Kuki nam mite kinepna KNO leh UPF

Kuki nam mite kinepna KNO leh UPF

529
0
SHARE
Kuki nam mite kinepna KNO leh UPF
By: Thanglam Manlun Civic journalist

Kinepna beiya hingthei hilou lei mihemte kiloikhomna leh kilungto na’n ama ama nam chamlhat’na leh kivaihom’na aneijou vaikhonunga Kuki nam mite dinga umsun kinepna chu KNO leh UPF bou ahitan ahi. Hitoh kilhon chun mitin lungthim’a thudoh hung kilang chu alolhing nadiuvem or alolhinglel diuvem? tibou ahitan ahi. Hijeh chun tuni’n political talk thu’ah lung-gel phat chomkhat ina-sekhom diu kadeiyin ahi.

PROCESS OF TALK :- Political talk hi kihouna lah’a asangpen ahi. Ajeh chu kihouna’n namkhat chu changtum kivaihom’na leh nam mite phatchomna dinga thunei vaibol govt. toh kinoptona semdoh ding tina ahijeh’in kihouna hi thil thupitah ahi. Ahin, hiche kinoptona semding hi thilbai ahilou jeh’in gangtah’a seilhah’a boljeng thei hilou ahi. Ajeh chu govt. in jong charter of demands ho phatecha avetchilla akhol chil ding ngai ahi. Chukeu hilouva govt. in avet thupi penchu namkhat gelkhoh na’a namdang atohkhah’a chamna ake-ding chu thil hitheilou ahikeu hilouva govt. jumna hiding ahijeh’a ahithei leh delay tactics mangcha’a mipi kinepna suhdai ding tichu govt. lung-gel ahi tichu seilouva jong hetsa ahi. Heche photchetna chu NSCN (IM) toh akihouvu hi ahi. NSCN (IM) ten India Govt. toh 1997 kum’a ceasefire agreement ana neiyu ahitan kum 20 val achenung ‘in jong imachom ahidehpon ahi. Chutia Naga te hibanga kilungtoh tebon alolhin jou louleh eiho vang (kahaa-se) tia nagel maithei ahi. Ahin, gelding khat chu NSCN (IM) Politics leh eiho’a akibang poi ti ihetdiu ngai ahi. NSCN te sanga eiho lolhin’na ding nailamjo ahi. Oleba kamang seidan’a neigeldiu ham? ipi hile anoi anasim suh pou pouvin.

GOVT. IN AVET THIL THUM HO :- India govt. hihen koigam hijong leh agam sunga kiphin’na neiya govt. douho akihoupi teng lung-gel thum neiya akihoupiyi ahi. Hiche lung-gel hochu ahile PEACE, PROSPERITY AND INTEGRITY ahi.

  1. PEACE in adoichu akiphinho chu kihoupi’a gamsunga boina umsahlou ding tichu govt. in adei leh achepi chu ahi. Hijeh’a chu Kuki nam-mite kiphin’na jong kihoupi’a gamsunga chamna aumna dinga inam sipai hou kihoupi dinga ahin kouvu ahi. Kihouna kitihi chamna semna ding ahijeh’in akiphinho deichu nam dang lung tongkhathei ahi’a nam khat suhlung lhaimona thei ahileh chamna umtheilou ding ahi. Iham tia hichu akisuh bulhit’a ahijong leh namkhat khohsahna kon namdang khat lungnomo’a kiphin kitding tina ahin hichu govt. chepi hilou ahi. Frame work agreement alolhin theilouna chu Nagate suhlung lhaina dinga state thum Assam, Tripura leh Manipur lung phatmo ding chu thil hitheilou ahijeh’a tuni chan’a amu amal umtheilou ahi.
  2. PROSPERITY tichu haona leh phattheina kitihi gamjouse ngaichat lenpen ahi. Hijeh’a chu gamjousen ama ama gamsung phattheina leh haona dinga asun ajan’a aboipi’u ahi. Ichenna’u India gam jong van-noiya economic growth rate sangloiya pang ahi. Hijeh’a chu India in Nagaland a Sohlhu-ga chang khat jong amansah nomlou ahi. Hiche photchetna chu Kashmir gam ahi. Kashmir gam’a terrorists ho douna dinga India in asuhmang hi agam gasoh sanga double triple a tamjo ahi. Ahivanga apehdohlou ahi, ajeh chu Kashmir gam’a Apple pumkhat jong a-it jeh’u ahi. Chuti ahile NSCN (IM) in Currency achom neiding, Flag achom neiding tihohi India economic perspective of prosperity toh kikal ahi.Tekah na’n naphailei kei-inn toh kinaipakhu aga ken kanehding ahi kitileh nanom dem? nanoplou ding ahi ajeh chu nagam ga-soh chu na-it teiding ahi.
  3. INTEGRITY :- Kipumkhat’na kitihi inn-sung, khosung leh gamsung’in angaichat pentah leh agelkhoh pen chu ahi. Hijeh’a chu India govt. in jong gamsung integrity sukeh thei terrorist ho akimaitopi’a Kashmir gam apehdohlou ahi. Chuti ahile NSCN (IM) in India toh equal soveriegn right neiding atihi ahithei nadem? ahitheilou ding thil ahi. Ajeh chu India haosapu Table a kihou ahijeh’u ahi. Soveriegn right neiding thu ahileh International levella sei ngai ahin tua agam neipa kom’a nagam neimoh peh’in kitichu kon ahinai atiding ham. PAN Naga hihen Southern Nagaland hijong leh Flag leh Sum atum’a neiding kitichu soveriegn right hithou thou ahin ahitheilou ding thil ahi.

EIHO DINGA ANAILAM JOHNA :- Kuki nam mite dinga anailamjohna chu state within state or Territorial council kitihin India Map jong suhkhalou, Manipur Map jong asuhkhahlou ding ahi. Ajeh chu boundary lhekhen’na umlou ding ahi. Hijeh’a chu Manipur integrity sukeh pouvinge tia lamkai hon soi ana bollu ahi. Eihon igel thupiu hi igam’u demarcation athah’a bolla hiche kolkah hi Kukiland ahi kitileh itiu ahi. Hijong chu geldinga lom ahi ahin, Territorial council imu’uva ahileh Govt. toh kinoptona dan chun protect eibol ding’u ahin boundary kilheh hen kilheh hihjong leh thakhat ahi. Katina jeh chu Manipur gamsunga cheng Kuki, Naga leh Meilheite chenna leh thaneina chu India danpi noiya election segment hon akhensa ahi. Hijeh’a chu Manipur Map jong kehlouva alangkhat’a eiho jong chamlhat tah’a ikivaihom theidiu chu athupi pen ahi. Hitia chu India govt. toh kinoptona aumteng boundary kilheh khel khel hihjong leh Phaigam mihon thinglhanga thaneina aneilou diu ahi. Ajeh chu Territorial council Law chun safe guard eiboldiu ahi.

KNO LEH UPF HO TEPNA :- Tu tu’a Kuki nam mite’n ikinep pi’u chu KNO leh UPF ahin, khonung kinepna chu DRK ahi. KNO leh UPF in Govt. toh kihouna aneiyu amachalna khat chu tumasang’in KNO leh UPF in  achang chang’in govt. anakihoupi ji’uvin ahile kalung anompon hijeh chun kipumkhat ding thu haseiyin kana seiyin ahile thingnoi eimuda loijong ana um’in ahi. Kei ima hilou seijeh hipontin, India govt. pressure jehham ahilou leh aphat situation in namoh toukhom sah’u ham vang kahepon tuchung 7 vei chan’na India govt. toh kihouna’a lamkai jouse natoukhom’u chu lungmon aum’in mi-vet ding’in jong ahoiyin ahi. Tuchung kihouna chu separate talk a kon progressive talk ahiphat’a Nagate kicha’uva unthim theilou ahitauvin ahi. Unity kitihi mihem’in akichat pen ahi ti kiphona chu tuchung nahung toukhom’ule NSCN (IM) ten talk kichai chaiya press release ahinbol jeng’u chu ahi. Hijeh chun tunjong kilungtoh’un lang dinkhat’in ding’un tihi nam mite taona hijing jeng ahi. Ikilungto leh jolelding aumpoi tihi Pu le Paten ahin chepiuva British te anadouvu ahijeh’in acha atute eihojong ikilungto diu angaiyin ahi.

CIVIL ORGANIZATION HO TOH KITHOKHOM DING:- Eiho nam mite hi iti ikivaihop’u ham aseiye akihepon ahi. Twi le Nga, Bu le Me akiti banga Thingnoi leh nam mite hi kikhen theilouva hingkhom tongkhom ding ahi. Ahin, tu idinmun’u hi ivet leh Civil organization ho leh thingnoi hohi kimat theilou dan’in aum’in aphamo lheh’in ahi. Govt. toh talk nanei’u jong leh thipbeh’a nache’uva nahung kile’u jong leh thipbeh’a naumjeng’u hi thilhoimo ahikeu hilouva govt. gelkhohna jong lhasam ding ahi. Tuni chan geiyin Public voice umdohna ding tohgon aumpon, tumasang’in Kuki Inpi Kangui mopoh na’n simlaihon kijotna aneiyun kipapi aum’uvin ahi. Ahile ichenna’u gam jouse’a Kuki Inpi GHQ or KSO lamkaina’a nam mite’n kijotna neithei hilouham? keigel’in vang ahimona ding kahepon ahi. Tu’a ahimona hi Thingnoi ho nakilungto lou jeh’uva mipin tha kineitheilou chule civil organization lamkai honjong naa-tohye ahetlouvu hidin katahsan’in ahi. Hijeh chun tu vaikhonung hijong leh i-naa tohhou mi gin le ja um’a iboldoh theina diuvin kilung toh’un lang nam mite jong participation ineisah di’u angaiyin ahi. Achuti lou leh the hope will fade away like the leaves withered.

Achaina’n kipumkhatna hi galjona ahi ti geldoh jing pum’a nampi kithodoh’na dinga pan lacheh din  avel’in tepna kahin neiyin ahi.