KIPACHAT NA LE KISEISET NA LEISET-A EIMITE

KIPACHAT NA LE KISEISET NA LEISET-A EIMITE

716
0
SHARE

Leisetna hin Pathen in aumding dol thilho, acheng ding dol mihem le saho chule adang tamtah aumsah in ahi.Thilsem ho jouse chung’a thunei vaihom ding, gouching ding in mihem ngansena abonchan ape in ahi. Mihem chu lheplhah a ana um phat in chonset in vai ahom in ahi. Hiche chonsetna chu tuni chan in vannoija mihem te lah a aum jing in ahi. Apha le ase hetkhenna kipe mihem in chonset hi apel doh thei le galjona chang a, pachatna amu thei ahi. Hinlah chonset achunga thunei sah ho chun seiset na alujang dimma akipoh ahi.
Tunin eimite society a kipachatna le kiseisetna thua chomcha kihoulim hiute. Vannoija hin mihem jousen pachatna chan ding adei soh keijin ahi. Koima seisetna changnom aum poi. Tehse hole chapang neo ho jeng in jong pachatna thu angainom uvin ahi. Seisetna kiti hi Pathen na kon ahipon, Lucipher a kon ahijeh in seisetna hi koiman adeipon, ajah nompon ahi. Mihem jousen adei, amunom chu PHATCHATNA kiti thucheng  bou ahi. Koima chan kiseisetna kiti thucheng hi angai nompon, ajahnompon, achang nompon, adei poi.
Achuti leh sopiteho idinga eimite lah a hi pachatna thu kihaseilouva, kiseisetna thujeng bou kisei jing ahitadem? Inam sung u, isociety sungu, iphung sung u, i-insung uva hin kipachatna thu jeng bou ging leh Christian ihinao toh kitoh ding ahin, hinlah kipachatna thu sang in kiseisetna thu joh akihasei in ahi. Hotel  dunglah, lamlen dung lah ahilouleh kaimun(Bazar) dung lah pouva hin eimite pasal ho hihen, numei ho jijongleh ahon(group) na aum khom teng u leh mi pachat ding thu seijo jui louvin, mimit mona holla seise jing jong i-society sung uva atam thim lheh tan ahi. Hitobang hohi Pathenna kon ahinaisaipon, hinlah Pathen houten mi seisetna thu bou ikam sung uva ipotdoh sah jui uvin ahi.Phungle chang thu a ikiseise uvin, sakho thua ikisei se uvin, abolthei, anasa ho iseise kit uvin, seiphatna thu pachatna thu hi i-society sunguva alhasam lheh in, Pathen chate kahi itiuvin, hinlah ichonnao le ithusei uvin Pathen chate ihilou dan u aphuongdoh in ahi. Pathen  lhagao kaihoija umte chu Pathen chate ahiuvin, Pathen chate chun mi aseise ngaipoi, adem ngaipoi, amavang mi setna seilouvin mi atilkhouvin, apahcha in, alhamon’e.
Kuki society sunga kakipana tah lamkai hon ahin boldoh u, ahin tohmolso uchu ahileh
1.    Simlai kiloikhomna lamkaihon simlai Pol X, XII pachanna/lolhinna neiho loppihna anei uva,apachat uva, atilkhou uva, amakho diu asei pih uhi kahin pachatna lentah ahi.
2.    Namsunga lamkaihon inam sung uva la tamtah isemdoh pih u mi alasem ho aoipih uhi ahi. La kiti hi ki-ai ngailou hel ahin, jaila oi kiti ahi. Chule jaila asemdohho loupi tah a  i-oipih uva kipathilpeh nasatah jong inei pih uhi kakipana lentah ahi. Hiche nichun amanu pachatna thu isei uvin, seisetna thu isei ging pouve.
3.    District a nam lamkai hon kanatoh asunggil lang hethem hih ujongleh vannoi miten kidang tah a eipachat uva, vannoi gamtinna kanatoh doh ho le kathilpeh doh ho seiphong  ding le hilchen dinga eikou jing uva, tohphatman, kipa man, pachatna, seiphatna chule kanatoh ho hetpihna eineipih uva, Asia gam, Europe gam, America gam ho a kache jing a Award tamtah kahin pohlutna jeh a thilpeh(gift) a Eon Car(Magna)khat eipeh uva, pachatna eipeh uhi kadam sunga kasuhmil lou hel ding ahitai. Eipe lamkaiho chun iseise uleh thilpeh kiti hi umponte, ipachat jeh uva ikipa pinao aum jeh a eipeh u ahi.
I society sung uva hi ahithei channa hi  kipachatna thu bou isei ding diu, kisei setna thu hi seiging lou ding ahi. Michingte, mi khangtou te koima akiseise topouve. Akipah cha uve. Kipachat to hi thahatna ahi, kipana ahije. Kiseisetto hi kinahna, thalhomna, lhasetna ahi. Eimi kahi a, eimi society a ka umma, eimiho hindan kahetna, eimiho dinga na katoh thei ja, vaicha tahpa in kipahtah a hinkho kamanthei kakipah e.
Mihem koi hileh pachatna holgun keija natong, thilgong, kalsongho chun pachatna amu louteng anatoh, athilgon, akalsonna ahiding bang tah a atohmolso joulou ding ahi. Ajeh  chu thilnasatah, thilloupitah, gam le nampia ding, vannoi khantouna ding ho tongdoh ing e, gongdoh ing’e, tongmolso ing ‘e itileh “Great things can be done by great sacrifices” kiti hi chepi ding,  “nothing dared, nothing achieved”  kiti jong hi geldoh ding, “If the toil is great, so is the fruit thereof” kiti hi suhmil louding ahi. Pachatna hollou ding, seisetna ho jahda louding, itoh ding mission chu target nei tah a chepia, tohjing ding, akum, alha sottah lut jongle lunglha lou hella toh jing ding, tohmolso tei tei ding ahi. Chutengleh seisetna jammang intin, pachatna hung lhung ding ahibouvin ahi. Thilloupi, alen khat, mipia dinga khonunga pachuom ding khat tong doh inge tia ikipatna ahileh(atleast)alhompenna kum 5-10 sung lut ding ahin, thohhat ding, lung neng ding, pottho ding ahibouvin ahi. Vannoija computer, Televsion, Radio Aerophane, ship, chuleh adang dang hin geldoh a semdohho ihetauvin, kum sottah tah lutna na atoh dan u jong ihetaovin ahi.
Vannoi scientist hole discoverer ho hinana toh hou atoh lai ule, aboipi laitah uvin koiman pachatna thu asei dehpoi, ahethem lou ten mi ngol dan a amu uva, imacha ana simlouvu ahi. HInlah a mission hou ahintoh molsoteng uleh amaho bou chu miching pen, minasapen, miminthangpen, thijongleh thitalou mihem, pachatna sangtah kipe ahiuve. Eimite lah a hin pachatna thu, tilkhouna thu kiti hohi alhasam vallinahi.Achesa kum 1989 apat in mission lentah 4 kagong in, kahin chepi in, sun le jan in kahin tong in, kanatoh kathilgon eimiten ahetphah loujeh jong hintin, koima pachatna jong kachang poi, koima tilkhouna jong kamupoi.Pachatna le tilkhouna kamu beh poi, hinlah Pathen kakou jingjeh in Ama in eipanpi in, kanatoh, ka plan, ka mission kum 30 jen jouvin kachai jin, kapute, kapaten amu khah lou eikipe in, kapute kapaten achot   khahnalou gam ho ah eikipui jin, kanam mite in amu joulou degree eikipe tan ahi. Hinlah tuni chan in pachatna le seisetna kamujing in ahi. Hichu ipi jeh ham itileh leiset hi sapsetna gam, kholjinna Pathen in eihin  sollu ahi jeh a pachatna jong kimu, seisetna jong kimu ahin, lungdonlou ding, lunglhah lou hel ding ahi. Ahiti ding mong ahi.

Dr. Sir. H.H.Mate