KNO leh NNPGs in pan lahkhom dinga kinoptona soi kaina nei ta

KNO leh NNPGs in pan lahkhom dinga kinoptona soi kaina nei ta

283
0
SHARE

KNO leh NNPGs in pan lahkhom dinga kinoptona soi kaina nei ta

Imphal, Jan 19(ET): Ama ama nam in chamna thu sorkar toh asei jing laiya Kuki leh Naga thal choi thingnoimi hon lhangphong tah a pan lahkhom dinga kihouna anei uvin, achesa 1990 khang a Kuki leh Naga gal jouva kon thingnoi hon lhangphong a pan alahkhom got nau masapen ahi.

Working Committee (WC), Naga National Political Groups (NNPGs) leh Kuki National Organisation (KNO) hon India sorkar toh kihouna anei utoh kilhon a nam teni kah a kibahlouna ho suhlhap nadinga pan lahkhom dinga soi kaina anei tauvin ahi. ‘Declaration’ a hi alangni in soi akai ahi’in, achesa January nisim 10, 2020 kum a Imphal khopi a meeting anei jou uva soi akaiyu ahi.

N Kitovi Zhimomi, convener NNPGs leh PS Haokip, president KNO in soi akaina ‘declaration’ a chun adeh a Manipur gam sunga achesa kum som a sim nam kah a boina umho, political leh social thu ho seikhom dinga kinoptona soi akaiyu ahi’in, pan lahkhom ding chule khat leh khat jana kipehto dinga asei uvin ahi. Group teni hin aphat toh kilhon a nam khat ahilouleh adang khat tongkha thei thu ho kihetsah to ding a jong asei uvin ahi.

KNO spokesperson Seilen Haokip in hiche hi Kuki leh Naga ho kah a chamna kisem kibulphuna ahi, tin aseiyin ahi. Kihouna a Alezo Venuh, GPRN/NSCN leh C Singson, advisor, GPRN/NSCN in N Kitovi Zhimomi akilhonpi in chule KNO thalheng a PS Haokip, Seilen Haokip, spokesperson KNO, TS Haokip, Defence secretary KNO, Dino, KRA/KNO apang uvin ahi.

WC, NNPGs hi achesa 2017 kum a kon Centre to achom chom a kihouna neiya Naga thingnoi kiloikhomna sagi ho ho umkhomna ahi. NNPG a hi GPRN/NSCN, NSCN-R, NSCN (Khango), NNC (Parent body), FGN, NPGN/NNC (NA) chule NNC GDRN (NA) pang ahi. Group hin atil a Naga ho kipunkhomna ding leh chang a kivaipoh nading (sovereignty) thumna anei vang uva, tu naicha India sorkar toh soi kai dinga kigotna akinei tai, tia thuphon aneiyu ahi.

Naga chenna gam jouse a Article 371 (A) noiya special provision kikehlen chule Manipur leh Arunachal Pradesh gam a Regional Territorial Council (RTC) hi NNPGs hon thumna anei holah a pang ahi. Sovereignty leh Integration chungchang a NNPGs hon hiche thu jong kisei jom ding ahi, atiu ahi.

KNO hi India sorkar toh chamna thu seina a pang Kuki thingnoi kiloikhomna 17 umkhomna ‘umbrella body’ nil ah a khat ahi’in, group in Manipur gam a Territorial Council of Kukiland achom a athum ahi. Imphal khopi a kihouna anei jou uva NNPG lamkai ho Churachandpur district a KNO president inmun a ankong jong asokhom piuvin ahi.

Kuki Inpi Manipur lamkai hon British Deputy High Commissioner Nick Low kimupiu

Imphal, Jan 19(ET):  Tuni nilhah lam nidan 5:00 vel chun Kuki Inpi Manipur lamkai hon Nick Low, British Deputy High Commissioner to India chu Hotel Classic Grande, Imphal a akimuto piuvin chule kiloukhomna jong ana neiyin ahi.

Hiche kimutona a chun KIM lamkai Khaimang Chongloi, Sominthang Doungel, K. C Guite, Thongkam Haokip, Dr Tara Muanching le KSO President Paotinthang Lupheng ho anapang uvin chule Nick Low chu namjem ngongo (mufflar) khat ana o-peh uvin, lekhabu Anglo-Kuki War book toh The World of Kuki People kiti lekhabu teni jong ana peuvin ahi.

KIM lamkai hon British Colonial period masang a Kukite chamlhat tah a ana khosah dan u, Colonialism ruled jeh a gal ana umdan chule Anglo-Kuki gal jouva Kukite genthei naho chule tu le tua Kukite Politically, Socially chule Economically suppressed ahilou le marginalised kibol ahidan ho jong ana seipeh un ahi.

British Deputy High Commissioner to India Nick Low in jong lamkai ho thusei phatah in ngailhah na aneijin chule gelkhohna aneidan jong aphong doh in, maban a kijahmat to jing dingin jong adeisah na thu aphong in ahi.

Gamsunga um college jilkung hon thumna anei sorkar in Jan 27 kah a abulhit dinga phat tep peh u; ‘Relay hunger strike’ bol dia gihna neiyu

IMPHAL, Jan 19(ET): College jilkung hon thumna anei hou sorkar in January nisim 27 nikho kah a asuhlhap peh diuvin phat atep peh uvin ahi.

Jilkung hohin Federation of Government College Teachers’ Association (FEGOCTA) noiya state sorkar in 7th University Grants Commission (UGC) Pay and Regulation 2018 achepi nadinga thumna aneiyu ahi. Manipur Press Club mun a Sunday nikho a FEGOCTA in thuso miho akimupi na’a, sorkar in January nisim 27 nikho kah a thumna eisan peh lou uva ahileh ajing nikho, January 28 a kon ‘Relay hunger strike’ kipan ding ahi, ati.

FEGOCTA general secretary Dr N Somorendro in jilkung hon thumna aneiyu hi state cabinet in aphatsah ahitan, ahivanga tuni chan a kitahso loulai ahi, ati. State sorkar in 7th Central Commission in recommendation apeh ‘pay structure’ hi achepi loulai vanga July 18, 2018 ni a UGC in 7th Pay chule university leh college ho a jilkung kilahna leh promotion thu a ‘qualification’ chungchang a regulation athah pen asodoh ahitai, ati.

State Cabinet in jilkung ho thumna bulhit peh dinga phatsahna anei kal nikho 48 achetan ahivanga atahso nadinga pan kilahna umlou lai ahi, tin ngohna aneiyin ahi. FEGOCTA in Saturday nikho a executive meeting abol nauva thumna akibulhit lou thu sangtah a aseiyu ahi. Saturday nikho a kihouna a strike bol dinga FEGOCTA executive committee in kilolna anei ahi, tin Dr N Somorendro in hetsahna aneiyin ahi.

Sorkar in January nisim 27 kah a donbutna anei louleh ‘relay hunger strike’ pan dinga kihouna a kilungtoh tah a kilolna um ahi, tin aseibe in ahi. Kilolna dungjuiya January 28 nikho teng jilkung hon DM College of Science campus pam a ‘relay hunger strike’ abol diu, hiche jouteng leh Imphal College leh Manipur College campus sunga January nisim 29 leh 30 nikho teng kiphinna umding ahi, tin Dr N Somorendro in aseiyin ahi.

Chief Minister, Education Minister leh mopohna nei authority hon hiche chungchang a pan alah diuvin Dr N Somorendro in temna aneiyin chule 7th UGC Pay and Regulation 2018 chepi ahina dinga ngaichat ahile ‘relay hunger strike’ kalval a kiphinna sang cheh kibol ding ahi, ati. Hetthei khat chu college teacher hon strike abol uhi sorkar in kitepna anei jouva avel vel a ana vohhai u ahitai.

‘Hit & Run case’ a themmona neiho thu he aumle Dk. 50,000 peh dinga Kangpokpi police in thuphon nei

Kangpok, Jan 19 (ET): Kangpokpi police hon achesa January nisim 15 nilhah a National highway 2 a Theologian leh KSO member hi a mikhat tat lih a jam pai paiya gari chunchang thu he a aumleh kipaman sum peh dinga thuphon anei uvin ahi.

SP Kangpokpi PH Maheshnaraian, IPS in asei dungjuiya achesa January nisim 15 nilhah, nidan 6.30 a kon 7 kikah don a National highway 2, Tumnoupokpi kho kom, Kangpokpi district a mikhat gari in atalih a, gari tol ho jam paiyu ahi. Thilsoh a Pangjang kho, Saikul Sub Division, Kangpokpi district a cheng H Ngamboithang Kipgen (30), s/o Semmang Kipgen thi ahi.

Thilsoh toh kisaiya Kangpokpi police station a FIR No. 2 (1)2020 KPI-PS U/S 279/427/304-A IPC ajihlut u ahitai. Koi tobanga case a themmona neiho kihetdoh nathei thu he a aumle dangka 50,000 kipaman peh dinga Kangpokpi Superintendent of Police in aseiyin chule thu pe thei hohi koi ham ti kiseidoh louding ahi, tin jong kitepna aneiyin ahi.

Koi tobang hiche chungchang thu he a aumle SP Kangpokpi (8119998020),  ASP(Ops), Kpi (8732026062), SDPO Kpi (9899210672), OC Kpi PS (8413948592) chule IO (8837008687) number ho a hetsahna anei theiyu ahi.

CM in Medical college sah nadinga phailei apeh angah dinga Rights body hon temna neiyu

Imphal, Jan 19(ET): Youth’s Forum for Protection of Human Rights (YFPHR) in Chief Minister N Biren Singh henga akisei medical college a dinga gam leiset apeh u angah diuvin ngehna anei uvin ahi.

Yaithibi Loukon, Langthabal Imphal a state sorkar in medical college sah ding lungtup anei ahi. Human rights body injong hiche chungchang a CM henga memorandum apelut uvin ahi. “Medical college sahna dinga gam leiset akipeh a ahileh lousoh atohkhah ding ahi ajeh chu institute a kimang ding mun hohi phailei ahi’in, loubol mi tamtah in asum mu nau alhaso diu ahi”, tin kiloikhomna in memorandum a aseiyin ahi.

“Manipur Conservation of Paddy and Wetland Act, 2014 dungjuiya medical college dinga gam kipeh ngah a phailei ventup ding ahi”, tin memorandum a asei uvin chule CM in medical college sah nading mun hi phailei ahilouleh gam le go tongkhathei mun hilouva mun dang apeh diuvin YFPHR in temna aneibe in ahi.

State sorkar in phailei mun a khantou machalna ding natoh ho angah dinga jong ngehna anei uvin ahi. “Phailei a thil kisahna mun kisem ho kisang louding ahi. Tua jong phailei mun tamtah hiche hohin alo tah jeh a gamsung chang lhasam ahi”, tin YFPHR in aseiyin ahi. “Manipur gamsung hi chang atamso na mun a kihe’a gamdang a kipodoh ahi. Ahivanga tua neh leh chah akemsuh hi project chom chom a dinga phailei mun akilah jeh ahi. Hiche hohi mi tamtah kihinso na ahijeh a ventup ding ahi”, tin aseibe uvin ahi.

Chapang Lakh 3.14 bidoi neiya kibol Intensified Pulse Polio Immunisation Programme 2020 kipanta

Imphal, Jan 19(ET): Family Welfare Department office a tunin Intensified Pulse Polio Immunisation Programme hondoh ahitan ahi. Tukum hiche tohgon noiya kum 5 noilam chapang 3,14,286 lou kapdia bidoi kinei ahi tin Health Services a Director Dr. K Rajo in aseiyin chule tuchan hin vaccinator 12, 820 leh polio boot 3205 hondoh dia kigel ahin, atamjo vang akihongdoh tai ati. Achesa 2011 kum’a India hi Polio-free-Nation a ana kiphondoh vang’a gam kineipi Myanmar, Bangladesh leh Pakistan ho’a kon polio natna vei chapang jat atam jeh’a nikho 3 chelha ding program kibol kit ahi tin jong seiyin ahi.

District Family Welfare Officer, Dr Nillakanta injong tuni chun Imphal West District ah Intensified Pulse Polio Immunisation programme hondohna aneiyin ahi. Hiche a chun CMO, Imphal west Dr H Kulla jong apang in ahi. chapang jat 52, 998 lou kapna ding’in polio booth 500 jong akihongdoh e ati.

Thoubal Deputy Commissioner N Bandana injong tuni chun Thoubal district a ding’in DC Complex ah Intensified Pulse Polio Programme hondohna aneiyin ahi. Kingon chu District Health Society Thoubal leh District Family Welfare Office tenin National Health Mission kithopina noiya “Let the Victory over Polio continue with two drops of life” kiti thupi mangcha a agon lhon ahi. DC N Bandana in aseina ah polio booth 325 a chapang 35, 105 lou kapding bidoi kinei ahi ati. Tunia booth activity kinei ahin, January nisim 20 leh 21 tengle inson a loukapna kibol ding ahi tin jong aseiben ahi. Kingon a chun Chief Medical Officer Thoubal, Dr N Jayantakumar, District Family Welfare Officer Thoubal, Dr Ksh Memcha, District Health Society Thoubal a Manager Ch Basanta hojong apang uve.

Bishnupur district  a ding’in tuni chun District Family welfare officer Dr P Merajao in Intensified pulse polio immunization programme hondohna aneiyin ahi. Kingon chu District Health Society Bishnupur  in agon ahin hiche a chun Bishnupur District Hospital a Medical Superintendent Dr N Bino, CDPO ICDS Bishnupur Suranjoy leh District Malaria Officer, Dr Th Nabakeshwor hochu sahlut tah’a kou ahiuvin ahi. Tuchung’a dia doi le tup pipen chu Nambol, Bishnupur, Moirang Sub-Division hopsung’a chapang 23, 382 lou kapding hi ahi. Chapang jouse lou akikapsoh nathei diuva nule paten pan ahin halah diuvin District Family Welfare Officer, Dr P Merajao in temna aneiyin ahi.

Youths Union for Voluntary action Thanga Ngaram leh District Task Force IPPI Committee Bishnupur a kon mobile team 10 tobang hon District Health Society Bishnupur kithopina noiyin Loktak Lake leh akimvel a cheng chapang 62 tobang polio drop adonsah uvin ahi.

Moreh khopi a jong Intensified Pulse Polio Programme hondohna aum’in ahi. Kingon chu Primary Health Centre Moreh in Health and Family Welfare Services kithopina noiya agon ahin hiche a chun SDO Moreh, Irengbam Dinesh Kumar, DIO Tengnoupal, Dr Kh Gojen, ASP Moreh Police, Kh Robinson, MO-in charge, PHC Moreh, Dr Kh Santikumar hojong apang uve. Dr. Santikumar in aseina ah tuchung kingon hi Moreh leh akimvel kho ho’a chapang 2, 181 lou donsah dia tohgon kinei ahi ati.

Red Cross Society, Imphal West District Branch honjong Intensified Pulse Polio Immunisation programme noiyin chapang ho lou donsahna lampang’ah jochan in kithopina apeuvin ahi. Hiche a chun Red Cross Society, Imphal West District Branch a volunteer hon Family Welfare Department kithopina noiyin munchom chom ah chapang ho lou adonsah uvin ahi.

 

Tripura gam a CAA douna a kiphinna nei kiloikhom hon Amit Shah kimupi theilou

Guwahati, Jan 19: Joint Movement Against Citizenship (Amendment) Bill (JMACAB) member ho New Delhi khopi a ni som lhing aum jou uva jong Home Minister Amit Shah toh akimuto thei deh hih lai uvin ahi.

“Ni 10 lhing New Delhi a kaum u ahitan, Amit Shah toh kimuto a, CAA thu seiding hi kakinep nau ahi. Ahivanga Union Minister in eikimupi pouve”, tin JMACAB lamkai Jagadish Debbarma in thuso miho akihoupi na’a aseiyin ahi. “Maban a pan lahding dan phondohna kinei vahding ahitai”, tin Debbarman in aseiyin ahi.

New Delhi a kholjin a JMACAB member 6 panna delegate ho Saturday nikho a Tripura gam a kileu ahitai. “December 12 nikho a Amit Shah toh CAA thu a kihouna kanei uvin, Tripura panna a Northeast a CAA chepi lou dinga Shah henga ngehna kaneiyu ahi”, ati. “Hiche pet a Home Minister in kitepna ima aneipon, ahivanga sorkar dinmun hetsahna kanei diu ahi tia eiseipeh u ahi”, tin aseiyin ahi.

“Hiche jouva Tripura gam a kahung kile uva Shah donbutna kanga u ahi’in, kal thum achetah vanga Home Minister in donbutna eipeh loujeh uva CAA douna a kiphinna kapat u ahi”, ati. Amit Shah in eikimupi diu ahi tia CM in January nisim 8 nikho a kitepna aneijeh a January 9 nikho a New Delhi kacheu ahi’in, ahivanga Home Minister in eikimupi pouve”, tin Debbarman in aseibe in ahi.

Cabinet kikhel ding thu’a CM in Delhi jon

Imphal, Jan 19(ET): BJP lamkaina state government sung’a cabinet reshuffle bolding toh kisaiya BJP National President leh Center lamkai hotoh kimuto ding’in Chief Minister N Biren tuni ana kalsong doh tan ahi. Cabinet reshuffle bolding hi BJP MLA leh aki khutjoppi political party dang dang’a MLA ho deisah khat anahi jing ahi. Thulhut kimu dungjui a Minister 4 portfolio khelding hi Chief Minister pa agakalsonna a hung kicheh ding ahitai tin akiseiyin ahi.

Contract teacher ho ngaichat bulhit dia ngehna um

Imphal, Jan 19(ET): All Manipur Hill Districts Contract Basis Teachers’ (Welfare) Association, (AMHDCBT(W)A in hill district a jilkung nasatah a alhahsam suhlhap nadinga 2006 kum a contract teacher kilah na chule document  state sorkar leh All Tribal Students’ Union Manipur (ATSUM) in pan alah ahetpeh nau leh akipapinau thu asei uvin ahi.

AMHDCBT(W)A in thuso anei nauva contract teacher 546 thalheng a ngaichat anei hou abulhit peh diuvin ngehna anei uvin ahi. Tua verification kibol jilkung 546 document jouse hi akisumang ahilouleh akichomkhen umlouva Education policy thah ahilouleh 2006 kum jouva R/R dungjuiya ‘regulate’ ahisah diuvin thumna anei uvin ahi.

Appointment hi 18/05/2006 a vide order no 3/1/2006-ED(H) a merit basis a kisem ahi’in, re-engagement hi December 2008 chan bou (order no 4/103/04-SE(S)) chan bou ahi’in, financial compensation asempeh diu, physical re-verification chule document verification -14/11/2019 order no AO/56/ACB/2010(3)-DE(S) pt.1) ho policy thah dungjuiya abol diuvin asei uvin ahi.