Maharashtra gam a sorkar akisem theilou jeh a Presidents Rule kikoi ta;...

Maharashtra gam a sorkar akisem theilou jeh a Presidents Rule kikoi ta; Kuki Black Day Janglum song KIC Complex mun’a kitung fencing leh gate PS Haokip, President KNO hondohna nanei

232
0
SHARE

Maharashtra gam a sorkar akisem theilou jeh a Presidents Rule kikoi ta

 New Delhi, Nov 12 (ET): Maharashtra Governor Bhagat Singh Koshyari in recommend abolna report apetlut  President Ram Nath Kovind in phatsahna anei jou Tuesday nikhon Maharashtra gam a President’s Rule akichepi pan tan ahi.

Nikho kipat til a Governor Koshyari in President henga report apehna a party alen (major party) li- Bharatiya Janata Party (BJP), Shiv Sena, leh National Congress Party (NCP) in sorkar sem na dinga pan alah theilou jeh a Maharashtra gam a President’s Rule chepi ding ahi, tia asei ahi. “Ni 15 achetan, sorkar semthei party khatcha kamu poi”, ati ahi.

Sorkar kisemna dinga bol thei chan kabol ahi’in, ahivanga tu dinmun a sorkar det akisemdoh nading umthei lou ahi, ati. Maharashtra Assembly hi kisumang (suspend) kibol ahitai. Lha gup lhing gamsunga President’s Rule kichepi ding ahi’in, ahivanga aphat alhin masanga jong kiladoh thei ahi. Achesa Tuesday nikho a Union Cabinet injong Maharashtra gam a President’s Rule chepi dinga recommendation apeh ahi.

Governor in recommendation apeh jouva Ministry of Home Affairs (MHA) in hiche thu a President Kovind office in soi akai dinga file athot ahi. Kal kichaiya Governor in gamsunga single largest party hi a BJP in sorkar asem dinga kouna apeh ahi’in, ahivanga BJP in ‘minority government’ asemnom loujeh a anasan peh lou ahi.

Hiche jouva Governor in sorkar sem dinga Shiv Sena kouna apeh a nidan 24 sunga donbutna apeh diuva asei ahi. Monday nikho a Governor Koshyari in Shiv Sena delegate ho akimupi na’a, pary in sorkar asem nom thu aseiya ahivanga Congress leh NCP ho a kon tosotna lekhathot apehna dinga nithum phat athum ahi. Ngehna hi Governor in san peh talouva NCP in sorkar asem dinga kouna apeh a, Tuesday jan nidan 8.30 chan phat ateppeh kit ahi.

NCP leh akiloikhompi Congress kah a boina aumjeh a tosotna amu vahding hi tahsanna umlou ahi. Alangkhat a Shiv Sena hon Tuesday nikho a Supreme Court in ‘deadline’ phat suhsah dinga anop pehlou thu a ngehna anei uvin ahi. Member 288 umna Maharashtra Assembly election result hi achesa October 24 nikho a kiphong ahitai. NDA alliance majority hi ahi’in, BJP in seat 105 chule Shiv Sena in seat 56 amu ahi. NCP in seat 54 chule Congress in seat 44 anei ahi.

Chapang kum ijat hijong leh thaneina anei soh kei uve: Governor

Imphal, Nov. 12 (ET): Chapang jouse numei hi le pasal hile ipi kum hiu le thanei na anei soh keu uvin ahi tin  Manipur Governor Dr. Najma A. Heptullah in ana sei in ahi. Hiche thu chu a 8th  vei channa  Manipur Commission for Protection of Childs Rights (MCPCR) doundation day kiman na a jin gun a ana pan na a Governor nu in ana sei ahi.  MCPCR foundation chu “Children of today, our keepers’ tomorrow” kiti thupi noi a Old High Court Complex, North AOC mun a ana kimang ahi. Governor in kingon a ahou limna a chapang ho in thanei na hi alen ho toh kibang in anei uvin, hiche toh kilhon a angai chat adei chat ho u phate cha a vetsui peh ding ahi ati. MCPCR hin akiphudoh apat a gamsung a chapang ho ventup na ahin nei jing dan thu jong Governor nu in tahlang na ananei in ahi. Commission tup le doi hi chapang ho hinkho man dan vet tup le thil phalou ho akon veng tup ding ahi toh lhon a maban a jong chapang ho chin tup na a natoh na ahin nei jing ding uvin jong Governor nu in temna jong ana nei in ahi. Governor in Manipur Governor ding a ahung lhun til a numei chapang kisuse le kithat ana tam toh lhon a kidang ana sah dan asei toh lhon in tu kum khat le ni sung a hotabang na toh commission hapan na jal a ahung dai tah dan jong ana sei in ahi. Commission makei na noi a kiloikhomna jat chom chom cheh in mipi hotoh kitho a chapang ho chintup na ding a pan nasatah a alah na chung a kipa thuseina jong ana nei in ahi.  Chapang chung a khanset na nei ho hi dan toh kitoh a gotna a phate cha a peh ding ahi tin jong Governor in ana sei in ahi.  Social Welfare Minister  Nemcha Kipgen in ahou limna a commission in chapang ho huhdoh na ding a adin mun ape chah ding uvin temna ahin nei toh lhon in hou le nam ho jeh a kit het na umlou a chapang ho ahi ding bang tah a vetsui na le kithopina peh ahi na ding in jong temna ananei in ahi.

Member of Parliament Dr. R. K Ranjan Singh in ahou limna a nam sung a aneo pen a mipi ho in chapang ho thanei na le chan ding dol phate a hetpeh na le vetsui na anei u angai dan ana sei in ahi. Chapang ho kum don lai a insung mi le society in phate cha a asin ji dan ahet a athanei na u apeh cheh ding u ngaichat na lenpen ahi dan jong ana sei in ahi. Leiset chung a hin chapang million 300 val athanei na akipe pon chuleh Manipur sung a jong hi gamsung boi jeh a chapang ho lungthim hi pohdoh tah sang a kilah doh peh dan in aum in,  hiche ho hi gamsung hui nun hoi lou jeh ahi ati. United Nation in thupeh anei bang a kholai le insung a chapang chung a umchan le khanchan phate c avelvet na akinei jing na ding in jong MP pa in temna ana nei in ahi. Police in chapang akisuse ahi lou le aki engbol ato khah le chapang hou a akihou pi ding u chuleh tijat sah lou a lung dam sel leh nem tah a kihou limpi na anei na ding uvin jong hetsah na ahin nei in ahi. Chairperson, MCPCR Sumatibala Ningthoujam le Director, Social Welfare Uttam Singh in jong kingon a chun panlah na ana nei lhon in ahi.

Kuki Black Day Janglum song KIC Complex mun’a kitung fencing leh gate PS Haokip, President KNO hondohna nanei

B.Lalboi Gangte

CCpur. Nov. 12 (ET) : National Socialist Council of Nagalim (NSCN-IM) in 1992 – 1997 kum chan’a Manipur State le Nagaland State sung’a Kuki te gam leiset deichat na jeh’a mit phet kah lou’a suhmang ding tohgon anei nao’a nu nao chapang jao nan mi 1157 NSCN-IM Tangkul  lamkai na’a ana tha nao chungthu tuni chan’a athat ho chung’a thutan na achelhah lou naban’a Kuki Nam miten 1992 kum akipat 13 Sept. nikho hi Sahnit-Ni (Kuki Black Day) tin kumseh leh mollem saho geldoh naleh jaabol na akinei jing in ahi. Chuleh athi ho sumil louva geldoh leh jabol na Kuki Nam mite apeh jing’u vetsah na in mi 1157 ho min kijih na Janglum Song Kuki Nam miten simdoh thei ding leh a-itih’a mangta lou ding Kuki Inpi, Comlex Tuibong mun’a Janglum Song thum kitung doh chu Kuki Inpi Churachandpur District in Kuki Black Day Monolith Fencing leh Gate asem’u jotheng ahitoh lhon’a tunin hondoh na ana kinei tan ahi.

Hiche toh lhon’a kingon phatsung’a Kuki Black Day Janglum song kitun na Fencing leh gate hondoh na PS Haokip, President KNO in anei in chuleh Khaibong Haokip, KIC in Pathen heng’a lhandoh na ananei in ahi. Kingon achun Kuki Inpi-CCpur Members ho, Kuki Chief Association,  Kuki Khanglai Lawmpi, Kuki Students Organisation, Thadou Kuki Students Union, Kuki Women Union, Kuki Women Organisation for human Right  lamkai ho leh member ho jousen pan anala uvin ahi. Hetthei khat chu  thina anatoh mi 1157  ho min kijih na Lumsong  thum ho chu Haojakam Chongloi, Former President, KIM, Khorsing Teron, Chairman JACAS, Diphu, Assam leh Ongyun Miao, Secretary, Singpho Dev. Society hon achesa Sept, 11, 2018 nikho’a  ana hondohsa’u ahitai.

Naga Mother’s Association hon Imphal a mipi kiloikhomna ho kimupi, Manipur le Nagaland kah a cham le monna umding adeisahna phongdoh uh

Imphal, Nov 12 (ET):  Nagaland a pansa Naga Mothers Association (NMA) hon Naga thu a Manipur mipi lungsat laitah in tuni chun Manipur numei kiloikhom ho le Coordinating Committee on Manipur Integrity (COCOMI) lamkai ho toh kimuto na anei un ahi.

NMA thalheng lamkai mi 6 ho chu jannilhah a Imphal hunglhung uva COCOMI lamkai ho le numei thalheng ho toh thipbeh cha Classic Hotel a kihouna anei u ahi.

NMA president Abei-u Imeru in asei na ah ipi soh jong le Manipur le Nagaland mipi kah a kingailutna umsah jing ding chu tuchung Manipur kahung kalson u tup le doi khat chu ahi in chule Manipur ‘Meira Paibis’ ho toh phatsot a pat kiheto sa akihiban a 2013 kum a jong ‘Lifetime Peace Award’ jong ana kisang khom ahi in, nu khat hinadol a khat le khat chamdel a kingailut ding hi khohsah pen ding ahi e, ati.

NMA president in kihouna chu anom in lunglhai aum in, Manipur mipi lungling lao na ho Nagaland mipi kom kalhut tei diu ahi e, ati.

NMA Advisor Dr. Rosemary in chadel a in heng khat hina chenkhom ding thu kihoukhomna ban a numei ho genthei hahsatna thu le Naga thu seilhap na ipi lhung jong le sah le lhang hinadol a chamdel a chengkhom ding in jong tepna aneikit e.

Rosemary in aseikit na ah Naga thu seilhap ding hi GoI in athanop pi angai in ahivang in GoI palai RN Ravi in thuchom chom asei jing in nasatah a kei ho jong eilungdon sah u ahi e, ati.

Indo-Naga Peace Talk toh kisai’a CM N. Biren in ama Secretariat a Press Conference bol; Gamsung mipi hon Govt. atahsan ding a sei

Imphal, Nov 11 (ET):  Chief Minister N. Biren in tunin ama Secretariat ah Press Conference anabol na’a Indo- Naga Peace talk toh kisai’a Manipur kipumkhatna kitongkha lou ding in Centre lamkai hon avel in ahinsei kit utoh lhon’a gamsung mipiten Government chung’a tahsan lal na aneilou ding uvin temna ananei in ahi. Chuleh Framework Agreement kithulhuhna ahung kiseiging nachung’a gamsung mipite lung opkai naleh lung asou bang’a thunei vaihom ho lungsung jong asou toh lhon’a Manipur kipumkhatna huhbitna ding’a jochan’a pan kila jing ding ahi ati.

Aman aseibe na’a masang’a chun Manipur kipumkhatna kisukeh theilou ding ahi tin kithulhuhna 12 lang kilungtoh tah in ana kilakhom in chuleh hiche chung thu’a  All Political Party team khat in jong Centre agano khatan ati. Chuleh Union Home Minister in jong Manipur territorial Boundary kitongkha louding ahi ti’a akamcheng tah’a asei naban’a kithulhuh naho chung’a soi kikai masang’a stakeholder hotoh kihouna jong kinei masa ding ahi tin jong anopna anape in ahi ati. State Government in Centre chung’a tahsan na akinei bang in gamsung mipi ten jong tahsan na nei’u hen tin temna anei in ahi. Gamsung’a ding’a golnop thupi Sangai Festival a pan lading’a gampam mi hung kholjin ahi jeh in festival phatsung’a boina aum louna tei ding’a amitakip in lunggel anei cheh ding uvin temna jong anei in ahi. Hiche toh lhon’a Social Media dung’a jong khat lunghan nathei ding thu le la ho seilou ding leh social media jeh’a kinah kiboi sosah lou ding in Chief Minister in mipite temna anei in ahi.

Union Home Minister in gamsung’a All Political Party team leh CSO ho heng’a Manipur gamsung kitongkha louding ahi ti’a akamcheng jong kicheh tah in apetan chuleh hiche thu hi PIB akon  in jong jih tho in jong ahinpe tan ahi. Janhi (Nov. 11) jong chun RN Ravi in Silchar a Peace Talk toh kisai in Constitution leh Nagalim kiti pang em tin thudoh abol naban’a hiche thu cheng hi pang theilou ding ahi ti’a masang’a kanaseisa jong ahitai ati.

COCOMI lamkai na CSO hotoh jong kihouna nei ding tohgon akinei nalai in chuleh kihoukhom tengle State Government toh itobang thu seiding ham tiho seikhom masat’a pha ahi toh lhon’a akinthei lam’a CSO hotoh kimuto na ding’a thu hung kipe ding ahi tinjong aseibei.