Kikumna dileh kikum louna di (Tribal le phaicham Student ho kikumna)

Kikumna dileh kikum louna di (Tribal le phaicham Student ho kikumna)

187
0
SHARE

Kikumna dileh kikum louna di
(Tribal le phaicham Student ho kikumna)

Simlai kiloikhoma – Student Union hohi akikumna didol umjongleh thil jousea akikum teng akinna ahipoi ti hung umdohji ahi. Tupetna thinglhangmi simlai ho kiloikhomna ho kikumna thu le la hohi akikumna diudol tah ngen hithou ahi. ATSUM, KSO le ANSAM hon thinglhang gam’a thil kivat ho thua govt to kihouna le kinop tona ijavei hamkhat anabolsao state govt nin asuh bulhitlou ho asuh bulhitna dia August 31 (2020) chan phat anateppeh kit u chu anikho akichaitan hinlah govt ninla ima aboldehpoi. Tribal Student body ho demand bol hi thil khat le ni bou hilou, thinglhang district a mipi le student ho ngaichat khohtah ngensen ahi. School le college hoa oja (teacher, lecturer) lhing ding, doctor le nurse ho jong aki ngaicha banga alhingdom koidi tiho hi Tribal student ho kiphinna hijing nalai ahi. ATSUM, KSO le ANSAM ho demand bol hohi Chandel district leh Churachanpur district a Student kiloikhomna holeh Gorkha Student kiloikhomna honjong atosonao aphondoh uhi student le mipi jouse dia thilkhoh tah ngen ahijeh ahi. Student kiloikhomna hohin kiphindi ahinti teng uleh govt nin akihoupi jiuva kinop tona thah (MOU) soi akikaipi kitjiuleh kiphinna voh haija umji ahin chomkhat jouleh govt ninjong ipi anaseija ipi ana kitep ham kihetmosah pai kitjidan ahi. Hiche jeh a Manipur govt hi itihlaija pat MOU govt ahi tia totnopna a neiloi umdohji ahi.  State govt dia jong thil jouse hut khatna suhbulhit di chu hahsa thou di ahi. Ipi hileh khohsahna aumloule thil demand kibol holah a khat le ni beh ol ol’a boldoh di ti umjile vang pha lheh di ahi. Tupetna hi covid jeh a  koiman ima dang agel khoh theilou di jong ahi. Hichena kah a govt vaipo ho election dileh power kichuna a boi mathah ahijeh un mipi asoh soh sohhen ti akam uva aseidohlou cha u bou hidi ahi.

Alang khatna, phaicham’a pansa student kiloikhomna JSCC (Joint Students Coordination Committee) kiti student kiloikhomna 3 – AMSU, KSA, leh MSF hon thinglhang district hoa leinoija um thil mantam ho lahna dia Company hon tohgon anei u thu hi “agam mi” (indigenous) nopna louvin hithei ponte ahintiu hi amaho chu agam mi dan’a kigel u ahitadem datmo um ahi. Ukhrul, Kamjong, Tengnoupal le Chandel district hoa leinoija um “Limestone” leh “Chromite” lahna dia company phabep hon Manipur govt to kinop tona soi akai uva company hojong amun ho avetpan u ahitai. Limestone hi cement semna di ahin Chromite hi thih semna a mandi ahin hiche thinglhang gam district hoa hi tamtah um’a kisei ahi. Hiche district sunga cheng agam akho nei ho phatsahna a kinop tona um ahileh midang kiha kumna di umlou didol ahi. Company hoto kinop tona nei hi agam mipi thalheng Manipur govt mama ahin agam mi phatchomnadi jong ahi. Student kiloikhomna hohi mipi pumpi thalhenga thusei lasah abol jiu jong ahijeh in mipi kiloikhonmna holah a aseisah umjong himaithei nante. Hitobang kinop tona hoa hi Student le civil mipi kiloikhomna ho nopna lah masat di ti jong umdehlou ahi. JSCC ho sei adih khat vang chu ahileh leinoija thil lahna dia gampheng akilaisetleh ‘environment’ (thing le go, twi le huinun) atohkhah di atiu hi ahi. Ahin engset sumsel jeh a jahdana ahile vang akikumna diu hilou ahi.