KNO/KRA cadre khat Kangpokpi Police Station lock up sung’a athijeh a boina...

KNO/KRA cadre khat Kangpokpi Police Station lock up sung’a athijeh a boina sangtah um; SI khat leh constable 2 suspend kibol

89
0
SHARE

KNO/KRA cadre khat Kangpokpi Police Station lock up sung’a athijeh a boina sangtah um; SI khat leh constable 2 suspend kibol

Kangpokpi, Jan 28(UNA): SoO noiya um KNO/KRA cadre khat Kangpokpi Police Station lock up sunga tunjingkah a athisa akimu jeh in boina santah ana um in SI khat leh constable 2 suspend ana kibol tan ahi.

Boina aum ho sulham ding in Kangpokpi police station a kon KSO Sadar Hills Administrative office chan Social Welfare and Cooperation Minister Nemcha Kipgen keng a ache in ahi.

Kangpokpi police station lock up sunga akihen na a KNO/KRA thingnoi khat athi jeh a Kangpokpi DHQ a boina sangtah um ahi’in, Minister Nemcha Kipgen in pan alah jouva boina kisulham a chule sun nilhum a kikhah niseh kimanchah ngai hojong nilhah nidan 5.30 a kihong pan ahi.

National child bravery awardee hi a Thangboi Lhouvum hi Kuki Revolutionary Army (KRA) a pang ahi’in, achesa January nisim 25 nikho a Toribari kom, Imphal-Tamenglong lamlen a 38 Assam Rifles hon lamlen a lhai gari ho a sum adon na a amat u ahi. AR hon Thangboi hi anilhah ma ma a medical fitness certificate toh Kangpokpi Police station a apehdoh u ahitai.

Ahivanga tuni jingkah a lock up sunga athisa kimudoh ahi. Thangboi hin ajinu chule acha thum athi san ahi’in, acha aneopen hi lha gup bou hinalai ahi. Athi thu akithan jouva lunghang tah a mipi, atamjo numei ho akikhom uvin, Kangpokpi police station anokhum uvin, khangthah phabep in police station window leh thil thah chule computer desktop ho asuse uvin ahi. Lunghang tah a kikhom mipi ho suhthip nadinga police hon meichang phabep van langa akap uvin ahi.

Police station mai National Highway 2 a mipin tyre ahal uvin, bandh abol uvin, che le vah le ho nilhum a atang den uvin chule dukan leh sumkol veina mun jouse jong akikhah in ahi. Dammo kipohna chule press leh media ho tilou gari khatcha alhaisah pouvin, Minister Nemcha Kipgen jeng jong KSO Sadar Hills Administrative office building chan keng a che ahi.

Kangpokpi DC Lalithambigai Kalidas, IAS leh IGP Zone-III K Jayanta Singh in apet pet a Kangpokpi police station adei lut in, meeting chom chom asem uvin ahi. Local MLA jong hi a Minister Nemcha Kipgen in ADC Sadar Hills Chairman leh atohkhompi Vice Chairman Thangjakam Misao, IGP Lunseh Kipgen panna a meeting abol uvin ahi. Civil body a Kuki Inpi Kangpokpi district lamkaina noiya Kuki Inpi Saikul, KSO Sadar Hills, KSO Saikul, KWU Sadar Hills, TSA, Thadou Inpi, KTC, KWWO leh KYU jong apang uvin chule kihouna a Assam Rifles official hojong apang uvin ahi.

Athi pa in adalhah achate chule aji pohnat na jal a SP Hemant Pandey in mihem ngailut najal a ama langa kon dangka lakh khat cheque peh dinga kitepna aneiyin ahi. Kangpokpi CSO hon vangsetna toh pa insung mite thalhenga dan asem hou Minister Nemcha Kipgen umna a aseikhom jou uva kinoptona soi akai uvin, Kuki chonna dungjuiya hemkham bol ding, mopohna nei police officer leh duty hi a police personnel ho suspend bol ding, judicial inquiry umsah ding chule vangsetna toh pa insung mite dangka lakh 5 ex gratia leh ajinu Grade-IV post natoh peh dinga kinoptona anei uvin ahi.

Kinoptona soi akai jou uva bandh kikoi aladoh uvin chule police station a magistrate inquiry leh forensic department official hon abol diu abol jou uva thilong Imphal khopi a post mortem bol dinga apo tauvin ahi. Vangsetna toh pa angong a hi alol kimehna maha aum’e tia thulhut in asei ahi’in, ahivanga tu dinmun a ima photchen hilou lai ahi.

Alangkhat a KTC in Kangpokpi mite thalhenga themmona neilou passenger bandh jeh a hahsatna toh ho henga nommo asah nau thu aphong uvin ahi.

Kuki Inpi Manipur in Thangboi Lhouvum akimatna mun a athi demna anei uvin, sorkar in action kilomtah a alah louleh kiphinna sangtah bol dinga gihna anei uvin ahi. Thilsoh taoh kisaiyin duty phate a poh lou na chung in SI Seigoulen Sitlhou leh constable mi 2 suspend bol dingin Kangpokpi SP in order asodoh in chule Constable suspend kibol teni chu Lungoumang Haokip le Paominthang Khongsai ahi akiti. Suspend kibol sung ahi allowance ho amu louding u chuleh Kangpokpi khopi sung a SP pa phalna bei a adalhah thei lou ding u ahi akiti.

ZYA GHQ lamkai na’a CCpur Police, Narcotic Affairs Bureau Manipur leh 2nd AR hon Lungthul leh Kangkap gamkai sung’a Kaani leiho suse

B.Lalboi Gangte

Ccpur, Jan 28 (ET): Zomi Youth Association (ZYA) GHQ lamkai nan tunin District Administration Ccpur, District Police, Narcotic Affairs Bureau Manipur leh 2nd Assam Rifles kithokhom nanoi in Lungthul leh Kangkap gamkai’a Kaani lei kilho namun ho anasuse uvin ahi. Hiche Kaani lei mun suse ding’a kon ho chu Lungthul (D) ah akingah khom uvin hiche kho akon chun jinglam nidan 10:30 in Lungthul apat group 2 in akihomkhen uvin group khat Lungthul kho apat Km 10 vel’a gamlha’a um Kaani lei kilhon  namun ho asuse uvin, group khat in Kangkap gamsung’a Kaani lei kilho na mun ho asuse uvin ahi. Hiche achun District Police team hochu  Lawrence Kapkhenmang Munluo, MPS Addl SP (Ops)  Ccpur in alamkai in, NAB team hochu ASI Hitler Meitei in alamkai in chuleh ZYA Ghq Lamkai nanoi’a ZYA Unit chom chom apat volunteer 200 val anajao uvin ahi.

Hiche toh lhon’a Kaani lei kisuse hohi Kangkap leh Lungthul kho sung mi inko 15 in alho’u ahi in Lungthul gam bou’a Kaani lei kilho na aletdan acres 18 aval in hiche ho jouse abon in anasuse uvin ahi. Hiche mun’a Kaani kisuse ho asum a sei ding in Dk. Crore 1 man vel hi ding ahi. Kangkap gam’a Kaani lei kilhon na gam mun Acres 15 vel alen asum a sei ding in Dk. Lakh 88 vel man ding Kaani phung anasuse uvin ahi. Chuleh hiche tohgon kinei nahi achesa Jan. nisim 16 nikho’a ZYA Ghq in Guite gamkai sung’a um kho ni a Kaani lei suhset ding’a kithulhuh na anei najeh uleh General Assembly 2019 kum’a khamnathei doudal na ding’a “Kaani (opium) Free Zogam” mission minsah kithulhuh na analah’u tohmolso nading’a ananei’u ahi. Kaani lei kisuhsetna ZYA GHQ noi’a Kapkhovung block apat kho chom chom tichu Ngaljang, Suangdai, Suangdoh, Lungchin, Enpum, Lungthul(T), G. Bualzang, Tuilakzang, Lungthul (L) leh Lungthul (D) apat mipi hon kithopi na anape uvin chuleh  ZYA Raja Goukhothang Block apat Kangkap, Songtal, Mualnuam, Kaihlam, Thuangtam, New Kangkap kho akon mipi hon jong kithopi na anape uvin ahi.

SAI/STC centre mun dang a chon ding deilou vetsahna a player chule minu mipa hon lamlen a kiphinna bol

Imphal, Jan 28(UNA): Sports Authority of India/Sports Training Centre (SAI/STC) Khuman Lampak a um player chule nu le pa teho aja a sim in Tuesday nikhon mun dang a Centre akichon deilou vetsahna a lamlen a kiphinna anei uvin ahi.

Khoyathong traffic junction mun a player chule nu le pa teho akikhom masapen uvin, SAI/STC huhdoh uvin, tin achom chom hatah in asam uvin chule kichep golseh li- Fencing, Wushu, Weightlifting leh Swimming kilahdoh demna thu asam uvin ahi.

Boina thilsoh aumlou nadinga police hon amun angah uvin ahi. Kiphinna bol a player ho black top a akijam uvin, ‘slogan’ chom chom asam uvin, phat chomkhat jouva player holeh nu-le-pa teho Minuthong lei a akikhom kit uvin, ‘slogan’ ho ma ma asam kit uvin ahi.

Achesa January nisim 16 nikho a kon state sorkar in pan alah dinga ngehna kineiya kiphinna kipan ahitan, ahin, tuni chan geiya action akilahna umlou ahi, tin kiphinna a pang Yengkhom Tenu in aseiyin chule mopohna nei minister ho henga jihtho a application jong kipe ahi’in, tuchan a aphatchomna umlou ahi, ati.

Masang a chu events jouse centre a kon lahdoh dinga tohgon um ahi’in, ahivanga Chief Minister in pan alah jeh a events 6 hi kilha ong ahi’in, ahivanga vangset umtah a fencing, wushu, weightlifting leh swimming hi centre a kon kiladoh ahi. Events thum- fencing, wishu leh weightlifting hi Takyel SAI a kichon ding chule Swimming hi centre a kikhah thengset ding ahitai, tin aseibe in ahi.

Chate ho akhonung akisem theilou nading mun a minu mipa hon kakoi nom pouve, tin aseiyin ahi. Hetthei khat chu achesa January nisim 2 nikho a Centre adalhah nadiu order kisodoh ahitai. Hitobang dinmun a player ho aumsot uva ahileh ahinkho u chule career u seding ahi’in, amaho hinkho leh career (khonung) semna dinga centre huh ngai ahi. SAI/STC mun dang a chon ding a thulhuhna um demna sangtah kaneiyui, tin aseiyin chule state sorkar, mopohna nei sports minister leh authority adang dang hon aganna thei pen a pan alah uva, boina asuhlhap diu chule player ho hinkho ahuhdoh diuvin temna aneiyin, minu mipa jousen pan alah dinga temna aneibe in ahi.

Coronavirus nat venna dinga state sorkar in pan la; Airport leh gamgi mun chom chom medical team hon ngah

IMPHAL, JAN 28(UNA): State sorkar in gamsunga coronavirus nat alhun louna dinga kivenna a pan ala uvin, Imphal International Airport, Moreh, Behiang leh Jiribam gamgi a um gate ho a gamsung hung lut ho ‘infrared thermometer’ mangcha a kholna anei uvin ahi.

China gamsung Wuhan khopi a kipan Coronavirus natna achal cheh cheh jeh a state sorkar in kivenna dinga hitobang pan alah ahi, tin Dr Arke, Additional Director (Public Health) Medical Department, Manipur in aseiyin ahi.

Coronavirus hin khosih, naptui long, luchang nat, tisat, lol nat, chule tahsa nopmo na ho asosoh ahi’in, natna hi common cold a kon thina thei pneumonia chan lhung thei ahi. Virus hin gancha- bong leh vohcha ho eh akho sah a, chule ahcha ho a respiratory (upper) natna asosah ahi. Hiche nat kijenna dinga hi tuchan a vaccine ahilouleh antiviral drug umlou lai ahi.

Coronavirus natna hi mihem leh mihem kilato thei ahi ti hetdoh ahi jouva WHO in kiginna dinga thuso anei ahi. Kum masa December nisim 27 nikho a virus hi Wuhan khopi a kihedoh masapen ahi’in, pasal phabep in hiche natna anei ahi. Chinese doctor hon natna nei hohi angaiya banga ajen ahi’in, ahivanga damlou phabep respiratory problem leh hypoxia a athi jouva natna akhol gil be u ahi.

Kijot to na amachal cheh cheh a khantou toh dungjuiya lenna leh adang dang ahoi cheh cheh jeh a vannoi hi neocha hi ahitai. China gam a Manipur gammi tamtah um ahi’in, hiche jeh a state sorkar in kivenna dinga pan alah ahi, ajeh chu China gam a um gamsung miho hin natna pum a inn ahin jot maitheiyu ahi.

Achesa January nisim 18 nikho a Centre in State Health department in kivenna a pan alah dinga thuhilna anei ahi’in, MO lamkaina a medical team hon Imphal Airport a ahung lhung ho tisat nei aumle screen abol uva chule team hohin aniseh a sorkar  jong akikhol theina dinga Moreh, Behiang, Jiribam  leh Mao a jong MO lamkaina a medical team hon um uva, passenger ho record jong alah u ahi.

Gam kinaipi Nepal leh Srilanka a natna nei akihetdoh thu Ministry of Health and Family Welfare, India government in alungkhampi thu aseiya, ama ama gam a medical department official, chief secretary leh DGP hotoh video conference abol ‘a, gamsunga natna ven ding dan thu aseikhom u ahi. China a kon hung koi tobang tisat nei aumleh mipa thuchen kilading, fever surveillance aboldiu chule centre henga aniseh a report kipe ding ahi. Adamlou pa/nu symptoms asoset leh RIMS ahilouleh JNIMS isolation ward a aumsah diu ahi.

Kivenna dinga pan kila hi Coronavirus natna amangtai tia phondohna aum kahse a chelha ding ahi.

Dist. Administration in Govt. gam ho vetchil na aneipan ahi tah dan thuso miho heng’a phongdoh

B.Lalboi Gangte

CCpur. Jan 28 (ET): Churachandpur District sung’a Press / Media hon tunin DC office Chamber mun’a District Administration akon Pawan Yadav, IAS Deputy  Commissioner, Amrita Sinha, IPS, Superintendent of Police leh S. Khaikhopau Ngaihte, MCS, Additional DC Churachandpur ho toh kihoukhom na ananei uvin ahi. Hiche phatsung’a Pawan Yadev IAS in CCpur District sung’a khantou na aum theina dia pan lah natoh kisai aseina’a Centre funding kibol kim khat ah khonung in agam neiho claim bol aum in hiche nachung chon’a Court case chan’a kiheh na jong aum tah jeh in  District Administration lang in Court case kiti ho boipi  na ding phat aneilou ahi dan atahlang in ahi. Chuleh hiche hin gamsung’a khantou na lut ding ho nasatah in adal tan in ahi ati. Aman aseibe na’a Churachandpur gamsung’a government gam ong jong aum dapon ahin alohon amaho gam dan in akisem uvin ahi. Ahin government gam ahidan melchih’a um kim khat vetchil na akipat tah dan atahlang in ahi.

Hiche toh lhon’a SP Amrita IPS in houlimna aneina’a Burma / Myanmar henga report apeh u ahi. Lenna hilou gari a hung ho akon hung kipandoh Kenbo Bike jong CCpur District sung’a akikham toh lhon’a tamtah jong matdoh in aum tan hijong kihethem’a Christmas leh Kumthah Festive Season sung’a kipedoh kit ahi. Hiche bike kimanchah na mun hi thinglhang kochong lam’a amanchah ding uva hethem ahivang in khopi sung’a vang kham na kinei jom jing ding ahi ati. Chuleh khopi sung traffic ho hoitah’a vetkol na achelhah jing nachung’a tu leh tua tohmol soding alhom in hijeh chun hiche chung thu hi jing (Jan. 29) nikho leh thil chom chom toh seikhom na kinei ding chuleh khopi sung’a mipi po’a lhai diesel auto ho kingah na mun ding jong kisem peh ding ahi ati.

Kangpokpi CSO hon kani lei kibol kha dinga thulhuhna nei; sorkar in lampi dang agon peh diuva ngehna neiyu

Kangpokpi, Jan 28: Kangpokpi district a Kuki Inpi Sadar Hills Kangpokpi district noiya Kuki civil society organization chom chom in meeting anei uvin, tukum a kon district sunga kani lei leh khamna thei adang dang kha dinga thulhuhna anei uvin ahi.

Kihouna a Kuki Inpi Saikul Gamkai, Kuki Inpi Moltam Lhang, Kuki Inpi Tuibul Lhang, Kuki Inpi Tuilang Lhang, KSO-Sadar Hills leh KSO Saikul Gamkai, KSO Island, KSO Bungpi, KSO Tuilang, KSO Moltam, Kuki Women Union Sadar Hills, KWU Saikul leh KWU Tuilang kiti Lhang Inpi ho apang uvin ahi.

Sorkar in kani lei kibol suhmang dinga lungtup anei tosotna chule district sunga hiche jeh a thilse lhung thei ho gelkhohna jal a tukum, 2020 a kon kani lei kibol kha ding thu meeting a phatah a aseikhom uvin ahi. Kuki civil society organization hon Kuki Inpi Sadar Hills Kangpokpi district lamkaina noiya kani lei bol ding akha nunga koi tobang kani lei bol a aumle district a kon ama leh a insung pumpi nodoh dinga kilolna anei uvin ahi.

Chule state sorkar in loubol miho leh kani lei bol ho akivah nathei diu lampi dang aganna thei pen a agon peh diuvin jong temna aneibe uvin ahi.

 

Meivah lhun louna Senvon leh Lungthulien khosung mi asang a sim in kijotna nei

Imphal, Jan 28(ET): Prime Minister Narendra Modi in meivah kipe soh (100 per cent village electrification) ahitai, tia asei vanga Manipur gam a um thinglhang kho ni in gamkaiya meivah apeh diu thumna a lamlen a kijotna anei uvin, Independence a kon khosung mu thim ahi, tin asei uvin ahi.

Tipaimukh Assembly constituency noiya um Mizoram gamgi, Imphal khopi a kon km 294 leh 281km cheh a gamlha Senvon leh Lungthulien kho a kijotna aneiyu ahi. Kiloikhomna chom chom lamkaina a Senvon lamlen a kijotna a mi 2,000 val in pan ala uvin chule Senvon Kohran Inzawmkhawm (SKI) kiti khosung a um houbung chom chom kipunkhomna jong apang uvin ahi.

Sorkar in phat atep kum 2 ache nunga jong khosung a meivah akipeh loujeh a kiphinna kibol ahi, tin SKI chairman L Rolawm Pulamte in thuso miho henga aseiyin ahi. Sorkar in khosung a meivah peh dinga kitepna anei ahi’in, 2018 kah a jo dinga asei uva, hiche jouva December 2019 kah a meivah lhun lut tei dinga aphat atepchon kit u ahi, ati.

“Sorkar in phat atep anivei channa aval tah vanga meivah khom leh meigui kilhung hohi kijou naisai loulai ahi”, tin aseiyin chule mun phabep a meigui hi thingphung a kito ahi, ati. “Kum jakhat val meivah beiya kaum u ahi”, ati. Centre in Pradhan mantra Gram Sadak Yojana (PMGSY) scheme noiya Senvon-Lungthulien chule akinaipi kho dang dang ho kah a ‘inter-village highway’ sah nadinga sum sanction abol ahi, tin Pulamte in aseiyin ahi.

“Fund hi kum tamtah masanga sanction akibol tah vanga tuni chan a natoh umlou ahi”, tin aseiyin chule khosung miho hi Central Water Commission (CWC) in asah lamlen a kingam ahi’in, hiche lamlen hi lui val ahitai, ati. Senvon a um primary health centre, high school leh veterinary hospital chule adang dang hi kum somni val kimangcha lou ahi, tin jong ngohna aneiyin ahi.

State sorkar henga avel vel a ngehna aum vanga aphatchomna umlou ahi, tin aseiyin chule khosung a ngaichat khoh ho aumlou thu a Centre leh State sorkar henga memorandum kipelut ding ahi, ati.

Sevon a kon km 11 vel a gamlha Lungthulien kho a jong Monday nikhon hitobang kiphinna abol uvin, khosung mi 1,000 val in meivah kilhun lut lou leh khosung lamlen aphatcha akisem loujeh a lunghan vetsahna a kijotna anei uvin ahi.

“Lekhasim nadinga meivah kadeiyu’, tin kiphinna bol hon asam uvin chule nehguh bol official ho chunga action lah dinga thumna anei uvin ahi. Local MLA Dr Chaltonlien Amo toh kijahtona anei theilouvu ahi. Senvon, Lungthulien leh Rawvakawt hi Hmar ho chenna thinglhang gamlha tah a um ahi’in, khosung hi kum jakhat val ahitai.

Thinglhang gamlha tah a aumjeh a ngaichat khoh ho lhasam ahi. Senvon hi Hmar chule Zo nam dang dang dinga mun thupi khat ahi, ajeh chu Christian hou hi hiche mun a achesa 1920 kum a Welsh missionary hon ahin pohlut ahi, tia historian hon aseiyu ahi. Pherzawl district DC Mannuamching in khosung a meivah peh nadinga natoh achelhah lai ahi, tin aseiyin ahi.

Hluna Hrangchal, district manager, Manipur State Power Distribution Company Limited in, ‘power department hon khosung teni a meivah lhunlut nadinga abol thei chan abol ahi’, tin aseiyin chule natong ding mi leh gari alhahsam jeh, lamlen phatlou jeh a natoh machal theilou ahi, ati. Khosung a um simlai hon jan a lekha sim nadinga kerosene thaomei leh solar aman u ahi’in, insung atamjo in anhon nadinga thing aman u ahi.

GTPDC hon CM heng a Memorandum pelut

Imphal, Jan 28(ET): Primary Teachers/Hindi Teachers 2019 lahding deina jeh in Graduate Teachers Promotion Demand Committee (GTPDC) hon tuni chun CM pa heng ah SSA/RMSA ho post achom a genpeh a chule State cadre post, Matriculate Teachers/Under Graduate teacher/Primary Teachers/Hindi Teachers/Assistant Graduate Teachers/Higher secondary Lecturers ho tongkha louva gonpeh ding in memorandum khat apelut uvin ahi.

Chule hiche memorandum achun SSA/RMSA a natong ho atoh kum jat uh vet a seniority dungjui a promotion peding in jong thumna anei uvin  chule Directorate of Educaton (s) in 16 Jan 2020 a notice apehdoh nauva jilkung hiding a lhing ho promotion notification Matriculate Teacher/Under Graduate Teachers/ Primary Teachers / Hindi Primary Teachers ho heng a sodoh ding in jong ngehna anei uvin ahi.