Kuki Inpi Manipur thuso UNC in donbutna nei; gamsung mi dihtah ahi...

Kuki Inpi Manipur thuso UNC in donbutna nei; gamsung mi dihtah ahi pouve, tia seikit u

128
0
SHARE

Kuki Inpi Manipur thuso UNC in donbutna nei; gamsung mi dihtah ahi pouve, tia seikit u

Senapati, Nov 6(ET): November nisim 5 nikho niseh thuso a Sominthang Doungel, vice president (Political Affairs), KIM in Kuki Inpi Manipur thuso anei United Naga Council (UNC) in donbutna anei uvin ahi.

State sorkar in (Order No 2/8(1)/2016, dated 13-10-2019) Anglo-Kuki War 1917-1919 Centenary Celebration song a kisun ‘In Defence of our Ancestral Land and Freedom’ kiti thucheng lahdoh dinga Kuki Inpi Manipur ho thuso apeh ahi, tin UNC in suhthengna anei uvin ahi.  State sorkar thupeh juilouva, akisei dei umlou thucheng ladoh louva program achepi u ahi”, ati.

UNC in asei dungjuiya, C Aisan kho, Saikul subdivision a hondohna kinei janglum song a Chief Minister N Biren Singh chief guest a apan leh Minister Th Biswajit Singh min kisun hi kikhel lou ahi. State sorkar in October nisim 17 nikho hi ‘restricted holiday’ a thusim kibulphuna umlouva aphondoh ahi, tin UNC in aseiyin chule ‘gamsung mi dihtah’ tia kijih thucheng chungchang a state sorkar in gamsung mi dihtah hilou ho dinga ‘restricted holiday’ aphondoh thudohna aneiyin ahi.

India sorkar leh Kuki Inpi Manipur in October nisim 16 nikho chule File No 7/1/2019-NE-1, Ministry of Home Affairs, (dated 29th October 2019) a kinoptona kisem jouse toh kikal/kitohlou a Kuki Inpi Manipur in sorkar thuso chouna leh donbutna aneiya chule pupa gam thusim huhna dinga koi hijong adouna dinga Kuki mite kipunkhom ding ahi, tia chouna anei ahi”, ati.

Hiche jeh a gamsung mi dihtah hi a Naga hon gamsung mi hilou hon thusim akisemthu uhi kisang louding chule kimoh vetlou ding ahi, tin UNC in aseiyin chule hiche jeh a boina thilsoh aumleh akikum ho themmo kichan ding ahi”, tin Naga kiloikhomna UNC in gihna jong anei uvin ahi.

MPCC in Indo-Naga Agreement thu a ‘State Assembly Special Session’ kou dinga seiyu

Imphal, Nov 6(ET): Manipur Pradesh Congress Committee (MPCC) Vice president leh spokesperson T Mangibabu in Wednesday nikhon gamsunga thilsoh ho alungkhampina thu aseiyin, ‘special state assembly session’ kou angaiye, tin aseiyin ahi.

Congress Bhavan, BT Road mun a T Mangibabu in thuso miho akimupi na a, tuhi kipa golnop phat ahipoi, ajeh chu gamsung mihon Indo-Naga final accord sem ding thu alungkhampi ahi, ati. Peace Talk kisem Mangibabu in akipapina thu aseiyin, ahivanga gamsung akisuhkhah a ahileh party in amoh vetlou ding ahi, ati.

AICC lamkai hon Centre sorkar henga hiche thu a pan alah diuva MPCC in ngehna anei ahitai, tin aseiyin chule Modi lamkaina sorkar douna a Congress in ni 10 gamsung pumpi a kiphinna bol dinga tohgon anei na a Manipur gamsung ding gelna jal a party in pan alah louding ahi, tin MPCC spokesperson in aseiyin ahi. Tu dinmun a MP jouse ipi dinmun a pang uham, tin N Mangi in thudohna jong aneiyin ahi. Gamsunga BJP lamkai sorkar hiche thu a athipbeh jeh a demna thu jong aseiyin ahi. Press meet a MPCC spokesperson N Mani, General Secretary Haresgwor Goshami leh adang dang jong apang uvin ahi.

Christian kiloikhomna AMCO in gamsunga chamna aumna dinga taokhomna sem dinga Christian jouse kouna thuso nei

Imphal, Nov 6(ET): All Manipur Christian Organisation (AMCO) kiti gamsunga um houbung chom chom khenna umlouva Christian kiloikhom ho umkhomna khat ahi’in, Manipur gam a tu leh tu a Christian umjat hi hop 43 ahi’in chule Christian jouse hi AMCO member ahi, tin AMCO in thuso anei uvin ahi.

November nisim 6 nikho a AMCO in ‘emergency meeting’ aneiya, phat sottah kihouna aum jouva boina lampi chepi louva chamna joh ngehna neidinga kilolna anei ahi, tin Rev. S. Prine Vaiphei, President, AMCO leh Rev. Fr. Jacob Chapao, General Secretary, AMCO in thuso aneiyin ahi. India sorkar leh Naga hon Peace Talk anei thu, Kuki ho pu-pa gam leiset thu leh adang dang thu jeh a achesa kal ni leh thum sunga gamsunga lungmonna aum theilou hi AMCO in alungkhampi ahi’in, machalna hilouva eima chang kisuhmangna bou hiding ahi, ati.

Gamsunga tua hi chamna leh lungmonna angaichat dan thu AMCO in aseiyin, kitahsan to na lhasam a chule nam chom chom kah a lunggel a kikhenna um ahi. Hiche hojeh a gamsung a boina sangtah sohthei ahi’in, hiche jeh a Christian Organisation luboh AMCO in nam chom chom khat leh khat akingailut nadinga kouna anei ahi. Kingailutna leh kisan to nahi lungmong a chenkhom theina ding alampi ahi, ati. Centre leh state sorkar in lungmong a chenkhom thei nading lampi asem dinga temna jong aneibe uvin ahi. Kihouna sem louva bomb kisuhpoh, bandh, mipin dan akhut a alah a thutanna anei, strike leh kiphinna kibol ho organization in demna aneiyin, gamsunga um kiloikhomna chom chom leh CSO hon bandh kou louva angaichat ho lampi danga aphon diuvin AMCO in temna aneiyin ahi. Gamsung mihon chamna tosotna dinga pan alah cheh diuvin temna aneiyin chule social media leh channel dang dang a boina thilso nathei, kitomona thei leh kitahsan to louna thei jouthu a kisem thuthot ho kithansah louva pan lahkhom joh dinga temna aneibe uvin ahi.

Gamsunga um Apex Christian Body khat hi a AMCC injong gamsunga um Christian jousen tao nikho anei diuvin thulhuhna anei uvin, hiche a hi Imphal khopi leh akimvel a um Christian kiloikhomna chom chom, Priest, Pastor, Catechist, Evangelist, khangthah leh numei ho pangding ahi, ati. November nisim 8 nikho teng MBC Centre Church mun a jingkah nidan 7 teng kikhopna umding ahi.

Christian houbung jousen ama ama houbung a amahon pha asah u phat a taona anei diuvin temna anei uvin chule thinglhang leh phaicham a um Christian leh gamsunga um houbung hon akisei thu ho a taokhomna anei diuvin ngehna anei uvin ahi. Gamsunga um Christian jousen taona nikho tosotna lhingset apeh diuvin aseibe uvin ahi.

ECI thupeh dungjui’a Electors Verification kibol na’a voter verification kibol louho vote thi ding

B.Lalboi Gangte

CCpur. Nov.6 (ET):  Election Commission of India (ECI) in India gamsung mi vote neiho ding’a Electors Verification Programme achesa Sept. nisim 7, 2019 nikho’a pat tohgon anei toh lhon’a Nov. nisim 18 chan chan ding’a ECI in phat anavochon tan ahi. CCpur District sung’a hiche verification programme achelhah jing lai ahitoh natoh ho anong kai jeh mi tamtah verificationbol loulai jong aum in ahi tin thulhut chun aseiye. Chuleh Booth Level Officer (BLO) kimkhat in ama umna Polling Station a inn cheh achon uvin, kimkhat inn cheh chonlou in VA ho kithopi nanoi in khosung inn khat’a verification abol uvin ahi. Ahin natoh na kinei ho deibang tah’a mipi ho aki ging lou jeh in CCpur District sung’a Vote neisa mi tamtah verified akibol loulai jeh hin a vote ho thi theiding dinmun in aum in ahi ati.

Hiche Voter Verification Programme phatsung’a hi min dihlou suhdih na, passport thenglou suhdih na leh Aadhaar Card toh link ding ti ahi jeh in natoh ho hi kintah’a bol gangthei ahilou dan asei uvin ahi. Chuleh Oct. nisim 31 chan in Manipur State sung pumpi’a Vote 19,40,057 um nalah’a 12,29,645 vel bou verified akibol doh jou in 63.38%  jong alhing jou pon ahi. CCpur leh Pherzawl District sung’a Assembly Constituency 6 um nalah’a 55-Tipaimukh a vote nei 18,208 um nalah’a verification ding’a kipe lut 6,767 apha in 37.16 percent bou alhing in voter 11,441 verification kibol loulai ahi dan mudoh ahi. 56-Thanlon AC a voter 18,035 um nalah’a Verification process ding’a BLO khut’a um 9,552 apha in 52.96 percent alhing in voter 8,483 kibol loulai, 57-Henglep a voter 30,133 um nalah’a verification ding’a kipelut jat 11,557 apha in 38.35 percent alhing in voter 18,576 verification kibol loulai, 58-Churachandpur AC a voter 55,741 um nalah’a verification bol ding’a kipelut 33,291 apha in 59.72 percent alhing in voter 22,450 kibol loulai, 59-Saikot AC a voter 52,666 um nalah’a Verification ding’a kipelut 23,219 apha in 44.09 percent alhung in voter 29,447 kibol loulai chuleh 60-Singngat AC a voter 26,784 um nalah’a Verification bol ding’a kipelut 10,947 apha in 40.87 percent alhing in voter 15,837 akibol naipon ahi.

Naga Peace Talk thu’a COCOMI in gamsung mun chom chom’a toumun kiphinna bol jom jing

B.Lalboi Gangte

CCpur. Nov.6 (ET): Naga peace talks toh kisai’a “Alert campaign” suhjom na ding’a Coordination Committee on Manipur Integrity (COCOMI) in thuphon anei toh lhon’a tunin CCpur khopi sung Khumujamba Leikai a Meeitei hon COCOMI panlah na tosot nan toumun kiphinna ananei uvin ahi.

Kiphinna’a chun mi 300 val in pan anala uvin hiche achun ‘Save territorial Integrity, Give peace not Pieces, No divide and rule policy, not an inch of Manipur’s territory will be compromised and Save Manipur’ thucheng ho ana tahlang uvin ahi. Chuleh Government in gamsung asuhkeh thei nalou ding’a COCOMI kalsonna jouse tosotna kinei ding ahi tin CCpur United Club Organisation President S Kula chun aphongdoh in ahi.

Hiche toh lhon’a Naga leh Centre Govt. kikah’a kihouna’a kiphatsah na pilhing sem’a um hin ipi ipi ahopkhah ham ti phondoh na anei nading’a Centre Govt. nona’a hiche toumun kiphin nahi chelha ahi. Hetthei khat chu COCOMI hin Centre heng’a Naga peace talks hin ahomkhah point ho mipi het ding’a achesa Nov. nisim 4 nikho chan’a aphondoh ding’a pha anatep peh nachung’a tuni chan’a phondoh louva aum nachung’a hitobang kiphin nahi achelhah pi ahi. Chuleh Manipur territorial integrity venbit ding deina jeh’a COCOMI in Nov. nisim 7 leh 8 nilhah leh Torch rally jong aneiding ahi. Hiche nachung chon’a Naga peace talks toh kisai’a kithulhuh na point ho tahlang na ding phutna’a Cordination Committee on Manipur Integrity (COCOMI) lamkai na’a Imphal khopi sung mun chom chom’a ‘Alert protest’ jong kiche jom jing ding ahi ati.

Alangkhat’a COCOMI in Union Govt. in thulhuh na aneiho Manipur gamsung mipi deilou thucheng apan lou nading in gihna anei in ahi. Chuleh tunin Top Khewa bazaar mun’a Khurai leh Top Awang Leikai Meira Paibi a Coordinating Body tohgon nanoi in public alert meeting leh toumun kiphinna jong ananei uvin ahi. Coordinating Body Khurai Executive member Bon Khurai leh S. Roshan Meitei in tulai dinmun ahoi tah lou toh lhon’a Manipur gamsung venbit najoh athupi pen joh’a mipi akoi’a koiman tulai phat tah’a entertainment programme abol lou ding uvin ngehna anei in ahi. Hiche toh lhon’a Paona Keithel kom Friends Talkies, Keishampat Leimajam Leikai, Nambol Naorem, Ideal club Kshetrieikai, Konthoujam leh Yaiskul Police lane dung’a jong toumun kiphinna anachelha in ahi.

Naga ho autonomous council kipeh ding chung a Arunachal mipite jong lung mong lou

Itanagar, Nov 6: Naga peace toh kisai a gam ken a ding kilah doh jeng vang a Autonomous council kisem ding ahung gin jing toh lhon in Arunachal  Pradesh te in jong lunggim na ana nei uvin ahi. Hetthei khat chu Greate Nagalim map ahi Arunachal gamsung a Tirap, Longding le Changlang district jong jao ahi.  Union Home Minister Amit Shah in Naga te thu seilhah na a Arunachal, Assam le Manipur gamgi ho kitoh khah lou ding dan hilchetna ana nei utoh lhon a gam ho a boina umding ana ol jep ahi.Hetthei khat chu Home Minister pa in kihou lhah na hi akitongkha ding state thum hotoh kihou na kinei chai teng um ding ahi tia ana sei ahi.

Tu le tua mipi te lunggim na hi Autonmous council sem peh ding agin toh lhon a mipi in lunggim na ahin nei kit u ahi.  Professor  Nani Bath, Rajiv GANDHI University in thuso miho toh akihou limna a Autonomous district council semding agin hi kipa aum in hinlah state polang akon a vaipoh na kisem louding ahi tin ana sei in ahi. Arunachal Pradesh STudents Union a general secretary Tobom DAI in ahou limna a council hi akipeh ding le state in vaipoh na anei ding, Nagland akon a vaipoh na ding ahi le greater nagalim toh kibang ding ahitai ati.

Naga Autonmous council a jao ding district thum ho akon mi phabep in thuso miho toh akihou limna a autonomous council hi akisem le galguh bol ho in council lamkai ho aneh mang ding u ahi ajeh chu fund centre akon hung ding ahi tin ana sei uvin ahi. Hetthei khat chu Arunachal Naga ho hin hiche chung chang thu ahi  galguh bol ho kichat jeh a ima ana sei ngam lou u ahi. Hetthei khat chu Arunachal a district thum a cheng ho hin autonomous council le Nagalim a jao ding hi ana dei lou u ahin hinlah Dimapur akon gihna ana kinei jeh a koima in thu asei ngamlou ahi akiti. Hetthei khat chu Tirap, Changlang le Longding district a other Nga tribe tia kihe tribe 5 hohi government in hetpeh na anei lou lai ahi.

Gamsung’a Bomb pohkeh jing kiloikhomna phabep in demna nei; lungmong in mi akhosa thei tapoi tia WAD  in sei

Imphal, Nov 6(ET): Imphal Thangal bazaar a bomb pohjah a police mi 5 le milham khat kisuhkhah na le janni Tamenglong a bomb pohjah le November 1 nia Telipati bomb poh a CRPF 3 kisuhkhahna chung ah Women Action for Development (WAD) in nasatah in tunichun themmo achantan ahi.

Chule WAD in Moreh a bomb pohjah thu jong themmo achan ban a hitia kijom tobang a bomb pohjah jeh in state mipi lungmong in akhosa thei tapoi, ati.

Moreh khopi sung a bomb apokeh jing toh lhon in alhangsung a cheng ho tuni chan in lungmong tah in achengthei lou thuu thulhut chun asei in ahi. Achesa October lhasung achun munthum jen a bomb ana poh in amasapen chu 5th Oct. 2019 ni chun jan nidan 10:15 don in Moreh Police Station fencing bang kom a apoh in ani na chu 7th Oct ni jan nidan 9:09 don chun Intelligent Bureau Office fencing bang kom ah ana poh kit in chule athum channa chu 11th Oct jan nidan 7:55 don chun KSO office fencing kom ah apoh kit in ahi. Hiche tobang a kijom jel a bomb poh gamsung a um jing toh lhonin alhang sung a cheng ho alung linglao jing uvin aban a ipi hungsoh ding ham ti atija jing uvin ahi.

Thulhut in aseibena achun, Indo-Naga peace talk thu a Manipur gamsung aboi jing nakah a hiche tobang a japi kisuling lao natoh aum jing hin gamsung a monna tah tah aumtheilou dan jong aseiye.

WAD in aseina achun, hiche tobang natoh hi Governor, Chief Minister chule Council of Ministers hon kholchilna lampang a aching athem deh hotoh kitoh a mona neiho agangthei pen a akholdoh diuvin jong ngehna anei un ahi.

Youth Forum for Protection of Human Rights (YFPHR) hon jong Telipati bomb pohjah le November 5 ni Thangal bazaar bomb pohjah a duty polai police le milham kisuhkhah ban a nitin neh kihol ho gentheina asodoh nachung ah themmo achan in ahi.

YFPHR in aseikit na ah hitobang hi mi meidoi natoh mipi suh kichatna ding le AFSPA 1958 paolap le galguh minpan a sepai kinop chep nadia jong ginmo ahi e, ati.

Langkhat a hibang a sepai tamtah state sung a tollut ahijong hi Naga thu ol heu cha suhlhap nadia tohgon khat hitei dia ginmona anei ban a chutobang a chatloh hon  International Humanitarian Law jana apeh a milham suh kichatna le changval phatchomna ding ngaitona lunggel a kon kikangse ding in YFPHR in temna jong aneiyin ahi.

Forum-Asia leh HRA in sepai hon gamsunga um themjilna mun alo alungkhampi na thu seiyu

Imphal, Nov 6(ET): Asian Forum for Human Rights and Development (FORUM-ASIA) leh Manipur gam a member hi Human Rights Alert (HRA) in gamsunga themjilna mun ho ‘militarised’ akibol alungkhampi na thu asei uvin ahi.

“Military atamna sa gamsunga military atam cheh cheh hi lungkham um ahi. Gamsung miho dinga lhamon lelna ahi”, tin Forum-Asia in aseiyin ahi. Achesa kum som val thingnoi hatna ahijeh a gamsunga military tam ahi. Armed Forces (Special Powers) Act, 1958 kiti dan dei umloutah hin military ho tha apeh a chule achungthu kiseithei louna dinga ahuh ahi.

Kum khat val masanga Supreme Court in Manipur gamsunga sepai hon dan pam a atha (extra judicial killing) a kingoh case 1,528 lah a case phabep CBI hon akhol dinga mopohna apeh ahi. Supreme Court thupeh nunga CBI hon action alah loujeh a thudih a na kitong hinam chule kibungkhenna um em, ti thudoh aumsah ahi”, ati. Centre sepai hon Dhanamanjuri University, Modern College leh Maharaja Bodhchandra College panna a themjilna mun ho alo ahi”, tin asei uvin ahi.

“Gamsung vaipo hon themjilna mun a sepai ho aumding avel a aphal kit hi lungkham umtah ahi. Achesa September 2010 kum a Indian Army chule paramilitary force jousen themjilna mun school leh hostel a aum nau ho adalhah diuva thupeh anei ahi. 2014 kum a United Nations  Committee on the Rights of the Child injong Convention on the Rights of the Child, adeh a Optional Protocol on Involvement of Children in Armed Conflict ajui diuva India sorkar henga ngehna anei ahi”, ati.

UN Committee in recommendation apeh na a sorkar in chapang umna, adeh a school mun ho lo louna dinga asei ahi. School mun a kon sorkar in sepai ho apuidoh a, buluna thilsoh umthei vendoh nadinga pan alah diuva jong aseiyu ahi. Educational institution mun a sepai kikoi hi India Constitution toh kitoh lou, human rights toh kikal, adeh a Right of Child leh Democracy toh kitohlou ahi, tin FORUM-ASIA leh Human Rights Alert thuso chun aseiyin ahi.

Supreme Court thuhilna leh United Nations Committee on the Rights of the Child recommendation jui ding, apet pet a themjilna mun a um paramilitary leh sepai dang dang ho aumna diuva phalna kipe lahdoh ding, themjilna mun a sepai ho umsah nadinga phalna pe a authority ho chunga dan dungjuiya action lah ding chule ‘human rights’ leh international law ho jana peh dinga Manipur leh India sorkar in action alah dinga temna anei uvin ahi. Forum-Asia hi regional human rights group ahi’in, Asia gamsung gam 21 a member 81 um ahi.