Kpi DHQ a ISL player Boithang Haokip liemna kingon kibol

Kpi DHQ a ISL player Boithang Haokip liemna kingon kibol

552
0
SHARE

Kangpokpi, Jan.6: Kanggui Youth Union in KYU UPA team toh kitho in Brig.Thomas Ground, Kangpokpi district HQ a tuni chun Kangpokpi District HQ a hung seilen a India gamsung mun chom chom a District HQ min hinchoisang jing football peh themtah le minthang tah Boithang Haokip liemna kingon abolpeh in ahi. Kingon kichailam chun kingona panla jousen ankong asohkhom uvin ahi.
Boithang Haokip hi 1970/80 laiya football peh lam a ana minthang (L) Henkholal Haokip chapa ahi. Boithang hi neocha ahi laiya pat Brig.Thomas Ground a football ahin peh pan a 2014 kum a Indian Super League ahung kipatdoh a pat player poimo tah khat a hungpang ahi.
Kingon a chun Kangpokpi Town Committee Chairman, Chonkam Kipgen Jin-gun in apang in chuleh Kangpokpi Women Welfare Organization executive ho leh local body lamkai jouse’n pan alauvin ahi.
Kingon a chun Kangpokpi Town Committee in vannoiya Kangpokpi District HQ min hin choisang jing Boithang Haokip chung a akipana thu aphongdoh in ahi. Jin-gun a pang Chonkam Kipgen in Boithang Haokip chu kipavetsahna in town committee thalheng in Saipikhup khat asilpeh in chuleh Kangpokpi Women Welfare Organization in jatpon a kisem ngong-aw (muffler) khat a awpeh in ahi. Kanggui Youth Union in kipa vetsahna le malam a akichepna ho a pan hatah a ahin lahtheina ding in memento khat ape in chuleh KYU UPA Team in jong memento hoitah khat ape in ahi.
Kangpokpi Youth Union le UPA Team in Boithang chu “The Pride of Kangpokpi DHQ” tin phondohna aneilhon in ahi. Kingon kichailam chun KYU Gollhang team le KYU UPA Team in felicitation football match khat aneiyuvin ISL Player Boithang Haokip jong UPA UPA Team a chun apang in KYU UPA team in KYU Gollhang Team chu 2-1 in ana jouvin ahi. KYU UPA Team goal masapen chu kichep minute 30 lhin nah a Boithang Haokip in akhum ahi. Second half jou minute 63 chan nah a chun Mangmin in goal khat ana pehlut kit in ahi. KYU Gollhang team ding a goal khum chu Lalneithang ahi’n amah in second half minute 78 lhin a chu goal khat akhum ahi.