Kuki Chin ho Burma’a lesol kit di kiti

Kuki Chin ho Burma’a lesol kit di kiti

454
0
SHARE

  Kiloikhomna min kichiehsel jong hilou “Manipur Maoist” kiti hon Manipur a Kuki leh Chin ho hi Burma akon ahiuvin Burma a achenlut kit diu hi Manipur gam mi dihtah (indigenous people) ho bitnadi ahi tia thuso ahinbol uhi ILP tia kisam choh jeju ipi doina ham hung kichiehpan ahi. Abul’a pat mi tamtah in anasei chu kol le vai ho theidana jeh-a hiche ILP kiphinna khujeju ahipoi ti anahipeh e. Manipur Maoist kiti hohi thingnoimi kiloikhomna dan’a um ahivang uva politics a atup le adoi u ipiham, India govt kom’a ‘demand’ abol’u ipiham jong akihepoi. Ahin thuso abolnauva lekha kisutdan vang lekha simsang ahivang’a “alangkhat bou he ho” lungthim le lhoh ajaove tivang het thei ahi. Asei uhi ahileh Burma Tamu lhang’a 1967 kum’a Burmese Army in Khawdawmi operation anabol uchun Burma gam’a kon Kuki ho tamtah Manipur ah ahung jamlut uvin, hiche galjam hohi Burma gam’a chenlutsah kitna dia Manipur mihon pan alahleh Manipur gam mi dihtah hodia phachomdi ahijeh a tua ‘ILP movement’ phatah-a boljomdi ahi ti ahi. Chuleh Burma akon mama Chin hohi Mizoram ah anajamlut un Mizo Society a kiloikhomna hon Burma a lesolna din pan alah jeh un Burma lang’a chekit nomlou ho Churachanpur ahung chenglut uve ti ahi. Achutileh ILP movement hi kol le vai hoa kon kivennadi hilouva Burma kon Kuki le Chin ho lesolnadi (nodohna di) tina hijeng ahi. Hitobang thu le la hi Indigenous People of Kangleipak (IPAK) leh International Meitei Front (IMF) kiti meilhei Civil kiloikhomna hon thuso hoa lhangphong tah a anasei jingsau khat ahi. Hiche thua hi Kuki Research Forum (KuRF) leh KSO hon donbutna anapehsau ahi. Tua hi thingnoi lang’in hiche thu hin ahinsei kit dan’in aum’in thulah-a koi’a pha ham, mi-ngol thusei thulahlou dan’a limsahda’a phadi ham gelthei ahi. Hitobang hung kiseidoh lona hi Moreh leh Churachanpur district a phaicham lhang kivetlel jeh jong hidi ahi. Moreh leh Churachanpur Lamka Town a Kuki Chin hohi Burma akon hung jamlut ho bouva kisei ahi. Phaigam thingnoi thingchung ho thusei hi Kuki le Chin hodi gelkhoh tah dan’a akisei vang uva Manipur gam mi dihtah (indigenous) ahipouve tina ahi.
  Burma’a kon ahi, ahilou thuchuom ahitan Manipur suhkehnadi thusei ahidan hetsah-a phadi ahi. Manipur thusim (history) hi Kuki te beiya hitheilou ahilam leh Manipur thinglhang gam leh meilhei lengte Kuki haosa leh Kuki sepai hon anahuhdoh ahilam heloulai loi, henasa’a kihetmosah loi umdan ahi. Alangkhatna, ILP thu leh akinaipi Bill thua Tribal ho kiphinna aumjing laiya akitohmopen’a hung pangdoh hi koiham ti mi’n amudoh jeh-a hitobang thu hung gingdoh jing ahijong geldoh phaat ahi. Achutilouleh akitohmo ho ani niuva (abon uva) nagam ah kicheuvin hung kitinadi nailamdi ahi.

SHARE
Previous articleSept 2, 2016 local news
Next articleSept 3, 2016 local news