Kichouto le kikalto vetsahna khat (Nam ponlap khaidoh kitetna um)

Kichouto le kikalto vetsahna khat (Nam ponlap khaidoh kitetna um)

46
0
SHARE

Kichouto le kikalto vetsahna khat
(Nam ponlap khaidoh kitetna um)

Lhangphong tah a Manipur Independence Day leh Naga Independence Day kamang’e tia chamlhat ponlap kikhaidoh kiti hi India Independence Day leh India govt kalna ahi. State govt a kon’a hitobang jahdana aum vanga Manipur a phaicham leh Moreh a Manipur Independence day kiman, Naga district mun chomchoma Naga Independence day 14 August ni’a ana kiman chu Manipur govt thaneina umlou mutheina ahi.  Meilhei le Naga holah a India a kon potdoh di tia thingnoi galguh bol jong aumjeh uva govt mitmu changtah a chamlhat ponlap kikhai doh a nikho nitna kinei hi govt dia mohvetje umlou didol ahi. Thingnoi hon gamlah a guhthim’a bol ho chu thukhat ahitan Imphal leh District HQ ho kisan’a ahinbol uchu govt dia jachat umtah ahi. MNF (Mizo) hon 1966 kum’a Mizoram Independent gam ahitai tia Aijawl khopia MNF ponlap ana khaidoh uchun Indian Air Force hon khopi sung bomb analhah khumlo jeng u ahi. Tua Manipur a chamlhat ponlap tungdohji hohi thingnoimi galguhbol malah civil mipi kiloikhomna ho lamkaina ngen ahijie. Manipur phaicham mi hon Manipur Independence day tia 14 August ni leh chamlhat ponlap akhaidohjiu hi govt douna ahipoi tin aseijiuve. Meilhei lengpa inmun laitah kisan’a chamlhat ponlap khaidohna le anikho nitna lengpa jaona a anaboljiu chu tua lengpa Raja Sabha MP ahijou kisan’a kibol hi India danpi noija akihahselna to kikal di ahi. Kumdang’a chu Naga hon Naga Independence day nitdi aguong uve ti thu aumteng Nagaland leh Manipur State govt teni’n hitobang program umtheilou di ti thupeh (order) anaboljia bolsah louva ana umji ahi. Tuchunga hitobang kin lhangphong tah a chelhah chu State govt kisuhlou leh meidoi jeh tidi hijeng ahi.

Lhangphong tah a Manipur a Naga Independence kimanna hi tuchung bou ahipoi. Tuchung Tamenglong district HQ laitah ah NSCN-IM lamkai khat jaona’n Naga Independence day akimang’in mundang dang’a jong hiche nikho nitna kin anabol uve. Nagaland state geijin bon Naga Independence day nitna leh ponlap khaidohna ho anabolsahji lou chu Manipur a akibolsahji hi Manipur govt dia jachat umtah ahi. Meilhei ten jong Naga honbon abolthei uleh keihon jong kabol thei uve atiu bang ahi. Phaicham’a chamlhat ponlap khaidohna kin kibol police hon angahsahnau aum vanga atamjoa ima alolou u ahi. Meilhei tele Naga te hin India govt chouna sanga amani kichou tona a ama ama Independence day anit u joh hung hidoh di ahi. Tukum 14 Agust ni’a jong chu Naga hon ponlap khaidohna kin abol uve ti thusoa kimu jouva meilhei ten phaichama adondon’a Manipur chamlhat ponlap ahinkhaidoh bebe un akilang’e. Chamlhat ponlap khaidoh manna koima chamlhat hidehlou ahi. Ahin hitobang hi govt chouna leh nam le nam kikah a kichoutona khat ahidoh jeh a amin maimaija kibol kiti jongleh dihtheilou ahi. India sunga Independence day hi 15 August bou ahin nikho dang nit aumleh India douna ahidan kihetmosah um nalai ahi.