Kuki Inpi in NH-37 bandh bol dinga gihna nei; Phaitol lhanmol a...

Kuki Inpi in NH-37 bandh bol dinga gihna nei; Phaitol lhanmol a Henkhogin kivoh demna sangtah neiyu

53
0
SHARE

Kuki Inpi in NH-37 bandh bol dinga gihna nei; Phaitol lhanmol a Henkhogin kivoh demna sangtah neiyu

Imphal, Feb 9(ET): Kuki Inpi Jiri-Tamenglong in Phaitol lhanmol a ajeh beiya Imphal East commando hon mikhat avoh nau thilsoh demna sangtah anei uvin ahi.

Vangsetna toh a Henkhogin Singson, s/o Lalngahlien Singson, Ngahmunphai haosapu, Tousem sub-division, Tamenglong district hi achesa February nisim 6 jan nidan 7 don a commando hon abulu a avoh ahi, tin Inpi thuso chun aseiyin ahi.

Henkhogin hi Phaitol kho a che a, a kho a ahung kile langa police hon alamtin u ahi, tin Inpi in aseiyin chule Henkhogin chonchan leh hinkhoman hi atheng e, tin adinpi uvin ahi. Commando hon Henkhogin hi Phaitol lhanmol a nasatah a avoh jou uva adalhah u ahi.

Jiribam hospital a Henkhogin apui uva, hiche a kon Silchar Medical College Hospital a refer abol u ahi’in, doctor hon ahinkho huhdoh nadinga pan sangtah alah u ahi, tin Inpi in aseiyin chule Tamei Assembly constituency MLA, Tamenglong DC leh SP in ipijeh a district dang a police hon Tamenglong district a themmona neilou milham ho chunga hitobang sosetna anei theiyu ham ti asuhtheng diuvin dohna jong anei uvin ahi.

Jiribam district police commando hon tu masanga jong ‘warrant’ beiya avel vel a inmun kholna anei jing uva chule Tamenglong Kuki kho a cheng milham khosung miho avoh uva agih jing u ahi, ati. State sorkar in February nisim 12 kah a chonvalna neiya commando ho anatohna a kon ahaisah louva ahileh NH-37 a bandh bol dinga Inpi in gihna aneibe uvin ahi.

PYC in Henkhogin Singson kigimbol demna sangtah nei

Jiribam, Feb 9(ET): Jiribam police hon Phaitol lhanmol a Lalngahlien Singson chapa Henkhogin singson, Ngahmunphai hausa chung a khut alha uva agimbol jeh uvin Phaitol Youth Club (PYC) hon nasatah in demna anei uvin ahi. Police hon  athi ding a adalha uhin khosung teni kikah a boina asem got uh ahidan aki cheh in gamsung vengtup ding hon khat le khat kah a sagu ase uhi ipi abol nau ham hilchetna apeh ding uvin asei un ahi.

PYC in aseibena achun Phaitol leh Ngahmunphai mipi ho kihetthemmo nathei ding natoh kibol hi akidei pon, mona nei ahijong leh dan dungjui a achung a action lalouva avoh chai uva adalhah jeng uhi gamsung dan le mol vesui ho chaloh dingdan ahi pon akinthei pen a hilhchetna ahinpeh uva pu pa dan dungjui a akisaipi authority hin Club a ngaidam thumna anei ding uvin jong asei un ahi.

CM Biren in Imphal West a 33/11 Power Sub-Station hondohna nei

Imphal, Feb 9(ET): Chief Minister N Biren Singh in Mayang Langjing Tamang, Imphal West district a tunin 33/11 KV Power Sub-station hondohna aneiyin ahi.

Sub-Station hi dangka crore 2.9 lut a kisem ahi’in, Mayang Langjing Tamang leh Mana Ingkhol a cheng insung 700 vel meivah pehna ding ahi. Kin gon a Power Minister Th Biswajit, MSPDCL Chairman L Susindro leh Lamshang MLA S Rajen jong apang uvin ahi.

Chief guest a pang CM Biren in ahoulimna’a, achesa kum thum sunga aphatna langa kikhelna aume tihi mipin ahet ahi, tin aseiyin chule scheme phatah tah tamtah kipandoh a, phat chomcha sunga mipi a dinga project tamtah hondohna um ahitai, ati. Hiche hohi mipi tosotna jal chule sorkar in gelkhohna aneijeh a hithei ahi, tin aseibe in ahi.

Hitobang Sub-station adang phabep jong hondoh thei dinga gotsa um ahitan, mipi dinga pehdohna aumteng leh mipin aphatchompi tei ding ahi, ati. Development scheme chom chom ho thu CM in aseiyin, Government in abol ‘School Fagathansi Mission’ noiya akilhengdoh school 6 a session hi February nisim 12 a kon kipan ding ahi. Chule school adang se a session hi March kal kipat teng kipan ding ahi, tin aseibe in ahi.

Society a kitahna nei aum louva ahileh building hoitah tah leh infrastructure hoitah tah kisem jong leh aphatchomna umlou ding ahi, tin Biren in aseiyin chule chapang leh khangthah hohi abul a kon kitahna neije hil ding ahi, ati. Gamsung miho hi natong hat te ahi’in, thepna nei hiu ahi. Thepna nei hohi sorkar in Manipur StartUp leh scheme dang dang mangcha a kithopina apeh ahi’in, gamsung hin khantouna leh machalna lampi ajot ahi, tin aseibe in ahi.

Power Minister Th Biswajit in ahoulimna’a, MSPDCL in meivah a manna aumlou nadinga mun jouse a prepaid meter koi ding atup ahi, tin aseiyin chule gamsung ‘power generating capacity’ hi lhomcha ahi’in, agency dang dang a kicho ho a mipi ho supply lentah kibol ahi, ati. Hiche jeh a thinglhang district a jong meivah man thep je dan hilna nei angaiyin, prepaid meter hi mun jouse a kito ding ahi, ati.

Hiche a dinga sorkar in prepaid meter lakh 2 vel lah dinga tohgon anei ahi, tin Th Biswajit in aseiyin chule ‘price fixation’ kijou ahitan, tender lha nadinga process kipan vahding ahitai, tin aseibe in ahi.

Nongmaiching Reserve Forest donlouva aume tia ngohna thu kisei JFMC in nelkalna nei

Imphal, Feb 9(ET): Joint Forest Management Committee, Keirao Bitra Awang Leikai in Nongmaiching Reserve Forest noiya um Angoulok leh Shagollok reserved forest chungchang a thuso um sangtah a nelkalna anei uvin, ngohna thu kisei hohi abul umlou chule JFMC leh Forest Department official ho adih louva vetsah nading, suh minset nading ahi, tin asei uvin ahi.

JFMC, Keirao Bitra Awang Leikai President Salam Madhumangol Singh in thuso aneina a, kum som kum somni masanga Nongmaiching Reserved Forest noiya um Angoulok leh Shagollok reserved forest a dan dihlouva thil kibol chom chom aum jeh a chai soh ahi, ati. Akimvel a cheng khosung mi phabep in thingphung aphuh jing, gam mei ahal jeh ahi, tin asei uvin ahivanga Joint Forest Management Committee kiti Forest department leh vengsung mihon ahin semdoh a kon thingphung kiphuh, mei kihalna leh dan dihlouva natoh na adang dang hohi hatah a nemsuh a chule gammang thing in atom na len cheh cheh ahi, ati.

Forest staff leh JFMC volunteer hon local awareness program leh protection drive chom chom abol jeh uva kum phabep sunga gammang hi hatah a kivengtup ahi, ati. JFMC leh Forest staff hon gelkhohna anei pouve, tia thuso a kisei ngohna ho nelkalna aneiyin, Forest official leh committee in thingphung kiphuh, mei kihal leh adang dang dan in aphal louho akibol louna dinga aphat tin a patrolling abol jing ahi, tin aseiyin ahi.

Ahin, kum phabep JFMC in pan sangtah alah vanga mi phabep in kailhang a joh ding Uchan Chips lahna dinga thingphung (pine tree) ho aphuh jing nalai uve, ti thu JFMC in anopna aseiyin ahi. Angoulok leh Shagollok forest reserved area a thingphung phuh a mi phabep JFMC hon amat nau thilsoh phabep jong um ahi.

Ahivanga thingphung phuh hohi vengsung mi jeng ahijeh uva, Forest dan apalkeh uve tia case ima sem louva ‘humanitarian ground’ a committee in alhadoh kit ahi, ati. Mipin gammang athupi dan ahet teng lebou gammang kiveng thei ding ahi, tin JFMC in ngaidan aseiyin chule thingphung phuh ho jail a kikoi hi ‘deforestation’ ven nading alampi khat bou um ahipoi, ati.

Forest department a lamkai luboh hon JFMC dinga kigong fund 50 percent akah uve, tia ngohna thu kisei nelkalna aneiyin, Forest official hon fund akah nau thu aumpoi, ati. JFMC kipe fund hohi thingnou tu na, reserved forest area kimvel a cheng hahsa genthei insung ho kihinso nading (livelihood) scheme ho a kimang ahi. Sorkar in JFMC fund apehna a water pumpset ni kichodoh a, hiche hi kum masa a twi hah sunga sangtah a kiphatchompi ahi, ati. Tekhambi Loukol a phailei kibol hi hiche pump set jeh a lolhing ahi, tin aseiyin ahi.

JFMC in Tekhambi Loukol a irrigation canal asah a, Club building asemphat a chule vengsung a um Woman SHG ho dangka 50,000 cheh a kithopina aneiya, Keirao Khunou Public Pond sahna leh khantou machalna ding natoh dang dang bolna a aman ahi, tin aseibe in ahi. Gammang huhna dinga JFMC leh Forest official hobou mopohna peh ding ahipon, mipin kitho a pan alah ding ahi, ati. Chule Committee leh akimanchah na thuchen he nom ho JFMC office a ahung diuvin temna aneibe uvin ahi.

Truck Driver Union hon km 20 lhing Moirangpurel a kon Napet Palli lamlen semphau

Thoubal, Feb 9(ET): Moirangpurel Area Local Truck Drivers Union hon Saturday nikho a konin Moirangpurel a kon Napet Palli jotna lamlen semphatna natoh apan tauvin ahi.

Andro Kendra, Lamlai Kendra leh Saikul Kendra a um khosung ho che nathei lamlen asem phat diu hi agom a km 20 lhing ahi. Lamlen a kotong ho ahuh uva, athah a black top kibol lamlen vetkolna natoh hohi ‘repairing work’ a aboipi pen u ahi.

Moirangpurel Area Local Truck Drivers Union advisor Ng Ratankumar in thuso miho akimupi na’a, lamlen hi achesa kum 3/ 4 sung phalou ahitai, tin aseiyin, lamlen semphat angaichat jeh a Union in Saturday nikho a kon natoh pat ding a kilolna anei ahi, ati.

Forest and Environment Minister leh Andro MLA Th Shyamkumar, Lamlai AC MLA Ksh. Biren in lamlen kisemphat na natoh sangtah in atosot uvin chule machine ho a kithopina anei uve, ati. Lamlen semphat nading natohna a union in truck 200 val amanchah ahi, tin Ratankumar in aseiyin chule Nongdam-Oksu Magic Association member honjong Saturday nikho a service avohhai uva, natohna a pan alah u ahi, ati.

Lamlen pam a cheng vengsung mi tamtah, club leh organization chom chom injong pan ala uve, tin akipana thu aseiyin ahi. Alangkhat a 182 Battalion, BSF, CI post Damodar injong natohna akithopi ahi, tin Ratankumar in aseibe in ahi.

Maphou Dam a kon Laikongching jotna lamlen km 12 vel hi sottah black topping kibol lou ahitan, leiset bou kisunga, phat sottah hitia hi kikoi ahi, tin Union advisor Ratankumar in thil umdan state sorkar in hetpehna anei dinga ngehna aneiyin chule aganna thei pen a Maphou dam leh Laikong Ching jotna lamlen black topping abol diuvin mopohna nei department ho henga temna jong aneiyin ahi.

 

‘Hit & Run case’ a mikhat in thina toh; Themmo na neiho Feb 11 kah’a akiphon diuva KSO in hetsah

Sugnu, Feb 9(ET): Tunilhah lang chun T. Lailoiphai leh Sugnu lei kikah in gari khat in mikhat analanglih in anajam pai paiyin ahi. Thina toh chu Jangpao Baite ahi akiti.

Hitobang khotona neilou le mihem hinkho lut dan helouva hitobang thil asothei nahlai hi phamo akisan chule thilsoh toh kisai a mona nei hon aganna theipen a kiphonna ane diuvin KSO Sangaikot in hetsahna aneiyin ahi.

Themmo na neihon February nisim 11 nikho kah a insungmite kom’a kiphonna aneilouva ahileh gamkai mipileh CSO hon pan kilading ahi jong ati.

Makhao Area Youth Welfare Organisation in jong thilsoh sangtah in lunglhailouna akiphongdoh in Sangaikot Sub-Division, CSOs in 11th Feb. 2020 kah a hiche thilsoh chung a mona neiho kiphong dia phattep anei nauleh thulhuhna asem jouse Makhao Area Youth Welfare Organisation injong kitosot ding ahi ati.

AMCTA in Feb. 12 akon cease work strike pan ta ding

Imphal, Feb 9 (ET): The All Manipur College Teachers’ Association (AMCTA) noi’a college chom chom’a ahung lhung ding Feb. nisim 12 nikho akon cease work strike bol ding in kigot naho jouse achai tauvin ahi tin thulhut chun aseiyin ahi. AMCTA Secretary General in-charge M Imocha in aseina’a achesa Feb. nisim 6 nikho’a Manipur College mun’a kiphinna kinei phatsung’a ahung lhung ding Feb. nisim 12 akon cease work strike bol ding’a kithulhuh na ana kinei ahi. Chuleh AMCTA official team hon Kha Manipur College, Thoubal College, Ideal Girls College jong janhi chun vilna  anakinei in hiche achun College ho jouse in AMCTA tosot cheh ding in kinoptona jong ananei uvin ahi.

Hetthei khat chu achesa Feb. nisim 6 nikho’a kiphinna ana kinei phatsung in jong Chief Minister heng’a 7th UGC Pay Scale agannathei pen’a implement abol ding in 4 vei channa ding in lekha anakipelut ahin tuni chan in donbut na imacha anei naipon ahi.

Jalentah a thu seithei ahidan geldoh thahkit nading a Cycle rally kibol

Imphal Feb 9(ET): Tuni chun DM College a PD club leh agelkhoh miphachom phabep hon Jalentah a thu seithei (Freedom of Speech) hi manipur gamsung a aumthei nading leh ngaidan seitheina tha mimal in kinei cheh ahidan geldoh thahkit nading in ‘Cycle for Freedom of speech’ kiti thupi mangcha in Cycle rally abol uvin hiche kin chu DM College Arts ah akipan in Tera ajotpa uvin Manipur University agapha uvin hiche akon chun Moirangkhom ahin jon uvin hiche mun achun achai uvin ahi.

Hiche kingon lah a jao Assistant Professor Arambam Noni in thuso miho heng a aseina achun mijousen topic khat chung a ngaidan pehtheina thaneina kinei sohkei ahi in hiche hi govt. in milham ho akichatsah uva achung uva action amoh lah ujong hi adihlou ahi in topic khat chung a ngaidan kipethei mong ahi in koiman anantheilou thil ahi ati. Chule igam sung uvah kitha kimat online blogger ho gihna kibol ahilou le journalist ho chung a mona kisemkhum ho jouse hin ivetleh topic khat chung a ngaidan apeh jeh uva govt. in action alah dan in akilang in hinlah hiche hi kholtoh ngai ahi ati. Tuni rally achun placard ah ‘No free speech No democracy’ ‘No to internet ban’ Free speech is our natural right’ kiti holeh thu chom chom atahdoh uvin cyclist mi 150 tobang in pan ala uvin ahi.

Manipur University in PM tohgon noiya um Centre a staff ho lha 4 lo pe talou

Imphal Feb 9(ET): Centre for the Study of Social Exclusion and Inclusive Policy, Manipur University in staff ho lo pehna a hahsatna lentah atoh uvin ahi. UGC in center a dinga fund asodoh loulai ahi, tia lha li lhing staff ho lo kipelou ahi.

Ahivanga Imphal Times thuso in UGC in fund hi center a dinga lha gup seh a asodoh ahi, ati. Kum khat masanga UGC in Manipur Studies asuhmang a chule lhaseh a lo kipe hi kinga ahi’in, ajeh hi Manipur University authority staff hon bou ahet ahi, tin thulhut chun aseiyin ahi.

Centre for the Study of Social Exclusion and Inclusive Policy hi PMO noi ahi’in, alhasam (disadvantaged group) ho plan leh policy kisimna chule Social Exclusion leh India gamsung adeh a North-East (Manipur) a kibungkhenna ho thu a literature velvetna ahi. Chule hiche hi imalam jouse a alhasam society ho thahat sah nading thu hilna ding jong ahi.

Tahsan umtah thulhut in asei dungjuiya, UGC in fund ape tapoi, tia staff ho lo lha li lhing lo apeh louvu ahitai. Ahivanga Study of Social Exclusion and Inclusive centre a dinga fund hi lha gup dan a athot diu athot louvu ahijeh a dinmun hi achom hidinga ginmo ahi. Thulhut in Study of Social Exclusion and Inclusive Policy Centre a dinga Sanction hi kisuh/kitup tah a hunglut ahi, ati ahi.

Chule kum khat masang a kisumang a Centre for Manipur Studies, University in tuchan a lo (salary) amu jing nahlai ahi, tin thulhut chun aseibe in ahi.

Loktak Lake ahoina mang soh

Imphal, Feb 9(ET): National Hydroelectric Power Corporation Limited (NHPC) a 105 MW multipurpose hydroelectric project hin Loktak Lake ahoina ho nasatah a atohkhah ahi.

Project hi achesa 1983 kum a NHPC in apat a, barrage asah pan ahivang a gamsung a cheng agamkai mihon Loktak lake ahoina hohi amangsoh tai, tia agel jing nahlaiyu ahi. Vetnom aumna leh ahoina ho aman tilouva project hi Loktak lake kom a cheng ho dinga kichat umtah jong hi ahi.

Kum 37 ache tah vanga gamkai mihon project kichepi jeh a hahsatna ato hou ageldoh jing nahlaiyu ahi. Mi tamtah in project kichepi jeh a twi alet jeh a phailei leh inmun mantam tah tah amansah ahi. Chule climate change injong Imphal khopi a kon km 45 a gamlha Moirang a um Loktak Lake sangtah a atohkhah ahi.

Karang a nga man mihon island kimvel a tu masang chun twiya um ganhing athah thah akimu e, tia asei uva chule thoukang jong tu masanga sanga atam cheh cheh e, atiu ahi. Hetthei khat chu Loktak lake hi ‘phumdi’ (heterogenous mass of vegetation, organic matter) a kiletna mun a kihe minthang ahi. Loktak hi ‘Lok’ kiti twilong (stream) chule ‘tak’ kiti ‘achaina (the end) kiseina ahi.

Kaa-ni lei khel’a Ganja lei joh hin gamsung economy ahin suhkhang ding ahi : Add. SP, NAB Th Brinda

Imphal, Feb. 9 (ET): Permaculture Alliance Manipur (PAM) makai na noi’a “Cannabis Cultivation in Manipur” kiti thupi noi’a nikhat chelha Seminar Youth Hostel, Khuman Lampak mun’a kibol na’a Additional SP, NAB, Th Brinda in gamsung’a Kaa-ni lei suhmang na ding’a Ganja lei bol ngai ahi dan ana tahlang in ahi. Kingon achun moderator in Retired IAS Dr RK Nimai apang in chuleh resource person in Member Secretary, Manipur Medical Plant Board, Dr A Guneshwor, Senior Principal Scientist, CSIR-NEIST, Dr H Birkumar, Professor, Department of Agronomy, CAU, Dr L Nabachandra le Postdoctoral Fellow of Economics Department, MU, Dr Bishanjit Loitongbam  ho anapang uvin ahi.

Hiche toh lhon’a kingon phatsung’a houlimna nei jouse in Ganja hi aphat na atam joh toh lhon’a Kaa-ni suhmang na ding’a Ganja tu ding joh in seilhah na ananei uvin ahi. Additional SP, NAB, Th Brinda in ahoulimna’a chang kitu na phailei tamtah’a jong Kaa-ni aki tun hiche ho ngah sah ding le kham ding kiti hi thil hithei lou ahitah jeh’a asuhmang ding le ngah sah na ding’a Ganja joh atu ding’u tilou lampi dang aum talou ahidan jong aphondoh in ahi. Ganja kitu hin State sung economy ahoi sah ding hiche nachung chon’a thil chom chom ajong phat chom na ahin poh lut ding ahi dan jong tahlang na anei in ahi.