Khutgoh keuva inlang hung kile (Ticket thua Amit Shah kimupigo)

Khutgoh keuva inlang hung kile (Ticket thua Amit Shah kimupigo)

42
0
SHARE

Khutgoh keuva inlang hung kile

(Ticket thua Amit Shah kimupigo)

Hichan gam’a kon Delhi lang gakiche a kimutopi dia kitup pen Union Home Minister Amit Shah kimupi louva Chief Minister (CM) N Biren Imphal ahung kile kiti hi ahoihoinan seijongleh gaki jumso tina ahi. N Biren chun Congress a kon haija BJP a lut Manipur MLA 5 ho Delhi a anapuija BJP a lahlutna jong aganei ahi. Party a lahlut maimai hilouva ahung lhung ding  By election leh 2022 kum’a General Election a party ticket amuna tei diuva hiche MLA ho atahsa tah uva party boss ho gaki musah di tidan ahi. Party thu ahileh party a alenpen chu President ahin, party president JP Nadda akimupiu jou kisan’a Home Minister Amit Shah kimutopi teidi kigo nalai chu Amit Shah hi PM Modi sanga thupijo leh ama thu thu ngap ahitadem ti thei ahi. Amit Shah akimupi theilounao ajeh kisei chu corona natna avei jeh a hospital a kon apotdoh loulai jeh ahi akiti. Ahin Amit Shah adamdoh tai kitina jong N Biren le MLA 5 ho Delhi che masang anahitah jeh in Amit Shah hin akimupi nomlou mong ham ti jong kihetalou ahi. Among mong’a BJP tungdoh hi RSS ho ahijeh un Amit Shah titah louva Prime Minister Modi gei jong RSS ho tundoh a kisei ahi. Achutileh party ticket thu hoa jong RSS ho seisei ahidi tahsan umtah ahi. By election umdi ahi kiti jongleh tule tua kibolpai di jong ahilou jeh in party ticket thuleh election to kisaija Delhi a kipel metmutna busat thona di umbehlou ahi. Thakhat tah a Congress MLA a kon haina nei lah a Md. Naseer Delhi che lah a ajao kitlou jong thukhat ahikitne. Pangal (Muslim) hohin alhangpi’a BJP hi Muslim ho suhgentheina di tup jing Hindu party a bou agel jeh uva Md. Naseer jong BJP a alutkal chu amaikhah di ahijeh a Independent a tetdi, akaijou teng BJP sot di ti ahidan jong a-imlou ahi.

O Ibobi bolthei laitah a Md. Naseer jong O Ibobi’n solchah phatah a anei mi khat anahijeh a phulou helouva MLA/minister hung hidoh jeng khat anahi. Thiding hijongleh Ibobi nungsunlou dia mi tamtah in anagel Congress MLA phabep hon  term kichai kah a Congress MLA a kon haina neiloi aumjeng hi “congress nadalhah louleh” tia kigihna khat um hidia mi tamtah ginmo ahi. Congress MLA Resign kibol hohi nehthei tuitah leh moltum to kivetchepna khat um hidia thuthang um hisaosao sohkei u ahi. Midang kiseida taleh O Henry kisan’in apalen (O Ibobi) adalhah jeng kiti hi politics sehseh thu hilou di, nadalhah louleh tia molto kivet chepna khat um hidia mi tamtah in aginmo ahi. Congress a kon BJP lut jouse BJP ticket hung kipe teidi tina jong umlou, BJP a tet jouse kai jengdi tina jong hidehlou ahi. Hiche jeh a ticket hung kihopma election hung kichai teng MLA Resign kibol ho ijat hamkhat amoh sagai thilo hung umbe thei ahi. BJP hohin candidate 2 le 3 lang ticket peh dia akinepsah jiuva achainaleh haithei lungnei paija apaimang jiu ahidan 2017 election a muthei ahi. Tua hi BJP hon Manipur a congress hi akit general election teng ating-gu geija tachip di ti agon diu ahin  abolkhel uleh BJP sunga Biren deilou ‘dissident group’ hole BJP to ui le kel bang jouse hung pangkhom kit thei u hinalai ahi.