Kum 70 lutna Court Case (Houin mun kichuna Case thupipen seilhah hita)

Kum 70 lutna Court Case (Houin mun kichuna Case thupipen seilhah hita)

1067
0
SHARE

Kum 70 lutna Court Case
(Houin mun kichuna Case thupipen seilhah hita)
Uttar Pradesh Ayodha khopia Hindu holeh Muslim ho houin mun kichuna Case kum som sagi lang ahung chejouva Supreme Court nin khatvei ni (November 9, 2019) a thutanna ahinnei chu navah khat ahidi vang’a Muslim holah a along lhailou um thou thou ahi. Thutanna ahung umleh khat lang joh joh kipah a khatlangpa alung lhailou di jong hetsa ahi. Ajodha a houin mun kichuna hi tua Hindu hon Ram Temple (houin) akisah thei tahdiu, Muslim ho houin (Mosque) sahna dia akom’a gam Acre 5 peh dia India sung’a Court sangpen Supreme Court nin thutanna anei ahi. Centre a BJP ho kijom’a ahung hat kit va pat bol dia anagon ho abanban’a hung chal ahijeh un Ajodha a Ram Temple jong BJP toson Hindu te kiloikhomna lenpen RSS ho dei bang chetna seichaina ahung umdi jong ginchat umpeh anahi. J & K a Article 370 kilahdoh chu BJP ho election laija ana kitepnau thupi khat ahinmolso jou uva tua aban Ajodha a Ram Temple adeibang uva ahinchai kit u ahi. Aban hung hidi lah a North East State tamjo kichatpen CAB jong hung nailam tul tul tamaithei ahi. Hindu te pathen Ram, mihem’a ahung penna mun hi Ajodha khopi a mun khat ahin, hiche muntah a Ram temple (houin) jong ana umsa anahi. Hicche Ram temple chu 16th Century AD laija Muslim leng ho India ahinlah uva vai anapoh lai uva anasuhset uva amuntah a Pangal (Muslim) te houin (Mosque) anasah ahi. Muslim leng hon India gam ahinluo uva chu mihem kiti lungsetna beihel’a chemjam thahatna’a vai anapoh u anahi. Tua India a Muslim atamjo hi Muslim leng te hatlaija hunam’a Muslim ana kisosah u anahi. Hindu hou nadalhah a Muslim nakiso dileh nahin ding, nanop louleh nathi di ti vaihomna ana um ahi.
India in Independent anamu jou jou 1949 kum langpeh a pat chu Ajodha a Babri Masjid (Muslim te houin) muntah a hi Ram Temple ana um ahijeh in hilai mun tah a Ram temple mama khat sah kit dia Hindu ten Court Case anabolpat u ahitai. Mun kichuna ahijeh a Court nin jong thutanna ana moh neitheilou anahi. Hindu tea hung hat jepjep phat uva Court thutanna ngah talouva achesa 1992 November 6 nikho’a chu Hindu volunteer (kar sevak) mi asang asang’a sim’in Babri Masjid chu hunam’a anasuhset u ahi. Hiche Babri Masjid kisuhset a kon India muntin’a Muslim holeh  Hindu ho kah a gal ana um’a mi asang’a sim anathilo ahi. Ram Temple leh Babri Mosque mun kichuna hi pathen ngaisahna (gelkhohna) vehvuh jong hilouhel, hiche mun kichuna’a thi ngam’a pang ho jong hou tahsan khohsah vehvuh ho hilouhel u ahibouve. Politics lutna leh chungnun kichuna jeh ahijeh a kum hitih chanpi hi Court Case seilhahlouva ana um ahi. Alang lang’a ho lunggel thei cheh hileu pathen houna mun chu hoilai hileh akhohpoi ti jeng thei hile kilomtah ahi. Politician hon vote muna thei dia mipi ho atil ngol gam jeh uva hou thu, houin mun thua hitobang kiboina anasohdoh ahibouve. Houthu (religion) kiti hi mihem ki ngailut tona hidi chu thisan kiso tona, kikhen telna leh politics bol pansatna’a kineigam ahitah jeh in gam khangtou hon hou thu leh pathen ahepha tapouvin houin kai jong aum tapouve kiti khu dihjo ngap diham tikuom umji ahi