Kum 5 vaipo di lhendoh hikit (Lamkai hohi mihem tun ham...

Kum 5 vaipo di lhendoh hikit (Lamkai hohi mihem tun ham pathen tun himong hinam ti)

197
0
SHARE

Kum 5 vaipo di lhendoh hikit

(Lamkai hohi mihem tun ham pathen tun himong hinam ti)

                          Vannoija dia mihem tamnapen anina leh ‘democracy’ lenpen gam India a ahunglhung ding kum 5 a sung’a vaipo ding chu lhendoh ahikit tai. Election Result seimasa themgao ho ichan dih a ichan dihmo am tijong akichehtan navah umtah ahi. Tua hi koi nomle daleh MP tam kaidohpen party – BJP lamkaina hin gamsung vai ahinpoh kitdi ahitah jeh in mipin jong phuntamna umlouhel’a thunei vaipo ho thu thua nundi chu akin thupipen hijeng di ahi. Lamkai, thunei vaipo kiti hi pathen tun himongnam ti hi ahi. Ajeh chu dandihlou tah leh mipi deilou tah a amale ama lamkai dia kitung loi jong umdalou ahi. India a Democracy kivaipohna dungjuija lamkai kitungdoh tamtah hi tolthat, hunam’a numei suse leh Criminal Case jat-jat nei loi jong um ahi. Hitobang mi ho chu MLA, MP ahiteng uleh pathen tun ahi tithei ahinadem? Chuleh leiset chung mihem thusim’a hi masanglaija pat tuni geija adon adon’a mipi di gelna beihel’a athu thua vaipo (dictator) kiti umjing thou ahi. Mipi achonkhel val teng achung uva mikhoh vaipo umji ahi ti hi Bible a jong akimu thouve. Ahin Old testament khang hihen, Hitler khang hihen tukhang hileh mipi mit thip tah a vaipo hojong achaina atuo jiu hi mihem hilo umlou tam ahi. Democracy dungjuija Election kiti hi aloutheilou khat ahi. Tulai khantouna kitoh a ‘Electronic Voting Machine’ (EVM) hung kimanto lhon’a Machine kiheitohle’a (tampering) akailou di khat kikaisah a akaidi khat kikaisahlou ti thu kiseiji hojong hi atah ahileh hitobang joubolna’a kon kaidoh hojong pathen tun ahi ti thei hiloudi ahi. Election sehleh EVM thua ngohna umji hi ahatlou, akailou hon aseijing mong jong ahijeh in tuchung Lok Sabha election result kiphon dikoncha a jong Opposition party (Non-BJP) hon EVM thua ginmona jatjat anaseiman kit u ahin ajeh bei jong hikitlou ahi. Election kiti hi hoilai gam hileh sum lutna tah ahin India gam’a sumlutdan hi sum’a vote kichohtho jeh ahipen’e. Sum thahatna leh hunam’a vote lhahna (booth capture) jong India a umjing ahi. Hitobang’a election kai ho pathen tun ahi tidi jong dihthei behlou di ahi.

                Ipi chu hitaleh kum 5 seh a vaipo kilhenna umlou hileh lamkai hi angai-ngai hon athitokah uva achutipoh jeng diu, hichea chu thudih jong umlou di ahi. Kum 5 a hi vaipo akikhel loi umjing tei thou ahi. Vaipoa kapan petna mipi lung lhaina kahilouleh kum 5 jouleh katoumun’a kon eikisonlha thei ahi ti gelna umjeh a themkhat beh mipi di gelna um ti thei ahi. BJP hojong adeilou hon satan to kibanga asei vang’a India mi tamjon adei tina himai ahi. BJP hi Anti-Christian party, North East gam mi ho dia tohgon phalou nei party ahi tia dem hobon vote pe aumleh Hindu hou, Hindu chondan le Hindu gam choisang di ti dei hon adop diu hetsa ahi. Hindu min’a Christian holeh Muslim ho suhgentheina natoh neiji hojong BJP lamkai jouse moh ngoh thei ahidehpoi. Chuleh BJP govt ahiman’a Hindu hilou ho dia kimoh hollel di jong ahidehpoi.