KIM, KSO-GHQ in commando ho jeh a boina sorkar in asuhlhap dinga...

KIM, KSO-GHQ in commando ho jeh a boina sorkar in asuhlhap dinga ngehna nei; police thuso demna neiyu

140
0
SHARE

KIM, KSO-GHQ in commando ho jeh a boina sorkar in asuhlhap dinga ngehna nei; police thuso demna neiyu

Kangpokpi, Mar 15(UNA): Achesa March nisim 14 nikho a themmona neilou Kuki khangthah ni chunga police ho khansetna thuso banjomna chule state police hon ‘Moreh a police commando ho akibulu e’, tia niseh thuso ho a thuso aneiyu Kuki Inpi Manipur leh KSO-GHQ in donbutna le demna sangtah anei uvin, Manipur police commando ho Moreh mite douna a agitlouna ahi, tin asei uvin ahi.

Gouminlun Gangte, Information Secretary, KIM leh Khaiminlen Doungel, Information Secretary, KSO-GHQ in thakhat a thuso aneina’a, police commando hon themmona neilou Kuki khangthah ni melsetah a avohna thilsoh demna aneiyin, khangthah teni hi akisukhah na lhon asan jeh a kijen jom lhon nalai ahi.

Vangsetna toh khangthah teni hin police commando hon asei jeh uva gari angah lhon ahi’in, police hohin thingnoi toh kisaina neiya angoh a melsetah a avoh ahi. Lamlen a vah le upa khat in khangthah teni hi ka mi het ahi’e, tia police commando hon avoh lou dinga ngehna anei ahi’in, ahivanga commando holah a SI khat in khangthah teni hi service pistol a akhet a chule upa pa in asen a achedoh dinga ano ahi.

Hiche jouva upa pa hin gamkaiya haosa ho akihoupi a, amahon jong apet pet a thilso namun adel lut ule police commando hon athilse bol selmang theina dinga jam u ahitai. Niseh thuso phabep a police hon thuso anei nauva khosung mihon police ho abulu in, dan palkeh a khangthah teni atosot uve, tia ngohna thu kisei hi thutah akhel got u ahi.

Lhang haosa hon thisan dimset a khangthah teni hospital a apoh uva hi police commando hon ananga u ahi’in, hospital chan a police commando ho ahung jeh uva mipi lunghang a, police gari jong neocha kisuhset lo ahi, ati. Police hon hospital channa bulu ding agot uhi amun a um numei ho chan geiya alunghang ahi’in, thil umdan ivet le akisukha aumlou hi vangphat umtah ahi.

Alangkhat a police hon khangthah teni douna a FIR asem uva, thudih aselmang uva, amaho dei ajih u ahi. Khangthah teni hi tua Raj Polyclinic a um ahi’in, police hon avil jing a chule mat ding agot jing u ahi. Hunam a discharge bol ding chan gei agot u ahi’in, ‘human rights’ kipalkeh na thilsoh ho KSO in thipbeh a avet louding, themmona neilou ho kisuhgim douna a pan alah ding ahi, ati.

Moreh a police commando ho aum a kon ‘law and order’ hoimo cheh cheh ahi, tua thilsoh hin police ho joh in dan apalkeh jing avetsah ahi, ati. Dinmun vettup lel ahi masanga state sorkar in aganna thei pen a thilsoh umchan avettup ding chule Moreh mihon aphat tin a commando ho khansetna ato jing asuhlhap diuvin Kuki Inpi leh KSO-GHQ in temna aneibe uvin ahi.

ADC term suhsaobe dinga cabinet kilolna Governor in alahdoh dinga ATSUM in ngehna nei

Imphal, Mar 15(ET): Manipur (Hill Areas) Autonomous District Councils Act, 1971 section 13 toh kitoh louva Autonomous District Council 6 a office term akisuhsao be deilouna a ATSUM in Governor Dr Najma Heptullah henga memorandum ape uvin ahi.

All Tribal Students’ Union Manipur (ATSUM) hi Manipur gam a tribal holah a kiloikhomna len ahi’in, Hill district 10 a um a chule 1.3 million awgin thalheng a pan alah ahi, tin ATSUM in lekha athot nauva asei uvin chule hiche chungchang a pan alah ding uva temna aneiyin ahi.

The Manipur (Hill Areas) District Councils Act, 1971 Section no 13, second paragraph a hi “kivaipohna a boina lentah peldoh nading ahi ti Administrator in tahsanna aneiya ahile bou Office term hohi kum khat kal hilou ding, pha asah sunga dinga avohchon thei ahi. Hiche a ‘Administrator’ thucheng kimang hi ‘head of state’ kiti Manipur Governor tina ahi, tin ATSUM thuso chun aseiyin ahi.

Vareiyo Shatsang, President, ATSUM leh Seiboi Haokip, general secretary, ATSUM in soi akaina memorandum a chun, Hill Area Committee (HAC) in state sorkar henga ADC 6 election vohchon dinga recommendation abol uva, hiche dungjuiya state cabinet injong Act dungjui hinam ti geltohna neilouva lha gup a dinga ADC Election avohchon ahi, ati. HAC in ipijeh a hitobang recommendation apeh ham kihelou ahi, ati.

Section 13 a kisei ‘administrative difficulty’ kiti hi ‘law and order’ aboina, natural calamity leh adang dang tina a hetthem thei ahi. Manipur gam a achesa kum thum sung hi chamna um ahi’in, law and order aboi nading umlou chule boina dang dang jong umlou ahi. Ipijeh a ADC 6 ho term hi extend kibol ham, tin jong thudoh anei uvin ahi.

Tua ADC ho term hi June teng le kichai ding ahitan, state sorkar in ADC 6 suhmangna aneiya chule election athah bol dinga kigotna aneiding ahi. Tuni chan geiya state sorkar in ipijeh a hitobang abol ham ti hilchenna apeh loulai ahi’in, HAC recommendation mai maiya kibol ahi, tihi kisang louding ahi. Sorkar in athulhuhna akhel louva ahile tribal civil society ho a kon boina ato ding, ‘law and order’ boi thei ding ahi, ati.

Hiche jeh a Governor in sorkar thulhuhna alahdoh ding, ahiloule ipijeh a ADC 6 ho term lha gup kisuhsao be ham ti hilchenna apeh dinga temna kaneiyu ahi, tin ATSUM in aseiyin ahi. January 16, 2020 ni a HAC in meeting abol a, January 29 ni a ADC election hi go juh lai ahijeh a November lha teng bol dinga kilolna anei hi principle act toh kitohlou ahi. State Cabinet in March 3 ni a kilolna anei hilchenna pe ding ahilouleh ladoh dinga ATSUM in Governor henga ngehna anei uvin ahi.

Chikim kho a Police leh bandh bol ho kikah a kinotona um; Mi 4 kisukha

Moreh, Mar 15(ET): Tuni chun Moreh sung a um Chikim kho a security force holeh Bandh bol mipi ho kinotona ana sohdoh in hiche achun numei 3 panna in milham 4 akitongkha uvin ahi.

Thulhut in aseina achun Moreh police commando hon khangthah ni ana voh chungthu uva lunglhailou vetsahna a kipunkhom mipi ho chu police hon anocheh got nalam uva kinotona chu sohdoh ahi in akitongkha ho chu Marina Mate (22), Chinkhoneng Zou (55), Lhingjaneng Lhungdim (50), Mangneo Haokip ahiuvin amauho hi abon uva Chavangphai kho mi ahiuvin akinthei pen in Moreh hospital ana lhut uvin ahi.

Security personnel ho jong mipi lunglhailou hon song ase nalam uva akitongkha aum uvin ahi. Thuboi jeh a Moreh Kuki CSO hon Imphal-Moreh lampi a phattep umlou bandh March 14 apat akoi uh ahitan chule District administration injong Moreh khopi sung a CrPC 144 lhakhat sung umding a ana phondoh ahitai. Tuni kiboina achun mipi ho nocheh nading in security force hon tear gas akapkhum uvin alangkhat ah bandh tosot hon song in asep uvin ahi.

CM in sorkar kisem kum 3 lhinni a artist leh sportsperson ho dinga CMAST leh CMAT phondohna nei

Imphal, March 15(ET): Gamsunga BJP lamkaina sorkar akisem kum thum lhinni a Chief Minister N Biren Singh in sportsperson leh artist ho dinga scheme lenpen Chief Minister’s Secretariat mun a phondohna aneiyin ahi.

Deputy Chief Minister N. Joykumar, Cabinet Minister le MLA ho, Chief Secretary, DGP, civil le police official ho kipana kin abol nauva apang uvin chule sorkar kisem kum thum alhin toh kilhon a Coffee Table Book hondohna anei uvin ahi. Coffee Table Book hi Department of Information and Public Relations in publish abol ahi’in, chule program sunga achesa kum thum sunga sorkar natoh doh ho vetsahna film chomcha jong ape uvin ahi.

Chief Minister in thuso miho akimupi na a, Chief Minister’s Akhannaba Sanaroisingi Tengbang (CMAST) leh Chief Ministergi Artiste Singgi Tengbang (CMAT) hi gamsung minphatna hin polut a sportsperson chule artist asang a sim ho phatchomna hiding ahi, tin aseiyin chule athah a phondohna anei CMAST leh CMAT project hi dangka lakh 736 leh 570 lakh vel lhing ahi, ati.

CMAST scheme noiya sorkar in sportsperson international level a medal sang ho government service kilomtah kipe ding ahi, tin aseiyin chule National leh International Sports tournament a pan la chule medal sang a natoh neilou sportsperson leh coach jouse Chief Minister’s Halshelgi   Tengbang (CMHT) noiya umding ahi, ati.

CMAST hi sportsperson hon sports thil amantam – cycle, thal, rifle, pistol leh adang dang thil mantam ho chohna dinga akithopi ding ahi. Olympian gold, silver leh bronze medal mu ho dangka crore 1, lakh 75 leh lakh 50 kipe ding chule pan la hon dangka lakh 10 cheh amu ding ahi. Scheme noiya sorkar in gamsunga um local club 250 vel hi kum khat a dangka lakh 2 chan incentive apeh ding ahi.

Scheme a hi tohmun neilou sportsperson leh coach, kum 50 chunlang chule Manipur/India thalheng a National ahilouleh International tournament a pang ho dinga ‘lifetime pension scheme’ jong pang ding ahi. CMAT hi gamsunga um artiste ho panlahna athupi dan hetpehna ahi’in chule imalam jouse a artiste ho tilkhouna ahi. CMAT hi kum khat sunga artiste 4000 vel in aphatchompi tei nadinga tupna aneiyu ahi.

CMAT noiya kum 60 le achunglang hi a artiste 1000 vel pension kipe ding ahi. Pensioner holah a Awardee, Guru chule Non-Awardee (tradition, culture leh art form chingtup a pang) ho jong pang diu ahi. CMAT scheme hi theatre, sumang leela, dance, music leh visual arts kiti field chom chom a kichuhna pe a cultural group ahilouleh institution ho sum a kithopina kipehna ding jong ahi.

Government Dance College, Shre Shree Bal Mukunda Dev Music College, Imphal Art College, Manipur University of Culture a simlai hon ‘financial assistance’ amu diu ahi. Padma Awardee, National Akademi Awardee kiti Sangeet Natak Akademi, Sahitya Akademi leh Lalit Kala Akademi Awardee, State Kala Akademi Awardee hon alungtup molso nadinga ‘one time financial support’ amu diu ahi.

Authority in hetpehna anei artiste hohi CMHT injong ahop tha ding ahi’in, CMHT scheme hi artist 1000 vel in aphatchompi ding ahi, tin CM in aseiyin ahi. Achesa kum 3 sunga sorkar tohdoh ho CM in aphongdoh in, gamsunga Inner Line Permit System (ILPS) jong kichepi ahitan, May 2017 a kon lha seh a Meeyamgi Numit le Hill Leaders Day kimang a, CM in mi 34,000 vel akimupi ahitai, ati.

Go to Village leh Go to Hills mission thu aseiyin, beneficiary 3,06,026 register kibol a chule inkot chan a service kipe ahi, ati. CMHT, CMST, Star-up Manipur kiti scheme hohi gamsunga launch akibolna masapen ahi’in, tuni chan geiya CMHT hi lakh 6.8 in aphatchompi ahitai, tin aseibe in ahi. ‘Law and order’ pha cheh cheh a, bandh leh blockade lhom cheh cheh a chule 2016 kum a kon international tourist kal cheh cheh ahi.

Khamnathei douna a gal kibol a, khamnathei dangka crore 2000 val man kisumang ahitai, tin CM in aseiyin chule 2018-19 kum a Gross State Domestic Product hi 16 percent a kal ahi, ati. School Fagathansi Mission hondohna um’a, hiche noiya school 60 a khantou machalna sangtah pohlut dinga lhendohna kinei ahitai. Class 10 simlai ho pass percentage jong achesa 1972 kum a kon asan napen ahi’in, sorkar in 1st Chief Minister’s Indigenous Martial Arts (Thang-ta and Cheibi) Meet, 2020 jong agon ahi, tin CM in aseibe in ahi.

Manipur a BJP makaina govt. kum thum lhingta

Imphal, Mar 15(ET): Tuni chun BJP makaina noiya Manipur gamsung a vai ahop kum um kumthum alhing tan ahi. Chief Minister N Biren Singh in thuso miho heng a aseina achun Manipur gamsung a thingnoi umho toh kihoutoh a kicham ding anop thu asei in ahi. Aseibena achun Indian Govt. in jong NSCN-IM leh Kuki group thingnoi ho akihoupi tauvin chule Manipur gamsung a thingnoi umho toh chamna asemnop thu jong asei in ahi. Chule kumthum chesa a natoh phat ho aseina achun Churachandpur gamsung a boina sottah um akisulham thei in chule National Highway a blockade phat sottah um jong akiladoh in chule thinglhang leh phaicham a umho kikah jong semphatna akibol in gamsung a chamdel a boina imcha umlouva umsah ding  hi ahahpen e ati. Thinglhang a cheng mipi hotoh kinaicheh nading in Hill district HQ mun chom chom ah Cabinet meeting akibol in chule Go to Village mission, Go to Hill, CMHT, Meeyamgi Numit chule Hill peoples day ho jong mipi hon toh govt. kikah ahoi cheh theina ding gelna in ana kipandoh e ati.

KSO Tengnoupal in commando ho chonval demna nei, kiphinna bol dinga gihna neiyu

Tengnoupal, Mar 15(UNA): Kuki Students Organisation (KSO) Tengnoupal in achesa March nisim 13 nikho a Moreh a posting hi a commando hon L Phunchong kho a Khaijamang Touthang leh Mangminlen Touthang avoh nau thilsoh demna sangtah anei uvin ahi.

Helkholun Haokip, Education Secretary leh incharge Information and Publicity Wing, KSO Tengnoupal district in thuso aneina a, sorkar in Tengnoupal leh Imphal-Moreh Highway a sepai asol lut be jing a boina asuhlhap got hi boina kibe na ahi, tin sorkar panlah dan kidang asahna thu aseiyin ahi. Manipur a ‘President’s Rule’ kikoi tobang a Tengnoupal district pam a sepai tamtah kiging jing a akoiyu ahi, tin aseibe in ahi.

Sorkar in boina ho nidan 24 sunga asuhlhap louva ahile KSO Tengnoupa chule block adang dang hon CSO dang dang toh kitho a Imphal-Moreh Highway a bandh abol ding ahi, tin aseibe in ahi.

MNRF in Leishemba Sanajaoba ‘boycott’ bol dinga gamsung miho kouna nei

Imphal, March 15(ET): Thingnoi kiloikhom Naga Revolutionary Front (MNRF) hon Leishemba Sanajaoba Indian politics a lut dinga nopna anei gamsung mihon boycott abol diuvin temna anei uvin ahi.

MNRF Information and publicity secretary Rex Kashung in thuso aneina’a, Manipur gamsung hi chamlhatna neiya gam anahi jing ahi’in, kum 2000 val thusim neiya chule leng khanggui hon nehguh abol khah jeh a 17th century jouva kon mi chunga kingam a gam khat a pang ahitai, tin aseiyin ahi.

Burma in gamsung alo- Seven Years’ Devastation, British khut a gimna ato chule Indian union a gamsung akilahlut hi abon a leng insung kah a laltouna kichuna aumjeh ahi, ati. Maharaja Bodhachandra in Indian union a gamsung akilahlut ding adoudal vanga India sorkar toh aguh a kihouna aneiya dangka lakh thum akilah jou September 21, 1949  ni a Shillong a Merger Agreement soi akai ahi, tin MNRF in ngohna aneiyin ahi. State assembly in Johnstone School a September 27, 1949 kum a Merger Agreement san louding (null and void ahi) tia kilolna anei u ahi’in, India sorkar in state assembly kilolna khohsah louva sepai ahin sol lut a gamsung alo ahi, ati. Hiche jouva kon thal choi ho movement kipan a hinkho tamtah manlo ahi, tin Rex Kashung in aseiyin ahi.

October 28-29, 1993 kum a GM Hall mun a Merger Agreement hi adih pon, kisang louding ahi tia kilolna a National Convention on Manipur Merger Issue anaum ahi. Leishemba Sanajaoba in State Rajya Sabha seat a dinga nomination paper apehlut hi Manipur gam India henga johdoh nadinga pan alahna masa ahi, ati. Leng insung a nehguh aumjeh a thinglhang le phaicham miho hi atheng le athenglou tia kikhen lo ahi.

Achesa phat ho a suhkhel tamtah suhdih nadinga Kangleipak mi tamtah in ahinkho ato ahi, tin aseiyun chule tua leng khanggui hi a Sanajaoba Indian Parliament a pang dinga akigot hi gamsung miho jouse totna a akineina ahi, tin ngohna aneibe in ahi.

Tripura a Genthei val jeh’a nupi khat in achate 2 atha jouva ama kikhailih

Agartala, March 15: Achesa March nisim 13 nikho chun Tripura gamsung Gomati District Udaipur Sub-Division sung’a um Shamukh Cherra mun’a insungmi mi thum (chapang 2) ana kikhai lih uvin ahi tin thulhut chun aseiyin ahi. Thuso miho heng’a Gomati District Additional Suprintendent of Police Rajib Nag in aseina’a hiche thilsoh hi Police hon Friday nikho jingkah lam chung thulhut anakimu in anakidel lut pai in ahi. Kholchilna akinei dungjui in hiche insung mipa Andolan Kishore Debbarma (35) hi anatoh na’a kon sun (afternoon) a inn ahung kile achun insung’a aloinu kikhai lih amu in chuleh achate 2 tol (floor) lhang’a alup lhon chu anamudoh ahi ati. Hiche thilsoh hi insung genthei val jeh hiding in aginmo na thu jong aphongdoh in ahi.

Hiche toh lhon’a chapang teni pa (Debbarma) chun aseina’a achete 2 hin insung’a loubol nading’a kikoi pesticide ho jeh’a thi hiding in aseiyin ahi. Chuleh thina toh hi Debbarma loinu Jamuna Debbarma (25) leh achapa Ankush Debbarma (4) chuleh achanu Jaba Debbarma (7) ahi. Hiche thilsoh chung’a case registered jong akibol tan chuleh hiche insung miho thina ajeh jong kholchil na achelha jing in ahi tin Nag chun aseiyin ahi. Chuleh autopsy report kimu teng epi jeh mong’a thi ahi’u kihebep ding ahi tinjong aseibei.

Alangkhat’a hitobang thilsoh achesa November nisim 23, 2019 kum ajong chun Simna Assembly Constituency noi’a um East Barakathal mun’a jong nupa khat ana kikhailih lhon in chuleh achate 2 gu (poison) adoh sah lhon in anakithat uvin ahi. Amaho chu Paresh Tati (35) aloinu Sandhani Tati (28) chuleh achate 2 Bishal Tati leh Rupali Tati ahi.