Kiphinna khat chunga kiphinna di umbeji

Kiphinna khat chunga kiphinna di umbeji

288
0
SHARE

Kiphinna khat chunga kiphinna di umbeji

                                Babysana thi thu hi hoitah a ‘politics’ kibolna’a kimang ahidan hung kicheh jepjep ahitai. Akikhailih (amale ama kithat) ahi ti niveijen Post Mortem kibol nung’a photchenna umjouva jong kiphinna di kiholjing nalaija govt nin Babysana thina thu ah thudih podoh hen tia bandh kibol toh, Torch Rally kiboltoh, Student hon Imphal khopi sung’a kijotna anei utoh ahiti cholhah jeng’u hi avum aval kibol tithei ahitai. Post mortem kibol masa chung’a tahsanna umlou jeh a hiche thina thua kisemdoh JAC leh ainsungmite dei dungjuija Post mortem kibol kitna a chu ahethei tah insungmi thalheng mi 2 jong ana kijaosah nalai ahi. Amale ama kikhailih ahi ti hi hoitah a hetdoh ahijouva jong ipi dia amale ama kikhailih ham, adihlouva kisuhgimna aumjeh ham’a kikhailih hinte ti ginmona jeh maimaija hibangse soh a kiphinna kinei hi kiphinna di dang thu le la mujou lou jeh hile kilom thim, politics bol hon dan le thupeh akisuhpon, mithi thu khat kholdohna dihtah aneijoupoi tia govt minsetna di hol loi um ahidan hung kilang cheh cheh ahi. Babysana thi thua kisem JAC lamkai 2 kimat jouva hi akiman lamkai teni lhadoh ahilouleh kiphinna khohcheh kinei nalaidi ahi tia gihna thu kisei nalai ahi. Chuban’a Babysana thi thua thudih kipodoh hen tia Student hon kijotna aneinaova police hon anochehna dia Tear gas akapkhum uleh mi khat akisuhkhahlo kit jong kiphinna khatna hung kineigo kitnalai ahi. Police in athu kholna nasatah aneijing thou ahin ipi atileh adondon’a mipi hiti kiphin jeng ham ti hi adang hipontin MLA loikhat nin govt suhminsetna dia mipi ho abantildoh tailou adang umlou ahi. Police honjong selguh anei tahbah u ahileh gangtah a thudih apohdoh uva mona neiho achandidol gotna peh di hi chamna umnadipen ahi. Hiche thua ginmo um mat theithei jong matsa um, Bail a lhadoh louva jong kikoi ahi. Ngohna kineikhum leh ginmoa um Hostel Warden teni, School Principal leh achapa gei police in amatna Jail a akoija athu akholjing ahi.

                           Akikhailih kiti hi umjing ahin ipi atileh Babysana tkikhailih thu hi Student Hostel a um ahiman’a School minsetna dia kiphinna sangtah kibol jong hithei, matna umho jong Babysana chung’a kikhailih lona dia thildihlou achunga anabolkhah ujong hithei thou ahi. Akhohna lotlotna JAC lamkai kiman tenin Jail a kon potdohna dia Bail kathum.ka ngeh loudi ahi atilhon, dan dungjuijin abanban’in hung che hen gei ati lhon vang’a kiphinna nei hon athu ala ima seina umlouva lhadoh in umlhon hen tia kitom kit u ahi. Tu tadi a dia hiche thua kiphinna nei hon asei diu khohpen chu Student khat kitha, kikhailih jeh in athinu anakaina School’a student asang’a sim dang jouse school kailou, class lalouva ahiti um u adihpon, school kikhah hi gangtah in kihong hen tileu kilom dijo tah ahi. State Assembly Monsoon Session toukhomna hi ahung lhung ding August 26 leh kipandi ahijeh in hiche masang’a Babysana thi thua kiphinna akichai louleh Assembly toukhomna ahung umteng hiche thua Assembly nokhum di tiho ahinbolgot kit diu ahi. Phaicham’a kum khat beh hi June lha a pat August gei thil khat jeh a kiphinna sot tah umji hi angaina dan’a umdoh ahitan theida umtah jong ahitai.