Kiphinna umjongleh chesot dehjilou (Thu aboileh Internet kikhah chetji)

Kiphinna umjongleh chesot dehjilou (Thu aboileh Internet kikhah chetji)

82
0
SHARE

Kiphinna umjongleh chesot dehjilou
(Thu aboileh Internet kikhah chetji)
Gamsung’a thuboi laboi, mipi kiphinna ho ahung umteng ham, hung umdia ginmo ham ahitengleh Internet kikhaji hi mipi hon Internet hi aphalam’a man/jah sang’a kiphinna meikong lah a kerosene twi chapna’a akineiji jeh ahi. CAB pass hung kibol ni’a pat North East state lah a Assam leh Tripura ah CAB deilou jeh a mipi kiphinna akhuchengpai jengtan ahileh State govt teni dia Internet kha jeng hi kiphinna suhthipna dia lampi khatna kikoi jeng ahi. Train service leh Exam routine ho kikhel jong thukhat ahitan, Gauhati khopi’a December 15-16 sung’a Japanese Prime minister (PM) leh India PM meeting umdia kigongsa jong amun khel dia umdoh jeng ahi. Ahin India a hi ipi thu ipi la jeh a mipi kiphinna khat aumdoh teng nikho phabep kijom thel’a achejou teng ol ol’a hung thip lhaji ahi. CAB thua lunglhailou jeh a kiphinna khucheng’a umna Assam leh Tripura a jong bandh hatdan koima moh vahdoh ngamlou ahi. Ahin hiche thu (CAB) ah itobang kiphinna umjongleh achesot di tahsan aumpon, chesot jongleh Parliament (centre govt) nin CAB pass kibolsa anunglahdoh dijong tahsan umlou ahi.
Mipi kiphinna lah a lha 6 (kum keh) lang angai bepma khucheng jing hi tukum sung’a Hongkong khopia um hi hidi ahi. Hongkong mipi ho kiphinna hi khopi kivaipohna noija daan palkeh a suhkhel bolkhel nei miphalou (criminal) ho gotna pehna dia Chinese central govt thuneina gam’a thotdoh a gotna amudi ti deilou jeh ahi. Hichu Hongkong khopi in ichan hamkhatna chamlhat tah a kivaipohna (autonomy) anei thaneina kilahpeh a agel u ahi. Phat sot tahpi hi Police to kinoto kijepto jong niseh tobang’a umjing anahin Chinese govt nin akiphin mipi ho suhthipna dia sepai/police asol vang’a mipi hon akijeptopi kit jeng u ahi. India a hi hoilai State hijongleh mipi kiphinna hi asotlai chan’a akiphin mipi holeh akiphinlou mipi jong chimdohpai jiu ahi. Tua CAB deilouna’a thua kiphinna jong hi chomkhat khucheng henlang bandh hung sot thimleh police in ajeplih, akaplih jong hung umkit thei, hichea kon’a boina jat khat hung umdohbe kit thei, mipi hon jong nehdi ahinneilou teng uleh hung chol diu, sot tahpi chejomlou di ahi.
Thuboi umdung juija Internet kikhaji hi kivenna dia kibol ahivang’a Human Right toh kikal ahi tia aoloi umji ahi. Jamu & Kashmir a Internet kikhakal hi lha 4 lang ahitan hinlah akihon’a mipi hon kiphinna bolna dia aman sang uva tia govt nin ahiti kha jing nahlai ahi. Internet kikha jeh a mipin kihoumat tona lang’a hahsatna toh jongleh Internet kihon jeh a boina aso a athilo loi umsang’a phajo ahi ti hi govt panna ahi. Hiche hi adih ahi. Manipur a jong thuboi ahung umteng Internet kikhahji hin ichan ham’a boina sousang thei adaldohji ahi. Chamna thu seina leh mipin boina asemlouna dia kihoumat tona hoa kimangji hileh kon khohtah a Internet ho akhaji loudi ahi. Eiho gam le society a Internet hi natohna le sumlona sang’a thulahlou kimoh houlimna ho bepma hamanjo atam jeh a thu boihih jongleh Mobile phone a Call akibol thei pouleh athilom leuva boidi umdeh loudi ahi. J & K a Internet kikha hi sotjap thou ahitan mipi honjong Internet beija hinje ahet tahdiu ahi. Mundang’a jong hiti thoudi ahi.