Kuki “Political Talk” (Ipi hile kihouna aumphotle Machalna khat ahi tidi...

Kuki “Political Talk” (Ipi hile kihouna aumphotle Machalna khat ahi tidi ahi)

341
0
SHARE

Kuki “Political Talk”

(Ipi hile kihouna aumphotle Machalna khat ahi tidi ahi)

                                              June 24 (2019) ni’a Delhi a KNO leh UPF lamkai ho kikimsel’a ajaonauva Centre leh State govt thalheng hotoh “toukhomna” ananei u chu ipi hung tiden di ham seithei ahilouvang’in thakhatna kihouna ana um seh-seh jong chu aphai tidi ahi. Tumasang’a kihouna ho hihen Imphal a khatvei veileh SoO Monitoring Group (JMC) hoto kihouna ho hileh UPF le KNO thalheng ho atum tum’a kihoupina ana umji ahi. Tuchung Delhi a kihouna chu ‘political dialogue/talk’ ahipon kinepna thei jong ahibehpoi tia gelloi jong aum’e. Prime Minister, MP, Minister (politician) ho kihouna a ajaolou man’a ‘political talk’ ahipoi tithei ahidehpoi. Kihouna chu thildang dang thu hilouva gam le go thua dinmun leh thaneina thu – ‘politics’ thu ahijeh a political talk timo ahipoi. Tuchung kihouna umto lhon’a angaija kum khatna dia SoO kinoptona kijopbe jong achamlouva lhasa hung hidi tina ahitai. Chuleh tuchung kihouna chu ‘Kuki political talk’ tia jihloi, ‘Kuki/Zo’ tia jihloi, ‘Kuki Zomi’ tia jihloi aumnahlai hi athupi louhel’a gel loi umjongleh kiboinapen hung hinalai thei ahi. Kihouna a pang ho leh lekha kipe ho akisuhlou leh ichan ham kiphah nung’a abul’a kipat kitna hung hithei ahijeh in akipat til lang’a pat ima jouse aban ban’a akicheh ngai di ahi. Kihouna akipat tah jeh in kichaivah di ahitai kiti jongleh kum tamtah lutna ahinahlai di jong hetsa ahijeh in khatvei gah navahna dia kinochel’a thil seilhah jeng loudi chu ‘Kuki/Zo’ tia ana kibolpan ahitah jeh in asuhtoh kitna dia ipi hung tidiham seithei hidehlou ahi. KNO leh UPF hon SoO analah uva chu “Kuki armed groups” (thalchoi Kuki group ho) tia govt toh soi anakaisau chu chomkhat jouva ‘Kuki/Zo’ ahung kiti kit chu boina khat semdohna anahibep ahi.

            Tua kihouna a agenda chu Territorial Council (TC) thu, hijong chu Bodoland Territorial Council (BTC) tobang (model) hidia ‘demand’ kibol ahi. Nomenclature a boina neite ihi jeh un TC min dia jong kiboina um nalai ahi. Ahin hiche lang hi ihaseileh sapte thuchih a “sakol masang’a sakol kangtalai kikoi” (to put the cart before the horse) kiti tobang hithei kit ahi. BTC Model a Territorial Council (TC) ahidileh akitoh theilou di tamtah umsa ahi. Apum apeh a BTC tobang chet hidi tina ahilou vang’a BTC Model khel khel tia anasei masatlou didol, eima mi le gam to kitoh a TC kivaipohna umdidol sei thei ahi. Ipi hileh hiche TC hi ipi min kisah henlang, mudi hihen muloudi hileh Sixth Scheduled noija Autonomous District Council (ADC) kiti toh akikhetna umbehlou ahi. MLA gup umna leh paotho jat kikimna district Churachanpur hi TC HQ hung hidi hitaleh pao (language) thua jong kichuna/kiboina hung umnalai thei ahi. BTC a chu Bodo pao (language) huhbitna thu hijeng ahijeh a pao thua kiboina umlou ahi. KNO-UPF TC a hi Literature langa achungnungjo kahi tihon TC HQ jong keiho tamna mun hidi, pao jong keiho pao ‘official link language’ hihen ahinti kit thei u, abang khat chun atampen ho tho pao hihen ahinti diu hetsa hikit ahi. Ipi hileh chenkhompi Naga ten ahonsung uva cheng dan’a isei jing jeh un ipi min kiputna leh ipi pao athupipen’a kimanna hileh TC beh inei uleh gamgi kikaina khat neina hung hidi ahijeh in aumlouhel sanga ipiham khat chu aphajoi ti te hijeng ahi.