Kum 20 val kisei lhalou lha 3 sunga seichaidi ti

Kum 20 val kisei lhalou lha 3 sunga seichaidi ti

181
0
SHARE

Kum 20 val kisei lhalou lha 3 sunga seichaidi ti
Boina thu khatna kihouna kiti hi seilhah loichel loi um, phat lut tah a kiseilha loi um, kihouna avel vel’a um vang’a seilhahlou loi jong um ahijeh in Centre leh Naga thingnoi lah a NSCN-IM kihouna hi ani channa leh athum channapa khat joh joh hung hidia um ahi. Tua Nagaland Governor Milun RN Ravi hi kihouna’a palai (interlocutor) sot tah anapang ahin tua Nagaland Governor ahung hikit hi kihouna baijo cheh diham, ahilouleh kihouna sehseh bon boipi’a akichaina umtheilou Governor natoh thupitah toh kum 70 lang Naga Political boina thu seilhahna di aboipi di kiti vang hi boi thou di ahi. Hiche jeh a Centre thalheng’a kihouna aneipidi ho tahbah injong tahsana ahaneilou u ahi. Ipi hileh Prime Minister Modi in RN Ravi Governor dia ahinsol sol’a lha thum sung’a Naga political boina thu aseichai dia thuhilna ahinei chu ahinsolpa Governor-pu jong kikhoto tho jeng’a athu seichaina umtheina di hi “Pathen kom’a kataona ahimaije” ati ahi. NSCN-IM lamkai Th. Muivah, anungjui lamkai dang hotoh Delhi’a pat Nagaland ahung lhung uve kiti hi Governor toh kihouna neidia hung uham, ahilouleh khatvei veileh Hebron Camp ahung phahjiu tobang ham kihelou ahi. IM hon asei uleh Prime Minister level a kihouna kinei ahi atiu chu Prime Minister lomlom jao hihjongleh Union Minister leh Centre a Officer luboh lang ho jaona beh a kihouna vang hile kilom chu tua hi Nagland a kihouna aumleh Governor level bep hidi tina ahi. Nagaland Chief minister Neiphiu Rio injong khatveini vel’a chu Naga political boina thu seichai ahidi adeidan anaseije. Nagaland mipi leh mipi lamkai honjong Naga thingnoi boina thu seichaidoh a aum’a gamsung’a mipi chamtah leh lungmong tah a aumdi adeisoh kei u ahi. Ahin mipi leh Centre lang’a kon lamkai loikhat hon kihouna kichaija boina thu seilhapma aumdi adeinau hi ajeh jat chombeh hikit ahi. Hichu – Naga political boina thu seichaija aumleh thingnoi hon milham chungleh Business bol ho chung dehdeh a sumdon abol u umtaponte ti ahi. Achutileh ‘Law and order” boina thu’a kikoi tina ahi. IM honvang ‘political’ boina ahi atijing peh u ahi.
Tua Centre leh IM kikah a kihouna aban hi anaseiboi lah uva kihe (official tah a koiman seilou) Nagaland State nin Constitution tum, Passport tum leh ponlap tum neidi atiu thu leh adang dang kihoulhah mona ho thua hung kihou kit diu tina ahi. Passport leh ponlap tum kiti hi India mi, India gam kahipoi tina ahin ipi ahung tidem sei masat thei ahi. Bhutan leh Nepal hi India Independent gam ahilhon jeh a Passport tum le ponlap tum jong aneilhon ahia India lhaving noija um tobang hilhon, India beija hingthei lhondi jong hilou ahi. Jamu & Kashmir (J&K) in Constitution leh ponlap tum anei jeh a hibangse soh a dinmun jatchombeh ‘Special Status’ anei kilahdohpeh ahileh State dang khat hitobang dinmun akipeh di hi tahsan umlou ahi. Naga te chenna jouse Nagaland a lutdi thula ahung gindoh poupouleh ajahda’a akitomdi kaosa’a umloi umkit ahi. Ahin hiche jong hi sepai chah kheh a akikoileh kon ima alothei dehloudi ahi. BJP hon atohgon’u abanban’a hinboldi atiulah Kashmir a ahinpat u ahitan Nagaland thu jong amaho (BJP) dei bang’a achaina khat semdi atiu hiteidi ahi. Centre in seilhahdi ati tahtahleh aseilhahmo umloudi ahi. Ahin nadeile kilah inlang nadale chutitante ti te ahung hidem ti hi ahi.