Koijoh themmo ham (Mipi mitmona kiseiji louva Govt mitmona bou kisei)

Koijoh themmo ham (Mipi mitmona kiseiji louva Govt mitmona bou kisei)

208
0
SHARE

Koijoh themmo ham

(Mipi mitmona kiseiji louva Govt mitmona bou kisei)

                                              Kivaipohna kitina photna hi lamkai leh anungjui mipi in ama ama boldi cheh um ahijeh in mopohna nei lamkai lang lhinlelna bou kiseijia mipi lang hon aboldidol abolji lou thu kiseijilou ahi angaina dan’a um ahi. Govt kivaipohna a jong hi mipi lah a akiphin di ngen ahiji vang’a mipi hon atohdiu dol atohlou, apeh diudol apehlounau jong tam kit ahi. Lamlen kisemlou (kisem hatlou) thu, govt inn le thil ho phate kisahlou thu, donding twi theng kimulou thu, electric meivah kisuhlou thu hoa mipi kiphinna leh govt lang’a mopohna nei ho oimona thu jeng kiseiji ahi. Tutun jong Maphou Dam Area lang’a cheng/khosa koi jat mi kitilou hon lamlen kisemphat lou jeh in kiphinna aneijun lamlen akisemphat loichel louleh agam alhang’a govt thil le lo, inn le lou jouse suhset din gihna anei uve. Govt lang jong hi ipin asuhmojia mipi tamtah lamlhahna lampi ho kisan semphat louva akum alha a akoi jeng jiham ti jong datmo um ahi. Khohsahna umlou jeh ham, khohsahna aumvang’a Centre lang’a kon fund (sum) ahunglou jeh ham hiteidi ahi. Khohsahna dihtah aumleh aumsa lamlen hobeh semphatna umthei divang ahi. Ahin lamlen akisemphapoi tia govt inn le lou, thil le lo ho bansuhset di, hallhah gamdi kiti jong adih achang hidehlou di ahi. Lamlen’a kotonglai, aselai ho hi avel’a cheng mipi hon jong semphat  theithei asemphat thei mama ahi. Tamei lampi a aselai munkhat akom avel’a cheng khomi hon leiset le songtum’a adip uva asemphat ubang chu pachat umtah ahi. Tulai gari nei atam vanga Registration kibolpetna Road tax khatvei peh a kipe tilou niseh a gari lhaile hon lampi semphatna aumjingna dia tax apeh khahlou ahi. Mundang gamdang’a niseh a lhaile gari jousen Tax pehna di munkhatna cheng som beh apehjing u, hichu lamlen ‘maintenance’ (semphat jingna) dia kimangcha  ahi. Manipur’a hi Registration kibolpetna Road Tax kipe hojong lamlen semphatna dia akiman di tahsan umlou ahi.

                Hapta/kal masa a Churachanpur district hospital a Ceiling chimlhah jeh a damlou kijen holeh dammo umpi ho akisukha umnalai kiti thu jong hi athilou u vangphat um ti di ahi. Govt inn kisa hole lei (bridge) kisem ho chomkah louva achimlhah hemhumji jong Manipur a dia thusoh kidang  kilou ahi. School inn bang (wall) chimlha, lei kisem akichai masang’a chimlha kiti hohi inn le lei ho sahna di sum ho adandan’a anekha di (kilahdi) atam jeh hipen ahi. Nehding/donding twi leh electric meivah ho akisuhpoi kitia hi mipi mitmo le suhkhel jeh jong atamjo hidi ahi. Twilonna di Pipe kigumang, kisuse, electric gui leh post kigumang, electric meivah man Fee pehlou kiti jong dim ahi. Hiche hohi govt lang sang’a mipi suhkhel le lhinlelna hahijo di ahi. Govt nin jong atohdidol atoh a mipi langin jong apehdidol apeh di hi adihpen leh ahididol tahvang ahi.