Kivaihop na khat a ana um Naga gam kipumkhom sah kit ding...

Kivaihop na khat a ana um Naga gam kipumkhom sah kit ding hi doi le tup thupi pen ahin, Centre toh kihouna a vang Myanmar a Naga gam ahoptha lou ding ahi tia NSCN-IM in sei

481
0
SHARE

Kivaihop na khat a ana um Naga gam kipumkhom sah kit ding hi doi le tup thupi pen ahin, Centre toh kihouna a vang Myanmar a Naga gam ahoptha lou ding ahi tia NSCN-IM in sei

Kohima, Jan 9: Naga te gam le go pu le pa khang akon kivaihop na khat a ana umse gam hi akipumkhom kit tokah a panlah na kinei ding ahi tin NSCN-IM in phondoh na ahin nei uvin ahi.

Kiloikhomna in India toh political boina thu seilhap na ding ahi Myanmar gam a um Naga ho gam ajao lou ding dan tahlang na ahin nei utoh lhon in khonung le Burmese government toh hiche thu le boi pi kit ding ahi dan jong hetsah na ahin nei uvin ahi.

N Kitovi Zhimomi, convenor, working committee, Naga National Political Groups (NNPGs) in thuso ana neina a Nagaland pam a um Naga chenna gam hotoh kigui jop na neina ding a Nagaland Article 371 A aum sa toh khah lou thu kisei na a NSCN-IM MIP in donbut na ahin nei toh lhon in Naga jouse khat ahin Naga sung a ki bung khen nag am hung lo ho natoh ahi dan le Indian Naga, Burmese Naga, Manipur Naga, Assam Naga, Arunachal Naga and Nagaland Naga kiti ho gampam mi ahi lou le gamsung a vai hung hom ho min sah mei mei le  Naga nam mite jalou na le nahsah lou a kisem thucheng ahi dan jong hilchet na ahin nei in ahi.

Hetthei khat chu NNPG lamkai Zhimomi in tu le tua Nagaland political map suh keh ding a natoh na kinei kipom lou hel ding ahi tia ana sei ahi. Nagland map hi Indian daanpi in asem map ahin Nagaland sung a lamkai Zhimomi ho in hitabang a thu ahi lou lam tah  a phondoh na anei hi Naga mite ading a vangset umtah ahi tin NSCN-IM akon kimu thuso chun asei in ahi.

Indian lamkai hon jong point 16 kinoptona in Naga thu asei lhah jou lou ding ahi tia phondoh na anei nung uva Naga lamkai a kisei Zhimomi in hitabang tuso anei na chung a demna sangtah jong NSCN-IM in ahin nei uvin ahi.  PAN Naga Hoho chung a thuso ahin neina uva NSCN-IM in hiche natoh na hi muntin a cheng Naga mite jouse kipumkhat na le ‘Berlin Wall’ bang a kisem ki khen na ho suhbei na ding a kisem ahi dan le chondan khandan ki suh tup na mei mei ahi loudan jong hilchet na kiloikhomna in ahin nei uvin ahi.

Territorial council chung chang thu a IM in hetsah na ahin neina uva Naga Regional Territorial Councils (NRTC) hi Framework Agreement toh kisai a Naga lhangsung ho a semding kiti ahin NRTC government hi ama le ama kivai poh na ding a kisem ding chuleh chamlhat na tha kipe ding ahi tin hetsah na ahin nei uvin ahi.

NNPG lamkai Zhimomi in Article 371A akisuhmang le Naga te thanei na mang ding ahi dan thu nelkal na ahin neina uva Naga te chamlhat na hi akhang akhang a ahin kichin tup ule ahin nei jing u ahitoh lhon a koima in alah peh thei lou u thanei na ahi dan tahlang na IM in ahin nei uvin ahi. Democracy chena lhongpi a Indian government in Naga te chamlhat na hetpeh na anei ahitah toh lhon a kihou na le national politics ho chamlhat na bidoi ngen a kibol ahi dan jong phondoh na ahin nei uvin ahi.

Achesa phat ho a suhkhel ho kingaidam to a malam mano phat ahitai: CM Biren

Imphal, Jan 9 (ET): Achesa phat ho suh khel ho suhmil a malam mano phat ahitai tin  Chief Minister N. Biren Singh in a 186th  vei channa Maharaj Gambhir Singh thina nikho kiman na kingon ah an asei in ahi. Hiche kingon chu  lengpa Samadhi Langthabal, Imphal West mun a an akibol ahi.

Kingon a jin gun a pang  Chief Minister pa in ahou limna a chamna le lungmonna state sung a nam kim cheng ho in kingaidam to na le kipumkhomna ahin neiteng hung umding ahi ati. Achesa phat ho a nam chomchom ho kikah a kipumkhomna um lou jeh a kinah boutam state sung a ana tam ahi dan jong phondoh na ana  nei in ahi. Hitabang a kitomo na ho in state sung khantou na asuh kih dan tahlang na anei toh lhon in mipi in khantou na ding bou amano ding uvin hetsah na ana nei in ahi.

Loubol naho a mipi kiha peh ding a temna anei toh lhon in mipi in loubol nom ho kithopina nei a government in jong sumle pai la ahi lou le natoh nalam ho a kithopina apeh jing ding dan hetsah na ana nei in ahi. State dangho akon a neh le chah hung lut ho lah lhom na ding a state sung a mi ho in neh le chah gasoh ding thil ho boipi na a akisah boi ding uvin jong Chief Minister pa in temna ana nei in ahi.

Maharaj Gambhir Singh, Nara Singh, Heerachandra le state sung a ding kipedoh adang dang ho chung a kipa thuseina an anei toh lhon in Chief Minister pa in tuni a hitabang dinmun a eum thei uhi amaho kipeh doh na jal ahi ati. State sung gamgi kisuh keh lou ding dan photchen na ana neitoh lhon in mipi in sot tah ana boipi u Inner Line Permit (ILP) system jong Prime Minister Narendra Modi le Union Home Minister Amit Shah makai na government in mipi te ngailut na jal a ahinpeh dan u jong tahlang na ana nei in ahi.

Manipur University Students’ Union (MUSU) in University campus sung akon a Assam Rifles (AR) post chon din thu ana sei na uva Chief Minister pa in ahi ding dol ahi dan le centre ang a chon na ding a temna anei ding dan phondoh na ana nei in ahi. Chief Minister pa in CSOs, student organization, meira paibi, local club ho in loubol na a mipi tilkhou na anei jing ding uvin jong temna ana nei in ahi. Loubol na lam a hatah a khantou na ding a government in special cell asemding dan jong tahlang na ana nei in ahi.

Minister, Art and Culture  L. Jayantakumar in kingon a ahoulimna a state sung a nasatah a kikhel na ahung lhun toh lhon a chondan le khandan jong huh na ding a pan nasatah a lah angai dan thu tahlang na ana nei in ahi. Kingon achun Chief Minister pa makai na noi in Maharaja Gambhir Singh, Meidingu Narasingh le Sana Heerachandra milim semthu ang a pahcha the na ana nei uvin ahi. Manipur Rifles ho injong Gambhir singh jana peh na in meipum kap na ana nei uvin ahi.

Kingon achun Minister, CAF & PD  Karam Shyam, Chairman, Tourism Corporation of Manipur Limited Dr Ranjan Sapam, Chairman Manipur Pollution Control Board L. Radhakishore, Chairman, Manipur Building and Other Construction Workers’ Welfare Board, H. Dingo, MLA, Yaiskul AC,  Th. Satyabrata, DGP, le vaipo dang dang in panlah na ananei uvin ahi.

CAA thu a boina athip teng le SC in CAA thu a ngehna ho angailhah bep ding ahi tia CJP Bobde in sei

New Delhi, Jan 8: Citizenship Amendment Act 2019 thu a gamsung pumpi boina athip teng le ngehna kipelut ho ngailhahna anei bep ding in Supreme Court in janni chun aphongdoh in ahi.

Hiche hi advocate Vineet Dhanda in apohdoh donbutna Chief Justice of India SA Bobde in asei ahi. Parliament in hiche dan aphatsah a pat deilouna a hehna lekha kipelut jong 60 val pha ahitai. Hehna bol ho chun hiche danthah kisem hi India secular dan toh kikal ahi e tia asei cheh u ahi. Hitia hehna lekha kipelut ho se chu January second week a donbutna peding a Supreme Court in December 18 nia chu centre thupeh anei a chutolhon a January 22 ni le court in ngailhahna anei ding ahitai.

Government dan sem khat kahlhah ding a ngehna pehlut a aum jong tuchung hi amasapen chule bench in jong kidang asah ma ma ahi ajehchu dan kisemdoh dan a chethei le chethei lou ding chung chang hi court mopohna ahibouve tia Justice BR Gavai le Surya Kant in asei ahi.

Langkhat a danthah semdoh a um hi manchah pan ding chu hijongle ache pan nai pon home ministry in danthah chepi ding dan aboipi laitah ahi tin aseiben ahi.

Ahin hiche dan thudol a gamsung mipi kiphinna hi athip teng lebou court hi hiche dan chung a kikum thei bep ding ahi e tia lha masa a chu CJI in jong ana seidohsa ahi.

CAA dan le NRC dan semdoh ahi a pat gamsung mipi kiphinna hin Muslim nam ho India toh ahin chom koi tei ding in aum lo go e. Ajehchu BJP vaihomna UP, Assam le Karnataka state ho a kiphin mi 25 jong thi lo ahi ahin Delhi a kiphin na asodoh vang in police kikum lut pai jeh in chutilom a boina vang alhung man pon ahi. Ahin  Jamia Millia Islamia le Aligarh Muslim University a kiphin ho chung ah police ho aso se lheh in hiche thudol kholchilna neiding in Allahabad HC in National Human Rights Commission Tuesday nichun thupeh aneitan ahi.

AR hon Dk. Crore 2.83 man khamnathei mandoh

Imphal, Jan 9 (ET): Thusoh khat in aseina achun, Dec 7 nikho chun khudengthabi check post a AR hon khamnathei Dk. crore 2.83 manding amandoh uve ati.

Hiche khamnathei chu Eeco van (Regn No – MN 04 A 6949) chu Manlun Haozalian Zou (35) R/o Machi village ama hin ahin tol ahi in agari sung achun Lhunkholal Lhungdim, (30) r/o Kotlenphai village, Chandel District chule S. Sundaywon (48) r/o Salemram village, Chandel District atou uvin, gari sung akon Brown sugar gram 904, Heroin gram 206 international market a dk. 2.83 crore manding amandoh uvin ahi.

Akimandoh khamnathei chule asung a tou jouse chu Moreh police station a apelut tauvin ahi.

KCP-MJC in Standard Robarth school kha ding a phondoh na nei

Imphal, Jan 9(ET): Kangleipak Communist Party-Military Joint Committee in Standard  Robarth English Higher Secondary school kha ding in phondoh na ahin nei taovin ahi.  Hiche thu chu achesa kum a pol 7 sim chapang Babysana kitha natoh kisai a government in thengsel a kholchil na anei na lou jeh le tu chan a mithah ho kimat doh loutoh kisai a phondoh na hung kinei ahi.

Party in thilsoh kipat akon a ahin vetlhah jing u ahi toh lhon a mithah ho khol na anei jing ding dan ule amoh vet lou diu dan jong tahlang na ahin nei uvin ahi. Hiche school kikha na chu phat teplou le atonsot ading ahi dan jong party in hetsah na ahin nei uvin ahi. School a nu lepa kiloikhomna le van driver kiloikhomna ho injong party thuphon hi jana nei a mipi deisah ahi tia gel a school a cha le nao kai ho school dang holpeh a van jong school dang a tol ding akihol tah ding uvin jong party in hetsah na ahin nei uvin ahi.

SGAYO in ngohna anei Ningol Club apomtheilou thu phongdoh

Imphal, Jan 9 (UNA): Saitu Gamphazol Area Youth Organisation (SGAYO) hon Ningol Club Heirok ho ahilou beh khat a eiki ngoh e tin apomtheilou thu aphong uvin chule deilou thilsoh aumkhah leh organisation in mo akipoh ding ahi tin jong aphong uvin ahi.

Ningol Club Heirok office a thuso miho heng a aseina nauva Secretary Sophia Khundongbam in aseina chun, Ningol Club Heirok volunteers hon agam government in adou khamnathei ho akitosot jing in chule Jan 3 nikho a  Koubru lhang a NAB ho makaina a MR, IRB, police commando hon kani lei suhset na ajong pan akila in hinlah SGAYO hon anche lou kibolna a kokpi ho leh buh ho susie a eiki ngoh hi bul le bal neilo ahi ati.

Sophia in aseibena achun, SGAYO hon eiki ngohna hi chi le nam kah a boina asem nom jeh uh ahi in chule amau ho hin aguh a kani lei kibol hi atosot uh ahi in hiche tobang organisation hi state government in agangthei pen a akhatan a khat le khat kikah a chamna umthei nading a suhmit ding ahi tin jong aseibei.

NAB in brown sugar factory khat anamudoh

Imphal, Jan 9 (ET): Gamsung’a daan in aphallou khamnathei jat chom chom suhmang nading’a drive akibol jing lai ahitoh lhon’a Narcotic and Affairs of Border Police Station team in janhi (Jan. 8) chun brown sugar laboratory khat anamudoh uvin ahi. NAB Office, SP/NAB W. Basu Singh, MPS in thuso miho heng’a aseina’a thuguh pole ho’a kon thuguh akimu toh lhon’a ASP/NAB Saklemba RK makai nanoi’a NAB team hon jan lam nidan 9:30 vel’a kholchil na aneinao’a brown sugar laboratory hi ding’a ginmo thei tah khat Kangpokpi District hopsung Saikul kom Phajang kho akon 400metre vel’a gamlha thinglhang lam’a anamudoh’u ahi.

Hiche toh lhon’a hiche laboratory achun team hon brown sugar (remnants of processe opium) hiding’a ginmo 461.83Kg, liquid opium (morphinated solution) 136 litre, 100kg lime, 1kg (17 bottle) Ammonium Chloride, 2 iron pressing machine, gas frame leh cylinder 1, hand gloves 4, weighing scale 1 chuleh thil jatchom chom jong anamudoh uvin ahi. Chuleh hiche mun’a natong hon NAB team ho hung ahetphat uvin ajamdoh man uvin ahi ati. Hiche chung’a Narcotics and Affairs of Border Police Station ah case khat jong anakijit lut in chuleh kholchil najong akinei in ahi tinjong SP chun aseibei.

SSA le RMSA in lo mulou jeh’a Govt. gihna nei

Imphal, Jan 9 (ET) : Joint Sarva Shiksha Abhiyan (SSA) leh Rashtriya Madhyamik Shiksha Abhiyan (RMSA) Teachers’ Association, Manipur (JSRTAM) in State Government in lha 6 tolop (salary) pending a aum asuhtheng joulou nachung chon’a jilkung ho promote bol nading’a pan alah lou nachung’a lungkimlou vetsah na’a ahung lhung ding Jan. nisim 13 nikho leh kiphinna kinei ding ahi tin Govt. gihna ananei in ahi. Manipur Press Club, Imphal mun’a JSRTAM Vice President Nongmaithem Prakash in thuso miho toh tuni akihoulimna’a SSA leh RMSA jilkung ho chung’a Manipur Government in abol dan chung’a alungkimlou nathu aphongdoh in ahi. Chule Govt. heng’a ngehna kinei ho asuhbulhit nading in memorandum jong akipe in ahin mopoh nanei department hon ngehna kinei ho nahsah in akoipouvin ahi ati.

Hiche toh lhon’a ngehna kinei ho suhbulhit ahiloule SSA leh RMSA jilkung hon State Government in jilkung posting leh transfer order aso hojong kisanpeh lou ding chuleh State Government “School fagathansi” mission jong kithopi na kipe lou ding ahi ati.

 

Govt. in DM University full fledged University ding’a aboldoh lou jeh’a AMSU lungkimlou

Imphal, Jan 9(ET) :  All Manipur Students’ Union (AMSU) in DM University hi State Government in full fledged University a aboldoh louva ahileh kiphinna jat chom chom kibol ding ahi tin gihna ananei in ahi.

Hiche chung thu’a AMSU Office mun’a thuso miho heng’a AMSU HRD Secretary Bruce Pebam in aseina’a Students’ Organisation khat hina jal’a  education sector lam khantou sah nading’a pan nasatah in akila jing in ahi. Chuleh DM University hi full fleged University khat hina ding in Students’ body in June 2019 kum chun kiphinna anakibol in ahi. Ahin hiche kiphinna chu Education Minister toh ngehna phabep kinei ho suhbulhit ding’a kinop tona anakinei toh lhon’a phat chom khat’a ding’a anakivohai ahi ati. Chuleh AMSU in State Govt. heng’a memorandum tichu point 5 ngehna anakinei ahi. Hiche point 5 Charter kipeh nalah’a chun State government in DM University hi Association Indian Universities toh affiliate hiding chuleh simlai ho heng’a Registration Ceritificates peh ding’a ngehna anakinei toh lhon’a suhbulhit in ana um in ahi tinjong aseibei.

Hiche toh lhon’a ningkum’a Education Minister toh kihoukhom na anakinei na’a chun UGC guideline dungjui’a Dec. 2019 sung’a regular VC, Dean, Registrar, Controller of Examination, Teaching leh Non-Teaching staffs ho appoint bol ding injong kinoptona anakinei in ahin hiche kitepna nachung Govt. in tunichan in asubulhit naipon ahi. Bureaucrat officer hon in-Charge VC leh Registrar apo uvin ahi. Chuleh DM University hin Academic council jong aneipon ahi. Hiche jeh hin DM University ah Undergraduate leh post graduate cource academic syllabus jong approved akibol pon chuleh themvet naho aphat cheh in akibol in ahin themvet na result ho aphatchet’a asodoh lou jeh in simlai scholarship bol nom hon State, Centre chuleh UGC noi’a schemes umho’a boina nasatah atoh uvin ahi.

Alangkhat’a Ph.D course ding’a notification jong ningkum October lha achun issued anakibol pan tan ahin tuni chan ipi macha aum thei naipon ahi. Ngehna kinei ho Govt. in agannathei pen’a asuhbulhit lou leh DM Colleg of Arts and Science, GP Women College akon simlai ho toh kithokhom nanoi’a kiphinna kibol ding ahi tinjong gihna anei in ahi.