Lockdown Jeh A Gampam A Pat Inlam Hung Kile Ho

Lockdown Jeh A Gampam A Pat Inlam Hung Kile Ho

76
0
SHARE

Lockdown Jeh A Gampam A Pat Inlam Hung Kile Ho

By: MK Touthang, IDAS

Kuki te khang thusim inung vet leh munkhat a sot chen lou, kichou le-le te ina hiu vin, che jeh hin kho lhingset leh a chengthei tah kho ilhom lheh uvin ahie. Tu khang ivet kit leh I chenna’u Manipur, Nagaland, Assam dalha’n India khopi chom-chom ah iki tol-tol jeng kit uvin ahi. Ahin tuchung COVID19 huse laan jeh in atam thei pen in khopi hoa kon inlang ihung kinung le kit uvin, hiche hi igel leh – ipi ibol diu tam? ipi ti iki manchah diu tam? ipi ti iki hinso diu tam? ti ho hi gellou thei ahipoi.

Hiche ho donbut thei na din, inlam dalha’a khopi ho’a ana kalson doh ho ahi-nau, a “profile” u vetlhah masat poimo kasai. Hiti’a gampam a ana kalson doh ho hi ivet leh alhang pi’n anoi a kipe loi thum (3) in aki hom khen thei e:

  1. Simlai Chapang – I um nau gam a lekha sim sang na ding college/university ahoi-apha lhom jeh leh, khopi len ho’a themjil na kisuh (‘quality education’) ho ngai chat jal in simlai chapang tampi kumseh in ipot doh jiu vin ahi. Tuchung boina jeh a koi tobang simlai chapang inlang a hung kile ium khah u leh inlam ium kah uva phat moh suhmang lou a lekha iki sim uva, eima chang iki ham bol diuvin iki tem uve.
  2. Natoh (‘service’) hol – Lekha sim jou a natoh/ ‘service’ hol a khopi lah a ‘coaching’ jao, ahilou le ama chang a ‘competitive exam’ a dia kigot na nei ho jong ‘lockdown’ jeh a mi ijat ham inlam hung kile um tei inte. Amaho jong in aum sung uva thildang boipi lou a, a lekha sim diu aki boi pi uva ahileh amaho dia lolhin na kalbi’a hung pang jo thei ahi. Ama bou ‘exam centre’ gampam lang ana pe kha a ‘exam’ ga bol theilou aum khah le vang kum khat aman sah diu ahitan, apha mo lheh e.
  3. Private Natoh/‘Service’ Bol ho – A lhangpi’a private natoh bol ho hi
    1. Khopi ho’a lekha sim a ana um, ‘government service’ mu theilou a ‘private’ lang a kihei doh a um den ho,
    2. Inlam a ‘Class 10/12” hin chai a, insung hahsat jeh a khopi ho’a ‘private’ natoh bol a hung, ahilou le
    3. “Personal life” boina jeh, ti chu jinei kisuh lou ham, ahilou le boina jat chom-chom nei a inlam hin dalhaa khopi ho’a natong a hung, amaho hi ahi nom uve.

Hiche loi thum ho lah a achai na pen ho bou hi tunin iki houlim nom uve. Alhang pin amaho hi von kijoh na (‘showroom’), neh le chah kibol na (‘restaurant/bar/fast-food’) ahilou le ‘spa/massage/ beauty parlour’ lah a natong ahi nom uve. ‘Private’ natoh ahi cheh vang in ‘corporate sector’, ti chu ‘BPO/MNC/Call-Centre’ lah a natong ho hi ahoui-doh dom uvin, adang hung kimin phah ho vang hi tuchung COVID19 jeh in abon uvin atong kha soh kei uvin ahi. Ajeh chu lha-lo jong tam behseh lou ahijeh in ‘savings’ atam nei pouvin, a natoh na mun jouse’u aki kha jeh in lha-lo la amu ta pouvin, alou theilou a inlam ahung kile u angai tan ahi.

Ahileh amaho hin inlam a ipi abol diu hitam? Hiche hi jat ni, ‘negative’ le ‘positive’ a seithei ahi. Akhat na chu ahileh, khopi ho’a umchan phalou tampi ajil doh u umtei in tin, hiche ho hi inlam a ahin pohlut uva, inlam um dan ahin suhset thei u ahie. Chuleh ama ding bep a ki manchah na kham sum mu a, jalen tah a hinkho mang jong um meithei intin, tua inlam a akhut a sum mu na um talou a, anu-apa le khosung-houbung sung ‘control’ na noi a ahung um diu hi ‘adjustment problem’ nei tampi jong hung um meithei inte.

Ahin tunin hiche aphalou lang ho hi ha seilou in a ‘positive’ lang joh i focus diu vin kadei sah e. Te-kah nan, khopi aum sung uva ama-ama ‘experience’ a kon a thilpha amudoh u, ajildoh u jong tampi um ding ahi. Te-kah nan, kol hon ipi ti ‘business’ abol uvem? I tobang lampi chom-chom a kon a sum hol na thei, ki hinso nathei um em? ti ho hi ahi. Mi noi a natong hi jong le lunglim geh chaa um ho chun phatchom na khat beh aki jil doh tei diu ka tahsan e. Hi tobang ‘idea’ chu inlam a ahin pohdoh uva, ‘business’ chom-chom ahin pohdoh uva, i gamsung u khantou-machal na lampi’a ahin puilut joh diu ka kinem e.

‘Idea’ chom-chom suh to a thil tampi boldoh thei ahi. Tulai ‘e-commerce’ khang ahitan, eiho deh-deh Moreh lang a kon ‘foreign products’ tampi beilam chaa imu thei u ahi. Flipkart/ Amazon ho’a ‘SELLER” a ‘register’ kibol a, Vietnam, Thailand, Malaysia le Indonesia thil ho khu hi tobang ‘online market’ hoa jong ‘business’ bolthei ahi. Tulai ‘online market’ hoa thil kijoh atam jo Moreh lang a kimu thil ngen ahi; akhoh le eima-eima ‘showroom’ jong muntin a iki hon u le ki hinso na thei ahi jeng e. Ahi lou le eima ‘local/ indigenous’ thil ho ha tah a boipi a ‘promote’ bolthei ahi. ‘Restaurant/ Bar/ Fast Food’ lah a natong ho dia eima gam a hi tobang ‘restaurant/ fast food’ ho jong hoi deo le ‘standard’ deo a hon a ki hinso na thei lampi aum e.

A chaina pen in, hi tobang adang-dang ho ibol thei tah hih jong leh ipu-ipa te kivah na loulho-thingpoh jong tulai khang toh kitoh a ‘organic farming’ lang jong bol thei ahie. Tuchung COVID19 a kon thilkhat kamu doh chu ahileh, ki hinso na dia thupi pen neh le chah ahin, eima hon/ lou a neh le chah thengsel, ‘fresh’ thet iki tu a ikineh thei kalval a ipi apha um ta ding ham? Ijo tho leh ‘commercial scale’ a jong loulho bolthei ahitai; tulai a hi tobang ‘organic’ thil ho hi mi’n adei joh ahitai. A hoiche chu hita jong leh, COVID19 jeh a khopi ho’a inchen-khosah tongkha leo a inlam hung kinung le ihi tah uleh, thilse lam hin po lut a panglou a, khopi ium lai uva thilpha imu cheng u polut a ipan joh uva, I gamsung u le I namsung u I choisang diu vin iki tem uve.