Lamlen lim le mel putalou (Govt mitmo ham, koi mitmo...

Lamlen lim le mel putalou (Govt mitmo ham, koi mitmo ham)

46
0
SHARE

Lamlen lim le mel putalou

 (Govt mitmo ham, koi mitmo ham)

                   Lamlen kiti hi aphatle asetnin agam akho a cheng ho mit le mitlou atahlang ahi. Truck Diver Association holeh ana kija khabehlou kiloikhomna (NGO) – Innovatory and Friends Mission, Manipur lamkai hon thusomi ho Kangpokpi district sung ‘National Highway’ (NH) a lamlen setna dehsetna mun’a anapui uva japi le govt langa mopohna nei department ho mu dia alim atah utoh athu asei u chu mopohna nei department (PWD) dia jachat umtah ahi. Hiche lamlen hasetna asetna mun le lhang hi Sadar Hills Kangpokpi district sunga Motbung leh Koubru Laikha kikah ahin asetdan chu National Highway tidi jong kilom louhel ahi. Khosung laitah lamlen hibang lom’a se hilevang akhomiten sotna bandh aboldiutai. Sadar Hills sung’a CSO le Student kiloikhomna jatjat um’a ipi atileh hilai kah Km 6/7 velbep hi kum hitihchan donlou dailouva um’a mi nuisat le totnopna kisoh hitam ti hi datmo umtah ahi. Truck Driver association honvang totna malah gangtah a akisemphat loichel louleh thilpo truck ho lamlen atonglai khatna akhup athal’a hung kibung’a tosetna lentah hung umthei ahi tia adip u akidoptho u ahi. Senapati langa sopi Naga ho khun kholai muntah a lamlen asetna hobou thua kiphinna abollou u, agamsung alhangsung uva lamlen setna phot chu akisemphat vahlouleh kiphinna aneijeng jiu ahi. Manipur a datmo le nuijat umtah khat hi lamlen semphatna dia asetna mun’a cheng khomi hon lamlen ahinkha teng ulebou govt nin ahinasemphat bepji ahi. National Highway lamlen kiti phot semphat jingna (maintenance) dia Centre in ima jouse mo akipoh jeng hileh lamlen nommo lai kiti umloudi ahi. Company hon thika a asemna NH-2 – Senapati langa pat Koubru Laikha gei ahoidan anopdan khu gam khangtou hoa lamlen kisemdan toh kibang thimjeng ahi. Lamlen setna lhang hi “PWD lamlen” tia min anuisat tho ahitah jeh a Company ho khutna pehdoh di hi lamlen nom neina theipen hidi ahi. PWD mopohna akipeh a mi khat le nin phatchomna’a aneija lamlen kisuhmo nei sanga Company in contract kilahleh mijouse phatchomna hidi ahi.

                   NH-2 lamlen sunga Sekmai leh Khongampat kikah jong khu avai alet toh anop toh phatseh a duljet jing thei ahi. Hichu akho aveng’a cheng mipi hon lamlen sem contractor ho kom’a “quality” (phatah a) asem diuva angatho jeng jiu ahi akiti. Tu masang jep jong chun Churachanpur lang’a jong lamlen le culvert (lei neo) sem hon “quality” um’a asem u hinam ti velha din Committee kisem thu ana kijai. Lamlen kisemdan ahoilou, akisemlou hel teng koi ngoh diham ti jong chemtat te  thusim lengdohji ahi. Minister ho ngoh loi, department officer ho ngohloi, thingnoi ho ngohloi, contractor ho ngohloi, akaikongla muphah umji talou ahi. Akoi hileh govt vaipo ho mitmo jeh hipen ahi. Tua jong Power kichu dile ama ama phatchomna di bouva kiboi ngen ahijeh uva mipi phatchomna di natoh tamtah donlouva kikoi ahin hiche lah a lamlen melsetah a setna  ho jong donlouva um ahi. Imphal Games Village khosung lampi jong khu akum athang’a semphat louva hiti umjing khu koi ngohdi hilouva amun aveng’a cheng ho ngoh di ahi. Seina thei thunei vaipo ho kom’a athu akilhut louva akino louleh konba a-ipi vote muna di hilou akhohsahlou di hetsa ahi. Bandh boldi tina ahipon society le veng kivaipohna lamkai hon akhohsah jep ngai ahi.