Kitha kimat thu (Phung le chang’a chesahlou teidi)

Kitha kimat thu (Phung le chang’a chesahlou teidi)

357
0
SHARE

Kitha kimat thu
(Phung le chang’a chesahlou teidi)
Tu kahlah kal/hapta khat sung’a kitha kimat thu in namsung alonkhum hi vangset umtah thilsoh ahijeh a alunggel thei jousen hitobang thilsoh hi deilouna leh demna thuphon adon cheh uva asei u ahi. July 5 (2019) ni’a Churachapur’a melhetlou thalchoi hon nam sung’a Business bol mi Lalboi Lhungdim ana mat u leh huhdoh a aum thu kiseichai loulaijin July 10 (2019) ni’n Sadar Hills Bongbal Kholen lang’a Hengjang haosapu Thangneo Kipgen leh atupa (asopi numei cha) Thangminlun Haokip melhetlou ho maman gimnei tah a meithal’a anakaplih thusoh ahung umkitne. July 13 ni’n Moreh ah thingnoi lamkai khat melhetlou hon sunchang laitah in ana kaplih kit uve. Hitobang thilsoh hohi asuhtangna khat umlouva mipi kiloikhomna hon demna thuphon bol bouva akichai jingleh aban ipi ahungsobe dem ti lungkham umtah hidi ahi. Hitobang thilsoh hohi namsung (society) chedan dihlou, kivaipohna kisuhlou jeh hijeng ahi. Hiche deilou umtah thilsoh ho chung’a deimo um cheh chu thilsoh ho phung le chang’a achedi hi ahi. Lalboi Lhungdim kimat thua ainsungmi – Lhungdim Insung Kiloikhom (LIK) hon alungnopmodan u tahlangna (advertisement) ahinnei uve. Tu masang jepma Kangpokpi lang’a bomb a kibuluna leh kisuhgentheina toh (sum demand kibol) loikhat ninjong ama ho mimal insung kitup dehset nin ana gel un akho agam dalha a gamdang’a kichau di gei gelman ana um’e ti jong ana kijai. Kum phabep masangin jong Churachanpur lang mama a mineijou haosa khat sum demand ana kihabolkhum behseh jeh in lunghan le lhaset tho’n ajat anam kiloikhomna ho nungsun’in achenna kho le veng’a konin ana kithehdoh leuve ti thu jong aum’e. Ahin hitobang dei umlou tah thilsoh hohi sum demand bol, miman, mithat hon jong phung le chang’a ve’a abol u ahidivang tahsan umdehlou ahi. Ajeh chu nam sung’a hitobang thilsoh hohi koima phung le chang ahuoidoh umdehlou, society natna hi mijousen lampi khat cheh a atuo cheh tithei ahi. Gal le tol hihen, itobang boina leh kisuh gentheina jat khat ho hileh aha thohlel dehset loijong umnante. Ahin hiche hohi insung khat le ni, phung le chang thua kivetna leh kinoisena’a lahlou hel din phalheh inte.
Society sung’a thingnoi thingchung kiloikhomna ho jong kitha kimatna thilsoh aumteng ajochan abol jiu ahi. Ahin demna thuphon bol leh toumun’a thu sei ho hi ahahpon atoh lang joh hi hah ahijeh in nam sung’a kiloikhomna jatjat hon tua pat nam sung’a kitha kimat ho suhtangna dia itobang panlah diham ti hi gelkhomna leh natohkhomna umleh phacheh di ahi. Koima’n ima abolpoi tina ahidehpon hinlah thil khat asojou tengle bou aseidi ademdi kichutho bep abah laise’a boina hi beilou ding ahi. Nampi kiloikhomna hoa hi midang koukouva joljol ngailou, society dinmun ahoija hinjouna leh chamna aum’e ti mi’n ahinmu teng acham’a mi hunglutdi ahi. Nam dinmun semtup ahilouleh mi jammangbe nalai thei ahi. LIK hon “hinna thei kakigel diu” atiu chu ipi chet ham akihetlou (aseilou) vang’a nampi kiloikhomna dalhah diham, kivenna dia meithal kichoh diham tiho ginmo thei hijeng ahi. Nam lamkai mopohna neihon suhtup theithei asuhtuplou uleh kidah umpen phung’a chehchao bena thei ahi.