Lou a man dinga Kaani ahilouleh Kaanja lei bol ho license peh...

Lou a man dinga Kaani ahilouleh Kaanja lei bol ho license peh ding ahi tia MLA Surchandra in sei

191
0
SHARE

Lou a man dinga Kaani ahilouleh Kaanja lei bol ho license peh ding ahi tia MLA Surchandra in sei

Imphal, Feb 16(ET): VC’s Court Hall, Manipur University a tunin ‘One Day International Workshop on Alternative Plants for Opium’ kin amang uvin ahi.

Workshop hi Department of Forestry and Science, Manipur University, Canchipur leh South East Asia Centre for Agricultural Sciences and Humanities (SEACASH) in Apunba Imagi Machasing (AIMS), Manipur chule Marjing Industries Private Limited, Imphal noiya agon ahi.

“Neilou loubol mihon kani lei abol lou diuva akikha hibou alampi ahipon, hiche khel a abol diu gon peh ding ahilouleh asum muna diu natoh gonpeh ding ahi”, tin workshop inaugural session a chief guest a pang MLA Yengkhom Surchandra Singh in aseiyin ahi. Kani ahilouleh kanja hi lou semna a akiman theiya ahileh sorkar in pharmaceutical company hotoh lou semna dinga kihouna aneiya alei bol ho licence apeh a abolsah theiyu ahi’in, hiche hi society leh alei bol ho phatchomna hiding ahi, tin MLA pa in aseiyin ahi.

Th Brinda Addl SP, Narcotic and Affairs of Border in ngaidan kisei atosotna thu aseiyin ahi. Yambem Laba, senior journalist in khamnathei a kivei ho gotna pehna dinga CBI hon pan alah phat ahitai, tin aseiyin chule min abol ding jahda ding hojoh khamnatheiya kiveiya ibol a pang u hitam, ati.

Achesa kum 30 sung Myanmar a atokhah ho thu Yataku Agatsuma, Chairman in aseiyin, kani lei khel a lengpithei, coffee ahilouleh ginseng lei ho bol thei ahi, ati. Pradip Phanjoubam, Editor, FPSJ, Review of Arts and Politics in ahoulimna a sorkar in khamnathei kijohna market len ho akholdoh a akha angaiye, ati.

Gamsunga kani lei kibol thu Dr H Birakumar Singh, Senior principal scientist, CSIR-NEIST, Imphal in aseiyin, sorkar in kani lei khel a bol ding lou a kimang chule anam twi ho, lemon grass leh citronella chule adang dang abol thei ahi, tin aseiyin ahi.

Workshop a MLA L.Radhakishore Singh, Prof. Amar Yumnam, L. Meghachandra , Principal Scientist ICAR – RC NEC, chule Japan gam a kon scientist leh academician adang dang jong apang uvin ahi.

China gam Wuhan akon hung kile India gammi 406 ho test result negative ahisoh toh lhon a achennao cheh a soldoh hita

New Delhi, Feb 16: Official thuso khat in aseina achun India gammi China khopi Wuhan a um mi 406 ho Corona natna avei uleh veilou hetdoh nading a Indo Tibetan Border Police (ITBP) ho vetsui nanoiya umho test result lahdoh ahitoh lhon in khatcha hiche natvei aum pouvin abannei cha a achenn nau kijotsah ding ahitai tin thulhut chun asei in ahi. Union Harsh Minister Harsh Vardhan in aseina achun Manesar leh ITBP a umho test akibolsoh kei in abon uvin Negative ahisoh kei uvin chule India gamsung a ding in hiche natvei mithum aum in abon uvin Kerala mi ahiu vin tuni chan in mi ni adamdoh tai ati.

January lha a China akon India gammi hungdoh ho umna ding a Manesar leh ITBP camp agong uvin hiche achun result ho aki hetdoh kahse kitupsel in akoichom uvin hiche mun achun ITBP leh Safdurjang hospital a doctor hon duty abol uvin ahi. Hiche mun a umho natvei akihetdoh lou jeh in abannei cha a Monday akon kilhadon panding ahitai tin thusoh chun asei in ahi.

AAP Chief Arvind Kejriwal in thumvei channa Delhi Chief Minister dinga kihahselna nei; Cabinet Minister dinga mi 6 in jong kihalselna nei

New Delhi, Feb 16: Aam Aadmi Party (AAP) chief Arvind Kejriwal in Sunday nikhon Delhi khopi a um Ramlila Maidan mun a term thum kijomna dinga Delhi Chief Minister panmun tuh dinga kihahselna anei tan ahi.

Kejriwal tilouva sorkar masa a minister 6- Manish Sisodia, Satyendar Jain, Gopal Rai, Kailash Gahlot, Imran Hussain leh Rajendra Gautam injong Delhi government a Minister dinga kihahselna anei uvin ahi. “Delhi kakipah e’ kiti banner leh Kejriwal poster tamtah Saturday nikho a Ramlila Maidan mun a atahdoh u ahi.

Chief Minister Kejriwal in atoson ho henga ahoulimna’a, goljona kanei hi Delhi mite goljona ahi, tin aseiyin chule achesa kum 5 sunga Delhites ho kipana dinga bou na katoh ahi, ati. “Election akichai tan, koi vote pe jong leuchun akhohpon, Delhi mite jouse ka insung ahi. Hou, party, jat leh nam khenchom louva mi jouse dinga na katoh ding, koima kachomkhen louding ahi. BJP leh Congress toson ho dinga jong CM kahiding ahi”, tin aseibe in ahi.

Election campaign sunga demna thu sei jouse kangaidam uve, tin aseiyin chuletuchung a hi lamlen pha, numei ho lungmonna ding, nehguh umlouna natoh gamsung mihon apat ahitai, ati. PM Modi jong kouna kapeh ahi’in, ahivanga ahung theipon, hijongleh Delhi hi ‘best state’ ahina ding aka lungtup kamolso nadinga phatthei eiboh ding kadeiye”, tin jong aseiyin ahi.

AAP lamkai Manish Sisodia pannan Party lamkai 5 in jong cabinet dingin kihahsel na ananei uvin ahi. Cabinet ding ding’a kihahselna neiho chu, Sisodia, Satyender, Jain, Gopal Rai, Kailash Gehlot, Imran Hussain leh Rajendra Gautama ho ahi.

PM Modi in ama constituency Varanasi a kin aneijeh a pang theilou ahi. Achesa kum 5 sunga khopi khantouna dinga kithopina neiya ‘Delhi ke Nirmata’ hi a midang 50 vel jong Kejriwal in kouna apeh ahi. Kouna kipe holah a tennis player Sumit Nagal, Delhi government school simlai leh IITian Vijay Kumar, mohalla clinic doctor Alka, bike ambulance service offcer Yudhishtir Rathee, night shelter caretaker Shabina Naaz, bus marshall Arun Kumar, Signature bridge architect Ratan Jamshed Batliboi leh metro pilot Nidhi Gupta jong pang ahi.

AAP in tu naicha a kibol election a seat 70 lah a seat 62 a goljona aneiya, BJP in seat get bou amu a anichanna a pang a chule Congress in seat khat jong amujou kit lou ahi.

Union Budget hin gamsung miho khohsahna apehlou ahi: Sotinkumar

Imphal, Feb 16(ET): Manipur Communist Party of India (CPI) in Irawat Bhawan, Imphal khopi a Sunday nikhon kiphinna abol uvin, Left party hon February nisim 12 ni a Union Budget 2020-21 douna a kiphinna gamsung jouse a bol dinga asei toh kitoh a abol u ahi.

Finance Minister Nirmala Sitharaman in budget apeh hi mipi douna (anti-people) ahi, ajeh chu milham ho sanga corporate sector dopsang ding gelkhohna apeh joh u ahi, tin CPI state secretary L Sotinkumar in thuso miho henga aseiyin ahi.

Union Budget 2020-21 hi achom chom in demna sangtah anei ahi’in, economicall backward group ho sum a kithopina kipe asulhom uve, tia aseiyu ahi. “Neh leh chah a subsidy kipehna hatah a nemsuh a, health, urban development, Mahatma Gandhi National Rural Employment Guarantee Scheme, social welfare, farming, schedule tribe and schedule caste a sum sanction kibol hatah a nemsuh ahi”, ati.

Corporate house tamtah loan sa louva aum uvin, ahivanga tua sorkar in ‘Non-Performing Asset’ angaijang ahi, tin Sotinkumar in aseiyin chule Modi sorkar in corporate house ho tosotna dinga Indian Economy asuhset ahi, ati. Loan angaidam uhi amaho thil ahipon, gamsung mihon hahsatah a alo doh ahi, ati.

Budget a gamsung economy semphat nading thu apangpoi, tin CPI lamkai pa in aseiyin, gamsung in hahsatna lentah ato vanga sorkar in budget a agelpeh lou ahi. Mipi douna a kisem budget deilouna thu seina ding phat ahi, tin aseiyin ahilouleh gamsung khonung boi ding ahi, ati. Gamsung mihon atosot diuvin temna aneibe in ahi.

Kal lhung a kiphinna kigong hi February nisim 18 chan abol diu ahi.

Japan-Manipur Agri Meet 2020 kin kimang; Manipur hi loubol miho dinga vangam ahi, tia MLA Dr. Radheshyam in sei

Imphal, Feb. 16(UNA): 2nd World War Imphal Campaign Foundation in Sunday nikhon Classic Grande conference hall mun a Japan-Manipur Agri Meet 2020 hondohna kin gon a ‘Imphal Campaign Talks’ 6th edition abol uvin ahi.

Kin gon a MANIDCO leh Manitron Chairman leh MLA Dr. Radheshyam Yumnam chief guest a apang in, Deputy Director, DIPR Ashok Lairen President a apang in chule Chief Strategy Officer Satoshi Nagata, SAGRI Tokyo Guest of honour a apang in ahi.

Kin kipat na a Japan-Manipur Agriculture Meet 2020 hondohna anei uvin, SAGRI Tokyo representative ho apang uvin chule ‘advance Agri-Technology gelkhohna leh loubol miho boltheina lentah hetdoh nadinga kithopina chom chom peh dinga asei uvin, Centre sorkar tohgon Act East Policy noiya gamsung kimanchah machal sah nadinga kithopina ahi.

Dr. Radheshyam in manchah khangtou tah tah (hi-tech facility) ho agriculture sector a man ding athanopna thu aseiyin chule loubol miho damtheina ding, sum mu nading leh lousoh ga atam nading thu aseiyin ahi. Kin kibol hin loubol miho machal nadinga sangtah a akithopi ding ahi, tin jong aseiyin ahi.

Agriculture hi mihem natoh masapen ahi’in, loubol miho hi tukhang technology, practice leh loubol dan (method) thah thah ho pohdoh peh ding ahi, ati. Organic thil hoi ga so nadinga financing leh marketing kitup ngai ahi’in, hiche B2B model of business a hi platform kibang cheh kipe ahi, tin aseiyin chule loubol mi jousen amaho phatchomna ding hitobang program ho a pan alah diuvin temna aneiyin ahi.

‘Manipur hi Farmers’ Paradise’ ahi, tin aseibe in ahi. Santoshi Nagata, SAGRI Tokyo in ahoulimna a 2nd World War a Battle of Imphal a ahinkho pedoh a sepai jouse ajana leh achung uva akipana thu aseiyin ahi. Satellite imagery leh monitor mangcha a soil testing method bol a ‘fertiliser level’ khol nading manchah thah apodoh in ahi.

Chule loubol miho phatchomna ding ‘micro-financial assistance’ pohdoh ding athanopna thu jong aseiyin ahi. 2nd World War Imphal Campaign Foundation hi 2009 kum a kisemdoh a non-profit organization ahi’in, martyr ho jana pe a, akiphal nau chule gal phatlou dan khangthah ho hilna dinga kisemdoh u ahi. Organization motor hi achesa thusim (history) hinsah jing ding chule 2nd World war heritage ho vetkol ding hi ahi.

Kerala a CAA kichepi louding chule NPR jong kiphal louding ahi: CM Pinarayi Vijayan

Kochi, Feb 16: Kerala Chief Minister Pinarayi Vijayan in Kerala gam a state sorkar in Citizenship Amendment Act (CAA) achepi louding chule National Population Enumeration jong aphal louding ahi, tin aseiyin ahi.

Nikhat masanga Krithi International Book Fair a apanna a Kerala CM in hiche thu asei ahi. Chule detention centre sahna a pan louding, National Population Register (NPR) second phase a data colletion a jong pan lahlou dinga aseibe in ahi.

“State sorkar in CAA achepi louding chule NPR jong aphal louding ahi. Detention centre kisa louding ahi. Census a information lahding state in kigotna aneiyin ahivanga NPR second phase a data collection a pan alah louding ahi”, tin CM Pinarayi Vijayan in thuso miho akimupina a aseiyin ahi.

CAA, NRC leh NPR thu a Prime Minister Narendra Modi demna sangtah aneiyin, Modi sorkar in RSS policy achepi a CAA, NRC leh NPR mangcha a nam khen nading tohgon achepi ahi, hiche hi gamsung in hou thu a chamlhatna anei leh constitution kinoise na ahi, ati.

“RSS in British imperialism policy ajui ahi. Modi sorkar in RSS policy achepi ahi. Mijousen Hitler policy asan lou ahi’in, ahivanga Golwalkar lamkaina in Hitler leh Nazism asana hi”, ati. Gamsung in hiche thu a ruling douna a pan alahkhom amu ahi’in, hiche hi umjom ding ahi. NRC hi CAA a kisem ahi”, tin aseibe in ahi.

CM in Lilong CHC a Staff Quarter hondohna nei; sorkar in mipi phatchomna ding akhohsah ahi, tia CM in sei

Imphal, Feb 16(ET): Chief Minister N. Biren Singh in Haorebi Makha Leikai, Lilong a Staff Quarter, Community Health Centre hondohna aneiyin, ahoulimna a hou, jat leh nam, politics aumna khen louva sorkar in mipi na tohding akhohsah ahi, tin aseiyin ahi.

Chief Guest a pang Chief Minister in Prime Minister Narendra Modi lungtup ‘Sabka Saath, Sabka Vikas’ hi state sorkar in bulhingset a atosot ahi, tin aseiyin chule vaicha genthei ho hinkho man idopsang teng ule chamna, khantouna leh machalna gamsunga umding ahi, ati. Politics kibol hi khat leh khat kitho to nading chule nam chom chom kah a kijato na leh kitahsanna aumna ding ahi, tin aseiyin chule nam chom chom kah a kiloikhomna det semding hi ama bidoi ahi thu jong aseiyin ahi.

Tua sorkar in mipi henga akitepna jouse abulhit ahi, tin CM in aseiyin chule sorkar in scheme chom chom apohdoh ho thu aseiyin ahi. Camp chom chom akibol jouva CMHT leh PMJAY card kihom ahi, chule sorkar in PMAY noiya Lilong a in 1000 chunglang asah ahi, ati. Lilong mihon gamkaiya khamnathei douna a pan sangtah alahkhom u apachatna thu jong aseiyin ahi.

Doctor, Teacher leh nurse ho a dinga thinglhang district mun 19 a transit accommodation kisa ahi, tin CM in aseiyin, phabep hondohna umvah ding ahitai, ati. Mipi tosotna jal a sorkar in kivaihomna pha apeh theiya chule thinglhang leh phaicham kah a kikhenna asuhmang ahi. Ahung lhung ding kum 5-10 sunga gamsung hi ‘Golden Land’ a kikhel ding ahi, tin jong kitepna aneiyin ahi.

Health and Family Welfare Minister L Jayantakumar in ahoulimna a doctor chule nurse hon kitah tah a na atoh diuvin temna aneiyin ahi. Gamsung khantouna dinga pan lahkhom angaiye, tin aseiyin chule CHC infrastructure semhoi nadinga sorkar in jo chan a kithopina apeh ding ahi, ati. Chule CHC a Geriatric, Palliative care unit jong kisemdoh vahding ahitai, tin aseibe in ahi.

Athah a hondohna um CHC Staff Quarter hi Pradhan Mantri Jan Vikas Karyakaram (PMJVK) noiya Minority Affairs Ministry, India government leh Department of Minority Affairs, Manipur government in asah ahi’in, dangka lakh 342.07 lut lah a centre leh state in 90:10 apohdoh a asah ahi. Quarter a hi damlou ho ding, doctor, nurse ho ding room, medical store room, patient attendant room, conference hall leh adang dang um ahi.

Kin gon a Lilong MLA Md. Abdul Nasir, Adhyaksha, Thoubal Zila Parishad Hasina Begum, Secretary to CM Ningthoujam Geoffrey, Thoubal district DC N Bandana Devi, Health Services Director Dr K Rajo, Director of Minority Affairs Ng. Bhogendra leh adang dang jong apang uvin ahi.

Doctor khat demand kibol PTC leh CDA in demna nei

Ccpur, Feb 16(ET): Paite Tribe Council, General Headquarters, Lamka in Dr. S Thangminlian heng a Liberation Tiger of Tribals (LTT) hon dangka Lakh 5 demand abol jeh un sangtah in demna abol uvin hiche tobang demand kibol hi gamsung a kiphallou ahi in chule koima kiloikhomna in Paite pao thoho heng a demand jong abol theilou ding uh ahi ati. Hiche demand bolho hi akintheipen a police hon ahin kholdoh diuvin jong asei uvin ahi.

Alangkhat ah Churachandpur Doctors Association (CDA) in jong doctor achankhom piu chung a hitobang a demand kibol hi demna thu aphong uvin doctor hohin mipi ho damtheina dinga bolthei chan a kibolpeh ahin chule government hospital hihen lang Private hospital/Clinic hijong leh Ccpur district sung a um ho hin aman niemthei pen a mipi ho gelkhoh najal a kibol ahin hiche tobang a tohdohsa jong hilou mikom a sum mohthum jeng hi angai jong ahipon, khantoumo tohkai avetsahna ahi in chule hiche tobang hi society sung a ding a kideilou ahi tin aphong uvin ahi. Tunung teng jongleh medical toh kisai ho lunggimsah louding in jong temna anei uvin ahi.

China gam’a COVID-19 jeh a thi 1,660 val ta

Beijing, Feb 16 (IANS): China gam a Coronavirus (COVID-19) natna jeh a thi Sunday nikho chan a mi 1665 alhing tan, natna jeh a mi 142 thi be kit ahi.

National Health Commission (NHC) in asei dungjuiya Saturday nikho a kon case athah kisei 2,009 ahi’in, hiche hi ni masa a case 2,641 sanga lhomjo ahitai, ati. Coronavirus natna symptoms hi nat gol adang hotoh kilou ahi’in, ahivanga COVID 19 a hi tisat leh tahsa chol, khut chule hai lhahsam (dyspnea) jong pang ahi. Natna neiya hi tua agom a mi 68,500 lhing ahitai. Athah a case kisei holah a thum tailou adang se hi Hubei province a ahi, tin World Health Organisation in aseiyin ahi. Nat kipatna Hubei province a natna jeh a thi mi 1,596 lhing ahitai.

Natna akihetdoh masat pen a Wuhan (provincial capital) in vangsetna ato jing nahlai ahi’in chule Sunday jingkah chan a province a nidan 24 sunga mi 110 thi ahi. Khopi sung hi achesa January 23 a kon ‘quarantine’ (kikhah) kibol ahitai. Saturday nikho a kon natna lel a case 219 aum’e, tin NHC in aseiyin chule adang 1,323 hi kijen dam a in a kisol ahitai, ati.

Natna akisei pat a kon damlou mi 9,400 val kijen dam a hospital a kon kisoldoh ahitan, chule natna neiya hop 30 tobang hi ‘observation’ a um nalai ahi. Saturday nikho a Asia pam France gam a coronavirus natna jeh a thi kisei masapen ahi’in, China gam mi tourist khat thi ahi. Virus hi gam 30 a alhun tah vanga case 99 percent hi China gam a um ahi.

Class X themvetna a Moreh akon simlai ho Mark mutampen Dk. 5000 kipe ding ahi: M Thoiba Singh

Tengnoupal, Feb 16(ET): Tunin Moreh khopi sung a pol themvetna a panla ding ho vang thumpeh na ana nei uvin ahi. Hiche vang thumpeh na kingon chu All Manipur  Student  union,  Tengnoupal District committee  makai na noi a  Eastern  shine  school Moreh a an akibol ahi.  Meetei  council Moreh  a President  M. Thoiba  singh in kingon a ahou limna a Moreh sung a simlai mark tampen hin mum dangka 5000 kipe ding ahi tin phondoh na ananei in ahi. All Manipur Student union Tengnoupal District committee in jong simlai khopi sung a ani channa asang pen chung a dangka 5000 pehding in phondoh na ananei uvin chuleh athum channa ang a dangka 3000 kipe ding ahi dan jong ana sei uvin ahi.  Kingon achun M.Thoiba singh, President Meetei council Moreh, Meiraba Meitei,  President  All Manipur Student union Tengnoupal District committee, Jilkung Surjit sharma, Jilkung Langamba Meitei le jilkung Budhachandra singh ho in panlah na ana nei uvin ahi. Thoiba in ahou limna a themvetna result pohdoh teng ann nehkhom na khat ki gong ding ahi ati. Moreh khantou na ding ahi lekha them tam ngai ahin, education lam khang tou lou a gamsung khang tou thei lou ahi tin Thoiba in ana sei in ahi.