Makhel a Tribal Freedom Fighters Museum kisem ding thu’a KIM in CM...

Makhel a Tribal Freedom Fighters Museum kisem ding thu’a KIM in CM lekha thot; Museum min Rani Gaidinliu kiminputsah got hi Kuki galhang ho vetset nale mu nem na ahi tia sei

527
0
SHARE

Makhel a Tribal Freedom Fighters Museum kisem ding thu’a KIM in CM lekha thot; Museum min Rani Gaidinliu kiminputsah got hi Kuki galhang ho vetset nale mu nem na ahi tia sei

Imphal, Sept 1(ET): Tamenglong District sung Makhel kho a Tribal Freedom Fighters Museum sem ding chung chang a thulhut an a umna chung a tuni in Kuki Inpi Manipur in adeilou dan thu’a Chief Minister N Biren Singh hetsah na ana nei uvin ahi.

KIM in CM pa lekha thot anei na uva chun gamsunga galhang ho geldoh jing theina dinga hitobang tohgon hung kinei chunga akipapi nau thuphon nei utoh lhon in, hitobang tohgon hin thinglhang miho kah a kipumkhat na le kihet them tona ahin pohlut ding ahidan jong ana asei uvin uvin ahi. Hiche museum sah na ding chung chang a National Level Committee masanga Manipur in Tribal galhang ho chung chang tahlang na ana nei na chung uva kiloikhomna in adeilou le apomlou u thil umdan hetsahna anei uvin ahi.  Hiche lekhathot a KIM in apom thei lou pen chu Museum min thinglhang mi ho donglou a Rani Gaidinliu min put sah ding kiti chung chang thu ahin, hiche museum min Rani Gaidinliu min put sah ding kiti hi Kuki gal hang ho vetset nale mu nem na ahi tin hetsah na anei uvin ahi.

Hiche museum um na ding mun hi amun agam lhat le mipi che nathei ahilou toh lhon a tohgon kinei hi Naga political demand toh kisai gamsung ahi jeh a adeilou dan u jong  ana hetsah uvin ahi. Manipur government in hiche museum sah na ding chung chang a gam huhdoh na ding mong mong a pan anala ho geldoh louva politics toh mehbet na kinei na chung chang a apom thei loudan u jong tahlang na ana nei uvin ahi.

Northeast gamsung a chamlhat na ding gal kisat na Kuki te panlah na hi ahipen dan tahlang na anei utoh lhon in, thusim semphat naho toh kisai a natoh na ding ho apomthei loudan u jong KIM in hetsah na anei uvin ahi. Hiche museum hi Imphal sung ahi lou le Lamka (Churachandpur) a koi ding adeisah dan ule, hitobang tohgon akibolthei lou ding le govt in ‘Kuki Freedom Fighters’ museum le ‘Naga Freedom Fighters’ museum in atum tum in homkhen hen tin ngehna ana nei uvin ahi. Hiche museum kisah na ding chung changa chanvou nei jouse hetsahna nei ding adeidan u jong ahetsah uvin ahi.

Xxxx

13th September ‘Sahnit/Black Day’ kiman ding thu’a KIM in thuphon nei

Imphal, Sept 1(ET): Kuki Inpi Manipur, Lhangsam S. Gouminlun Gangte min a thuphon in aseina ah 13th September Kum seh’a Sahnit (Black Day) tia Kuki nampin iman jing bang uva tukum jong iumna cheh uva imancheh kit diu ahi ati.

Thuphon in aseibe na ah Kukite chonna Ihongpi ipu ipa teuvin tonna pat ahin chepiu, mona neilou tolthi aumle achungthu kisei chai masangse a ananit jingu Sahnit chu tukhanga eihon jong ichepiu ahi. Kum 1993 laija Nagate chamlhat galsat Tangkhul lamkaina NSCN-IM hon mona neilou Kuki ahijeh a mihem 1000 val eina thanau chung thu gamvaipo (India Ie Manipur govt) hon seichaina anei tokah seuva Sahnit (Black Day) Nampi lunghem, lhaset le lungjin nikhoa kumseh a 13th September hi manding tia Kuki nampin nisim 7th September, 1995 nikho a kilolna ana kinei tunichan a kumseh a ihin man jingu tolhon a tukum 13th September, 2020 nikho jongle Kuki nam miten iumna cheh uva Sahnit iman cheh diuvin hetsah na khohtah thuphon ahung kineije ati.

Gamsunga natna hise (Covid-19 Pendamic) jeh le Govt in juiding dan Lockdown le SOPs akoijeh un tukum hiche dan kisem dungjuija imancheh diu ahi jong ati.

KIM in Sahnit manding dan asem ho chu; Inson/Inbul tin, Khotin le Houbung tin a hiche nikho hi Nampi a dia Pathen henga taona nikho a manding, Inson/Inbul tin le Khotin a Ponvom (Black flag) khaidoh cheh ding, Taokhomna le Sahnit thu seikhomna phat jingkhah lam nidan 11:00 apat nilhahlam nidan 1:00 sunga mancheh ding, Hiche nikho le koima kholche tolche chule natoh vaikon bol umthei louding, Mijousen Namvon ahilou le Von vom (Black Dress) kivon cheh ding, Neitokhom (Offering) jouse KIM relief fund a dia KIM lamkai khut a Ihutcheh ding, Kin-gon mankhom ding dei jousen Kuki Inpi District/BIock lamkaiho hetpehna noija bol ding, Covid-19 SOPs (Social Distancing le Face Mask) kikhen kang le muhtom phatah a bolcheh ding, KCLF hole Houlam kiloikhom na (Denomination) chom chom hon ama ama houbunga lolhing tah a akiman cheh na dinguva mopohna anei diu, Kuki Inpi Manipur lamkai chengin Sahnit (Black Day) song (Monument) umna KIC Complex, Tuiboung muna mankhom ding chule thuphon lhadohna Press Conference bolding ahi.

Hijeh chun, muntin a um Kuki chate jousen gelkhohna neipum a Sahnit nikho phatah a man ahina dinga iumna cheh ule eima eima panlah nading dolcheh a pan ilah cheh diuvin Kuki Inpi Manipur in temna tolhonin hetsah na khohtah ahung kineiye tin thulhut kimun aseiben ahi.

Xxxxxxxx

Manipur a Covid-19 jeh’a mikhat thi kit; gamsung’a case 6382 phata

Imphal, Sept 1(ET): Covid-19 natna nei Thoubal district a kon numei Kum 55 a upa khat in tuni RIMS hospital a thina atoh in tuhin Covid-19 jeh a thina toh Manipur a 29 alhing tan ahi.

Chule nidan 24 sung in Covid-19 positive case nei mi 120 ho RT PCR test result negative ahitoh lhon in discharged akibol tan ahi. Amaho chu CAPF (54), CCC Lamboikhongnangkhong (38), UNACCO (14), PR Kakching (2), RD Wing (2), TK Ukhrul (1), Senapati (2), CCC Noney (5) leh Tamenglong (2) ahi.

Langkhat ah hiche phatsung mama chun Covid-19 positive case thah 130 (Pasal 83 le Numei 44) mube ahin, ama ho chu milham mi 127 le CAPF personnel mi 3 ahi.

Case thah kimu ho chu VRDL, RIMS – 17; VRDL, JNIMS – 4; Raj Medicity – 4; Ukhrul – 2; Thoubal – 19; Shija Hospital – 2; Babina Diagnostics – 12; Kangpokpi – 2; Imphal West – 50; Jiribam – 6; Churachandpur – 6; Bishnupur – 3; Imphal East – 2; Tamenglong – 1. They are from Imphal West – 60; Imphal East – 5; Thoubal – 22; Ukhrul -2; Bishnupur – 7; Churachandpur – 6; Senapati – 2; Kangpokpi – 2; Tamenglong – 14; Jiribam – 6 ahi. Milham mi 127 lah a Tamenglong akon mi 2 tilou adang mi 125 ho chu gamdang a kholjinna neilou ahive.

Case thah kimu ho chu COVID Care facilities a vetkol ahitaovin ahi.

Tuni chan in Manipur sung’a Covid-19 positive case 6382 (Milham 4782 le Central Security personnel – 1600) aphatan, Natna nei kijendam 4450 (Milham 3566 le Central Security personnel – 884) ahin chule active case 1903 (Milham 1189 le Central Security personnel – 714) ahi. Recovery rate hi 69.72% aphatan ahi.

Xxxxxxxxx

Director General Assam Rifles in Manipur vilna nei

Imphal, Sept 1(ET): Lieutenant General Sukhdeep Sangwan, AVSM, SM, chun Manipur sunga Assam Rifles ho dinmun holeh leh forward area ho vilna chu nisim 31st Aug apat 1st Sep 2020 sung chun vilna ana nei in ahi.

Vilna anei sung chun Director General chu mun chuom chuom a Commander  ho a kon in gamsung dan le thupeh ho vetsui ding leh gamsung thu le la akhoh dungjui a kimaituopi thei dinga guotsa ahidan aphuongdoh cheh un ahi. Gamsunga Assam Rifles ho vilna hungnei General Sukhdeep injong Assam Rifles ho gamsunga dinga pan alah dan uleh kigingjing a aum jingu alunglhaina thu aphongdoh in ahi. Head Quarter Inspector General of Assam Rifles (South) injong state sunga sepoy ho jouse kisonpi thei tah leh aphat dungjui a kimaituopi thei ding dimun a akoithei ho jallin jong pachatna sangtah apen ahi. Director General ahung kholjin sungin adeh a boina khohjep jep na mun a um sepoy hotoh kihoulim khomna jong ana nei in, chuleh umna gena kituptah a umlouna mun a umhonjong phunchel lou hel a gamsung mipi toh chamdel a aumthei nadia pan alahnau ho pachatna ananeiyin ahi.

Director General pan aseibe na ah Assam Rifles sunga COVID-19 toh kisaiya Force preservation jong Manipur sunga guon hiding ahi ati, chule Gamsung huinun dungjuiya kimaituo pi thei a umjing nadia kimansa a umjing ding in jong temna aneiyin, Manipur gamsung mite toh cham le lungmonga umtheina dinga jong pan lajing ding in temna jong ana neiyin ahi.

Xxxxxxxxx

Khamnathei Dk. Crore 17 val man Assam Rifles hon mandoh

Imphal, Sept 1(ET): HQ IGAR(South) maikaina in Assam Rifles hon WY 58 packets, WY tablets (packet a 10,000 tablets cheh), foreign cigarettes(WIN) 170 packets a sum a dangka  Dk.  17.5 crores vel man Myanmar apat hung kipolut chu ana mandoh un ahi.

Hiche akiman doh hohi ginmo a um gari in Khemdo vel lah a dan in aphallou von phabep ahinpo e ti thulhut amu nauva kon a Khemdo mun a nisim 31st Aug 20 nikhoa MVCP duty hon New Songyang apat hung Maruti Gypsy leh Suzuki Access (two wheeler) kholchilna anei utoh kilhon in gari sunga kipo WY Tablets 58 packets leh WIN cigarettes 170 packets agom a  Dk.  17.5 crores vel man ding ana mandoh un ahi.

Thulhut in aseibe na ah matdoh a um teni ahileh Mr John Thangjalet Haokip, Saibol Joupi, Chandel dist a um leh Mr Vickey Haokip, Khangbarol, Chandel dist a um ahi akiti. Akimandoh teni hi Chandel Police Station khut ah von kimandoh hotoh pehlutna jong ana nei un ahi.

Xxxxxx

India China Gamgi boina: Chushul a PLA in boina semkit Ladakh boi cheh cheh

New Delhi, Sept 1: India leh China gamgi thu a boina seithei louva boina aum jing toh kilhon in alangto gel in lethuhna ding manchah a kigotna ana neijing un hitoh kilhon chun achesa August 29-30 sung chun lhumlam Pangong Tso mun a Chinese PLA ho ahung lut e ti het ahijeh chun amaho chaloh naleh boina kivendoh nadia Indian Army hon manchah phabep ana tollut utoh kilhon in East Ladakh mun boina ana sousang man in ahi.

 “Chushul area a um PLA hon India gamgi kehlet ding lunggel aneijing toh kilhon in hiche Chushul mun boina akhoh cheh cheh ding in aum in ahi. Hiche toh kilhon chun manchah phabep leh hat tahtah ho gotsa in akoijing tauvin ahi. Alangkhat ah Indian Army hojong hitobang ma chun alethuh nading in gal manchah phabep guontup sadem in lhumlam Pangong Tso leh Rezang La ah Special Frontier Forces hotoh akikoi in ahi tin senior military official in aseiyin ahi.

Tu le tu dinmun hi alang alanga kinim vamphet a um ahi tauvin, alangkhat ah Indian Army ho hi a sepoy a sim a tamjo hiche boina kimaitopi dinga gamgi 1,597 km a sao Ladakh mun’a Line of Control (LAC) a guon ahiuvin ahi.

Thulhut kimu dungjui in Indian sepoy hon mun phabep toupha ahitoh kilhon a Chinese sepoy ho chaloh dan vetsui ahi jinge ati. Hinla Chinese PLA ho hi seitheilou a Beijing a kon thupeh ngahjing a umjing ahi dan uleh India Army chunga chaloh na hetman louva ahin neithei u ahi ati.

Ladakh mun a PLA hon gamgi khel a chalohna abol jing utoh kilhon a Delhi mun a National Security planneDk.  in chaloh dan jouse avetsui jing ahina banah LAC in ahuop 3,488km sunga gamgi thu a kihouchamna moh um thei lou ding ahi.

Xxxxxx

Rajiv Kumar Election Commissioner a lhendoh a um

New Delhi, Sept 1: Rajiv Kumar chun  Tuesday nikho chun Election Commissioner (EC) of India hina panmun analuo tan ahi tin official thulhut chun aseiyin ahi.

Kumar in Election Commission of India hina hi Chief Election Commissioner Sunil Arora leh Election Commissioner Sushil Chandra jaona in analo in ahi.

Kumar hi tukum February lha a chu Finance Secretary, Government of India panmun akuon a kichol(retired) ana hi tan ahi. Amahi Chairman Public Enterprises Selection Board ding in April 2020 apat August 31 chan panmun peh ana hi in ahi. Chuleh Kumar hi Establishment Officer, Department of PeDk. onnel and Training chu 2015-17 sungin ana tuh kit in ahi. Joint Secretary, Department of Expenditure, Ministry of Tribal AffaiDk. , Ministry of Environment and Forests leh Education department ho a jong panmun ana tuh in ahi.

Rajiv Kumar hi 1984 batch Indian Administrative Service Officer ahi in kum 36 Government of India service ahin tong tan ahi. Kumar hin centre ministries mun chom chom leh ama umna state Bihar/Jharkhand a  panmun phabep ah na ana tong in ahi.

Xxxx

Assam in COVID-19 douna a Dk. 730 Cr mangdoh

Guwahati, Sept 1: Assam government in Tuesday ni a nikho li tah chelha Legislative Assembly autumn session anei nauvah Dk.  730 crore chunglam hi COVID-19 toh kisai ah akimang chan ahi tin PTI akuon thulhut chun aseiyin ahi.

 “Agom’a Dk.  730.72 crore kimangdoh lah a, Dk.  579.9 crore hi state health and family welfare department and National Health Mission (NHM) akuon a hung kipedoh ahi in, chuleh adangse Dk.  150.81 crore hi revenue and disaster management department akuon a kimangcha ahi”, tin Finance and Health Minister Himanta Biswa Sarma in kikhopna achun ana phongdoh in ahi.

Congress MLA Rupjyoti Kurmi, Sarma in athudoh adonbutna aneina achun “COVID-19 natna hi state sunga athengsel e tithei ahi nailou jeh in district chom chom a kon a Audited statements lhingset kilakhom thei nailou ahi ati.

Dangka Dk.  579.9 crore kimanchah dan a hilchen na ah achen achai a het thei hinai hih jong leh alhangpi a sum le pai kiman dan phondoh thei sun ahi, Government of Assam leh NHM in agom in Dk.  579,90,31,071.30  COVID-19 toh kisai a manchah dingin ana lhadoh in ahi ati.

Sarma in aseibe na ah government in Dk.  199.72 crore hi thil le lo chung in ana kimangcha in, Dk.  3.86 crore hi medical colleges ho ana kipedoh in, Dk.  52.95 crore hi testing bolna ding in ana kimangcha in, Dk.  75.82 crore hi lou le ai a ding in ana kimang che in, Dk.  37.69 crore hi medical equipment ading in akimangcha kit in, Dk.  42.89 crore hi transportation in aki mangcha in, chuleh  Dk.  3.41 crore  awareness campaigns ho ah ana kimangcha in ahi, tin thulhut chun aseiyin ahi.

Alangkhat ah health and family welfare department leh National Health Mission also in jong Dk.  1.07 crore  additional manpower ading, Dk.  1.6 crore administrative a kimanchah nading leh Dk.  160.88 crore hi state pam a um ho sum le pai a kithopi na in ana kimang in ahi. Hiche ho toh simtha in agomin revenue and disaster management department in Dk.  150.81 crore akinthei lam a quarantine centres semtup nadin ana kipedoh e tin thulhut in aseiye.

Sarma in aseibe na ah state’s health and family welfare department leh National Health Mission in agom in  union government akon in agom in Dk.  196.82 crore akimu in ahi. “Chuleh, Dk.  50,00,000 insurance support ding in Pradhan Mantri Garib Kalyan Package chu COVID warrior insung mite adia guon ahina banah aban mi 4 ading jong gon ahi ati.

Sarma in mipi 53,534 akon a kiphalna a kimu Asom Arogya Nidhi account a August 15 chan gei a kimu jat Dk.  116.1 crore ahi ati. Hiche kiphalna ho hi Chief Minister’s Relief Fund a lut ho ahi in COVID-19 adia achuom a kibol ahilou jeh in COVID-19 mong mong a kimu jat chet sei ahah e atin ahi.

Xxxxxxxx

India sunga Covid-19 case thah 70,000 kimube, agoma 3.7 million nailamta

New Delhi, Sept 1: India sunga Covid-19 case thah 69,921 mube ahitoh kilhon in agomin 3.7 million tobang ahitan ahi.

Union health ministry akon a thu thah kimu dungjui in, tuletua active cases hi 7,85,996 ahi in chuleh mihem 28,39,882 jat hi discharged ahi tauvin ahi.

India health ministry record dungjui in thina toh 819 toh agomin  65,288 aphatan ahi. Chuleh recovery akhan jep toh kilhon in 76.62 percent aphatan chuleh thina toh akhehsuh toh kilhon in 1.78 per cent aphatan ahi.

Chuleh nikho 8 sungin 5 lakh recovery recorded ahi in hiche hi achesa hotoh tedingin atamjep tan ahi tin ministry in ana phongdoh in ahi.

Health ministry in aseibe na ah natna jat chom chom toh kithokhom jeh in thina hi 70 per cent in hatah a lhut jouve ati. Health ministry in natna hatna mun adeh a Uttar Pradesh, Jharkhand, Chhattisgarh leh Odisha, ho a team kigon ba ding ahi tinjong aseiyin, hiche team hochun state sunga Covid-19 toh kisai tohgon ho adeh a containment, surveillance, testing leh postive case ho kivetkol na ho anungtho diu ahi ati.

Hiche team ho hin state sunga kiven dan leh dan ho vetsui sa a kithopina apeh diu hiche team lah a epidemiologist leh public health expert hojong jaocheh diu ahi ati.

Hiche akhih dehset state 4 lah a hi Uttar Pradesh hin active cases atam neipen ahi in, aban a Odisha, Chhattisgarh leh Jharkhand ahi tin minitry in aphongdoh in ahi.

Xxxxxx

Thangjamang Kipgen, MCD, President BJP Sadar Hills in Polythene Pipe Haukhongching khomite pe

Imphal, Sept 1(ET): Kangpokpi ADC Member le BJP Sadar Hills President Thangjamang Kipgen in tunin agamsung mipite khotona in polythene pipe phabep Haukhongching khomite hengah pehdona ana nei in ahi.

Hichetoh kilhon chun Haukhongching haosapu Rev. Minthang Sauntak in  MDC pu chungah kipathu aphondoh naban ah khosung tuineh masanga sanga nomjep ding akinepna jong aphongdoh in chuleh khosung miten itih hijong leh MDC kisumil lou ding, kitosot jing ding ahi tinjong aphongdoh in ahi.

xxxxxxx

RD&PR Minister in social media a MGNREGS thu kisei ho vetlhahna nei a suhkhel nei ho gotna pehdia phongdoh

Imphal, September 1(ET): Konthoujam Gram Panchayat sung a Mahatma Gandhi National Rural Employment Guarantee Act noi a nikhotha adihlou a kipe chungchang social media a kithethang pansan in Rural Development and Panchayati Raj Minister Shri Thongam Biswajit Singh in kholchilna nei a suhkhel nei ho chung a gotna pehding in tunichun aphongdoh tan ahi.

Social media a jannia video tahdoh a um chu photlot a minister in tuni jingkah a Konthoujam Assembly Constituency Gram Panchayat chu avil pai ahi. Konthoujam Makha Leikai Ward No 5  achangseh a ni 4 na atoh thu video a tahdoh numei nu chu minister pa’n akimupi a ama’n jong khamgahna aumtolhon a ni 20 natoh phatsung a ni 16 bou natohman pehdia mopo ho thusei chu adangse’n anelpon hinla  sum mu nadang neilou jeh a ni 20 lhingset a na atoh thu chu minister pa aseipeh ahi.

Hiche thu hi phatah a kholchil ding in minister pa’n amatoh kilhon khom official ho thupeh anei ngal ahi. Chule official hon lekhabu a kon adangse’n ni 16 na tohdia soi abol nao le numei nu’n achangseh a ni 20 na atoh dan jong amudoh un ahi.

GRS hon natohna masa ho a job-card nei ho soi alahlou jong official hon amudoh be un, hitolhon a themmona nei ho ahoidoh umlou hel a agangthei pen a gotna pehdia minister in aphondoh pai ahi.

Phat hahsat lai a government in mitin kihinsona dia tohgon achepi lai a hitobang thil aso hi vangset aumlheh e tin minister chun aseiye.

MGNREGS noi a mimal in lemon-grass, cintrolla, papah chule gancha vah bolding khohsah cheh ding in minister in job-card nei ho tilkhouna aneiban a khonung kihinsona hoitah sothei ding jong ahi e, ati.

Biswajit in hitobang velso sahlou dia achekhom ho temna anei a Covid-19 phat hahsat sung a job-card hi mitin in kihinsona aneiding hi Prime Minister Narendra Modi gelkhoh khat ahi, ati.

Chule numei nu panlahna kipapi le tilkhou na in ni 50 natoh phat pehbe ding a Biswajit in agon ngal ahi. Chule atongnom in na atohthei nadia ana gonpeh toh vaihom pa jong minister pa’n apahcha lheh in chujongle tohgon noi a mipi hahsatna ho thulhut hin pe ding in jong youth club le meira paibis ho temna jong aneiye.

Chule natong lou a sum lahdoh amopo ho le job-card nei ho kah a kihet themna jong ngah a natohphat ni 4 avat jong phatah a tong cheh ding in minister in mipi temna anei e.  Chule minister le akilhonpi hon Ahallup Bamdier Makha Leikai a MGNREGS noi a na kitohna ho jong vetlhahna anei un ahi.

Xxxxxx

Japan in Coronavirus nat douding dan sodoh

Tokyo, Sept 1: Japan in coronavirus natna toh hinkhom joh dia tohgon thah asemdoh ho jui ding kigong cheh dia amipi ho kouna anei hi aphalou kiti hi phat jouse a peldoh thei ahipoi tia Japanese tahsan le chepi hi juiding a hahsa lou hel phatah a simcheh ding ahi. Hiche lah a apoimo thil thum ho chu; Kikah tah a umding, Mu kitom ding, Khutsop jing ding ahi.

Boldia apoimo ho: Meter 2 kikah a umding, Polam a atamthei pen a kichep ding, Kimaito a mi kihoupi lou ding, In lhun teng agangtheipen a mai le von kisop loi ding, Mi khut itohkhah teng khut sop loi ding, Online bou a thilchoh a pehding ho pehding, Kailhang a mikhat bou cheding, Von ho ahithei chan a khut a khoi lou ding, Mipi po gari toupet a pao louding, Keng ahiloule gari neo bou a tohnamun jotding, Electronic business card bou man ding, Kihoukhomna a video conference bou manding, Kihoukhom na mun kot ho phatah a hon ding, ache hon muh kitom chehding, Ahithei chan a in a na toh got joh ding, Khol che le lou ding, Ink oho jeng jong vil lou ding, Natna nei ihi ikihet le che na mun le kimupi ho hetdoh ding, Kimai ngat to a mi toh an nehkhom lou ding, Lheng le bukong khat a mi toh an nehkhom lou ding, An neh pet a kihoulim lou ding, anche ha neh ding, Mipi an nehkhom ahithei chan a gon lou ding, Mipi kititna, mitoh kihoujing ahithei chan a bollou ding, Eima tahsa dinmun jingkah seh a kivet jing ding, Ehbuh manchah she le sin jing ding, Mun neo lah a sot umlou ding, Pamlam lhei le na jong ahon a bol lou ding ti ho ahi.

Japanese government committee chairman Shigeru Oo in lou le ai semdoh nadia alhompen a kum khat le akeh lut ding ahitolhon a hiche kah a natna toh hinkhom dan poimo ahitai, hichu hitobang phat a khosah ding dan het chu ahi, ati.

Achung a dan kisei atamjo abon a China in achepi chu ahi. Mitin in natna gal phat lut ding ahi ahe nai hinla kimaitopi ding dan kicheh a gong ah aumpoi. Japan hi chingthei tah a thilbol le dan noi a phatah a khosa thei gam khat chu ahi.

xxxxxxxxxxxx

NH-102B Chiefs Association kiphutdoh

Imphal, Sept 1(ET): NH-102B in ahopa kimvel a gam le go le mipi ho vengbit ding in September 1, 2020 tunichun NH-102B Chiefs Association phudoh in aumtan ahi. Government in NH-102B lampi kehlet dia ahin gon akipapi lai in August 31, 2020 nia memo No.DC(CCP)/LA-2/2008- 6(Pt-l) noi a Churachandpur Deputy Commissioner in lampi kehlet nadia gam leiset lahdia ahinsodoh Chief Association chun phamo asalheh un ahi.

Amahon asei be na ah gam leiset lah man hi Manipur district dang toh kibang a bol hihen ahiloule Hill Area Committee in achesa August 8, 2017 kum a UO No.5-04/Chairman(HAC)/2017-LA ana sodoh toh kikal a Manipur khang thusim a gam leiset lahman anempen dia  Deputy Commissioner, Churachandpur in Commissioner (Revenue) kom a lekha apehlut hi agam mipi dohna umlou hel a kibol mipi nahsah lou na natoh ahi, ati.

Hiche thu hi agam mipi toh seitoh ahikah a natoh chelhahsah lou ding le gam nei hon gam lekha Deputy Commissioner kom a pehdoh lou ding le dei umlou thil asodoh khah le amaho themmo chan lou ding in Chief Association thusodoh chun asei e.

xxxxxxxxxx

Khamnathei ngah a themjilna khohsah dia MSF in tepna bol

IMPHAL,  Sept 1(UNA): Manipur gamsung a khamnathei ne le khamnathei a kivei thu niseh tobang in aumtan tuhtang lou a achejom peh le hiche hi khonung a Manipur mipi hahsatna hin lhut ding ahi e tin Manipuri Students’ Federation (MSF) in tunichun asei e. Khatvei seh patepna a kipan a hinkho tamtah hiche khamnathei hin asuhset ahidan hi het a hiche thangkol khatvei seh khamnathei tohkhah lou tei ding a MSF chun khangthah ho temna anei ahi.

MSF in gam pha so nading a khamnathei toh kikang se a themjilna lampi a kipumpeh lut joh ding ahi e, ati. Magnitude of Substance Use India 2019 thulhut dungjui a India pumpi a khamnathei a kibolden kum 12 chunglam Manipur khangthah hi atampen ahi e. Khamnathei a kibol den khangthah ho chun chomlou kah a HIV, Hepatitis C le Tuberculosis natna aneidoh jiu ahi, ati.

Khamnathei toh cha le nao te akigamlat thei nading in nu le pa ten thei top so in pan ala jing un, hitolhon a gam pha so nadia school le veng tin a khamnathei phat loudan hi seiphong a khangthah ho lampi dih komu peh ngai ahitai tin MSF chun asei e.

Langkhat a khamnathei suhbei nading a state government in tohgon achepi hi mitin in tosot cheh a lolhinsah ngai ahitai, ati. Chule khamnathei a lutding kigong khangthah ho le akibolden lai ho huhdoh ding hi amitakip mopohna jong ahi e, ati.

 xxxxxxxx

August lha sung a le 27 a go ju hi kum 120 sung a dia go tamdan alichanna hi

New Delhi, Sept 1: India Meteorological Department (IMD) in August lha sung a le 27 a tamjo go ju hi kum 120 sung a dia go tamdan li channa ahi e, ati. IMD in asei na ah June 1 a pat August 31 kah a go chu angai na a go ju le 10 sang a tam jo ahi ajehchu alhangpi a June 1 le September 30 phatsung hi India a go juh lai ahi e tin IMD scientist R K Jenamani chun asei ahi.

Jenamani in August 2020 lha sung go juh hi kum 120 sung a dia go tam dan li channa chule kum 44 sung a dia go ju tampen a melchih ahi e, ati. Mahesh Palwat, vice president, Skymet Weather in Bay of Bengal a August lha a low pressure mun nga a akisemdoh jeh a August lha a go tam dehset ahi e, ati. Jenamani in Bay of Bengal mun 5 tah a low pressure chun central le north India a go hat tah ajuhsah ahi in, amasapen a August 4-10 a Odisha tuipang ahin no a aban central India le Gujarat kitollut a north Arabian Sea le Oman coast ano lut kit a, August 9-11 a anichanna chun Andhra Pradesh-Odisha coast a pat Chhattisgarh le northeast Madhya Pradesh ano phei kit a August 14 nia Jaipur a tui let lo ahi e, ati.

Athum veina August 13-18 sung a sohdoh chun Chhattisgarh le northeast Madhya Pradesh anolut a August 18-20 a northeast Rajasthan le south Punjab le Delhi-NCR lah jong tui let lo ahi. Chule li channa August 19-26 a sohdoh chun central India le southwest Rajasthan abanle Pakistan sahlam ho atohkhah a August 20-21 nia Odisha, August 21 nia Telangana le Hyderabad, August 22 nia Madhya Pradesh abanle August 23-24 nia south Rajasthan le Gujarat tui len kit ahi.

xxxxxxxxxx

Lamphel a danphal lou a khosa ho District administration in nodoh

Imphal, Sept 1(ET): Lamphel Sanakeithel (Shankar Talkies kom) a dan phal lou a cheng ho Imphal West district administration in tuni jingvai nidan 10:30 velchun JCB mang in in phetlha’n aching ho anodoh in, mipi leh police ho kah a kindintena nasatah asohdoh man e.

Akidang khat chu in lekha nei a hin podoh loi jong aumkit in, ipi lamdol a jamabandi lekha aneithei u ham tivang tupet a het ahi nai pon ahi.

Sana Keithel Shankar Talkies kimvel a chenna in 200 tobang tunia chu suhset a um ahi. Hinla hitobang phat hahsat pet a in le lou suhset peh a um hon nop mo asah nao le government chung a alunglhai lou nao thuso mi ho kom ah aphongdoh un ahi.

Xxxxxxx

Indo-Myanmar Freindship gate September sung kikhah nalai ding

Tengnoupal, Sept 1(ET): Myanmar gamsung Tamu district administration le Tengnoupal district administration in kithokhom a phatchom khat ading a Indo-Myanmar Freindship gate ana kha u chu tu lhasung (September) kha jom ding in kinoptona ana nei uvin ahi.

Hiche gate kha jing nalai ding tohgon chu Covid natna maban chal thei nalouding le kivenna ding toh kisai a kihou lhah na ana kinei ahi. Thuso kimu dungjui in hiche gate kha ding chu Myanmar govt in India sung le Manipur a COvid case tam jing le khan jing toh lhon a kha ding a hetsah na ahin nei u ahi akiti. Hiche gate kha jing nalai ding thu chu Tamu District administration in Tengnoupal district administration ang a hetsah na ana nei u ahi.

Xxxxxxxxxxxxxxx

Hill District Contract basis kiloikhomna in hilchetna nei

Imphal, Sep 1: All Manipur Hill district Contract Basis Teacher Association a president Haopu Khongsai in Manipur Chief Minister ang a regular lhah na ding toh kisai in lekha thot ana nei uvin ahi. Hiche lekha thot chu ATSUM, ANSAM le KSO-GHQ in hetsah na ana nei u toh kisai a vel hetsah na kinei kit ahi. Chief Minister pa lekha thot kinei na achun kiloikhomna in contract basis a jilkung ijat ham achesa 2006 kum a ATSUM le Manipur govt kihou lhahna dungjui a ana kilah toh lhon a hiche jilkung kila ho chu angai na bang a regular lhah sahding a kihou lhahna le tohgon kinei ahidan hetsah na jong ana kinei in ahi. Hiche chung chang thu ahi kai don an jong ana kinei tahdan jong tahlang na ana kinei in ahi. Thuso kimu dungjui in achesa 2011 kum a Directorate of Education in in regular lhahding toh kisai a physical verification ana kibol dan jong tahlang na ana kinei in ahi. Hiche verification  contract a natong jilkung 772 umtoh lhon a vaipo ho ang a hetsah na nei ding a togon ana kinei ahin hinlah tu chan a donlou a kikoi ahi akiti.

Xxxxxxxxxxxxxxxxxxxxxx

President Lui Pranab Mukherjee vuilem hita

New Delhi, Sept 1: Indian president lui Pranab Mukherjee chu tuni in vuilem na ana kinei in ahi. Hiche thivui an chu COvid-19 daan kipe ho juipum a ana kinei ahi. Mukherjee chu Lodhi road a um electric crematorium a vuilem na chu ana kinei ahi. Hiche thivui na kingon achun Pranab chapa Abhijti Mukherjee in apa thilong vuilem na kingon ana makei in ahi. Kingon achun gamsung lamkai jat chom chom chuleh insung miho in achaina ding in jana pehna ana nei uvin ahi. Defence Ministry akon thuso kimu dungjui in hiche thivui na kingon achin covid toh kisai a daan kipe ho juina akinei cheh in ahi akiti. President Ramnath Kovind le Prime Minister Narendra Modi in jong Mukherjee inna jana pehna neiding in vilna ana nei lhon in ahi. Jana pe ding in gamsung lamkai lah in Prime Minister lui Manmohan Singh, Lok Sabha Speaker Im Birla, Congress lamkai Rahul Gandhi, BJP chief JP Nadda, RSS chief Mohan Bhagwat, Delhi Chief Minister Avind Kejriwal le union minister dang dang ho in jong panlah na ana nei uvin ahi.   Defence Minister Rajnath Singh makai na in jong defence lam a lamkai ho in jong jana pehna ana nei uvin ahi.

Xxxxxxxxxxxxxxxxxxx

Rajnath Singh in Russia a kholjin na nei ding

New Delhi, Sept 1: Union Defence minister Rajnath Singh in jing nikho le Russia lam jonna kholjinna nei na nei ding a vaikon doh na anei ding ahi. Minister pa hin kholjinna hi Shanghai Cooperation Organisation kihoukhomna a panlah na nei ding jeh a anei ahi akiti. Minister pa Russia sung a nit hum ahung kal son ding dan tahlangna ahung kinei in ahi. Hiche kholjin na ahi minister pa in Russia defence minister toh jong kihou na anei ding ahi akiti. SCO kihoukhomna hi India le china kikah a gamgi toh kisai a boina um jing lai a kibol ahi toh lhon a, gamteni minister teni hin kihou na anei ding ham tia thudoh kinei na achun kihou na umlouding dan hetsah na ahung kinei in ahi. Hetthei khatchu tukum ading a Defence Minister pa in Russia vilna anei hi ani vei channa ahintan, achesa June isim 24 a jong Victory day toh kisai a vilna ana nei ahitan ahi. Hetthei khat chu India le China boina jeh a SCO noi a military exercise kibol na jong India in panlah na nei tah louding a hetsah na ana nei u ahitan ahi.

Xxxxxxxxxxxxxxxxxxxxx

DM community college vesui ding umlou

Imphal, Sept 1(ET): Skill development toh kisai a themjil ho hetna pehding toh kisai a kisem DM Community college chu Nodal officer um lou toh lhon in academic process che lha theilou in aum in, aveusi ding le sesson kipat na ding tohgon ima aum thei pon ahi akiti.  Semester exam ho jong phonlou a kikoi le online class kibol tah loutoh lhon a simlai ho jong avai tham dan udaan le college sung kivaipoh na achop dan tahdan hetsah na ahung kinei in ahi. Maban a college che na ding dan tu channa tohgon ima aum loudan le kingon ima kibol lou jeh a maban a college kivaipoh ding dan lungdon aum tah dan hetsah na jong ahin nei uvin ahi. Community college a simlai ho in DM sung a department chom chom a lamkai ho ang a ahah sat nah o ule aboina ho u tahlang na anei jing vang uva tu channa koima in aboina u vetsui na le kithopina anei lou laid an u jong tahlang na ahung kinei in ahi. Hitabang a college sung vetsui na kinei lou le donlou a ki koi toh lhon a Education Minister in vetsui na le panlah na ahin neina ding in jong  DM community College simlai ho in temna ahin nei uvin ahi.

Xxxxxxxxxxxxxxxxxxxxxx

Beaularam a sample lahkhom na kinei

Tengnoupal, Sept 1(ET): Tengnoupal district sung a Beaularam khomun a covid-19 positive phabep ana um toh lhon in tuni in khosung a mipi ho test bolding in sample lahkhomna ana kinei in ahi. Hetthei khat chu khosung akon ahi mi 12 lam covid positive mudoh ana hiu ahi. Tengnoupal district chief medical officer Dr. Kh Gojen Singh vetsui na noi a Doctor 6 group 3 a kihom a hiche sample lahkhom na chu ana nei u ahi akiti. Hiche sample lahkhom na a palah na nei doctor ho chu Dr. Feiga Luckson, Dr. Moichi, DR. Kodiarson, Dr. Priyobharta, Dr, Morpham le Dr, Morung ahiuvin ahi. Tengnoupal district deputy commissioner akon thuso kimu dungjui in Tengnoupal district sung a um institutional quarantine centre um 8 ho kha ahi tah ding dan jong hetsah na ahung kinei in ahi.

Xxxxxxxxxxxxxxxxxx

Assam a PM-KISAN achanglou ding chang tamtah kihedoh

Guwahati, Sept 1: Assam sung a PM-KISAN chanvou chang mi lakh 9 lam ahilou lam tah a chang u ahidan hetdoh in ana um uvin ahi. Hiche scheme hi loubol ho ading a kibol ahin hinlah mitin in akibol dan hetdoh na ana nei uvin ahi.  State Agriculture minister Atul Bora akon thuso kimu chun asei na a loubol ho kithopina ding a centre in ana pohdoh scheme hi mi tamtah in ana kibol uva sum anakilah u hetdoh ahi toh lhon a kholchil na kinei dungjui a mi 9,39,146 lam matdoh ahidan jong tahlang na ana nei in ahi. Hetthei khatchu tu kum achesa June lha achu Union Agriculture ministry in Assam gamsung a hiche scheme hi ana kha uva, abol atam vaal toh lhon a loubol hi mong naovem tia kholchil na nei ding a state govt hetsah na ana nei u ahi.  Hiche thupeh toh kisai a Assam Chief Minister in kholchil na nei ding a thupeh ana nei toh lhon a chanvou chang lakh 9 lam chu hetdoh a ana um u ahi. State sung a district 33 lah a Barpeta sung a chanvou ahilou lamtah a chag atam pen in ahi akiti. Barpeta sung a loubol hilou a hiche scheme sum kilah hi mi lakh 1.51 lam alhing in ahi akiti. State sung a loubol lou a matdoh ana um lakh 9 lam matdoh ahijou in chanvou chang hi mi lakh 31.20 lam alhing nalai in ahi. Phatchom khat jou in centre in hiche ho lah achun mi lakh 3.17 lam kahlhah na ahin nei kit uvin hiche toh lhon in lakh 28 lam ahung lhing in ahi. Minister pa akonthuso kimu dungjui in hiche sum ana chang ho hin sum ahin le diu dan le gov tin sum ho anung lahding dan u tohgon anei ding dan u jong hetsah na ana nei in ahi. Hiche thu toh kisai in state government in district ni akon agriculture officer ni jong suspend ana bol tan ahi. Kholchil na kinei na a data operator khat jong suspend ana kibol in ahi.

xxxxxxxxxxxxxxxxxxxxxxxxxxxx

Thangkholet Kipgen lekha jih “Genevieve Thusimbu in Thadou” thenso hita

KANGPOKPI, SEPT. 1 (ET) : “Genevieve Thusimbu in Thadou” ti’a Thangkholet Kipgen in ana jih chu tunin Thangjakam Misao, Vice Chairman ADC-SH Kangpokpi in ama office mun’a thenso na ananeitan ahi. Kingon phatsung’a Thangjakam Misao in aseina’a vannoi’a kisei minthang thusim ipao a simthei ding’a ahung kiboldoh nachung’a akipa nathu aphongdoh in ahi. Chule lekha jih pao khantou na ahijeh in maban’a thusim ho jihbe jing angaidan jong atahlang in ahi.

Hiche toh lhon’a Thangkholet Kipgen in houlimna aneina’a Genevieve Thusim hi mijousen asimnom thusim le lungset umtah ahitoh lhon’a sappao (English) akon akisim teng agilna ahi ding bang’a akisimdoh thei lou jeh’a eima pao tah a simthei ding hi kana gelkhoh khat chu ahi. Chule Thadou pao in hiche thusim le hi umcheh jong leh tuchung’a pahi kikehlen’a kihil nathei thusim dang thum (3) toh kagopkhom’a kahin semdoh ahi. Hiche lekhabu thensona kingon achun Thadou Linguistic Research Forum (TLRF) Secretary Paominlun Lhouvum le MDC phabep injong pan anala in ahi.

xxxxxxxxxxxxxxxx

Nagaland a nikho 100 sung’a Covid +ve case 4,003 lhing; case thah 53 kimudohbe

KOHIMA, SEPT. 1 : Nagaland a nitin’a Covid-19 +ve case thah akimudoh jing toh lhon’a tunin jong case 53 anakimudoh kit in agom’a case 4003 alhing tan ahi. Akimudoh case thah hohi 674 sample test kibol na’a kon kimudoh ahi. Chule Nagaland a nikho 100 sung’a Covid-19 case 4000 akheltan ahi. Tuni kimudoh case thah 53 lah’a 29 hi traced contact akon, 11 hi armed force personnel, 8 hi returnee ho chuleh 5 hi frontline worker ho ahi. Chule traced contact a kimudoh +ve case 29 lah’a 16 hi Kohima akon chuleh 13 hi Mon akon ahi.

Hiche toh lhon’a armed force personnel 11 lah’a 9 hi Dimapur akon chule 2 hi Kohima akon, returnees 8 hohi abon’a Kohima akon chuleh frontline worker 5 jong hi Kohima akon ahi. Chule agom’a case 4,003 lah’a 1,703 hi armed force personnel ho, 1,268 hi returnee ho, 744 hi traced contact akon chuleh 288 hi frontline worker ho ahi.

xxxxxxxxxxxxxxxx

Tripura a nikho khat sung’a Covid-19 natna a mi 10 in thina toh; agom’a 112 lhingta

AGARTALA, SEPT. 1 : Tripura a Covid-19 natna jeh’a tuni (Sept. 1) nikho’a mi 10 thina anatoh toh lhon’a State sung’a ding’a nikho khat sung’a hiche natna jeh’a thina toh anatam nikhopen ahi naban’a agom’a 112 alhing tan ahi. Hetthei khat chu hiche mi 10 thina toh ho lah’a Tripura ading’a numei lah’a advocate sangpen Padma Dattagupta jong anapang in amahi Sunday nikho’a Covid-19 +ve ahi ana kihetdoh jou’a haina hahsat na anei jeh’a ajing (Sept. 1) nikho’a akijen na Gobin Ballabh Pant (GBP) Hospital mun’a thi ahi.

Hiche toh lhon’a Padma (55) hi lawyer lah’a ding’a Covid-19 virus a thina toh masapen khat jong ahi. Amahi All India Lawyer Union ding’a Tripura State Committee a Co-President kum 7 atuh in chule Women’s Commission and the Child Right’s Protection Commission a jong member khat ahi. Alangkhat’a amahin janni (Aug. 31) a haina lam’a hahsatna ananei jeh chun Agartala a private hospital a anakivetsah in hiche achun sample test abol nao’a Covid +ve ahi anahedoh uvin ahi. Chu jouvin GBP Hospital Covid-19 ward ICU a ana kikoi na’a kon damdoh jou talouva thina anato ahi.

Thulhut kimu dungjui’a Tripura a sample 2,71,876 test kibol nalah’a Covid-19 +ve case 11,647 aum in ahi. Chuleh nidan 24 sung’a case thah 321 jong anakimudoh in ahi akiti. Chule tuni chan’a Covid akon adamdoh mi 7,654 aum tan ahin mi 3,858 hi akijen jing lai’u ahi akiti.

xxxxxxxxxxxxxxxxxx

UP Bandal District a insung khat a mi 32 Covid-19 positive hi

Lucknow, SEPT. 1 : Uttar Pradesh, Banda District hopsung Phuta Kuan akon vengsung khat’a chengkhom insungmi mi 32 Covid-19 +ve ahi tin thulhut chun aseiyin ahi. Chief Medical Officer (CMO) ND Sharma in aseina’a hiche District hopsung’a Monday nilhah lam chun Covid-19 natna nei mi 44 anakimudoh in hiche lah’a chun hiche insungmi mi 32 jong hi apang in ahi ati. Ahin insung mite hi inn chom chom’a um hi jong leh tu’a ding in quarantined a akikoitan ahi ati. Alangkhat’a CMO in aseibena’a District sung’a Covid-19 +ve case 807 lah’a mi 439 discharged akibol tan, mi 8 in thina atoh in chuleh active case 360 aum nalai in ahi ati.

xxxxxxxxxxxxxxxx

Imphal East District ding’a Rashtriya Poshang Maah 2020 hondoh hita

IMPHAL, SEPT. 1 (ET): Poshang Abhiyaan Scheme noi’a Rashtriya Poshang Maah 2020 chu tunin Imphal East District ading in Dr. Rangitabali Waikhom, Deputy Commissioner, Imphal East in officer leh staff phabep panna in ama office mun’a hondoh na ananei tan ahi. Hiche Scheme hin atup pipen chu India a free malnutrition hisah ding ahitoh lhon’a hiche kingon hi Sept. nisim 1 akon 30 chan chelha ding ahi.

Hiche toh lhon’a tukum hiche kingon in adoipi pen ding hi SAM (Seven Acute Malnutrition) Children ho kholdoh ding chuleh hetdoh ding ti ahinaban’a AWCs (Community land and at homes) jouse a kitchen garden promotion bol nading’a plantation drive bol ding ti ahi. Ahin tulai pandemic jeh hin kingon chu digital mode joh in achelhan ahi.

xxxxxxxxxxxxxxxx

India sung’a amasapen ding’a RIMS mun’a Sports Midicine Dept. kihongdoh

Imphal, Sept 1(ET): India sung’a amasapen’a ding’a Regional Institute of Medical Sciences (RIMS) in tunin Sports Medicine Department hondoh na ananei tan ahi. RIMS akon Media Advisor in aseina’a Prof. Y. Nandabir Singh vetsui nanoi’a PMR complex mun’a Sport medicine ding’a OPD akihondoh in ahi. Chuleh hiche Sport medicine kihongdoh hi Ministry of Youth Affairs and Sports, Govt. of India noi’a India sung’a ding’a RIMS mun’a kihongdoh masapen ahi ati.

Hiche toh lhon’a tule tu dinmun’a ding’a Dr. Nandabir, Dr. Ph. Bhupesh leh Dr. Y. Ninghthemba ho cheng hi consultant hiding chuleh OPD hapta sung’a vahchanni (Wednesday) tailou adang sung se kihong ding ajeh chu vahchanni leh operation bol ding ho bou abol ding’u ahi.

Xxxxxxxxxxxxxxxxx

NPP in Founder President PA Sangma pen nikho nit

IMPHAL, SEPT 1(ET): BJP led Government toh coalition nei NPP in tunin National Peoples Party (NPP) founder President PA Sangma 73rd Birth Anniversary nitna office thah Uripok Assembly Constituency, Naoremthong mun’a ananei in ahi. Kingon phatsung’a interim President NPP Minister N Kyasii in aseina’a mi kimkha in party activitie ho daltan go jong leh kisuhat go jing ding ahi. Chule pha masa’a office bearer a boina ana um jong hiche chun party function na asuhkhah lou ding ahi ati.

xxxxxxxxxxxxxxxx

AMUCO in Chassad kho ding’a relief material KKL CCpur khut’a anapelut

IMPHAL, SEPT 1(ET): All Manipur United Club Organisation (AMUCO) in Chassad kho kithopi na ding in tunin ann-chang, dal leh chi ho Kuki Khanglai Lawmpi (KKL), CCpur khut’a anapelut uvin ahi. Hiche relief material hochu AMUCO President Pheiroijam Nando Luwang leh General Secy. Thoithoi Khuman in KKL CCpur President leh General Secy. khut’a anape lut in ahi.

Hetthei khat chu achesa March nisim 16 nikho’a Kamjong District hopsung Chassad kho inn 150 val Tangkhul ten anahal lhah nao chung’a tun khosung mipi hon um na ding inn mun neilouvin aum gam tauvin ahi. Hiche thilsoh chung’a Chief Minister in kholchilna nei ding in member 3 jaona enquiry commission asemdoh in ahin tuni chan’a thilsoh nachung’a mona nei koima matdoh in aum hih lai in ahi.