Kuki Chief Council Manipur in PM a ding memorandum pelut; Naga Territorial...

Kuki Chief Council Manipur in PM a ding memorandum pelut; Naga Territorial Council kisem na a Kuki te chenna atohkhah lou diuva seiyu

377
0
SHARE

Kuki Chief Council Manipur in PM a ding memorandum pelut; Naga Territorial Council kisem na a Kuki te chenna atohkhah lou diuva seiyu

Imphal, Jan 17(ET): Kuki Chief Council, Manipur in Kuki te thalheng a Prime Minister Narendra Modi a ding memorandum Governor Dr Najma Heptulla henga apelut uvin, gamsunga Inner Line Permit System kichepi chule phat sottah lut  Indo-Naga Framework thu seichai kon ahitah jeh a apachatnau thu asei uvin ahi.

Kum sottah masang 1917-1919 Kuki hon pupa gam chule chamlhatna huhna dinga British anadou a, hiche thilsoh hi Assam Rifles thusim a Kuki Rebellion tia kijihlut ahi. British hon Kuki lamkai ho kum sottah tah jail a akoi uva chule khosung miho gotna apeh uva, kai sangtah alahpeh u ahi. Second World War a Kuki sepai hon Subhas Chandra Bose lamkaina noiya British sepai ho Burma leh Manipur gam a dou dinga Indian National Army a pang u ahi’in, India gam ngailutna leh kitahna chule ahangsan nau avetsah ahi, ati.

Naga Independent movement Manipur gam ahunglhun a NSCN-IM hon chamna ngailu a chule themmona neilou Kuki ho ahin suhgim pan uva, nam kah a gal anasoh ahi’in, hiche jeh a Manipur gam a bou Kuki mi 1000 val thi’a, kho 350 val galjam a chule Kuki lakh khat val refugee a um ahi. India sorkar in Indo-Naga Peace Accord thu NSCN-IM toh aseilhah masanga Kuki ho chunga thudih a na atoh masat ding ahi, tin memorandum a asei uvin ahi.

District chom chom a Kuki jat jong hetsahna anei uvin, Churachandpur district hi Kuki ho ataman kinelna bei district ahi’in, Kangpokpi district a census 2011 dungjuiya mi 1,92,744 lhing ahi’in, hiche lah a 90 % val hi Kuki tea hi. Chandel leh Tengnoupal district akigom a mihem jat 14,182 ahi’in, hiche lakh a Old Kuki tribe kiti Anal, Maring, Kambang leh adang dang hi hop 52 hi a chule New Kuki kiti Haokip, Kipgen, Khongsai, Zou, Mate, Baite leh adang dang hi hop 48 lhing ahi, ati.

Chandel leh Tengnoupal district a Old Kuki hohi Naga freedom movement a kitilkhou uva Naga tia akisei vang uva Naga tahbeh umlou ahi. Chin-Kuki nam hiu ahi. Chule Tamenglong, Ukhrul, Kamjong, Noney leh Senapati district a jong Kuki aching tamtah um ahi’in, amaho jong gel peh ngai ahi, ati. Indo-Naga Framework Agreement leh NSCN-IM chule Naga kiloikhom adang dang hon kihouna asemchai kon ahitan, Manipur gam a Naga territorial council kisem ding ahi, ti thu kisei ahi’in, hiche tobang ma a India sorkar leh Kuki thingnoi KNO/UPF hon kihouna apat u ahi’in, Kuki ho dinga kivaipohna atum semdoh ahiding hi thumna ahi.

Akisei Kuki tamna chule achennau district hohi Naga Territorial Council a kipan sah theilou ding ahi, tin Kuki Chief Council, Manipur in aseiyin chule Manipur gam a cheng Kuki ho dinga kivaipohna achom (administrative structure) asempeh diuvin jong thumna anei uvin ahi. India sorkar in Kuki leh Naga thu asuhlhap na a dihtah a na atoh ding Kuki Chief Council in akinepna thu aseiyin chule chamna det aumna dinga chihna amanchah diu akinepna thu aseibe uvin ahi.

MPYCC hon memorandum pehlut ding agot police hon suh molphou peh; natoh kilahna a sum guh kipeh lou dinga thumna neiyu

Imphal, Jan 17(ET): Manipur Pradesh Youth Congress Committee (MPYCC) hon chejom ding agot jeh uva member 32 vel police hon aman uvin, nilhah langa alhadoh kit tauvin ahi.

MPYCC member 100 vel in Congress Bhavan a kon Chief Minister’s Secretariat lang jon a kijotna anei uva, nilhah nidan 3 don a memorandum pehlut ding agot u ahi. Rally bol ho police hon Raj Bhavan mun a alamtin uva, hiche mun a police holeh MPYCC lamkai ho sangtah a kinelkal uva, rally bol hon hunam a chejom ding agot u ahi.

Chief Minister’s Office lang jot ding agot tei tei jou uva police hon MPYCC vice president, general secretary leh functionary adang dang panna a member 32 amat a, City police station a nidan ni tobang ahen u ahi. Akiman member jouse dan ima koi louva nilhah nidan 5.30 don a akilhadoh tai, tin police thulhut in aseiyin ahi.

Sorkar natoh kilahna, adeh’a tua IRB kilahna a nehguh akibol lou ding thumna a MPYCC member hon pan alah u ahi. Chief Minister henga pehlut ding agot u memorandum a MPYCC in IRB recruitment a dinga written test hi OMR (Optical Recognition/Reading) system a abol diuva aseiyu ahi’in, ahivanga memorandum pehlut ding agot uhi police hon asuh molphou peh u ahi.

Chief Minister N Biren in tohmun kilahna, transfer leh promotion a nehguh suhmang dinga asei akipapinau thu aseiyun, chule athusei atuhchah a, nehguh suhmang nadinga pan alah dinga MPYCC in aseiyin ahi. MPYCC vice president Ng Dilipkumar in thuso miho akimupi na’a, Chief Minister in athusei leh akitepna anatoh a apohdoh a ahileh gamsung khangthah chule natong ho achunga kipah jing ding ahi, ati.

Ahivanga, memorandum pehlut ding go a MPYCC ho tohgon suh molphou peh a police ho umchan vice president pa in demna sangtah aneiyin ahi.

Naga thu a kihouna lolhingtah a khumkha ahitai: Governor RN Ravi

DIMAPUR , January 17:  Nagaland Governor RN Ravi in Friday nikhon India sorkar leh Naga political group hotoh kihouna lolhingtah a khumkha ahitai, tin aseiyin ahi.

Kohima khopi a 13th Nagaland Assembly fifth session nikho kipat ni a Ravi in ahoulimna a asei ahi. Sorkar in kihouna lolhingtah leh aphalam a akichai thei nadinga kitah tah a panla a stakeholder jouse chunga kipathu sangtah aseiye, ati. Naga te thusim achombeh ahina hetpeh nading chule jana peh thei leh san thei Naga thu seilhahna dinga stakeholder jousen pan alahkhom a akipunkhom diuvin Ravi in temna aneibe in ahi.

Tribal Hoho, houbung, civil society chule organization chom chom in pan alah akipapina thu aseiyin chule state sorkar leh kinaipi gam dang hon chamna thu kiseina hi atosot uva chule hetthemna sangtah anei diuvin jong temna aneiyin ahi.

Citizenship Amendment Act, 2019 chungchang a Ravi in, Act jeh a gamsung mi dihtah kikhel thei ahi tia lunggimna anei thu aseiyin ahi. Article 371A noiya Nagaland gam a special status aumhi state sorkar in Centre hetdinga apohdoh ahi, tin aseiyin chule gamsunga Bengal Eastern Frontier Regulation 1873 noiya Inner Line Permit (ILP) kichepi ahitoh kilhon a CAA gamsunga akichepi nading dinmun umlou ahi, ati.

State sorkar in kum masa December 9 ni a ILP hi Dimapur district pumpi a chepi dinga thulhuhna anei ahi. Hiche thulhuhna hi gamdang mi tam cheh cheh ding ahi tia lunggimna neiya atam jeh a sorkar in alah ahi. Gamsung mi dihtah ho kihetna leh thaneina venbit ding hi sorkar in agelkhoh pen ahi, tin jong aseiyin ahi.

Hiche thu toh kisaiya sorkar in Register of Indigenous Inhabitants of Nagaland (RIIN) semdoh dinga thulhuhna anei ahi. RIIN akisem hin gamsung mi dihtah ho chule gamsunga cheng det a gamsung mi dihtah hilou ho kihetdoh na hiding chule hiche hi gamsunga ILP kitup tah a akichepi theina ding ahi, ati.

Ahin, RIIN exercise jeh a lamchom chom a boina thu aumin, hiche jeh a sorkar in hiche toh kisaiya thunoh jouse kholtoh ding leh vesui dinga commission asemdoh ahi, ati. Commisison in report leh recommendation apehlut jouteng leh Assembly in athu aban aseiding ahi, tin Ravi in aseibe in ahi.

KSO Sadar Hills in lampi toset na chung a gihna nei

KANGPOKPI, Jan17(UNA): Kuki Students’ Organization Sadar Hills in a member ho u khat achesa January nisim 15 nikho a gari in ana ta khah toh lhon in atang kha pa kou na ahin nei uvin ahi. Kiloikhomna in government ang a ahunglhungding January nisim 18 kah a mi tang kha pa amat doh lou le kiphinna nei ding in jong hetsah na ahin nei uvin ahi.

Hetthei khat chu achesa January nisim 15 nidan 7:30 vel a Yaikongpao le Kalapahar kikah a mi athisa khat gari tah lih hi ding a ginmo khat ana kimu  toh lhon a Kangpokpi police in thilong chu Kangpokpi district hospital a ana poh uva chu ban a RIMS a an akipo kit ahi.  Athipa chu H. Ngamboithang Kipgen, apa min Semmang Kipgen, Pangjang, Saikul akon ahi. Boithang hi tu lua tua final year B.D./B. Div. Simlai, Manipur Theological College, Mission Compound, Kangpokpi a sim ahi. Thuso kimu dungjui in Boithang in ahin tol pulsar bike jong chu lampi ning ah ase pum in ana kimu in ahi akiti. KSO Sadar Hills General Secretary, Lalgoulen Haokip  in thuso ahin nein a a hiche thilsoh hi gari len khat in ana phut khah a donlou a adalhah tina ahin, nidan 24 sung a govt in kholdoh na anei lou le kiphinna kinei pan ding ahi tin hetsah na ahin nei in ahi. KSO lamkai pa in asei be na a Highway a lampi toset ho ahung ha um toh lhon in mi phut kha a dalhah na thilsoh jong tukah in thumvei lam aum tan ahi ati.

State government le BIPL in lampi a signal akoi lou jeh a hitabang toset na hohi soh ahi tin lamkai pa chun tahlang na ahin nei in ahi. Hiche thilsoh a mollem pa KSO member khat ahi toh lhon a thilsoh chung a mona nei ho akimatdoh tokah a kiloikhomna aum thim lou diu dan jong hetsah na ahin nei in ahi. Thilsoh chunga mona nei ho nidan 24 sunga matdoh na akinei lou le ahunglhungding January nisim 19 akon a blockade bol ding in jong KSO in hetsah na ahin nei uvin ahi.

Nirbhaya rape case a themmo chang Mukesh petition President Ram Nath Kovind in sanpeh talou; Themmo na neiho Feb 1 teng khailih hita diu

New Delhi, Jan 17: Nirbhaya rape case a them’o chang mi 4 lah a Mukesh in ngehna abol President Ram Nath Kovind in asanpeh lou thu Rashtrapati Bhavan in tunichun Union Home Ministry ahetsah tan ahi. Mukesh ngaidam dia ngehna thu hi Ministry of Home Affairs in President vetlhah dia ana pehlut ahi.

Nirbhaya suse le that a themmo chang mi 4 -Mukesh Singh (32), Vinay Sharma (26), Akshay Kumar Singh (31) le Pawan Gupta (25) ho se chu January 22 jingkah nidan 7:00 le Tihar songkul sung a khailih hidia Delhi court in January 7 nia chu thutanna asodoh ahin tua hi February 1 jingkah nidan 6:00 teng joh leh khatlih ding’a Delhi court in thutanna thah anei kit ahi. Hiche hi President in Mukesh petition asanpeh lou nidan phabep jouva Delhi court in athah a thulhuhna anei ahi.

Mukesh thakhel a ding danthem pan President in ngehna asanlou na thulhut hetsahna kamupon, thulhuh hi songkul sung a Mukesh kipeh le kipehlou chung chang hi Patialia House Court a nilhah nidan 3 a kihedoh bep ding ahi, ati.

Achesa 2012 a Nirbhaya ahon a suse a that lah a pang Mukesh chun Tuesday nia Supreme Court a ngaidam thumna apehlut chu Delhi Lieutenant Governor in sanpehlou dia thulhut abol pansan a President vetlhah dia home ministry in ana pehtou pai ahi.

Ahin Mukesh in ngaidam thumna lekha apeh tolhon a January 22 nia themmo chang ho khailih dia kigong hi chelha ponte tia Delhi government in high court ana hetsah pai ahi.

Hinla Nirbhaya penna nu Asha Devi in numei ho bitna pehding a 2014 kum a Prime Minister mopohna hung chang pan Prime Minister Narendra Modi kom a khel le umlou a January 22 nia themmo chang ho khailih dia ngehna Friday nia ana nei kit ahi.

ANI thudoh adonbutna ah Asha Devi in themmo chang mi 4 ho tuchan a khailih ahilou thu ah BJP le AAP themmo achan in ahi.

Nirbhaya nu Asha Devi in thudih dei na tunichan a tao jing kahi in hinla kachanu thina chung a political phatchomna hol aum jing in, abang in government themmo achan in abang in police nei peuvin themmo chang ho ni 2 sung in khailih uving nge tin aseikit uve, ati.

Asha Devi in Delhi Police chung a thaneina eikipeh ule ni 2 sung a themmo chang ho khailih dia Delhi minister Manish Sisodia thusei jong themmo achan in, aumdan hi Delhi Police chung a thuneina neiding bou tupna a kisei abang jeng e, ati. Langkhat a hiche thu a hi BJP le AAP hi alang lang a themmo kichanto gel a umjing lhon ahi.

Phat chomkhat a dia Economic blockade kivohai

Imphal,  Jan 17(UNA): Truck kiloikhomna 3 lam in National Highway a economic blockade ana kou uchu phat chom khat ading in an akivohai in ahi.

Hiche voh hai na thuphon chu kiloikhomna thum ho in Chief Minister bungalow a Minister N. Kayisii jaona a kihou na ana nei utoh lhon a ana nei u ahi. Kihou na dung jui in ni 15 sung bloackade lahdoh ding in kiloikhomna ho in phondoh na ahin nei uvin ahi.  T. Abraham, Maram, Information and Publicity Secretary, Senapati District Truck Owners Association in Senapati District Truck Owners Association, Senapati District Truck Drivers Union  le Senapati District Truck Drivers Welfare Union member ho jaona a thuso miho toh kihou na a ana sei ahi.

Hiche blockade voh hai na chu Chief Minister pa in department kholchil na anga ding uva temna ana nei toh lhon a an akiladoh ahi. Kiloikhom na thum ho in ni 15 sung a athumna ho u suh bulhit ahi lou le tua sang a khoh jo a kiphinna anei ding u ahi dan jong hetsah na ahin nei uvin ahi. Hiche blockade kibol sunga tosot nah in nei mipi ho chung a union thum ho in kipa thu phon na ahin nei uvin ahi.

Kangpokpi a road safety week kimang

Kangpokpi, Jan 17(UNA): Department of Transport, Govt. of Manipur makai na noi in a 31st  vei channa National Road Safety Week chu amsapen ading in Kangpokpi DHQs  a ana kimang in ahi. Lunseh Kipgen, Chairman, Kangpokpi Town Committee le Sony G. Sang, MPS, SDPO Kangpokpi  chu  hondoh na kingon kibol na achun jin gun le jin ja um in ana pang lhon in, Ottong Khongsai, DTO Kangpokpi chu kinnei pa in an apang in ahi.

Kingon achun khopi sung a gari tol aja asim in panlah na ana nei uvin, traffic dan jui an ding chung a kihou khomna ana nei uvin ahi. Kingon a Lunseh Kipgen, Chairman Kangpokpi Town Committee in ahou limna a lampi a boina to lou ding kiding hi thil thupi tah ahin, lampi a toset na akon huidoh na ding a mi jouse in panlah na anei angai dan thu tahlang na an anei in ahi.  National Highway a police station jouse a CCTV koi ding in jong Lunseh Kipgen in ngehna ana nei in ahi. Hiche CCTV hoi akikoi teng lampi s mi phut kha a jam mang ho beilam cha a hetdoh ahi ding danjong ana sei in ahi.  Lampi a toset na aum jing toh lhon a town committee in speed limit ana koi jing ahin hinlah aboi pi ding le avesui ding ho in don lou a akoi jing ule gari tol ho in ajui lou jehuvin phat chom na akimu doh pon ahi ati.

SDPO Kangpokpi, Sony G. Sang, MPS in ahou limna a lampi a gari tol ding hihen lam jot ding ho hijong le traffic daan ajuiding u apoimodan thu tahlang na ana nei in ahi. Traffic daan jui na ding a simlai ho in phate cha a panlah na anei uva, nu le pa ahi lou le akum tam ho in hetna anei lou jong ule ahil jing ding uvin temna ana nei in ahi.

Ottong Khongsai, DTO Kangpokpi in ahoulimna a tukum a road safety week kiman hi Kangpokpi district ahung so akon akiman na asa pen ahi dan tahlang na an anei in ahi. Kangpokpi khopi sung le akim vel a lampi toset na ho atam jo a gari tol ho in ching thei tah a atol lou jeh u ahi dan jong phondoh na ana nei in ahi. Lampi a toset na umlou ding hi vai po ho mopoh na hi lou a mipi ho mopoh na ahi dan hetsah na an anei in ahi.

Kum chapang cha akon a gari tol ho in gari tol dan hetkeu hilou a atol teng hetjing a pha daan ho jui ding ahet ding uvin jong temna ahin nei in ahi.  DTO pa in asei be na a gari neo tol ho in helmet aki khuhcheh uva, chuleh gari tol pet a koima in phone atham lou ding in jong hetsah na ana nei in ahi. Traaffic daan palkeh na akon ki leusah na man ho jong tahlang na ananei toh lhon in mipi in ching thei le lim geh ha a gari tolna anei na ding uvin jong DTO pa in temna ana nei in ahi.

 

Tripura gam a Bru ho achen den theina ding kinoptona kisem; political party, CSO chom chom in kipapi

Aizawl, Jan 17: Bru thu a kinoptona soi akikai nikhat jouva political party leh Mizoram gam a civil society group chom chom in Centre chule Mizoram leh Tripura sorkar in thusim a umding Bru thu a kum somni val boina um kisuhlhap nading kinoptona asem jeh uvin pachatna thu asei uvin ahi.

Kinoptona kisem hi Mizoram political thusim a dinga machalna lentah ahi, tin jong asei uvin ahi. Young Mizoram Association (YMA) kiti Mizoram gam a civil society organization lenpen in Friday nikho a thuso anei nauva kinoptona akisem chungchang a kipathu asei uvin ahi. Kinoptona dungjuiya achesa 1997 kum a Mizoram gam a kon jam a Bru 30,000 val hi Tripura gam a chengdet diu ahitai.

Centre leh Mizoram sorkar in Bru ho gamsung a nungpui nadinga pan alah jing ahi’in, Mizoram gam a achen nau khosung a akile kit diu hi organization chom chom in alamto ahi, tin YMA thuso chun aseiyin ahi. Ahivanga Bru refugee hohi Mizoram gam a kile ding nom louvu ahi’in, ‘rehabilitation package’ chom chom agon peh vang uva Tripura gam a relief camp gup a umden ding akilhen joh u ahi, ati.

Union Home Affairs Ministry leh Mizoram sorkar panlahna YMA in akipapina thu aseiyin, kum 23 vel Bru thu a boina kisuhlhap hi Mizoram dinga lunglhaina ahi, ati. Simlai kiloikhomna lenpen Mizo Zirlai Pawl (MZP) injong Centre chule Mizoram leh Tripura sorkar chule organization chom chom in Bru Agreement soi kaina dinga pan alah jeh uva kipathu asei uvin ahi.

Mizo National Front (MNF) in Mizoram mite dinga hetthei umtah chule machalna lentah ahi, tin kinoptona kisem akipapi nau thu asei uvin ahi. Party in thuso anei nauva Centre, Mizoram sorkar leh NGO ho panlah na jal ahi, tin asei uvin ahi. State Congress injong akipana thu aseiyin, amaho vaipoh sunga jong Tripura gam a kon Bru ho gamsunga le pui nading natoh ana umjing ahi, ati.

Party in thuso anei nauva Mizoram gam a kile ding nomlouva Bru hohi Tripura gam a achen diu phalpeh nadinga Congress sorkar in Centre chule Tripura sorkar henga avel vel a anasei ahi. Ahivanga CPI-M lamkaina anahi Tripura sorkar in proposal kipe asan pehlou ahi, ati. “Bru ho agam a umsah dinga tua Tripura sorkar in nopna anei hi kipa umtah ahi”, tin aseibe uvin ahi.

State BJP unit injong pachatna thu asei uvin chule Union Home Minister Amit Shah leh gamsunga um NGO hon pan alah jeh uva kipathu asei uvin ahi. Mizoram People’s Conference (MPC) injong akipapi nau thuso anei uvin ahi. State sorkar in Mizoram gam a um Bru insung ho lungmong a achen thei nadinga khohsahna apeh jeh a kipathu jong aseibe uvin ahi.