Lockdown sunga School Fee thu

Lockdown sunga School Fee thu

567
0
SHARE

Lockdown sunga School Fee thu

Lockdown sunga private School hon Monthly school fee alah theilou diu tia State govt nin thupeh anei thu hi School bol/nei hon Teacher/oja ho lhalo apehlou diu hi ngalle thu khat hidi ahi. Private school a natong Teacher le Staff dang ho hi School nei hon lhalo apeh uva kon kivah ahikit jeh un school fee akilah louleh neh ding ahetlou (aneilou) diu tina ahisa ahijeh in aki suhsesu umlou ahi. Private School bol hon Lockdown sunga Monthly School Fee lahlou diu ahileh Govt nin School Teacher ho lhalo chet jat hihih jongleh hiche lockdown sung’a dia aneh diu anchang ham, sum le pai themkhat beh kithopina apehdi hileh thu khat ahi. Hiche thu hi umkitlou ahijeh in aboitah khat vang ahi. Govt service bol hon vang itobang phaat lai hijongleh lhalo asan/amu thou thou u ahijeh in Private school kai achate ho Monthly Fee apehlel diu jong ahidehpoi. Ahaboi hi Business neoneo bol ho leh nikhotha kilo to ho dia vang niseh a aneh diu tahbah kiholna hahsa ahidi jeh in school fee apeh diu jong hahsa cheh ahi. Private School hohi ‘business’ khat ahijeh in koiman School Fee apehlou teng Teacher le Staff ho lhalo apehdi umkit loudi ahi. Lockdown/bandh sung’a School bon kikailou tia Teacher hon natoh dang sumlona di akihol uva atoh diu jong hithei lou ahijeh in School Fee pehlou di ahileh Teacher le Non-Teaching Staff ho dia neh ding kisan neilouna hidoh di ahi. Lockdown beh hi kicheh sel’a lha khat lha ni jouteng angaija school kihong pankitdi tina umdehlou ahi. Natna kithejaldan hi themkhat beh tuhtang ahilouleh School ho angaija kihong pankit di tina hung umdeh loulai ahi. Manipur a School kikha kal hi March 13 a pat ahitan school kikha sunga School fee pehlou di kiti chu School a natong ho aboi diu het thei ahijeng’e.

Lockdown sung’a school fee laho school License gei kikah di ahi tia govt nin gihna neijongleh school chapang nule pa te leh school Authority ho kikah a kihoutohdan ahithou thoudi ginchat ahi. Private school kiti jongleh govt tobanga haosa tah leh det tah a um Catholic school leh adang phabep hovang tuition fee lalouva jong kumkhat oja ho lhalo pejou diloi umdi ahi. Ahin private school kiti chu ‘business’ khat ahijeh in stuong (profit) themkhat beh muna ahilouleh koiman manna dia abollou heldi ahi. Lockdown sunga Online a class bol ho dia vang tuition fee abon hihih jongleh akeh khat beh peh teidi hi govt nin velvetna neile dihpen di ahi. Private School akitileh thinglhang bou ahilou jeh in Hill District Private School Association Manipur (HIDPSAM) hon tuition fee thua  govt nin September 12 kah a velvetna ahinnei dia athah beh a ngehna ahinnei kit hi phaicham’a Private School ho tosotna jong jaothaleh athu gelkhohna umjepdi ahi. Online class umna ho thuchuom ahitan akibollouna hoa kumlhunga school kikailou fee lahdi kiti jong kilom kitlou ahi.  Abon hihih jongleh akeh khat beh ham, ijat ham’a dia kinoptona aumjongleh phadi ahi. Ima jouse kikaigop sohkei ahijeh in inn bahara (Rent) a umho jong Lockdown sunga inn neihon Rent alahloudiu ti ahikitleh inn bahara a kivah hon hahsatna atokit jeng diu ahi. Ipi hileh hinkhoa hi mijousen ama mimal hihen, gamsung mijouse tongkha hileh hahsatna phaat umji ahijeh in khat ding bou vetna umlouva kihoutohna khat aum ngai ahi.