Malchame a nei thei Kho neo chacha (Gal umkitleh akivenje bei kho...

Malchame a nei thei Kho neo chacha (Gal umkitleh akivenje bei kho tam)

821
0
SHARE

Malchame a nei thei Kho neo chacha
(Gal umkitleh akivenje bei kho tam)

Vohpi isoptheng leh bonlhoh lah ajonpaijin bonlah a akibolpai kitji kiti chu vohcha ho bou kiseina ahipoi ti theina tamtah umjing ahi. Tulah Anglo-Kuki War Centenary thu leh Naga Peace talk thua gamsung huinundan ahung dihthei lou jeh a chi le nam’a kiboina ahung umlouna dia govt sepai hon chi le nam chuom chuom chenkhomna mun le lhang hoa boina umlouna dia anavahle un ahileh Kuki kho tamtah inn som lhinglouva cheng amudoh uve. Hiche kho neo chacha (inn lhom chacha) hohi police le govt sepai hon anga tho uva aventup theilou diu ahijeh in boina tahtah hung umkitleh malchame’a pang kham jong hilou ahi. 1990s lang’a gal ana um chun kiventup jouna din adondon’a kho neo chacha ho kigopkhomna, chenkhomna (grouping centre) ana um sausauve. Thu ahung nop jou lang’a pat grouping centre ho ahung chehpan kitnin “bonlhoh lah” jotna ana umpai kitdan ahitai. Job Card khang ahung lhun kit chun kho neo cha cha ahung tam cheh kit nin munkhatna chenkhom, kigopkhom malah achengkhomsa ho jong ateldeh cheh kitne. Kaani lei bol khang ahung hikitleh akhohcheh soh kit, kho neo neo punbe kit ahi. Hiche hi akihaseileh haosa kivaipohna deilou dan’a gel loi umdi ahi. Ahin haosa dei jeh a kho neo chacha a chen jeh a khopi kholhing umtheilou teng gal laileh gam le lhang adalhah a nunglo kit joulou hi haosa kivaipohna dihlou jeh ahidan kihetmosah a thildang dang ngoh thei ahipoi. Thinglhang mun ning khatna jong inn ja-nga lang lom hihih jongleh inn jani lang chenna kho chu amale ama kiven jouna khat jeh a koiman amoh bulu theilou, govt nin jong security apeh thei ahi. Inn somni vel chenna kho ngah ding’a govt nin sepai mi somthum lang akoilouhel ahi. Ikiboipi jing te ho kholen tahtah a achen u khu masanglai lu kilahto khang’a kivenjouna di anatiu ahin tugeija khantou machalna’a aneithei u ahi. Chuban’a kho le veng kivaipohna jong haosa kivaipohna ahivang’a ‘democracy’ (mipi/khomi thaneina) umjep ahi.
Kumsehleh 1990s lang’a gal le tol’a ana mollen ho geldohna Sahnit ni kimang jing, athu le nikho kinitna hi midang khat tana bouva kinei ahia maban’a hitobang gal ahung lhun kitleh iti kivenna neithei ham ti gelna aum angaije tia kisei jing chu lampi chom chom’a nam lamkai hon ipi abol uvam ti dohna neiphat hung hita maithei ahi. Meithal le meichang bouva kiven jouna hilou, gam ning gamgi lang’a ho dehdeh alom chang’a (compact) a chenkhomna leh kholen kholhing ahilouleh boi thou thou di ahi ti hi hilai mun’a akihaseiloi ahijing’e. Boina ahung lhun mong mong tengle bou khahdohna umji, hichu vaigeiji ahi. Tuchung thu umdan ahung hoimo a pat thinglhang gamning lang mun phabepma koi thingnoi sepai ho kitol lele’a hoilai kho a nehding akidonpat am ti nam lamkai ho gei ahephalou tamdi ahi. Nehdi leh sum kidong chu aphanalai ahin thu ahung haboileh aban ipi hung hidi ham ti seilouva hetsa ahi. Haosa suhmangdi tina hilou, adihlou ho semphat di ti hi nomlouhel nahtahna tah (louchalna tah) aumlaise’a malchamea neikham jong hilou kho umjing di, govt kom’a kho kisumang jat kipe aja aja a kisim jingdi ahi. Pathen’in jong imalam jousea mi louchal, kikhel di nomlouhel ho alungsetlou, apanpilou heldi ahi.