Lamkai kichuna (Ane ngal ngalin ahut chang’a Anehji jeh a boina...

Lamkai kichuna (Ane ngal ngalin ahut chang’a Anehji jeh a boina umji ahi)

333
0
SHARE

Lamkai kichuna

(Ane ngal ngalin ahut chang’a Anehji jeh a boina umji ahi)

                             Thaneina (power) ho kimankhel jeh a lamkai di kichuna ho umdohji ahi. ADC (Autonomous District Council) a Chairman kichuna umjing bon khoh khopma Chief Minister  (CM) toumun kichuna ahung umdohji hin gamsung kivaipohna ichan ham’a atohkhah (asuhboi) jengji ahi. Chief minister, Minister, MLA, ADC Chairman, govt department hoa luboh (Head of department) ho, thingnoi thingchung lamkai ho, kho haosa ho gei hin athaneina cheh u amankhel uva, phatchomna mudi, nehdi ho alom chang’a kihuina aum’a power hopdohna alhahsamji teng boina khat chu umdoh jengji ahi. Tu tua CM kheldoh di tia kiphinna nei Ruling BJP MLA ho sung’ah aum’e kiti jong hi gamdang’a sum le paija kivei – Stock Market a sum sung ho umna/kihabolna gam hileh koiman sumtuong muna thei dia Stock Market a sum akoiloudi, hichun gamsung sum le pai dinmun ichan ham’a atohkhah jengdi ahi. PWD Minister Biswajit nin chief minister toumun kaduchat ahidehpoi tia asei chu ipi jeh a chief minister N Biren kheldohna dia alamkai loija pang kit ahidem ti hi ahi. Ama keu hilouva Minister leh MLA dang hon N Biren kheldoh di adei u hi athaneinau ahididol’a akipehlou jeh u tilou adang jeh hilou di ahi. Ministry/department jouse’a thuneina chungnungpen hi ministry/department minister ahi. Ahin Department File jathupidom jouse chief minister kom’a lhung di, ama phatsahna lahtei di ti ho hi kiboina bulpi hidia tahsan um ahi. File thupidom jouse CM kom lhungdi hijongleh Minister ho power suhnemna ahikhah kitleh alung lhailou diu hetsa hikit ahi. ADC hoa Chairman hjong hin thaneina jouse akihuitup uva Member dang hon thaneina leh phatchomna aginchat bang amujilou teng uleh Chairman kheldohna dia Camp bolloi umpai jiu ahi. Head of Department (luboh) hon jong athaneina ama phatchomna di bouva amanji teng Transfer achedohna dia anuoija natong hon sum adonkhom jiu ti jong tam ahi.

                          Thaneina kiti hi mopohna toh umtha ahijeh a amanje themlou, helou, mangkhel ho chung’a kiphinna jat khat hung umdohji ahi. Chief Minister (CM) N Biren jong hin athaneina ho atohkhompi minister, MLA dang ho lunglhaina’a amanchahlou hidiham ti ahi. Manipur govt a lamkai (CM) kheldi le khel loudi hi Centre lang’a lamkai ho khutna hung ki-ngam di ahitan akhel ujongleh boina neideh lou maithei, akhel lou ujongleh boina khat kipan ahitan boijing di tina tobang hikit ahi. Tua thu umdan hoa kon ivetleh Centre a party lamkai hon ijem tia CM ahinkhel lou uleh Assembly toukhomna hung um masatpen teng kiphinna bol hon CM chung’a ‘No confidence motion’ ahinpohdoh diu, CM in mi anei lhing hinam ti vetna hung umdi, kijolto, kichohtona, lungthim/duha kibolna hon ahinjuidi tina ahi. Hitobang dinmun’a hi Speaker thaneina hung potdi ahi. Speaker leh Governor in athaneina ipi lampi, koi phatchomna dilam’a ahinje diham tin ahinpohdi ahi.