Maipha vetna leh mi seiman’a kibol

Maipha vetna leh mi seiman’a kibol

182
0
SHARE

Maipha vetna leh mi seiman’a kibol

                                   Tuchung anga veichanna ‘5th ‘International Yoga Day’ kimanto lhon’in vannoi muntin hihih jongleh India sung’a mun tamjoa vang anikho nitna ana kimangin Yoga ipi ahi phate helou honjong anabol saosaove. Manipur a jong Chief Minister lamkainan MLA/Minister leh govt officer honjong Yoga ana bol’e. Atamjo chu pu thu nitna a bollou phamo tia bol hidi ahi. Ajeh chu Yoga hi tahsa le lhagao (lung kicholna) exercise khat ahijeh in Yoga nikho ahi tia gahboljap maimaija phachomdi hilouhel ahi. Yoga hi niseh lom hihih jongleh ijochan’a phatseh a boljingdia phatah khat hithou ahi. Prime Minister Modi jong Yoga bolna a apanleh milun dang dang jong tanom tah dan’a pang ahi. Maipha vetna leh min moldi ahi timan’a boldi kiti hi ipi hileh aphatchomna umlou ahi. Yoga hi exercise phatah ahito lhon’a mihil oja phatah noija boldi ahibouvin Yoga nikho ahi ti maimai jeh a bol chu Yoga minthansahna dia milun ho jaona a kibol ahingal louleh tahsa lhagaova dia aphatchomna umloudi ahi. Yoga hi India a ana kipandoh thepna khat ahijeh a 2014 kum’a Centre a BJP hon govt ahinsem uva kon kum sung’a nikho khat hi vannoi jin Yoga nikho tia anitna hetna aneidi ti  Modi govt nin ahinboileh adeitah u nikho, kum sunga nikho saopen nikho June 21 ahinmu nahlai u ahi. Yoga hi Hindu Philosophy leh houthu to kimatna aneije tia thi hotna hotloi leh demloi jong aum’in adeimo ho dia deimo thei ahina chan jong umthou ahi. Ajeh chu Yoga anapandoh ho chu Hindu te leh Hindu hou gut ho anahi jeh uva Hindu hou toh akimatna jat khat um mama ahi. Ahin tahsa damtheina dia tahsa nemna leh haidan, hui hiplutdan (Stretching and breathing exercise)    Yoga a kibol hi ipi hou jui hileh abol jouse dia pha/damtheina ahi. Tahsa leh lunggel ahatval teng kicholdona a touthim beh ham, thalnga lang’a lup thim beh a tahsa le lunggel kicholdona hi Yoga a um ahin hiche petna khu Christian ihileh ipakai ipathen gel’a taona iman jongleh thakhat hidi ahi. Ajeh chu hitobang thipbeh a um’a lunggel khu ‘meditation’ kiti, taona manpet, pathen gelpet kiti to kibang veve ahi.

                          Ima asuh asah hechenlou, abolkha lou hon Yoga hi Hindu hou ahi tia moh thet jong dihdehlou maithei ahi. Yoga a kibol ho eima tahsa le lunggel dia phachom ho ibol’a pathen  ideidei iki hou jongle khohlouhel di ahi. Yoga bolman’a Hindu kisohdi, Hindu ho bolbol bol kihidehloudi ahi. Tulai vannoi leiset a mihem te hi sun le jan’a kicholdo manlouva natoh, sumholna a akisahlel jeh uva tahsa leh lunggel natna jatjat nin alhunkhum u ahitah jeh a hitobang natna hoa kon damna dia phapen loija kisei lah a Yoga hi khat ahi. Hiche jeh a India a kon Yoga them ho mihil dia gamdang’a kouva um uva sum jong tamtah tah alo u ahi. Gamdang’a kon Yoga jil dia India a hung loi, chomkhat Yoga bol dia hungloi tam ahi. Aphatchomna hetdoh ahijeh a vannoi jin kum sung’a nikho khat hi Yoga nikho a neidi ti hung umdoh ahi. BJP hon Hindu hou le chondan adopsang got jingnalam uva Yoga jong hadopsang chehdi atiu jong hinante. Ahin Yoga a hi Hindu, Muslim, Christian thu umlou, phatah a bol hon tahsa le lunggel damtheina a vang anei u ahi.