Kuki ho gamsung mi dihtah ahipoi tijing (Naga hia Naga gam mi...

Kuki ho gamsung mi dihtah ahipoi tijing (Naga hia Naga gam mi ahipoi kitila?)

786
0
SHARE

Kuki ho gamsung mi dihtah ahipoi tijing
(Naga hia Naga gam mi ahipoi kitila?)

Midang themmo ichanleh eima kisohcha dehlou, akhohjo cheh a ihina dihtah kitahlangna umdohji ahi ti hi UNC (United Naga Council) hon ahetdoh loulai uham, henasa’a adon achanglou aseijing uham ti hi Manipur a Kuki te agam mi dihtah (indigenous) ahipoi tia avelvel’a asei u hi ahi. Naga holah a Kuki te Manipur gam mi dihtah ahipoi tia seijing loi hi koi ho loi lhohbuh leh lungputna kon ham ti jong seilouva het ahi. Manipur ti tahlouva Nagaland a jong Kuki te hi agam mi dihtah ahidan hung kiha hetdoh cheh cheh hi Naga kahi tia Nagaland State a agam mi ahipoi tia nodoh teidi ti thu hung umdoh a kon jong UNC leh atoson ho akhahdoh phat u ahitai. Koi nam, koi society hileh asung’a kipet-to lou umlou, akidemto loi um cheh ahijeh in Kuki te jong asung uva kidemtona leh themmo kichan tona jatjat um thou ahidan tulah thu le la hoa kon muthei ahi. Ahin tulang’a Manipur Naga holeh Nagaland a Naga dihtah ho kah a asung lang’a kibol tona hi Manipur Naga hon vetnadi jong ahetlou laitah u ahi. Vetna di hetlou lai chu aphanalai hung hithei, ijoleh jong gena tohmo hung bang nalai thei u ahung hiujong seithei hidehlou ahi. Achutileh Manipur’a achenkhompiu leh thinglhangmi hina achankhompiu Kuki te joh hi itileh khat le khat kitosot toa chamdel’a chenkhom hi akoikoi dia damna hidi ahi ti gel lou loi hi vangset umtah ahi.
UNC hi koi thingnoi kam le leija pang ham ti jong thuguh ahilou jeh in UNC min’a Kukite khetna thuso hoa soi kaiji hojong koi manchah leh seisei bol ham ti jong hetsa ahijeh in khat (Kukite) thetna’a thu ahaseilai seuva amaban u abindan leh kijumsona lam anailam cheh cheh u mutheina bep hidi ahi. Phaicham mi honla Naga kitilou, Kuki kitilouva thinglhangmi hon chanvou jat khat mukhau vinte tia sumsel’a thidi kigo jeng u ahin, hiche pet tah a UNC (Naga) ten Kuki te vetdana thu ahasei laiseuva koi kipana hidi ham ti jong hetsa ahi. UNC kam le khutna nei thingnoi group hojong lung linglao jeh a Hebron camp leh mundang dang Camp hoa kon athem them’a Burma gamgi sung lang’a anajamdoh u chu akikholkhom jou-jou uva Burma sepai hon ahindeldoh kit uva kisei ahi. Burma sepai hon India thingnoimi ho ahinnodoh kiti jong hi India govt panna louva hithei loudi khat ahi.
Anglo-Kuki War Centenary kimanna a song kiphut chung’a thucheng kijih hi moh a seidi dang hetlou jeh leh thangthip jeh a pansatna’a neija kum somni masang tobang’a Kuki te noise tah a boldi ham ti hidi ahi. Ahin phat le kum che dung juija khatvei kiging manlou hel’a ana um Kuki te jong British te thihnang’a kanadou ngapchat uleh tua jong koidang kaki chatdi ham ti lungput anei jing u ahijeh in kinoisena thucheng hohin phatnalam amano louhel di tahsan umtah ahi. Thinglhangmi hohi kithutoh tah a pangkhom hileubon akah uva sagu sepdi kivatlou di chu khat le khat kipet tosa’a aumjing uhi kon ipi muna’a ahinnei diu hinam ti hi ahi. Hiche kahlah a geldoh dia pha khat jong chu midang ten ingaimah mahdi asei uleh ingainomlou banga enjong midang ngaimah di ho seilou di, donbutna inei jongleh adihchet, ahia awnem pat ngaidi ahi.