Kiphinna bol jilkung hon exam boycott abol lou diuva Manipur Education Council...

Kiphinna bol jilkung hon exam boycott abol lou diuva Manipur Education Council in temna nei; Jilkung ho boina akisuhlhap a class akipat vah louleh simlai hon kiphinna pat dinga gihna nei

405
0
SHARE

Kiphinna bol jilkung hon exam boycott abol lou diuva Manipur Education Council in temna nei; Jilkung ho boina akisuhlhap a class akipat vah louleh simlai hon kiphinna pat dinga gihna nei

Imphal, Feb 7(ET): Council of Higher Secondary Education Manipur (COHSEM) in Friday nikhon government school a kiphinna bol jilkung hon exam duty bol loudinga kilolna aneiyu avel vet diuvin temna anei uvin ahi.

Joint Teachers’ Forum (JTF) kiloikhomna noiya government school a jilkung hon achesa February nisim 2 a kon cease work strike apat u ahitai. Sorkar in Revision of Pay (RoP), 2019 velvetna anei dinga jilkung hon hatah a thumna aneiyu ahi. Cease work strike bol a jilkung hon February nisim 14 leh 17 a kipan ding class X leh XII exam jong boycott bol dinga gihna aneiyu ahi.

Class X exam hi Board of Higher Secondary Education Manipur (BOSEM) in abol ding chule Class XII exam hi COHSEM in abol ding ahi. Office chamber mun a COHSEM chairman Dr L Mahendra in press conference abol na’a simlai ho ding gelna jal a kiphinna bol jilkung hon exam umding ho boycott abol lou diuvin temna aneiyin ahi.

Exam kituptah a bol dinga kigotna umsoh ahitan, Class XII exam hi district 14 a centre 101 a kibol ding ahi. District administration leh district police toh kitho a exam kibol ding ahi’in, ahivanga exam duty bol loudinga kilolna neiya kiphinna bol jilkung ho kigel lhahna hi lungkham umtah ahi, ati. “Kiphinna vetsahna a exam boycott bol dinga kilolna anei uve ti thu akija in, hiche thu hi akilungkhampi lheh e”, tin aseiyin chule simlai ho ding gelna a athah a akigel phat diuvin temna aneiyin ahi.

Exam kipat masanga sorkar toh kihouna anei uva athulhuh nau akhel diu akinepna thu aseibe in ahi. Alangkhat  a Dhanamanjuri University simlai hon government college a kimanchah angaiya akipat vah louleh kiphinna bol dinga gihna anei uvin ahi.

Government college a teacher hon February nisim 3 a kon cease work strike apat u ahi’in, 7th UGC Pay and Regulations 2018 chepi ding panna a thumna dang dang aneiyu ahi. Federation of Government College Teachers’ Association Manipur (FEGOCTA) kiloikhomna noiya jilkung hon kiphinna apat uva, class boycott abol u tilouva jilkung hohin ama ama college a toumun kiphinna jong abol u ahi.

FEGOCTA in kiphinna abol DM College of Arts jilkung hon atosot na’a, Friday nikhon college campus a kiphinna abol uvin ahi. Kiphinna a pang FEGOCTA lamkai hon thumna ho sorkar in abulhit kah a nungchon lou dinga aphong doh uvin ahi.  DM University noiya college student lamkai hon press conference abol nauva jilkung hon kiphinna abol sorkar in asuhthip dinga thumna anei uvin ahi. Class boycott akibol jeh a simlai hon lekha asim thei louva ahileh simlai kiloikhom hon kiphinna abol maithei ahi, tin Suraj Takhelmayum in aseiyin ahi.

Achesa February nisim 5 nikho a DM College of Arts a simlai hon meeting aneiya, FEGOCTA thu suhlhap a apet pet a class pat dinga thumna nei dinga kilolna anei ahi, ati. Chule angaicha facility ho peh ding tilouva college a faculty post ong ho lah dinga jong simlai kiloikhom hon thumna anei uvin ahi.

FEGOCTA in achesa ni 4 sung class boycott abol a kiphinna anei jeh uva government college tamtah a themjilna asuhboi ahi. Nithum tobang masanga jilkung kiloikhom hon college chom chom a toumun kiphinna abol u ahi’in, kiphinna kehlet nadinga class boycott abol u ahi. Alangkhat a FEGOCTA leh Education Minister in Thursday nikho a boina suhlhap nadinga kihouna anei uvin, ahin, kihoulhahna anei thei pouvin ahi. FEGOCTA in thumna ho bulhit ahi kahse a kiphinna bol jom dinga dettah a pan alah ahi.

Manipur gamsung constituency 60 ho’a electoral roll final photo kisodoh ta

Imphal, Feb 7(ET): P K Singh, Chief Electoral Officer, Manipur in mipi ho hetding a thuso abolna achun constituency 60 a electoral roll a ding a final photo chu ama ama electoral registration officer hon asodoh tauvin heche venom hon ama ama Electoral Registration Officer,  Assistant Electoral Officer ahilou le Booth Level Officer ho heng ah akivetthei uh ahi ati. Chule CEO, Manipur www.ceomanipur.nic.in akon jong akivetthei uh ahi ati. National leh State political party ho heng a jong DVD-ROMS copy khat cheh jong kipe ding ahi ati.

Aki sodoh dan achun Manipur gamsung ah vote khie thei mi 19,12,649 aum uvin hiche lah ahin pasal 960931 aum uvin chule numei 981630 aum uvin chule third gender 88 aum uvin ahi. Imphal west ah voter atampen in mi 357178 aum uvin aban ah thoubal ah voter mi 302852 aum uvin chule alhompen chu Jiribam ahi in mi 26852 vote pe thei aum uvin ahi.

Imphal-Moreh lamlen a AR sepai khat WY louchang tamtah toh kiman

Imphal, Feb 7(ET): Achesa January nisim 19 ni a Khudengthabi Check Post mun a IPS officer numei khat AR personnel khat in dihlou tah a abol’e, tia ngohna thu akisei jouva state cabinet in Khudengthabi checkpost ngah a Assam Rifles ho State police hon akhel diuva kilolna aneiya, hiche thu a Manipur Police ho tahsan thei hinam ti kinelna aum laitah a Thoubal District police SP Dr Ibomcha lamkaina a state police team hon Assam Rifles personnel khat a konin dan in aphal lou WY tablet tamtah aman uvin ahi.

Quick Response Team (QRT), Thoubal police hon Thursday nikho a frisking abol nauva WY (World is Yours ahiloule Yaba tia kihe) louchang tamtah Assam Rifles sepai khat a kon amatdoh ahi. Jan nidan 8.30 don a QRT team, CDO Thoubal hon Imphal-Moreh highway Wangjing bazar a thukholna anei nauva Maruti Swift Dzire car (registration no MN 01AG 2307) khat akham u ahi.

Gari akhol nauva anunglang a um airbag vom khat amudoh uva, hiche sakhao a hi WY louchang 2,30,00 amudoh u ahi’in, louchang hi lakh a sim man hiding ahi. Akiman mipa hi 6th Assam Rifles a sepai ahi’in, tu naicha Arunachal Pradesh a kon Manipur a kichon ahi. Mipa hi amin Yengkhom Bikram Singh (53) ahi. Akiman sepai pa dan dungjuiya case asemkhum uva chule thudohna anei uvin ahi.

Khamnathei lou tamtah pum a sepai pa hin Khudengthabi Check post leh check post dang dang iti ahin peldoh ham ti asei pouvin ahi.

Zo Kutpui, 2020 kin kigonna a Kuki Inpi Manipur in pan alapoi, tia KIM in suhthengna nei

Imphal, Feb 7(ET): Kawnpui kho, Churachandpur district a February nisim 11 leh 12 nikho a Zo Kutpui 2020 akigong e, ti thu kijah hi Kuki Inpi Manipur (KIM) in kidang asah ahi, tin KIM in thuso anei uvin ahi.

Gouminlun Gangte, Secretary, Information & Publicity, Kuki Inpi Manipur in thuso aneina a Kawnpui a kigong Zo Kutpui 2020 hi Manipur leh mun dang dang a um Kuki Chin Mizo ho kipunkhom nading sanga kibungkhen nading joh ahi, tin asei uvin chule phabep in ama chang phatchomna dinga agon kipumkhat nading amin putsah a agon ahi, ati.

Politics a eima phatchomna dinga Kuki Chin Mizo Society bungkhenna inga kipunkhomna thucheng minpat lou ding ahi tihi KIM deisah ahi, ati. Kuki Chin Mizo ho kipunkhom ding hi Kuki Inpi Manipur in atosot jom ding ahi’in, lunggel adihtah a, kitahna auma tohgon pha ahila chule khat chang phatchomna ding ahi louleh atosot ding ahi, tin aseiyin chule ZO Kutpui festival kigon na a Kuki Inpi Manipur apang poi, tin suhthengna jong anei uvin ahi.

Coronavirus natna jeh a thi 638 lhingta; Natna kithang umding ahi tia anasei doctor pa Coronavirus natna a thi

Beijing: Achesa December lha a ‘coronavirus outbreak’ (nat gol) umding ahi tia kiginna dinga thuso masapen apeh jeh a police hon amat Chinese doctor pa Friday nikhon hiche natna a athi tan, thilsoh jeh a mipi lunghanna leh pohnatna asang in ahi.

Li Wenliang (34) thi thu hi China gam a coronavirus natna jeh a athi akal be jing laitah ahi. Li hin aloi agol phabep henga Wuhan khopi a ‘SARS’ tobang natna thah umding ahi tia alungkhampina thu anasei ahi. Health official hon Friday nikho a natna jeh a thi a hi Thursday jan kim chan a mainland a 638 alhingtai, tia asei ahi’in, natna jeh a athah a mi 69 thi kit ahi.

China gam a tua hi mihem 31,000 val in coronavirus natna anei ahitan, Hubei province seh seh a case athah 2,447 hi Thursday nikho a kisei ahi’in, hiche province a agom a natna neiya case 22,112 kisei ahi. Alangkhat a WHO in vannoi muntin a laboratory 15 hi Coronavirus a dinga testing lab dinga phondohna anei uvin, list a hi Pune khopi a um National Institute of Virology jong pang ahi.

WHO in Shipping Fund Programme kiti Global Influenza Surveillance and Response System in asem hi damlou ho clinical sample thot na a aman ding ahi. Li in na anatohna Wuhan Central Hospital in social media a opthalmogologist Li athi thu aphongdoh uvin, lunghempina anei uvin ahi.

WHO injong Dr Li Wenliang athi apohnatna thu aseiyin, virus chungchang a anatoh na hohi ibon uva ikipapi diu ahi, ati. Li hin cha khat anei ahitan, chule ajinu naovop pet a athi san ahi.

Achesa December 30 ni a Li in hospital a admit kibol anatna kihelouva dammo khat test result amudoh ahi’in, aloi sagi toh amaho private WeChat group a athu aseiya, result hi achesa 2002-2003 kum a China gam a aja a sim ana thi lo na SARS natna tobang ahi, tia asei ahi. Li hin aloi agol ho akigin diu adei ahi’in, ahivanga ama post hi kithang ahi.

Hiche jouva doctor khangthah pa leh agol hohi Wuhan police hon thulamleng seiya angoh uva, kouna apeh uva, amat uva, hunam a confession (kiphonna) soi akaisah u ahi. Ahin lhadoh jou uva anatohna ajot kit’a, January kal ni lhin a natna akilah ahi. Li hin coronavirus natna anei kihetlou amit damlou khat ajenna a natna akilah ahi. January 12 ni a hospital a um’a, February 1 ni a coronavirus natna nei ahi photchenna um ahi.

Kal masa a Supreme People’s Court in Li kimat demna sangtah anei uva, athusei hi ana kitahsan leh phatchomna hiding ahi, tia asei ahi. Weibo kiti China Twitter platform in Li hi damlou jenna a ahinkho toh a ‘hero’ ahi, tia alah u ahi.

Eco-Park semna dinga thingphung kimoh phuh Environmentalist hon demna nei

Imphal, Feb 7(ET): Wildlife and Biodiversity Conservation Committee, Manipur kiti organization in Cheiraoching Thangmeiband Sinam Leikai a thingphung lhing set set Manipur Police Housing Corporation Ltd. in Eco-Tourism Development natoh achepi toh kilhon a aphuh alungkhampi na thu asei uvin ahi.

Member hon amun avil nauva angaicha louva thingphung lhing set set kiphuh tamtah amu’e, tin organization in thuso anei nauva asei uvin ahi. Angaichat na louva thingphung kiphuh hi Eco-Tourism natoh kibol lo na umlou ahi, tin aseiyun chule mopohna nei authority hon avettup diuvin temna aneibe uvin ahi.

Alangkhat’a, Alliance for Development of Alternative Manipur (ADAM) Kakching in Mahadeva Ching tia kihe a Angan Ching a thingphung tamtah atu u ahi’in, gammang thil ho chintup nadinga ‘session’ abol uvin ahi. Tohgon hin pandoh a Surjit Kshtrimayum in aseina’a, ADAM akiphudoh 2002 kum jou 2004 a kon Sunda Eco Club kipan ahi’in, hiche a kon thingnou kitu a campaign kibol’a, gammang suhthengna kiti natoh chom chom kipan ahi, ati.

Sunday Eco Club in Angan Ching Eco Park a Sunday nikho a ‘brainstorming session’ agong uvin, kin gon a Prof N Rajmuhon moderator a pang ding ahi, tin Surjit Kshtrimayum in aseibe in ahi. Achai sa Angan Ching hi Surjit tohgon na noiya thingphung tamna gammang aso kit u ahi.

Bodo Peace Accord hi Northeast a chamna det akisem nading lampi ahi tia Prime Minister Modi in sei

Imphal, Feb 7: Prime Minister Narendra Modi tunin Bodo Accord soi kaina dinga kin gon a apang in ahi.

Kin gon a mihem lakh 4-5 kikah nailam apang uvin, Prime Minister pa lamto nadinga All Bodo Students Union in janni a bike rally jong anabol u ahi. Prime Minister Modi tilouva Assam Chief Minister Sarbananda Sonowal leh atohkhompi minister hojong kin gon a pang diu ahi.

Centre, Assam sorkar chule Assam gam a ‘ban’ kibol National Democratic Front of Bodoland (NDFB) thingnoi hon lha masa nisim 27 nikho a Tripartite Bodo Agreement soi akaiyu ahi. Agreement hi Bodo tribe ho phatchomna ding ahi’in, Assam gam a tribe lenpen hiu ahi.

Kipana kin agon nauva pang a PM Modi in Kokrajhar rally hi Independent India a dinga rally lenpen ahi, tin aseiyin ahi. Bodo Peace Accord soi kikai kipapina kin a pang dinga Modi Assam gamsung Kokrajhar district a kholjin ahi. Mipi tamtah akikhopdoh amu a chun Modi in, “Ka hinkho a rally tamtah kamu in, ahin, hitobang a mi atamna kamupoi. Hiche hi India in chamlhatna amu jouva political rally lenpen ahi”, ati.

“Gamsung dinga martyr chang ho geldoh nading nikho ahi’in, Upendra Nath leh Roop Nath Bramha jana peh nading nikho ahi”, tin aseiyin chule Assam a um Bodo ho dinga dangka crore 1500 lhing ‘development package’ phondohna jong aneiyin ahi.

“Accord dungjuiya 15,000 crore hi Bodo ho kithopina dinga special developmental package a kipe ding ahi, ati. Congress lamkai Rahul Gandhi demna thu jong aseiyin, lamkai phabep in mol a voh dinga eisei uvin, nangho ngailutna in eiven a, mol kakichat lou ahi, ati. Bodo Accord hi chamna det, gamkaiya dinga kipatna thah ahi, tin jong aseiyin ahi.

“Sorkar masa in Northeast boina ahet a ahivanga asuhlhap nading lampi aboipi lou ahi”, tin sorkar masa demna aneiyin ahi. Chule CAA thu a Modi in, “Gamdang mi tamtah hunglut louding ahi tihi kakitepna ahi. Northeast a India gam mi ho agam a refugee ahi nadiu dinmun kaphal loudiu ahi”, ati. Assam Accord Clause 6 hi report akipehlut teng Centre in achepi ding ahi, tin aseiyin chule Northeast gam atamjo a BJP sorkar in AFSPA alahdoh ahitai, ati.

Keihon sorkar kasem masang uva Northeast atamjo a AFSPA aumin, keihon sorkar kahin sem jou uva Tripura, Mizoram, Meghalaya leh Arunachal Pradesh gam atamjo a Act kiladoh ahitai, tin aseiyin ahi. Assam Chief Minister Sarbananda Sonowal injong PM Modi chunga kipathu aseiyin, PM Modi leh sorkar in Assam chule Northeast dinga na atoh hohi Assam in asuhmil louding ahi, ati. Chule 2014 kum a BJP in Centre sorkar ahin sem jouva vannoiyin Northeast ahet ahitai, tin aseibe in ahi.

State finance minister Himanta Biswa Sarma injong Modi sorkar chunga akipana thu aseiyin, ULFA(I) kiti thingnoi ho peace talk a apan diuvin kouna ape in, sorkar in Assam a chamna det asem got jing ahi, ati. BTC chief Hagrama Mohilary injong chamna thah akipapi in, BJP apachatna thu aseiyin, 2021 teng Assam a sorkar asem kit diu ahi, ati.

Pramod Bodo, ABSU president in Bodo Peace Accord soi kaina aumhi Bodo, Assam gam mi ho dinga khangthah kipatna ahi, ati. Sorkar in Monday nikho a NDFB thingnoi hotoh Accord soi kaina aneiyu ahi. Bodoland gam tum thumna dinga kiphinna lamkaina All Bodo Students’ Union (ABSU) jong soi kai lah a pang ahi.

Tripartite Agreement a hi Assam Chief Minister Sarbananda Sonowal, NDFB faction li a lamkai ho, ABSU, Joint Secretary- Home Ministry Satyendra Garg, Assam Chief Secretary Kumar Sanjay Krishna in Union Home Minister Amit Shah umna a soi akaiyu ahi.

Alangkhat’a, Home Minister Amit Shah in Bodo Peace Accord hi Prime Minister Narendra Modi in thulhuhna them lamkai ahi avetsah kit na ahi, tin aseiyin chule Assam gam a chamna det pohdoh ding adei aphondoh ahi, ati. Modi sorkar hi kinepna thah ahi, tin aseibe in ahi.

District Level Co-ordination Committee on National Deworming Day 2020 meeting chelha

B.Lalboi Gangte

CCpur. Feb 7 (ET): Dr. Vumchinpau Tonsing CMO/Ccpur & Vice Chairman, District Health Society lamkai nan tunin BRGF Hall, DC Office mun’a District Level Co-ordination Committee on National deworming Day 2020 meeting anachelha in ahi. Kingon achun National Deworming Day 2020 Round khatna toh kisei leh National deworming Day 2020 hondoh nading toh kiseiyin programme sem ding dan jaona  thu chom chom aseikhom vin ahi.

Hiche meeting phatsung’a National Deworming Day 2020 1st  Round aphat cha nei ahithei nading in State Mission Director, State Health Society kom’a agan thei lam’a fund lhadoh ahi nading’a ngeh na nei ding, tu’a fund mu masang’a National Deworming Day hi bol nailou ding, National Deworming day toh kisai’a IEC Materials, Reporting formats leh Huutlou Albendazole Tablet kiti ho ZEO Office Ccpur, ADCC Ccpur leh CCpur district Private Schools Association (CDPSA) khut’a Feb. nisim 11 apat hopdoh’a IDCS Department in CMO store apat apoimo ding jat akilah ding ahi. National Deworming Day launching na mun ding in Kendriya Vidyalaya, BSF Gangpimual leh Kangvai Govt. High School lhendoh ahi in hi jong leh Education Dept. in thutan na alah ding uvin akoi uvin ahi.

Adverse Event Management Team ading in District Hospital ah dedicated room khat semdoh ding in kinopto na anei vin, National Deworming day ahileh February 10 nikho’a nei hiding, chapang kum 1 apat kum 19 kikah ho kom’a  Huutlou hopna neiding, Manipur state sung pumpi’a School leh Anganwadi Centre chom chom ho chungchon’a chapang Lakh 10.5 kom’a Huutlou hop  hiding, Mop up day ahileh February 17 nikho leh man hiding in kithulhuh na ala vin ahi.