Langol lhang’a Eviction kibol

Langol lhang’a Eviction kibol

316
0
SHARE

Langol lhang’a Eviction kibol

                                  Imphal khopi phaicham kimvel muol ning hoa inn kisah a cheng ho khatvei veileh ainn kiphetpeh (eviction) natoh hi aumjin ahi. Hitobang anukhahpen natoh chu Langol Tarung lang’a phai milong (Kabui) ho chenna Rugailong kho ah ana um’e. Forest officer langho seidan’in hiche a inn kiphetpeh hohi ama ama cheh in ainn u akiphet diuva avel vel’a hetsahna kinei vang’a anahsah lou jeh uva hunam’a kiphet ahi ti ahi. Forest officer khat nin aseidan’in Langol area a Forest gam’a phalna beija cheng (inn kisah) hi agom’a 1400 (inn sangkhat le jali) val ahi atin hiche hojong aban ban’a eviction hung kibol nalaidi ahi ati. Hiche Eviction kibolna kho a nupi lamkai khat nin asei chu ahileh inn kiphetpeh hoa hi meithai chaga hon niseh a neh kiholna a aman’u (cha hotel leh dukan neoneo ho abol u) ahin nopsahna mun’a kimang jong ahilou jeh in thi le thi hin le hin tia hitobang eviction hi kinang/kidou di ahi ati. Dan dihlouva Forest gam’a inn kisah ho hi neh kiholna di ahi tia govt nin amohvetje jong umlou di ahi. Ahin Langol muol le lhang’a Forest Reserved gam’a itih kah inn 1400 val ana chengman’a govt nin ima anabollou ham ti jong datmo umtah ahi. Mi achendet, inn kisah nung’a nodoh di ti sang’a inmun kilai lai leh inn kisahpat til ho ah jahdana umtheileh anung’a boina umloudi ahi. Muol chung hoa inn kisa ho dehdeh kisel thei jong hilou, State govt nin abol Calendar hoa jong alim ho kitah loi um nalai ahi. Hichu govt nin Forest gam’a inn kisah a cheng atam kihetmosah ham ti thei ahi. Tua inn sangkhat val hi nodohdi (eviction boldi) hung kichepijomleh itobang boina hung umdoh diham ti jong seithei ahipoi. Dandihlouva Forest gam’a inn kisah a cheng ho hi Politician (MLA/Minister) hon ahuh, apanji jeh jong hidi, chuleh Eviction kibolna hojong Politics a phulahna leh chi le nam’a vetna, khenna jong umteidi ahi. Imphal East Keirao muol chin lang’a Eviction anakibol ho jong chu Pangal ho inn ngen ahin Congress hon thuneina anachoilaija Forest gam’a ana chenglut u ahi. Tua Langol Tarung lang’a Eviction kibolna mun’a inn kisah hojong hi Congress ho pohlai mama a anachengpan u ahidi jong ginchat umtah ahi. State Assembly gal lang’a Thangmeiband leh Chingmeirong muol chung’a inn pahlah lah hojong khu Forest gam hitei di, phalna beija inn kisah a chenglut ngen hidi ahi. Langol Area a Eviction boldi hi anagot jing u, MLA hon Chief Minister Phone abolleh khongaiji anahina umsaosaova kisei ahi.

            Tulang’a hi phaicham mi hon muol chung hoa jong inn kisah di thanom tao, thinglhangmi hon phaicham, phailei lah a inn kisah di atikitgam u ahitai. Hiche hi Imphal khopi kimvel hoa jong muthei ahi. Ahin thinglhangmi hon phaileija kho le veng atundoh hohi inmun akichoh uva patta jong anei u ahivang’a amit teh avelel loi um ahi. Imphal khopi kimvel’a muolchung’a inn kisah atamjo hi phaicham mi ho ahiuvin inmun kichoh le patta umlou, moh chenlut (encroachment) ahi. Thinglhang district a Forest Reserved gam hoa jong acheng loi, lou le hon bolna a neiloi, thingphung kiphuh loi umteidi ahijeh in govt nin Forest gam’ah nacheng tabon uve tin nodohdi ham, action lah di ham hintileh ichan boina aumtadem ti jong gel thei ahi. Ipi hileh Forest Reserved gam kiti hi thingphung ho venbitna di ti ahi, thildanga dia akimanlou pouleh agam mi phatchomna di mama ahi.