Left Party hon BJP lamkaina sorkar douna a kiphinna sangtah bol dinga...

Left Party hon BJP lamkaina sorkar douna a kiphinna sangtah bol dinga kigotna neiyu

67
0
SHARE

Left Party hon BJP lamkaina sorkar douna a kiphinna sangtah bol dinga kigotna neiyu

Imphal, Jan 20(ET): Gamsung a Left wing Opposition Political Party hon India Constitution, Secularism leh Democracy huhna dinga ni 10 lhing kiphinna tohgon bol dinga kigotna anei tauvin ahi.

Irawat Bhawan, BT Road, Imphal a Left Party leh Secular Opposition party dang dang a lamkai hon tunin Press Meet abol uvin, adinmun u phondohna anei uvin ahi. National level a lunggel kibahpi political party hon kilolna anei utoh kitoh a kiphinna umding ahi. Akihouna a party lamkai hon Modi lamkaina sorkar in Indian economy atuh them loujeh a atamjo hinkho kimanchah ahahsat chule aboi cheh cheh thu alungkhampi nau asei uvin ahi.

Gamsung GDP hi akhehsuh na anem napen ahitan, achesa kum 50 sunga dinga tohmun neilou asan na pen hia chule loubol mi ama leh ama kithat tam cheh cheh e, industrial unit akikhah tamtah um’a, thao man, anhon na gas man, anche louhing chule niseh a ngaichat thil man ho kal cheh cheh ahi. Modi sorkar in ‘economy’ nasatah a asuhboi ahitai.

Hiche ho jeh a boina umho suhlhap a mipi kithopina peh sanga BJP in office atuh jouva nam kah a kibungkhenna akehlet a, ‘democratic rights’ leh ‘Constitutional guarantee’ abulu a, mihem million a sim atohkhah ahi. Tua union territory ni a kiso a Jammu and Kashmir gam a Article 370 gangtah a akilahdoh jeh a gamsung hi lha nga val kihen tobang dinmun mutheiya um ahi’in, ‘human rights’ kipalkeh a, mipi kimanchah asuhset soh ahi.

Kijahto na (communication) kisuboi a, economy kisuse a, mipi chamlhatna neitah a chatloh thei louva um ahi. J&K Chief minister anahi mithum chule political leader aja a sim leh mipi asang a sim ahen/amat jom nahlaiyu ahi. Hiche jouva Parliament in athu giltah a seikhomna nei louva Citizenship Amendment Act (CAA) phatsahna aneiya, BJP in majority ahinauva athaneina amanchah u ahi.

CAA, NPR leh NRC hi constitution toh kitohlou package ahi’in, hiche hi vaicha genthei, alhasam, SC/ST chule jat leh nam lhom ho kitupna ahi. NPR hi NRC basic ahi. CAA akilahdoh ding chule gamsung pumpi a NRC/NPR akingah dinga thumna kaneiyu ahi. Agam a NRC chepi lou dinga phondohna neiya Chief Minister jousen NPR vohhai ding angaito diu ahi.

India gam pumpi a CAA, NRC leh NPR douna a kiphinna um ahi’in, Indian Constitution venbit nadinga boina sem louva kiphinna bol ho katosot uve.  BJP vaipohna state chule police ho Home Ministry noiya aumna Delhi gam a hitia kiphinna bol ho chunga hunam thahat aman uva, chule boina sem louva kiphinna bol a thina toh ho jouse hi BJP vaipohna gam a thi u ahi.

Uttar Pradesh gam a 21, Assam a  chule Karnataka gam a mi 2 thi ahi. University, Institute of Higher Learning a police hon hunam thahat aman uhi asan nathei pen a demna neiding ahi, tin asei uvin ahi.

Anglo-Kuki War centenary song chung’a thuchang kijih ho lahdoh ding a Federation of Haomee in govt heng’a ngehna nei

Imphal, Jan 20(ET): Federation of Haomee (FoM) in Manipur state govt ang a Anglo-Kuki war hetjing na song a “In Defence of Our Ancestral Land and Freedom” kisut na song ho lahdoh ahi na ding in ngehna ana nei uvin ahi.

Kiloikhomna in song kiphu na ho chung a pan la ho ang a gotna peh ahi na ding injong hetsah na an anei uvin ahi. Federation in Chief Secy le Home Secy, Govt of Manipur ang a lekha thot anei na uva  Manipur sung a Kuki kho tamtah a hitabang song ho Centenary manna toh kisai a akitung toh lhon a “In defence of our ancestral land and freedom” tia song ho a kijih hin state sung a cheng nam chom chom ho kikah a kitomo na ahin pohlut thei ahi dan tahlang na ana nei uvin ahi.

Kiloikhomna in asei na a Kuki te ang a nam chom chom ho in hitabang thucheng lahdoh na ding a temna ana nei u ahin hinlah alahdoh nom pouvin ahi ati. Hiche thu toh kisai a Joint Secretary (Home) govt of Manipur in jong district jouse a DC le  SP heng’a song kihput ho lahdoh ding a thupeh ana nei ahitan hinlah vai po ho in tuni chan gei in ima abol pouvin ahi tin jong federation in phondoh na ana nei uvin ahi.

Moreh a office kin a che IPS officer chunga AR Rifleman khat khanse, FIR kijihlut ta

Imphal, Jan 20(ET): Yairipok Police Station a SDPO a um 2016 batch Indian Police Service (IPS) officer Anupam Moreh a ache na a 12th Assam Rifles personnel khat in Khudengthabi Check Post mun a ama leh ama escort party ho ana sugim uvin ahi.

Anupam hi office kin a Moreh a che ahi. Thulhut dungjuiya Anupam team ho uniform a atounau gari registration number MN01G-6243 hi kholna anei uva chule Imphal-Moreh lamlen mun chom chom mun thum a registered abol sah u ahi. Moreh a kon ahung kile na a IPS officer nu leh ama escort party hohi Khudengthabi Check post mun a D-Company, 12th Assam Rifles hon anakham u ahi.

IPS officer nu escort khat- M Hemanta, constable, Manipur police in 12th Assam Rifles ho henga gari register akibol thu hetsahna nei dinga che a, identification card ho avetsah uva chule office kin a ahi, tia asei ahi. Ahivanga, hiche mun a duty bol a PK Pandey kiti AR sepai pa hin IPS officer nu duty a kalsong ahi’in, Imphal a kile ding ahi ti ahet vanga ahen den’a chule jan-kim chan gei hen den dinga gihna jong anei ahi.

Chule hiche sepai pa hin athu hi Director General of Police ahilouleh Chief Minister henga asei uva ahileh ama leh ama team ho lha louding a IPS officer nu agih ahi. IPS officer nu touna gari chunga akhut alha ahi. IPS nu in Khudengthabi a AR sepai pa dihlou tah a achonna chungchang a hehna asemna a, AR pa hi agilou jom in, identity card kavetsah nung uva jong paocheng ngailou tah in kei leh ka escort team ho eihou uvin, khanse tah in achon’e, tin aseiyin ahi.

Anupam in athu Brigadier 26 AR henga kaseiya chule Major, D- Company 12th AR in thilso namun adellut e, ati. Assam Rifles a natong alen jep ho phone bol ding kagot leh ka mobile phone eilahpeh’e, tin Anupam in aseibe in ahi. Hiche thu toh kisaiya Anupam, IPS in Officer in Charge, Tengnoupal district a hehna ajihlut ahitai.

IPS Association, Manipur chapter in Khudengthabi thilsoh demna nei

Imphal, Jan 20(ET): Manipur police department noi a numei IPS officer khat Khudengthabi, Imphal-Moreh highway a deilou umtah a Assam Rifles ho khat in ana bol na chung ah tunin IPS Officers’ Association, Manipur chapter in emergency meeting kou in demna ana nei uvin ahi.  Association in hiche thu toh kisai a kholchilna kinei na a Assam Rifles in phate a panlah na anei ding uvin jong hetsah na ahin nei uvin ahi.

Hengjang haosapu leh atupa kitha thu a KNO/KLA in suhthengna thuso nei

Imphal, Jan 20(UNA): KNO noiya India sorkar toh chamna thu seina a pang a Kuki Liberation Organization/Kuki Liberation Army (KLO/KLA) in achesa July nisim 10, 2019 kum a Hengjang kho a tolthana (double murder) case a themmona nei ho kiphon thu a suhthengna thuso anei uvin ahi.

Hetthei khat chu achesa July nisim 10, 2019 sun nidan 12.30 don a thal choi hon Keihao leh Hengjang kho kikah Island (Phailengmol) block noiya Hengjang kho haosapu Thangneo Kipgen (58), s/o (L) Letkhai Kipgen leh atupa Thangminlun Haokip (26), s/o Thenthang Haokip akaplih u ahi. Gari a ache nalhon a akaplih u ahi.

Thilsoh chungchang a KNF-N leh KLO/KLA ho kingoh to jing u ahi’in, KNF-N in KLO/KLA ho natoh hiding’a ngohna anei uva, alangkhat a KLO/KLA in ngohna hohi semthu chule abul umlou jou ahi, tia suhthengna aneiyu ahi. SoO a panglou KNF-N hon amahon thu akhol nauva themmona neiho akimat a ahile thina chan gotna peh dinga gihna aneiyu ahi.

Thilso kal kum khat nailam ache jouva state police leh Assam Rifles hon thilsoh a themmona neiya kingoh ho amat uva chule toltha na thilsoh a kimang meithal jong amat u ahi. Hengjang haosapu Thangkhotinlet @ Thangneo Kipgen leh atupa Thangminlun Haokip akitha na thu toh kisaiya KLO/KLA in pan alah lou kum masa a jong suhthengna anei ahitai, tin KLO/KLA Information and Publicity Secretary, Kennedy Kuki in aseiyin ahi.

Th Krishnatombi Singh, Addl.SP (Ops), Imphal East leh Thangkhochon Haokip, Addl. SP, Imphal East lamkaina a sepai hon B Gamnom haosa jong hi a Paotinthang @ Paotin Kipgen (39), s/o Henthang Kipgen amat u apachatna thu jong aseiyin ahi.

Ahivanga Paotinthang Kipgen in police ho henga Gampum Peace Camp a KLA thingnoi ho kithopina kakilah in, amaho hin M16 assault rifle khat leh AK 47 rifle thum panna a meithal li eipeh uva chule KLA thingnoi li toh thisan kaso u ahi, tia asei thu hi imadang ahipon KLO/KLA suhminset nading ahi, tin aseibe in ahi.

Niseh thuso phabep a Thangkholen @ Thangneo @ Alvinash in KLO/KLA a self-styled Major kahi tia asei hi semthu ahi bouve, tin Information and Publicity Secretary in aseiyin, chule achesa May 15, 2019 kum a SoO Ground Rules apalkeh jeh chule organization douna thil abol jeh a kiloikhomna a kon kinodoh (suspend) ahitai, tin suhthengna jong aneiyin ahi.

Thangkholen @ Thangneo @ Alvinash in organization toh kisaina aneipon, chule ama chunga gamsung dan dungjuiya action hila hohi itobang hijong leh pachatna kinei ding ahi, tin thuso chun aseibe in ahi.

‘Hit & Run case’ thu’a KSO Sadar Hills in NH-2 a bandh akou ladoh ta

Kangpokpi, Jan 20(UNA): January nisim 21 jingkah nidan 6 a kon gari a mi kitalihna thu toh kisaiya National Highway 2 a bandh bol dinga KSO Sadar Hills in kouna anei tunin aladoh tauvin ahi.

KSO Sadar Hills in asei dungjuiya, achesa January nisim 15 nikho a KSO member leh Theologian khat hi a gari a min atalih pa hi atat ho tuni chan a akihet loulai vanga Police Department hon kitepna anei uva chule BIPL in vangsetna thilsoh chunga amopohna akilah’a, vangsetna toh te insung mite sum a kithopi dinga asei ahi, ati.

 BIPL in mopohna akilah jeh a KSO Sadar Hills in NH 2 a bandh akou alahdoh ahi. Ahivanga police hon hiche thu a thukholna anei jom diu ahi’in, chule thilso namun a kila sample ho leh adang dang ho police hon Forensic Department a athot u ahi, ati. Chule RIMS Morgue a thilong um jing nikho teng post mortem kibol ding, hiche jouteng kila ding ahitai, tin aseibe uvin ahi.

MSCW in IPS officer khat kijum bolna toh kisai a AR rifleman khat kouna nei; IPS officer nun thilsoh hilchetna ana nei

Imphal, Jan 20(ET): Numei sub divisional police officer khat chung a deilou umtah a natoh na kinei na chung a 12 Assam Rifle a rifleman khat  Manipur State Commission for Women in kouna ananei uvin ahi.

Commission chairperson Meinam Binota in asei na a IPS officer khat hitia akibol thei le milham numei ho iti kibol da di ham ati. Hiche thilsoh chung a gotna sangtah pehding a hetsah na ahin nei utoh lhon in commission in athu chief minister pa komjong akilhut tah dan tahlang na ahin nei uvin ahi.

Thuso miho toh akihou na a Yairipok SDPO Anupam in rifleman PK Pandey, D Company, 12 Assam Rifles in deilou umtah a ana boldan tahlang na ana nei in ahi. Aman aseina a hitabang thilsoh police officer kei chunga achuh thei le milham ho chung a ipi soh di tam ati. Anupam in MSCW ang a complain ana bol na a Moreh akon natoh na khat akon ahung kile toh lhon a Khudengthabi check post a lhadoh ding uva a constable Shahyar Khan le Samananda ang a Assam Rifles ho kom a duty ahi utoh lhon a asol doh ding uva hetsah na aga neisah na a rifleman Pandey in asoldoh louding dan le jaan khang tokah a ahen ding dan  hetsah na ana nei ahi ati. Police officer nu chu civil uniform a kivon lou ahi akiti. Rifleman pa in IPS officer hung hihen koi hung hi jong le asol doh louding dan le DGP le Chief Minister ang  a complain abol nom  ule abolthei u ahi dan jong ana sei in ahi ati. Rifleman Pandey chun police officer nu touna gari chu ahin jon in gari chu mol in avei in, Anupam in I-card ana vetsah vang in anga dehpon ahi akiti.

Rifleman pa chu police officer nu chu ahilou lou in ana hou in, abeh got toh lhon in a phone jong anal ah peh got in ahi, hiche a IPS nu guard a pang Shahyar Khan in anakham toh lhon in Assam Rifles dang ho ahung uvin SHahyar Khan chu avo uvin ahi akiti. Police officer nu in thilsoh jou a Tengnoupal police station a case registered bol ding  a achena a 12 AR, Colonel Rajesh Chaudhary le D-Coy a  Major pa in police station a hunam a hung lut a report file louding a ana gih a hitabang complaint akon a ima thu aum louding dan ana sei dan jong Anupam in hetsah na ahin nei uvin ahi.

PREPAK in Manipur Statehood Day kiman pomlou

Imphal, Jan 20(ET): Manipur gamtum ngehna mipi kiphinna thusim a kimu le gamtum del na historian hon genthei hahsat ana to thudol thusim asei ban un achesa Jan 21, 1972 chun Manipur gamtum ahung hi tai. Chu a kon a kumsih Jan 21 hi Manipur gamtum mu nikho a kinit tou peh ahitai.

Hiche kum 48 phatsung hin Manipur jalenna tundoh kit ding government of India kom a thum a kiphinna nei galguh umlou tobang a um chu Manipur government tohgon noi a Statehood Day kingon kimanna iti lamdol a mipi in pan alah jeng thei ham tin galguh Peoples’ Revolutionary Party of Kangleipak (PREPAK) in dohna anei e.

PREPAK Publicity le propaganda secretary-in-charge  Leibaakngakpa Luwang in alamlou hel a achesa September 21, 1949 nia chu nop le da thu umlou a India in leng Bodhachandra ana thunun a Manipur gam chu India a be sah dia ana lahlut a chu a kon India government in agondoh Commissioner in Manipur gamsung vai ana pohpan ahi e, ati.

Chu a pat mipi hin kipana hinkho hi aman lou ahitan hitolhon a state tohgon noi a chelha ding Statehood Day kingon a pan la lou ding in mipi temna jong PREPAK chun anei ahi.

Jiri ILP Counter a Gampam mi 723 in permit renew bol lou

Jiribam, Jan 20 (ET): Gamsung’a ILP ahung kichesah’a kipat in Jiribam District sung’a um ILP Counter mun’a gampam mi tamtah in permit akilah jing lai ahitoh lhon’a janhi (Jan 19) nilhah lam nidan 5:00 changei in ILP permit kilah mi 4, 107 alhing in hiche lah’a chun temporary permit mi 3,641 aphatsah peh uvin ahi. Janhi chan chun temporary permit kilah mi 783 ho permit phat anakichai in mi 60 bouvin permit renew anakibol uvin ahi. Temporary permit renew kibol lou mi 723 hohi hoija um ahi akihepon chuleh counter dang ho’a permit renew akibol akibollou ujong kicheh naipon ahi. Gampam mi permit kilah’a a-permit phat kichai nung’a gamsung’a aumden thei nahlai hi akisaipi authority mitmona khat jong ahi.

Alangkhat’a gampam mi tamtah Jiribam counter a permit kilah ding akibe jing in ahin Jiribam DC posting leh transfer kibol ho jeh hin Jiribam ILP counter mun natong ho asuboi lheh in ahi tin thulhut chun aseiye.

TADC kivaipoh dan velha dinga parliamentary panel ho Northeast a nithum hung kholjin

Guwahati, Jan 20: Assam, Meghalaya, Mizoram leh Tripura gam a um tribal autonomous district council (TADC) 10 kivaipoh dan hetoh dinga parliamentary panel ho nithum Northeast gam a kholjin dinga ahung uvin ahi.

Indian Constitution Sixth Schedule noiya Assam, Meghalaya leh Mizoram gam a TADC thum cheh um’a chule Tripura gam a khat um ahi. Panel ho ahung uhi Constitution (12th Amendment) Bill, 2019 a TADC ho tha (empower) peh ding tohgon nei hiu ahi.

Congress Rajya Sabha member Anand Sharma lamkaina panel hon party chom chom, adeh a tribal party ho, akilhengdoh TADC thalheng ho, official chule expert ho ngaidan alahkhom diu ahi, tin Tripura Tribal Areas Autonomous District Council (TTAADC) official khat in aseiyin ahi. TADC leh tribal party hon tribal ho khantouna ding (socio-economic development) a dinga centre a kon fund chule department apeh be diuva thumna aneiyu ahi.

Achesa December lha a Panel ho hung kholjin dinga anaum ahi’in, gamkaiya CAA douna a kiphinna sangtah aumjeh a tohgon ana vohhaiyu ahi. Rajya Sabha a February nisim 6, 2019 ni a kipodoh Constitution (12th Amendment) Bill hi Home Affairs Parliamentary Standing Committee in vetlhahna anei ahi. Committee in report hi January nisim 31 nikho a kipan ding Budget Session ‘second half’ sunga apehlut maitheiyu ahi.

Sixth Schedule hin Assam, Meghalaya, Mizoram leh Tripura gam a tribal area ho a kivaipohna venbit ding chule tribal ho ‘economic sovereignty’ vetkol dinga asei ahi. Bill hi TADC ho ‘financial leh executive power’ kipehbe nading jong ahi’in chule agriculture, land management, industry leh social forestry development a tohgon sem nadinga TADC noiya village council lhen be dinga jong aseiyu ahi.

Numei ho dinga seat hop thum a hop khat reserve bol dinga jong aseiyu ahi. Kiphinna sangtah aum jouva Centre in TADC vaipohna gamkai Inner line permit kichepina ho CAA a kon alha ong ahi. Arunachal Pradesh, Nagaland leh Mizoram gam a ILP kichepi ahi’in, Manipur gam a jong kichepi pan ahitai. Meghalaya sorkar injong ILP chepi nadinga Centre henga ngehna anei uva, assembly in ngehna neidinga kilolna aneiyu ahi.

Tripura Assembly in Friday nikho a TTAADC seat hi aumsa 30 a kon 50 a kalsah dinga kilolna aneiyu ahi. TTAADC hin 10,491 sq km a len chule mihem 12,16,000 chenna Tripura gam a hop thum a hop ni hi agamkai hi ahi’in, gamsung mi hop 90 hi tribal hiu ahi.