Lockdown ni 7 che jom be dinga phatsah hita; Angaicha khoh sector...

Lockdown ni 7 che jom be dinga phatsah hita; Angaicha khoh sector phabep kiphal ding, Thangal bazar leh Dharmsala a whole sale dukan ho nidan phabep kihong ding

97
0
SHARE

Lockdown ni 7 che jom be dinga phatsah hita; Angaicha khoh sector phabep kiphal ding, Thangal bazar leh Dharmsala a whole sale dukan ho nidan phabep kihong ding

Imphal, Aug 6(ET): State Cabinet in Thursday nikhon tuni nikho chan a kichepi ‘Lockdown’ ni 7 chepi jom kit dinga phatsahna anei tauvin ahi. Chule tua akichepi jom lockdown sunga hi angaicha khoh (essential) sector phabep kilha ong ding ahi.

State Cabinet in containment zone ho a sample collection kibol jong kalsah be dinga kilol lhahna aneiyu ahi, tin thulhut in aseibe in ahi. Gamsung mi gamdang a kholjin khalou Covid 19 positive natna neiya case thah thah akimu be toh kilhon a Chairperson, State Executive Committee, State Disaster Management Authority in Disaster Management Act, 2005 Section 20(2)(a) a tha neina kipe aman chah a achesa July nisim 30 nikho a order asodoh a, Lockdown tulha nisim 6 chan gamsung pumpi a chepi dinga thuso anei ahi.

State Cabinet in Thursday nikho a kihouna anei nauva Covid 19 natna vetkol nadinga lockdown koibe ding ngaicha asah jeh uva chejom pi kit dinga thulhuhna aneiyu ahi in, hiche toh kilhon a Chairperson, State Executive Committee, State Disaster Management Authority in August nisim 15 chan gamsung pumpi a Lockdown chepi jom dinga thuso anei ahi.

Lockdown bulhingset a kichepi ding chule Deputy Commissioner hon ama ama district a curfew koi nadinga order asodoh diu ahi. Manipur High Court in Central government chule state sorkar in asodoh guidelines dungjuiya ama order leh guidelines asodoh ding ahi. Chule akiphal ding hohi National Directives for Covid 19 Management dungjui hiding ahi, tin Chief Secretary leh Chairman, State Executive Committee, Dr. Rajesh Kumar in thuso aneiyin ahi.

August nisim 7 nikho a kon nisim 15 sunga akiphal ding thil holah a angaicha khoh ho (essential goods) ho apang in, hiche a hi angaicha khoh ho home delivery, bongnoi chule bongnoi thil kilahna, kisemna chule akijoh kiphal ding ahi. Niseh a man chah ding thil, me, thei, bongnoi, sa leh nga kijohna retail dukan ho district jouse a jingkah nidan 8 a kon sun nidan 12 sung (Sunday nikho tilouva) akihon ding kiphal ding, Imphal West leh Imphal East a thil chohna dinga gari a che kiphal louding ahi.

Thangal Bazar leh Dharamsala a whole sale dukan ho Sunday nikho tilou nikho dang jouse jingkah nidan 10 a kon nilhah nidan 3 chan akihon ding kiphal ding ahi. Imphal West, Churachandpur, Pherzawl, Tamenglong leh Noney district a Monday chule Thursday nikho teng kihong ding, Imphal East, Senapati, Kangpokpi, Ukhrul leh Kamjong district a Tuesday leh Friday nikho chule Chandel, Tengnoupal, Thoubal, Bishnupur, Kakching leh Jiribam district a Wednesday leh Friday nikho teng kihong ding ahi. Retailer hon wholesale dukan a thil kichoh nadinga gari akipui thei nading uva ama ama umna DC in permit/pass apeh ding ahi.

Thil kipohna gari ho alhai ding kiphal ding ahi. Mao, Jiribam leh Jessami a lhai thil pohna gari jousen interstate border agalkai diu kiphal ding, driver nil eh helper khat umna gari hon thil apoh u chule asolah jou uva alhai diu kiphal ding ahi. Truck semna workshop leh cha don na ho highway a kihong ding, hijong leh social distancing ajui diu ahi.

Hospital, Nursing home, Clinic leh Dispensarie, Chemist, Pharmacy leh lou kijohna dukan ho, Jan Aushadhi Kendra panna chule Medical equipment store, medical laboratory leh collection centre, veterinary hospital, dispensary, clinic, pathological laboratory leh vaccine kijohna leh supply kibolna mun ho kikhah louding ahi.

LPG gas home delivery, postal service (post office, telecommunication leh internet service), twi, sanitation, meivah chule waster management sector, petrol pum (CAF&PD department in notify abol ho bou), Airport leh Airlines ho kihong ding ahi.Thinglhang a phailei a natong ho, agriculture leh horticulture thil ho lahna agency (Farmers Producers company panna) kiphal ding ahi.

Nga vahna mun, nga an semna mun, gancha vahna, bongnoi thil semna, gancha an kisemna mun ho lockdown in ahop tha louding ahi. Reserved Bank of India leh RBI regulated financial market ho, bank branch leh ATM chule Business Correspondent ho a staff 30% kalval a tam louva kihong ding, LIC jong staff aumsa 10% khel louva kihong ding ahi.

Lockdown hin print chule electronic media ahop tha louding ahi. Medical leh veterinary care panna a emergency service a lhai private gari chule exempt kibol sorkar natong ho gari toh kiphal ding ahi. Essential service a natong centre leh state government officer jouse kihong ding, Administrative Secretary/Head of Department in aseilhah dungjuiya staff category 10 % bou office che ding ahi.

Thangal Bazaar leh MG Avenue a jingkah nidan 7 a kon sun kim chan kihong ding ‘spare parts leh tyre’ kijohna dukan hojong order a list abol uvin ahi. Hiche hohi SP Tyre and Threads, Thangal Keithel, Pintu Motors, Delhi Motors leh Raja Automobiles ahi in, abon a MG Avenue a um ahi.

Sova Workshop, Khabam Lamkhai, Jati Workshop, Chingmeirong, Nanao Worshop, Pheidinga, Depak Workshop, Luwangsangbam, Brojen Workshop, Khabeisoi, Boy Workshop, New Chekon leh City Sales, Mantripukhri jong jingkah nidan 7 a kon nilhah nidan 2 chan akihon ding kiphal ding ahi, tin thuso chun aseibe in ahi.

Hospital 5 in admission apehlou jouva naovop numei khat thi; hospital jon a adamlou jouse ajotna hospital in ajen dinga sorkar in thupeh nei

Imphal, Aug 6(ET): Noney district a kon kum 20 a upa naovop numei khat naonei dinga Imphal khopi ahungna a hospital nga in admission bol ding anop pehlou jeh a Thursday jingkah a athi in, hiche hi medical negligence leh mopohna neilou tah a thil kibol jeh ahi tia seithei ahi.

Kanpatliu Kamei, w/o Roshan Balang, Puichi kho, Nungba sub-division, Noney district a cheng nu hi JNIMS leh RIMS panna a hospital nga in nao nei nadinga kithopina angaichat ana peh loujeh uva tuni jingkah nidan 4 don a thi ahi. Amaho hi tu leh tua Makuiluangdi kho, Senapati district a cheng ahi.

“Ka chanu hi nidan 24 nailam leltah a um a, ka jot nau hospital khatcha in kithopina eipeh louvu, achaina a Shija Hospital maiya administration ho heng kache masang uva thi ahi”, tin athi nu anu Athona Kamei in thuso miho henga telephone a aseiyin ahi. Athona in asei dungjuiya, naovop achanu hi Wednesday nilhah nidan 2 don a Senapati hospital a apuiyu ahi in, hiche mun a doctor hon normal delivery bol thei dinga aseipeh u ahi.

Ahivanga, jan nidan 10.30 don a doctor hon normal a nao aneina dinga boina aumjeh a Imphal joh ajot diuva thuhilna aneiyu ahi. “Naosen hi anu oisunga athi tai tia eiseipeh uva chule doctor hon JNIMS, Imphal a referred eibol u ahi”, tin anu in aseiyin ahi. Vangset umtah a Imphal hospital alhun jou uva COVID 19 negative ahina result avetsah nung uva jong doctor aumpoi, tia admission peh ding anop peh loujeh uva akinep nau thon ahi.

Ichan geiya dinmun boi thei ham ti hetoh a nurse nu ma ma hin doctor ajen ding aumpoi, tia ahin soldoh u ahi, tin thulhut in aseiyin ahi. Numeinu hi ajipa chule anu in akilhonpi ahi in, Imphal Hospital jong ajot uva chule private hospital adang ni jong cheu ahi in, adammo nu anat alel vanga admission koiman apeh louvu ahi, tin thulhut in aseiyin ahi.

Athinu anu in asei dungjuiya, achanu chule apeng lha loulai naosen thilong vui dinga akho uva apoh u ahitai. “Doctor leh nurse ho natoh ding hi itobang natna hijong leh adamlou ho jen ding hi ahi. Ngaichat khoh pet a adamlou ho avet thei louding uva ahileh adamlou ho koiyina kithopi ding ham”, tin jong anu in thudoh aneibe in ahi.

Thilsoh jouva Health Department in AD (Plg.) leh DD(PH), Health Department panna committee asemdoh in, thu kholdinga ngansena aneiyin ahi. Order kisodoh nikho a kon nikho 7 sunga report apeh lut ding uva thupeh um ahi, tin Health Department spokesperson, Dr Sasheekumar in thuso aneiyin ahi.

Alangkhat a, hospital a service kipeh lou jeh a boina toh ho hahsatna suhlhap nadinga sorkar in August nisim 6 nikhon order thah (vide order no. 31/8/2020 – M (Pt-V1) asodoh in ahi. Government chule private hospital jousen ama ama hospital a kive ding ache a adamlou koi hijong leh khohsahna apeh diuvin thupeh a asei uvin, chule service peh louva akisoldoh aumlou nadinga hospital jousen staff khat mopohna apeh dinga asei uvin ahi. Koi tobang hiche thu palkeh a aumleh Manipur Nursing Homes & Clinical Establishment Act, 2005 noiya achungthu khoutah a kisei ding ahi, tin thuso chun aseibe in ahi.

 

Naovop nu thina toh kisai hospital ho ATRPFM themmo chan

Imphal, Aug 6(ET): Ngailutna beihel le gelkhohna lhahsam a kon numei naovop lai tuni jingkah nidan 4 vel a melse tah a mollem na lou-in chu All Tribal Rights’ Protection Forum Manipur (ATRPFM), INPUI Naga Union (INU), All INPUI Students Union (AISU), INPUI Naga Women Union (INWU) le Longmai Areas Authority Council (LAVAC) hon tunichun nasatah in themmo achan tauve.

Dam tei ding dei a Noney District hopsung Puichi (Oktan) kho mi naovop lai Kapatliu Kamei, w/o  Roshan Palang chu nidan 16 sung lou-in hol na phat aman nung a jingkah lam nidan 4 a mollem ahi. Naovop nu lut ding jahda lou-in hochu Senapati District Hospital, JNIMS, RIMS, Imphal Hospital, Raj Medicity le Shija Hospital ahiuve. Hiche lou-in ho chun Covid-19 le louthem lhahsam paome a naovop nu lahlut ding ana dal cheh u ahi. Lou-in 6 jen in asanlou jeh a casualty kotbul a tuni jingkah nidan 4 a  naovop lai mollem nu thu kholchil ding lom semdoh ahitai.

Hiche thilsoh nasatah a themmo achan ban in ATRPFM in naovop lai lanom a kilep private hospital le medical official ho dan dungjui a gotna pehding in jong ngehna anei e.

Hitolhon a naovop nu le akilhonpi hon ajotna lou-in umna district CMO makaina kholchilna nei ding lom semdoh ahitan themmona nei ho dan umsa dungjui a gotna peh hiding ahi.

Hiche thudol a dan umsa dungjui a pohlut a um damlou chu District Hospital a alut thei lou ding le hospital senior employee khatpen pen in asangjo lou-in khat a asol dia dan kisun hijongle senior employee chun naovop nu chu vet jong ve lou hel a adalhah khum ahi. Naovop numei thinglhang mi hijeh ham ahiloule hou le beh thu a donlou le nahsah lou a koi lou-in natong louthem hihen nurse hijongle thilsoh umchan hin dan dungjui a gotna pehding aphatsah ahi.

Ache masatna mun Senapati District Hospital in naovop nu alutsah pon hinla JNIMS Hospital, Imphal a dia asol son ahi.

Ahin naovop te insung chun private hospital ajotkit le louthem umlou in alep kit un, hitia kinom le kah a naovop nu chu mollem man ahi. Hitolhon in chupet tah a hospital duty ho themmo chan ahingal in district vaihom in hospital thuso abolkhum pai ahi.

Thilsoh umchan a kon government hihen private hospital government dan umsa juilou hetdoh hochung a FIR bolkhum hiding ahi.

Thulhut dungjui a thina toh te hin government hospital ban a Imphal Hospital, Raj Medicity le Shija Hospital ho jong ajot u chu government hospital gei in damlou nu chu alutsah lou seh hilou in hospital natong ho ban a security hon kampao ngailou tah a jong ahou nahlai ahikit e.

Hiti ho jeh a hiche thilsoh chungchang hi phatah a kholchil ding le hitobang velso lou nadia panla ding in Noney le Senapati District vaihomna jong ngehna anei un ahi.

Hetding chu Shija Hospital casualty kotbul a amollem masang a chu naovop nu le insung mi ho hin government hospital pum a hospital 6 kom a panpina khatjong  mulou ana lhei le leu a government hospital khat a alut nung uva louthem umlou lep a soldoh hikit uva achaina kei a Shija Hospital alhun ule ana vaigei val kha ahitai.

Hiche thilsoh hi District Magistrate le State government in agangthei pen a kholchilna anei a themmo chang ho dan dungjui a gotna pehding le damlou lutding phallou Hospital hon akilom kithopina apehding in  ATRPFM le tribal CSO hon ngehna anei un ihamtia ngehna donlou a aumle kiphinna chelhahpi ding in aphongdoh un ahi.

 

Manipur a Covid-19 natna nei khat thibe; Athi mi 8 lhingta

Imphal, Aug 6(ET): Manipur a Thursday nikhon COVID 19 natna toh kisaiya mikhat athi be kit in, Bishnupur district mi kum 15 a upa pasal khat athi toh kilhon a gamsunga natna jeh a thi mi 8 alhingtan ahi.

Vangsetna toh pa hi Phubala Makha Leikai, Bishnupur district a cheng ahi in, Thursday jingkah a akijenna Regional Institute of Medical Sciences (RIMS) Covid care ward, Imphal a kal (kidney) natna jeh a thi ahi, tin official thulhut in aseiyin ahi. Pasal pa hi achesa lha ni sung RIMS mun a akal alangni a anat jeh (kidney failure) a kijen ahitai.

Chapang pa jen a pang doctor khat COVID 19 positive ahi akihetdoh jouva pasal chapang pa chule ama vekol a pang a insung mi 2 jong test akibol uleh Covid 19 positive hiu ahi. Insung mi Covid 19 positive hi a mikhat tu naicha a test akibol kit na a hi negative hi ahitai, tin thulhut in aseiyin ahi.

Manipur gam a achesa July nisim 29 nikho a Khongjom, Thoubal district a cheng kum 56 a upa adamlou khat RIMS Covid Care Centre a akijenna mun a thi a, gamsunga dinga Covid toh kisai natna jeh a thi masapen hi ahi. Amahi achesa May 5 ni a Chronic Kidney Disease leh diabetes jeh a RIMS a admit abol uva chule dialysis avel vel a kibol ahitai. July 26 nikho a Covid 19 positive ahi kihedoh ahi, tia hospital in asei ahi.

Gamsunga Covid 19 toh kisai natna jeh a thi agom a mi 8 ho lah a Thoubal district mi 3, Chandel leh Kangpokpi district mi 2 cheh chule Bishnupur district mi 1 pang ahi.

 

Education Minister in Education Department official hotoh meeting nei; NEP, 2020 kitup tah a akichepi nadinga Task force sem doh diu

Imphal, August 6(ET): Education Minister Dr. Thokchom Radheshyam in Thursday nikhon Education Department a official hotoh ‘review meeting’ aneiyin, National Education Policy (NEP), 2020 aganna thei pen a lolhingtah a chepi nadinga core functionary jouse a task force sem a tohgon ho sem ding thu aseikhom uvin ahi.

Minister pa in thuso miho akihoupi na a, task force sem ding hi Education Policy thah lolhing tah a akichepi theina ding lampi gon nading ahi, tin aseiyin ahi. Union Cabinet in National Education Policy (NEP), 2020 phatsahna anei toh kilhon a, state hon policy achepi na dinga thuhilna um ahi, ati. National Education Policy 2020 hetthem nadinga kihoukhomna umding chule task force kisem ding ahi, ati.

Task Force hohin NEP, 2020 akichepi sunga hahsatna leh boina kitoh thei ho akhol diu, alampi asem diu ahi. Hiche jeh a class 5 chan simlai ho dinga textbook le (translate) ding ngaicha ahi, ajeh chu kihilna hi eima pao a kichepi pan ding ahitai, tin aseiyin ahi.

Meeting a Thokchom Radheshyam Singh in kikhopna a pang ho henga achesa August nisim 4 nikho a HRD Minister toh Video Conference a kihouna aneiyu thu aseiyin, National Education Policy, 2020 phatah a chepi dinga aseiyin ahi.

Policy het gilna nei angaiye, tin aseiyin chule stakeholder leh adang dang- educationist, teacher, teachers association, simlai kiloikhom leh adang dang hon athu akhol toh uva, policy hetthemna anei uva chuteng leh lolhing tah a chepi dinga temna aneiyin ahi.

Review Meeting a Commissioner, University & Higher Education & SCERT, M. Harekrishna Singh, Commissioner, School Education, T. Ranjit Singh, Education Department (Schools, University leh Higher Education) SCERT, COHSEM leh BSEM a kon official ho Conference Hall, Samagra Siksha Manipur, Babupara a apang uvin ahi.

 

Gamdang a kholjin khalou mi 94 leh CAPF personnel 9 panna a Covid-19 positive 124 kimube

Imphal, Aug 6(ET): Manipur gam a achesa nidan 24 sunga pasal 65 leh numei 50 panna a Covid 19 positive milham (general population) 115 akimube in chule Central Armed Police Force (CAPF) personnel 9 jong Covid 19 positive ahi akihetdoh be in ahi.

VRDL, RIMS mun a mi 53, VRDL, JNIMS a 33, Imphal West RAT a 29, DH Kakching a 1, Babina Diagnostic a 2, DH Churachandpur a 5 chule Shija Hospital a test kibol mikhat positive hi ahi. Natna nei ahi athah a kihetdoh be hohi Imphal West district mi 38, Thoubal a 35, Kakching a 6, Churachandpur a 7, Imphal East a 10, Kamjong a 4, Bishnupur a 3, Kangpokpi a 12 ahi.

Covid 19 positive (general) ho lah a mi 21 hi gamdang a kon hung kile ahiuvin, amaho hi Kakching a kon mi 3, Kangpokpi a 11, Kamjong a 4, Churachandpur a 2, Bishnupur 1 hiu ahi. Chule adangse (94) hi gamdang a kholjin lou gamsung mi hiu ahi. Abon uva Covid Care Facility a achon uvin chule ‘containment’ leh ‘contact tracing’ kiti angaicha ho apat u ahitai.

Achesa nidan 24 sung ma ma a RIMS a kon mi 7, CCC Meitram a 23, Thoubal a 5, Tamenglong a 6 chule Ukhrul a mi 2 RT PCR test abol kit nauva Covid 19 natna anei tahlou jeh uva discharged abol tauvin ahi. Gamsunga tu dinmun a positive case agom a 3217 (general population- 2681 leh CAPF- 536) lhing ahitan chule discharge kibol hi mi 1905 (general population- 1822 leh CAPF 83) lhing ahitai.

Active case hi tua 1304 um ahi in, hiche lah a CAPF personnel 453 pang ahi. Thursday ni a Bishnupur district mi kum 15 pasal khat Covid 19 toh kisai natna a athi in, ama jong hin kal natna anei ahi. Ama pum a natna jeh a thi mi 8 lhing ahitai.

Alangkhat a, naovop numei khat jong Shija Hospital, Langol Casualty a jingkah nidan 4 don a athi in, hospital lhun nading neilou jeh a thi ahijeh a AD (PiG) leh DD (PH), Health Department panna a committee kisemdoh a thukholna aneidiu chule August nisim 6 nikho a kon ni 7 sunga report apehlut diuva thupeh um ahi.

Private hospital hihen lang government hospital hijong leh jen ding ngaicha ho don louva koiya hospital aumleh achunga action lah dinga jong state sorkar in Thursday nikhon thuso anei tauvin ahi.

Natna khoh jeh a ’emergency’ a hospital jon athah a tam cheh cheh kit; doctor phabep in adamlou ho jen ding nop peh dehlou

Imphal, Aug 6(ET): Doctor hon COVID 19 test report neilou ho jen ding anop peh poi, tia thu kithang aumjeh a Imphal khopi a COVID 19 natna akisei sunga mipi hospital che ding kichatah a anaum ahi in, ahin, mipi kichatna hi achesa nikho 2 sunga a oldom in, RIMS leh JNIMS chule private hospital dang dang a emergency a kipolut damlou akal cheh cheh kit tan ahi.

Adamlou phabep in hospital authority hon admission eipe nom pouve tia aseinau case phabep aum vanga, hospital a patient attendant record jat akal cheh cheh in ahi. Thuso miho RIMS a ache uvin, dinmun vetlhahna anei uleh Covid positive hilou adamlou (emergency) phabep hospital security hon ‘thermal check’ abol jou uva emergency ward sunga alut sah u amu uvin ahi.

Alangkhat a, JNIMS a emergency ward hi achesa nidan 72 sung akikha vanga emergency case (exceptional) phabep JNIMS doctor hon ajen uvin ahi. JNIMS Medical Superintendent in IT thusoh miho akihoupi na a, emergency ward hi achesa nidan 48 sung mijouse damthei nadinga kikhah ahi in, tuni a nidan 72 kha be kit dinga aphat kisuhsaobe ahi, ati. Emergency ward akikha vanga apet pet a kijen ding ngaicha a adamlou phabep akijen e, tin aseiyin ahi. Tuchan geiya emergency a kijen ding ngaicha a adamlou 4 tobang hi emergency ward akikha sunga kijen ahi, ati.

RIMS a che thuso mihon emergency ward a che ho phatah a akhol uva ward sunga alut sah u amu vang uva department adang tamtah a mi athip chet in ahi. RIMS authority ho akihoupi nauva, hospital authority hon Thursday nikho a kon emergency a kipolut adamlou chule akijen jat hi ajat ni a akal e, tin aseiyin ahi.

“Janni a lungchang natna, gynae chule emergency a kipolut adamlou mi 48 bou ahi in, ahin, tuni sun a mi 72 alhing tan, ajat hi kal be dinga ginchat ahi”, ati. Private hospital adeh a Shija hospital leh Raj Medicity del a adamlou jong akal cheh cheh in ahi. Doctor hon hospital phabep a jen ding aphal peh loujeh uva naovop numei khat athi e, ti thulhut tilouva hospital che ding kichatna mipin anei atil a sanga nemsuh ahitai.

Centre in covid-19 financial package a dangka 890.32 crore lhadoh nanei

New Delhi, Aug 6: Central Government in tuni in state 22 ho leh Union Territories ho a ding in dangka 890.32 crore lam COVID-19 Emergency Response and Health System Preparedness Package ading in lhadoh na anei in ahi. Hiche package chu Prime Minister pa in achesa March lhasung a phondoh na ananei ahi.

Hiche package chu Chhattisgarh, Jharkhand, Madhya Pradesh, Odisha, Rajasthan, Telangana, Andhra Pradesh, Goa, Gujarat, Karnataka, Kerala, Punjab, Tamil Nadu, West Bengal, Dadra & Nagar Haveli le Daman & Diu, Arunachal Pradesh, Assam, Meghalaya, Manipur, Mizoram, Nagaland le Sikkim ading ahi akiti.

Package toh kisai ahi state ho ahi isolation bed 5,80,342 lam kikoi be ding, oxygen support lupna 1,36,068 lam kikoi be ding chuleh ICU lupna 31,255 lam kikoi be ding ahi akiti. Hiche package noi a testing kit 86,88,357 lam le VTM 79,88,366 lam choh an kinei ding ahi jong akiti. State ho a human resource 96,557 lam hap be na ainei ding toh lhon a human resource 6,65,799 lam ang a jong incentive pehna kinei ding ahi akiti.

Health ministry akon thuso kimu dungjui in hiche package hi RT-PCR machines, RNA extraction kits, TRUENAT  le CBNAAT machine choh na ho a jong kimang ding ahi akiti. ICU lupna ho semphat le semhoi na ding ho a jong jah ding ahidan ministry in hetsah na ahin nei uvin ahi. Hetthei khat chu achesa April lha achu dangka crore 3000 lam pehdoh na ana kinei ahitan ahi.

 

Thinglhang gam leiset huhbit le Village Authority hatsahbe ding tohgon kithopi cheh ding a AMBADA in tribal kiloikhom ho temna nei

Imphal, Aug 6(UNA): Manipur thinglhang gam leiset huhbit bit le village authority thahatsah be ding tohgon tosot cheh ding in tribal kiloikhom ho All Manipur Border Area Development Association (AMBADA) Chairman Thangkholal Baite le Secretary Jangthang Mate in asodoh tunia kimu lekha chun temna anei e.

AMBADA thuso in asei be na ah India hatsah nading a khotin suh hat ding hi Mahatma Gandhi a kon ana pengdoh a chutolhon a Manipur (Village Authorities in Hill Areas) Act, 1956 noi Village Authorities phudoh ana hi a aban a thinglhang kho khantou nading a 73rd Constitutional Amendment Act 1992 a pat Panchayat Raj hung umdoh ahi, ati.

Chule gamgi chin a pat km 10 gamla a um kho ho khantou machal nadia Ministry of Home Affairs noi a abon kei a centre sum pohdoh a Border Area Development Program (BADP) hi manchah khat ahi.

Hiche noi a natoh ding ho PRI, Autonomous Council, VA ho gei palai a ana pang a na ana tong jing chu state government danthah dungjui a kahlhah a um a chujongle gam leiset tohdoh lou kho chun khantou machal nading sum jong amulou dia state government in aheikon ahitai, ati.

Hitia danthah kisem hi akipom thei pon thipbeh a kivelou ding gam leiset huhbit le VA hatsahbe ding tohgon a panla cheh ding in AMBADA in tribal kiloikhom ho temna aneitan ahi.

Jiribam police in Dk. Lakh 11 vel man khamnathei mandoh

Jiribam, Aug 6(ET): Jiribam police in tuni in Leingangpokpi kom a truck khat akon in khamnathei tamtah ana mandoh uvin ahi. Police in che le vah le ho vetchilna ana neina uva truck Regd. No. AS 01 LC-2096 Silchar lam akon a hung khat akon a khamnathei ho chu ana matdoh u ahi. Truck sung a kiman doh khmanthei ho chu Golden Khaini 8640 lam, LX Jafrani Zarda, 300 packet, Luxury Pan Masala 324 packet,G-1 Tobacco 52 packet, Goa Pan Masala 52 packet, Kaka Khaini 2296 packet chuleh SS-1 Tobacco 50 packet ahi akiti. Akiman doh khamnathei ho chu dangka lakh 11 lam man ahi akiti.

Akimandoh thil ho chu Food Safey Officer Jiribam ang a pehdoh na ana kinei tan ahi.