ngohna anei a gihna anei hi Commission constitution toh kitohlou ahi, tia ana donbut ahi.

Ima jouse hi communal agenda ahi in, thinglhang miho Parliamentary le Assembly constituency a (Manipur gam a) athalheng kibang (equal representation) aumna ding a rights kilahpeh na ahi, ati. North east state 4 a Delimitation bol dinga thuphon aum juova political party jousen June 15, 2020 ni a nam bungkhenna neiya O Ibobi Singh Chairman na noiya kihouna anei uva Manipur gam a delimitation exercise chelhah sah lou dinga kilolna aneiyu ahi.

June 17 ni a jong meeting anei kit uva, BJP lamkaina a political party hon Delimitation adoudal na thu niseh thuso phabep a aphondoh u kisei ahi. Hiche hi athenglou chule nam thu a kibol ahi in, thinglhang mi tribal hon asan louding ahi, tin ATRPFM thuso chun aseiyin chule President in pan alah a, mipi ding helna chule tribal hill miho le non-tribe valley miho kah a kibahna aumna dinga pan alah dinga temna anei uvin, ahiloule Hill state achom a thumna a kiphinna umding ahi, tin aseibe uvin ahi.

Moreh a Dk. Crore 3 val man Khamnathei kiman

Imphal, June 19(ET): 43 Assam Rifles le Moreh Police in khamnathei toh mi phabep ana mat tha uvin ahi. Akimandoh ho chu ICP nung lam gamgi lai a ana kimandoh u ahi ahi akiti.

Akimandoh ho chu Thangminlal Touthang(28), S/o Yamthong Touthang, Haolenphai akon le Lunminthang Touthang(27) S/o Yamthong Touthang, Haolenphai akon ahi lhon in ahi akiti.

Amani chu  Febuxostat Tablets Zurig 80, 2001, Linezolid tablets 600mg, 663,Sorafenib Tablets – 423, Pirfenex – 960, Abiraterone acetate tablet 250 mg – 119, 64 x Febuxostat Tablets Febuget 40, 629 x Tadalafil & dapoxetine ,  400 x ambitree tadalafil,354 x Tadalafil 5 mg, 36 x Tadalafil 20 mg, 49 x Tadapox,  47 x Dolutegravir tablet 50 gm, 64 x levodopa tabs, 60 x Erlotinib tab, 60 x Gefitinib Tablets,36 x Veenat lam ahi in, akimandoh thil chu dangka  2.18 Cr lam man ahi akiti.

Hiche lou ho chu White colored Maruti ECCO Van registration number MN06LA0212 a ahin poh lhon ahi akiti. Amani chu jaan nidan som le akim vel a ana kimandoh lhon ahi. Covid-19 toh kisai a lou gampam akon hung kipoh kikha toh lhon a hitabang lou poh lut ding go Pharmacy ho kholdoh na kinei ding daan noi a gotna kipe ding ahi tin hetsah na ahung kinei in ahi.

Chukit leh Moreh khopi sung a  Covid-19 natna akon kivenna ding in  Asam Rifles in natoh na jat chom chom ana nei utoh lhon in gamgi a dangtoh kitoh lou a vah le ho matdoh na ana nei uvin ahi.  June nisim 19 nikho  nidan 1 vel in gamgi hin palkeh khat brown sugar  savon chun 77 a kichun toh mat tha ana hi in ahi. Akimandoh pa akon chun WY tablet packet 10 lam jong matdoh na ana kinei in ahi.  Akimandoh pa chu Sonkhopao Vaiphei, apa min Khupjangam Vaiphei, Lhangjol Moreh akon ahi akiti. Akimandoh pa akon  khamnathei chu dangka 1.772 crore lam ahi akiti.

India a nikhat sunga Covid 19 case 13,586 kihet doh be; nikhat a case kihet doh be atamna pen hita

New Delhi, June 19: India gam a Friday nikhon Covid 19 case athah 13,586 akihetdoh be in, nikhat a natna nei hijat aphahna amasapen ahi in, hiche toh kilhon a natna nei agom a mi 3,80,532 alhing tan ahi.

Natna jeh a athah a thi mi 336 lhing a, agom a athi hi mi 12,573 lhing ahitai, tin Union Health Ministry data in aseiyin ahi. Ahin, kipana thu khat chu Covid natna a kon kijen dam hi lakh ni val ahitan, agom a mi 2,04,710 lhing ahitai. Covid 19 active case 1,63,248 ahi, tia Friday jingkah nidan 8 chan a official thulhut in asei ahi. Natna nei mikhat hi agam a kinung le ahi.

Natna a kon kijen dam hi 53.79 per cent tina ahi. India gam a Covid 19 natna nei kisei holah a hi gamdang mi jong pang ahi. Achesa ni 8 sunga hi natna nei kihet doh be hi kijom a 10,000 val jing ahi.

Friday jingkah chan a natna jeh a thi kisei holah a mi 100 hi Maharashtra gam mi hiya, Delhi gam mi 65, Tamil Nadu gam mi 49, Gujarat gam mi 31, Uttar Pradesh gam mi 30, Karnataka le West Bengal gam mi 12 cheh, Rajasthan gam mi 10, Jammu and Kashmir gam mi 6, Punjab gam mi 5, Haryana le Madhya Pradesh gam mi 4 cheh, Telangana gam mi 3, Andhra Pradesh gam mi 2 chule Assam, Jharkhand le Kerala gam mi khat cheh pang ahi.

Manipur a Covid-19 positive 681 lhingta; Mi 218 kijendam ta

Imphal, June 19(ET): Achesa nidan 24 sunga Manipur gam a Covid 19 positive hi a mi 75 akihetdoh be in, hiche lah a mi 61 hi VRDL, RIMS a test kibol a chule mi 14 hi VRDL, JNIMS a test kibol ahi.

Natna anei kihedoh holah a Chandel mi 3, Churachandpur mi 4, Kamjong mi 2, Senapati mi 7, Tamenglong mi 29 le Ukhrul mi 30 pang ahi. Chule natna nei hohi abon uva gamdang a kon hung kile ho ahiuvin, tua hi Covid Care Facility a achon u ahitai. Chule ‘containment’ le ‘contact tracing’ hojong kivenna dinga abol uvin ahi.

Hiche toh kilhon a gamsunga Covid 19 positive agom a mi 681 lhing a chule active case hi 463 lhing ahitai. Friday ni a JNIMS a kijen natna nei mi 14 discharged abol uvin chule RIMS a kijen mi 5 discharge abol tauvin ahi. Agom a mi 19 hi RT PCR Test abol nauva Covid 19 negative ahi tah jeh uva hospital a kon ahin soldoh u ahitan, hiche toh kilhon a natna a kon damdoh mi 218 lhing a chule recovery rate hi 32.01 percent hi ahi.

Covid Care Centre, UNACCO, Meitram, Imphal West a natna nei mi 297 chan kijen thei dinga kehletna anei tauvin ahi. Tu le tua Covid positive hi a asymptomatic case hi mi 167 hi CCC, UNACCO a kijen a, Bishnupur district hospital a mi 33 kijen a chule Ukhrul District Hospital a mi 10 kijen ahi.

Data athah pen dungjuiya Bishnupur district a Covid 19 case 61 um a, Imphal East a 28, Imphal West a 64, Kakching a 42, Kamjong a 21, Kangpokpi a 56, Noney a 22, Pherzawl a 32, Senapati a 55, Tamenglong a 62, Tengnoupal a 13, Chandel a 14 chule Thoubal a 33 um ahi.

 

Tamenglong a QC munkhat a Covid-19 positive 29 kimudoh

Tamenglong, June 19(ET): Tuni chun Tamenglong district sung a Quarantine centre khat akon covid-19 case thah 29 mudoh be ahi thu thulhut chun asei in ahi. United Builders School (UBS) QC ahin mi 130 aum uvin mi 29 ho chu positive ahidan hetdoh ahi in amauho sample chu June 10 nikho a chu test bolding a ana kilakhom ahitai tin Chief Medical Officer Dr. Chambo Gonmei chun asei ina hi. Avei kimudoh thah holah achun numei mi 12 ajao uvin abon uva state dang akon hung kinungle ho ahisoh kei uvin ahi. Tamenglong district akon sample 1,659 chu RIMS a test bolding in ana kithot tan hiche holah achun 58 chu positive ahidan hetdoh ahitan tuhin active case chu 44 aum nalai in ahi. Mi 14 hochu adamdoh tah jeh uvin hospital ana dalha tauvin ahi.

Official thuso khat in aseina achun tuni a kimudoh thah ho chu UNACCO Covid-19 care centre, Meitram Impal East a kijen ding a polut hiding in asei in chule amauho chu symtom nei khatcha aum pouve ati. Dr. Gonmei in aseina achun state dang akon hung kile ho konkhat chu ache nading mun uh district HQ akon gamlha tah ahi jeh in chule avettup nopjoh nading gelna in gamdang akon hung ho IQC chu district HQ a gonpeh ahidan asei in ahi. Tuhin Tamenglong District Administration vetsuina noiyin IQC khat akihong in chule community quarantine centre 14 jong akihong in ahi.

 

Gamgi a India le China sepai ho kinahna thu a All Party Meeting chelha; Intelligence lhahsam na umham, tia Sonia in thudoh nei

New Delhi, June 19: All Party virtual meeting a tukal sunga East Ladakh a China sepai hotoh kinahna a thi India sepai 20 ho jana ape masa uvin, kihouna apan uvin ahi.

Prime Minister Narendra Modi, Defence Minister Rajnath Singh, External Affairs Minister S Jaishankar athi sepai ho jana vetsahna a thip beh a chomkhat ading uvin chule Singh le Jaishankar in meeting a hiche thu aseiyin ahi.

Line of Actual Control (LAC), Galwan Valley, Ladakh area a ‘status quo’ umsah kit a chule China jong aumnau masa (original position) a akile kit nadinga sorkar in kitepna anei dinga Congress president Sonia Gandhi in aseiyin ahi. PM Modi lamkaina ‘all-party meeting’ a China toh gamgi thu a kiboina thu Sonia in aseiyin chule LAC a China sepai tamtah aum thei hi intelligence a lhahsamna umham, tin jong thudoh aneiyin ahi.

Meeting a political party 20 a kon lamkai ho apang uvin, Defence Minister Rajnath Singh le External Affairs Minister S Jaishankar jong apang in ahi. Congress in LAC thu, adeh a China sepai hotoh Monday jan a kinahna a India sepai 20 athi jouva thilsoh ho aselguh lou dinga Congress in temna aneiyin ahi. Modi injong sepai ho kiphalna hi aliem a che louding chule gamsung akichou na aumle kilomtah a kilethuh ding ahi, tin aseiyin ahi. “Itih nikho a China sepai ho eiho gam hopsung Ladakh a hunglut uham? Sorkar in itih a China sepai ho hunglut hi ahet ham? May 5 ni ham, ahiloule hiche masang ham?” tin Gandhi in thudoh aneibe in ahi.

“Sorkar in gamsung gamgi satellite lima mu lou ham, external intelligence agency hon LAC a angai louva thil kibol ho report abol louvu ham, Intelligence in sorkar ahetsah louham”, tin intelligence lhahsamna um ham, ti thudoh jong aneiyin ahi. India le China senior commander ho kihou ni chule boina suhnem nadinga kinoptona aneiyu May 5 le June 6 kikah sunga phat manlutah kimansah ahi. June 6 meeting jouva jong hi political le diplomatic level a kihouna sem got ding ahi, ati.

“Imalam jouse a ilosap jeh uva mi 20 thi a chule tamtah kisukha ahi. Prim Minister in thutah ho chule April lha a kon tuni chan a thil lhung ho asei dinga temna kanei ahi. Status quo chepi ding chule China LAC a ama position masa a akile kit nadinga sorkar in kitepna aneiding hi gamsung pumpi in adei ahi”, tin Congress chief in aseiyin chule Mountain Strike Corps kiti 2013 kum a Congress in Centre sorkar asem laiya sanction kibol mountain infantry division ni status jong dohna aneiyin ahi.

“Itobang boina hijong le kimaitopi nadinga defence in ichan kigotna aneiyem, ti jong kahet nom e”, tin aseibe in ahi. All party meeting hi May 5 ni a Ladakh le mun dang phabep a China sepai ho ahunglut e, ti akihet jouva hi bol ding bola hi. Masanga banga gamsung pumpi dingkhom a gam huhna dinga sorkar atosot ding ahi. Ahivanga, hitia hi thil kibol lou ahi, tin aseibe in ahi.

Gandhi in People’s Liberation Army (PLA) hotoh kinahna a thi India sepai 20 ho jana apeh masat a houlimna anei ahi. Gandhi ti louva meeting a Nationalist Congress Party chief Sharad Pawar, Telangana Rashtra Samithi lamkai K Chandrasekhar Rao, Janata Dal (United) chief Nitish Kumar, Dravida Munnetra Kazhagam (DMK) lamkai MK Stalin, YSR Congress Party lamkai YS Jagan Mohan Reddy leh Shiv Sena president Uddhav Thackeray jong apang in ahi.

Modi in sepai ho kiphalna aliem kihisah louding ahi, tin avel a aseikit in ahi. Defence Minister Singh in India sepai hon duty abol nauva hangsan tah a pan alah u ahi, tin aseiyin ahi. Defence Minister in Prime Minister thalheng a kihouna a pang dinga kouna apeh lou political party holah a Aam Aadmi Party, RJD le AIMIM jong pang ahi.

 

National People’s movement makai MP RK Ranjan leh anungjui hon China khutsoh ho boycott bolding a kholhang sapna nei

Imphal, Jun 19(UNA): National People’s Movement makai MP Dr. RK Ranjan in tuni chun anungjui phabep toh China te thilsem ahilou leh khutsoh ho boycott bolding in kholhang sapna anei uvin ahi. Hiche thil kibol in Ladakh a India sepai hotoh China sepai ho kikah a boina ana sodoh na achun India sepai 20 in thina ato jeh uva India mipi lunghang hon China te thilsem ho boycott bolding a kholhang asap uh ahi.

MP RK Ranjan in thuso miho heng a aseina achun China ho thilsem a kingap hi adihthei tapon government in ama mite khusoh ngei a kingam ding a tohgon bolphat ahitan chule bol jong kiboldoh ding ahi ati. Aseibena achun Ladakh  kigel khohlou hi Congress party ho ngohna anei in adeh a Nehru lamkai til akon kidon beh talou dan in asei in hijeh achun China sepai hon ngamsung tah a ahin opkhum u ahitan LAC jong ahin khel ngam tauve ati. Alangkhat ah India ading a China hi van pehdohna alenlah a ali channa ahi in chule India toh China hi trade partner phatah ahitoh lhon in chinese van ho ban bolding hi hahsa ding in alangdoh in ahi. Hijeh chun RK Ranjan in aseina achun India gamsung a cheng jousen kilungtoh tah in boycott bol leuhin ahimo ding aumpoi tin asei in ahi.

Ahmedabad khopi a chapang 4 panna a insung mi 6 flat a akikhailih sa kimudoh

Ahmedabad, June 19 (PTI): Ahmedabad khopi Gujarat gam a Friday jingkah a kum 7 le kum 12 kikah chapang li panna a insung mi 6 inmun a akikhai lih sa akimu e, tin police thulhut in aseiyin ahi.

Ucha pasal ni- Amrish Patel (42) le Gaurang Patel (40) chule achate li hi amaho insung flat koima achen lou na a akikhai lih a kimudoh ahi. Flat hi Vatva GIDC vengsung a um ahi, tin inspector DR Gohil, Vatva GTDC Police station in aseiyin ahi.

Aman asei dungjuiya, Patel te ucha hi khopi sung veng dang achom chom a cheng ahi. “June 17 ni a, achate toh achen nau inmun ahin ahin dalhah uva, ajite henga chedoh dinga aseiyu ahi”, tin official khat in aseiyin ahi. “Thursday jan chan a ahung kile lhonlou phat a aji teni hi akisei koima chen louna inmun a che lhon ahi in, insung kot asunga kon akikam jeh a jan kim don a police ho akou ahi”, ati.

Ucha teni hin achate hi aneh le achah lah a gu alhah peh hidinga ginchat ahi in, hiche jouva amani hi ceiling a kikhai lih lhon hidinga ginchat ahi, tin aseibe in ahi. Police hon pasal teni thilong hi drawing room a amudoh a chule numei chapang ni- Kirti (9) le Sanvi (7) thilong hi kitchen a amu a chule kum 12 a upa pasal ni- Mayur le Dhruv thilong hi bedroom a amudoh ahi.

Abon uva athilong hi ceiling a kikhai a amudoh u ahi. Thilong ho abon a post mortem a athot tauvin chule thukholna kipan ahitai.