Kuki thingnoi hon Kuki haosa avoh (Phung le chang thua cheteiji)

Kuki thingnoi hon Kuki haosa avoh (Phung le chang thua cheteiji)

59
0
SHARE

Aug 21, 2020 Editorial

Kuki thingnoi hon Kuki haosa avoh
(Phung le chang thua cheteiji)

Achesa August 17 (2020) nilhah a Leimatak area a Ingourok kho haosapu Thenkholal Khongsai nasatah a kivoh thu chu Khongsai Youth Union (KhYU) hon demna sangtah aneijin hitobang haosa upa khat melse tah a kivo chu kipom theilou di ahi tin jong aseibei. Ahin KhYU hon hitobang na kitong thu adeilouna sangtah a aseivangun hiche thua ngaidam thumna umhen ti ho aphapoh dehpouve. Alang khatnah, KNF-Z hon hiche thua amaho natoh ahidan aimpouvin, athilbol u ajeh jong hilchetna apeh keu u hilouvin tuban’a hiche lhang (Leimata) a hem le thal choi thingnoi thua boina ahung umleh KhYU in mo akipohdi ahi atinalaije. KhYU hon Kuki te chondan le khandan’a haosa upa hi jabolna lentah nei ahijeh in Thenkholal Khongsai ain’a kon kikai doh a numei chapang masang’a thisan naisan kaija kivo chu kinoisena ahi ati. Kho haosa kiti hi mijouse moh hitheilou, chondan dungjuija insung bah khat mi upa jong ahi hi ainsung aphung bah chunga jong mopohna lentah anei jeh a haosa khat chunga khut kilha kiti hi phung bah musitna ahi tia jong lahthei/gel thei ahinai. Ahin thingnoi lang thu ahiteng levang thu jouse phung le chang’a lahloudi/seiloudi a phatah ahikitne. Thunop pet leh haosa hidi thanom ngensen ahi hi haosa power thupi jeh leh kho neipa hina a govt langa kon chanvou hojong athu thu ahijeh ahi. Ahin haosa ho dinmun ahahsatdan chu thuboi laboi, gal le tol hung umteng mol thoh masapen leh gal lamkaija dia mopohna jong acham’a achung’a lhung ahi. SoO um masang chu govt sepai ho kho khatna thingnoi ho hol’a acheuleh adoh masatpen uchu haosa leh village authority member koi ham ti hijeng, akhohleh mol haosapu mol nemasapen hijeng ahi. Thingnoi hojong neh le don le lupna gena akisuhlouleh alunghan u abuhlhahnau masapen chu haosa ho hikit jeng ahi. Govt sepai holeh kho haosa ho meithal long kikah a haosa ho um’a alang langa kichat di anei hi thukhoh laija haosa hidi jong  koima athanom umjilou ahi. Govt sepai hihen thingnoi ho hileh aseisei khat u chu haosa ho dia abollouje umlou ahi.

Ingourok haosapun SoO a umlou LTT thingnoi ho meithal akoijin alhanga LTT thingnoi Cadre (sepai)  Recruitment boldin jong anganseuve tia KNF-Z hon asei u chu adih hijongleh haosapun thingnoi ho kichat jeh a ama nople da’a abol/akoi jong hithei ahi. Ijem tin LTT ho seisei bolkit hihleh mol aneh thei hinalai di ahi. Ahin ama nopna tah a thingnoi group khat toh kisamkaina/kivopna anei ahilevang SoO noija um khat Operation area a Non-SoO thingnoi group khat umthei ponte tia agam alhang’a umsa thingnoi ho dia mah thei hithou kitdi ahi. Ipi hileh thingnoi thu hi phung le chang thua achejom jingleh nam thu kiti umlou cheh cheh di ahi. Thingnoi party lamkai khat party pumpi lamkaipa phung toh kivet chep jeng hi ajeh beijong hikitlou ahi. KNO hi SoO a um ahijeh a KNO Operation Area a Non-SoO group umtheilou di ti hi kuoi chu SoO a um hia kuoi chu umlou ham ti milham hon ahet theilou jeh a thil hoitah khat vang ahi. SoO a umlou hojoh gam le nam a dia pangdet tah kisei kit u ahijeh un adih adihlou seikhen hahsa kit ahi. Ipi thu hileh gam le nam dia natonga kisei cheh ahijeh un seitoh thei hididol ahi. Thingnoi le thingnoi akibolto, akithato ujong dih hihjongleh thukhat ahitan milham, haosa upa beh vang kidem jeple ti ahi.