Lungsetna beihel leh gimneitah a kithana

Lungsetna beihel leh gimneitah a kithana

340
0
SHARE

  Achesa September 19/20 nikhoa Tuibong Canaan veng’a kon kum 30 vel’a tah (upa) Henkholen Mate @ Michael “melse tah-a kithana” thua lungphatmona thuphon kibolna ho chu ivetleh “lungsetna beihel’in akithat’e” ti ngen ahi. Eilah a kitha hi lungset jeh-a kithat umlou ahi. Ahin ipi atileh “lungsetna beihel’in akithatne” kiti umjingham ti hi ajeh um ahi. Kitha kitijongleh kigimboltah jouva kithat leh melsetah-a kithat hohi lungsetna beihel a kithat ho tinadan ahi. Henkholen Mate chu akhut a-elkalepma kikan’a alol ki-at ahijeh-a “lungsetna beihel’a kithat” tia demna leh lungphatmona thuphon um ahi. Chuleh hitobang kithana hi mithat hon abolgot mong-mong tina jong hi; lunghan jeh-a voh kiticha voh nalam’a thilo kha jong hilou ahijeh-a “lungsetna beihel’a kithat” kiti jong hidi ahi. Mi khat chu thichan gotna kipe ahitah jongleh akithatpa thohgimna umbehlou leh melse behlouva achung’a natoh umthei jong tina ahi. Akhut akeng kikan’a alol- ki-at kiti hi “gancha bol’a kibolna leh lungsetna beihel’a kithana” kiti chu hidi ahi. Muslim thingnoi kiloikhomna ISIS hon mi kichat leh tijatna dia amimat ho u akhut akeng akanpeh uva ahing chang’a alol a-at u, hijong chu lim alah utoh Video record abol utoh hibang soh uva alimlah uleh Video record ho chu vannoi mipi mudia tulai Social Media hoa atahleleu ahi. Ahin ISIS thingnoimi hohin hitobang mihem hina bei thilbol hi amaho natoh leh khutnung ahidan ho aphon jiuva athilbol u ajeh jong aphontha jiu ahi. Hichu mi suhgichatna di leh gihna a abol ujong ahi. Eiho gam/eiho lah-a kitha melse leh gimnei hohi abolho kiphon malah ahithei chan’a ki im-mang jiu, kilep theichan’a kilep jiu ahi. Hiche jeh-a hi mi meisan thilbol tia demna umji ahi. Lungsetna beihel leh melse tah-a kithana bol hi hi govt jong um ahi. Ningkum lang chakhat chun North Korea Dictator President pu in adinmun chu’a aginmo apaneo (uncle) ngel-ngel jong uicha hang kihen hon lah-a ahing chang’a alelutna amaltelsah, hichu a Cabinet hotoh tou uva laam vetna avet u ahi. Hiche hohi mihem kibolna bei leh lungsetna kiti umlouva kithana ahi.

  Lungsetna pum’a kithana kiti jong umthou ahi. Hichu sap pao (English) a “Euthanasia/Mercy killing” kiti, vannoi leisetna govt ho aphal umlou ahi. Gam khangtou America ajong mithat miman gimneitah hojong thinachan gotna apieh teng uleh thina thei lou (injection) akap uva athilamcha jong helou khop’a um ahi. Mharasthra a kum 40 lang hospital’a chatmoa um Nurse Aruna Shanbaug chu athohgim na sotvalta, adamdohna di thu jong umtalou ahijeh-a Court in “lungset jeh a thana” (mercy killing) thupeh ananeiya ningkum (2015) a “ana kithatdoh” ahi. Hiche hi daan in apahllou ahijeh-a kinielna tamtah jong ana um ahi. Eiho lah-a lungsetna beijin akithatne kiti hi lungsetna aumnahleh kithana umloudi ahijeh in athu kimandan hi dihtheiloujo ahi.