Khudengthabi a tou AR sepai ho numei chunga akhanset jing KSO-GHQ leh...

Khudengthabi a tou AR sepai ho numei chunga akhanset jing KSO-GHQ leh KCA-TPL in demna nei

77
0
SHARE

India a ding’a coronavirus case ni channa Kerala a kimudoh kit; India in China gam mi chule China gam a um gamdang miho e-visa facility kipe chomkhat adia ladoh

Kollam, Feb 2: Kerala gam a coronavirus case ani channa aum thu State Health Minister in Sunday nikhon aseiyin, natna neiya kisei anichanna jong Alappuzha medical college a isolation ward a akijen e, ati.

Kerala gam in natna jenna dinga kigotna lhingset anei ahi, tin Health Minister KK Shailaja in aseiyin chule natna hi kijen dam thei ahijeh a kichat angaipoi, ati. AIR correspondent in state sunga mi 1,793 hi observation a um ahi, tia asei ahi. India in tua dinga China gam mi chule China gam a cheng gamdang miho e-visa facility akah ahitai, tin Beijing khopi a um Indian Embassy in Sunday nikhon aseiyin ahi.

“Natna jeh a e-visa ho phatchomkhat a dinga kikhah ahitai. Hiche hi China passport neiya chule China gam a um gamdang miho a ding ahi”, tin embassy in aseiyin chule India gam vil nading kin khoh nei hon Beijing a um Indian Embassy ahilouleh Shanghai, Guangzhou a um consulate chule khopi a um Indian Visa Application Centre ho akijahmat pi diu ahi, ati.

State sorkar in Pune Virology Institute a kon result anga ahi. “Adamlou pa Alappuzha Medical College a akijen in, Pune Virology Institute a kon result kimu loulai ahi. Ahidinga ginchat um ahi’in, hijong leh report akimu teng lebou photchen hiding ahi. Damlou pa hi China gam a kholjin kha ahi”, tin Shailaja in aseiyin ahi.

Kerala sorkar in adamlou adang ho hetdoh nadinga pan lentah alah ahi, tin aseibe in ahi. “Wuhan University a Kerala gam mi simlai tamtah um ahi’in, China gam a hung kile ho ‘observation’ a kikoi ahi”, ati. Chule coronavirus case ani channa dinga ginchat result (final) lahna dinga Union Health Secretary toh akihouthu aseiyin ahi.

Hiche masanga Centre in coronavirus case ani channa photchenna anei ahi. Case masapen jong hi Kerala gam a nithum masanga ana kisei ahi. Sunday nikho chan a coronavirus jeh a thi mi 304 lhing ahitan, Hubei Province a mi 45 thi kit ahi. Natna hi December lha a Wuhan a kipan a, khopi dang dang a chal ahi’in, tua hi hiche case 14,000 val kisei ahitai.

Natna achal be louna dinga muntin a health authority hon pan sangtah alah ahi’in, Australia, France, US leh Asia gam sagi a natna kisei ahitai. India sorkar injong China gamsung Wuhan a um India gam mi simlai 323 tuni a apuidoh ahi’in, hiche masang Saturday nikho a gamsung mi 324 ana puidoh u ahitai.

Khudengthabi a tou AR sepai ho numei chunga akhanset jing KSO-GHQ leh KCA-TPL in demna nei

Kangpokpi, Feb 2(UNA/ET): Kuki Students’ Organisation, General-Headquarters (KSO-GHQs) in Imphal-Moreh highway, Tengnoupal district noiya um Khudengthabi a tou Assam Riles hon achesa January nisim 19 ni a IPS officer numei khat check boldinga asei uva dihlou tah a abol nau demna sangtah anei uvin ahi.

Khudengthabi Check Post a tou Assam Rifles hon tu masanga jong numei amaiya, dihlou tah a abol’a, asuhgimna thilsoh tamtah kisei ahi’in, tu masanga M Chahnou kho, Moreh a cheng numei khat jong Assam Rifles sepai khat in meithal a adoiya, hunam a abol’a, atahsatah a asuhgim’a, chule numeinu tibah ho camera a alah’a, thilsoh umchan video a alahna thilsoh jong achesa November lha a anaum ahi, ati.

Khudengthabi a tou AR sepai hon numei jon mit a avet a, avel vel a asuhgim jing KSO-GHQ in agelkhohna thu asei uvin, state sorkar leh mopohna nei authority hon hiche mun a midang khat in vangsetna ato kit masanga action alah diuvin temna aneiyin ahi. Simlai kiloikhomna in IPS officer nu atosot nau thu aseiyun, themmona nei AR pa aganna thei pen a book akibol khum louva ahileh KSO in action alah ding ahi, ati.

Kuki Chief Association, Tengnoupal in jong Khudengthabi Check Post a a IPS officer khat ahi lou lamtah a ana kibol na chung thu nasatah in demna ahin nei uvin ahi. Kiloikhomna hi hiche thu a alang toni a kidem to lou a khonung le akoi in hijong le mi  a eng bol lou ding uvin hetsah na ahin nei uvin ahi.

Nipah natna chunga goljona inei uvin tua jong Corona virus chung a goljona ineikit diu ahi: Kerala Health Minister

Kollam, Feb 2: Kerala health minister K K Shailaja in tuni a thuso miho heng a aseina achun state sung a Corona virus vei mi 2 akimatdoh jeh in mipi ho lung linglau louding in asei in kum ni masang achun Nipah natna jong khoh lheh in akisei in hiche natna chung a jong goljona akichang in tuchung a natna chung a jong hi goljona kichang kit ding ahi in mipi ho lunglinglao louding in asei in ahi. Ahinlah kichatlou ding akiti man a kiven louding tina ahi dehpoh hatah a kiven ding ahi in chule moh kichat louding ahi tin jong aseiye.

Shailaja in aseibena achun Kerala gamsung a Coronavirus vei anina a kimandoh pa hi medical student ahi in Alappuzha medical college hospital ah atubeh a kikoi chom ahi in chule medical authority ho hiche hospital vellah a hi koima hava louding in jong thupeh anei uve ati. Chule amasajo hi chu numei ahi in ama chu Thrissur medical college hospital a kikoi ahi in hiche hospital kimlah a jong kivenna nasatah in abol uvin koima amoh vahdoh sahpouvin ahi.

Aseibena achun hiche thu hi datmo um ahi pon Kerala gamsung a kon china a simlai chapang tamtah um ahi in hiche natna hi khat le ni in ahin veitei ding chu kigingmo sa ahi in hinlah avei akihetdoh toh lhon a phattah ventupna kibol ahi ati.

Coronavirus Assam gam lhung dinga ginmo; Assam sorkar in gamsunga photchenna kinei natna nei aum poi, tia sei

Guwahati, Feb 2: Nat gol tobang symptoms neiya Assam gam mi pasal khat Gauhati Medical College and Hospital (GMCH) a apolut uvin, natna hi coronavirus hi maithei ahi, tia kichatna aneiyu ahi.

Kerala gam a kon Assam hunglhung ahi. “Heng’e, nat gol tobang symptoms neiya mikhat GMCH a jen dinga akipolut in, coronavirus case ni kiphotchen na Kerala gam a kon hung ahijeh a administration in jen ding hi thilpha pen a agel ahi. Ahin, ama hi coronavirus natna nei ahi ti tahsanna lhingset a seithei ahihih laiye”, tin thulhut in aseiyin ahi.

Alangkhat’a, Assam Minister Himanta Biswa Sarma in China gam a kipan natna hi gamsunga aum’e ti photchenna aumpoi, tin aseiyin chule natna a kon kivenna dinga pan kila jing ahi, ati. Adamlou mikhat hi kivenna dinga GMCH a kichon ahi, tin Assam Health Minister Piyush Hazarika in aseibe in ahi.

Gauhati Medical College & Hospital (GMCH) a mikhat Conoravirus natjeh a admit kibol aum e tia kisei thang chu jouthu ahi in Kerala akon khangthah khat Assam gamsung a hunglut chun Gopinath Bordoloi International Airport a screening akibol jouva GMCH a kholchilna bolding a kithah lut bou ahi in tuni chan in Assam gamsung ah hiche natna aum akiphohchet anaipon mipi ho moh kichat louding leh thu lamleng ho jeh a boilou ding in tepna abol in ahi.

Sarma in aseibena achun Centre in protocol asodoh dungjui in natoh akibol jing in Gopinath Bordoloi International Airport a Morigaon akon kum 24 a upa pasal khat hiche natvei ding a ginmo a um chu doctor hon akholchil jouvin imacha amudoh pouvin kichat nading aumpon chule ama X-ray akon in jong imacha mudoh ahipon akosih maimai ahithu asei in ahi.

Hiche nat akon kivenna ding in gambung jat chomchom in jong pan ala jing uvin US gamsung vaipo hon agamsung uva China gamsung akon amauho gamsung lutding chomkhat akhah uvin chule alutsa ho jong kholchilna phatechan anei uvin ahi. Russia gamsung injong China gammi toh chomkhat kitimat ding akhah uvin chule Kazakhstan gamsung in jong cross-border bus chule passenger train jong chomkhat akhah uvin ahi. Vietnam gamsung in jong chomkhat a ding in China jonding flights holeh ahung lutding ho jong akhah uvin, Nepal gamsung in jong China toh ki gamgi a um Rasuwagadhi checkpoint jong chomkhat a ding in akhah tauvin ahi.

Corona Virus jeh a Indo-Myanmar gamgi kikhah lou ding

Tengnoupal, Feb 2(ET): Moreh a mipi hon corona virus jeh a Indo-Myanmar gate kikhah ding ahi tia thulamleng ana the jal jing thu chu adih lou ahitin Gate No. 2 immigration a natong ho le police hon Moreh a thuso miho toh kihou limna a hilchetna anei uvin ahi. Hitabang a thulamleng kithan akon  gam teni kikah a sumkol veina a lhah sam na nasatah ahung umtoh lhon a hiche hilchetna chu kinei ahi. Hetthei khat chu Myanmar  Police Tamu a S.P. pa thudoh anakinei na a tu channa Nampalong kikha ding thu ima aum loudan hetsah na hung kinei ahi.

Government college a jilkung hon Monday nikho a kon ‘cease work strike’ pan ding

Imphal, Feb 2(ET): Government school a jilkung ho banga college a jilkung hon Monday nikho a kon cease work strike pat dinga gihna aneiyu toh kilhon a gamsunga education sector boina asang in ahi.

Manipur gam a um government college a jilkung hon achesa January nisim 28 nikho a kon FEGOCTA noiya kiphinna apat u ahitan, sorkar in thumna abulhit louleh phat teplou strike bol dinga Saturday nikho a thuphon aneiyu ahi. Federation of Government College Teachers’ Association Manipur (FEGOCTA) hi Manipur gam a um government college a jilkung ho kiloikhomna ahi.

7th Pay Scale Commission dungjuiya pay structure velvetna aumding hi athum u akhoh pen ahi. “Monday nikho a kon keima keima college a che jong leuveng class ka lah loudiu chule themjilna toh kisai ima kabol loudiu ahi”, tin FEGOCTA in aseiyin ahi. Hijong leh exam toh kisai thil ho kisuboi louding ahi, ati.

FEGOCTA lamkai hon Thursday nikho teng Imphal khopi a rally bol dinga jong thuphon aneiyu ahi. “Hiche hi themjilna dinga pha ahipoi. JIlkung hon strike abol le simlai ho atohkhah ding ahi”, tin Class XII simlai Amar Sarma in thuso miho henga aseiyin ahi.

ULFA leh NSCN-K thingnoimi ho sepai hotoh kikapto

Guwahati, Feb 2: Arunachal Pradesh gamsung Changlang district noiya um Khamdu kho a Sunday jingkah a sepai holeh sorkar toh kihouna a pang lou United Liberation Front of Asom (ULFA-I) thingnoi ho akikapto uvin ahi.

Thulhut dungjuiya ULFA thingnoi hon thingnoi douna operation bol a sepai ho amu mu uva meithal a akap uva, hiche jouva gangtah a gammang lah a jamlut u ahi. Alangkhat a Assam sorkar in ULFA lamkai ho,a deh a Commander-in-Chief Paresh Baruah kihouna a apanna dinga kouna anei jing u ahi.

“Bohag Bihu anai teng leh sorkar in Assam gam miho henga thu lentah phondoh dinga kigotna anei ahi. Assam Accord Clause 6 a high-powered committee recommendation kingah jing ahi. Home Minister Amit Shah injong recommendation hi gelkhomna umding ahi ati ahi. Assam gam a chamna aumthei nadinga Bodo Accord soi kaina aum jouva ULFA Chief Paresh Baruah kihouna a apan dinga kouna kanei ahi”, tin Assam Minister Himanta Biswa Sarma in aseiyin ahi.

Alangkhat a Assam-Arunachal gamgi Wara Natun basti pam a National Socialist Council of Nagaland (Khaplang) thingnoi holeh 9 Rajputana Rifles, Indian Army ho Saturday sun a akikapto uvin ahi. Army hon Wara Natunbasti gammang lah a patrolling abol nauva thal choi NSCN-K hotoh kisuto uva, kikaptona um ahi, tin Tinsukia SP Shiladitya Chetia in aseiyin, ahin, thilsoh a akisukha aumpoi, ati.

Thingnoimi aum’e ti thulhut amu uva hiche dungjuiya police holeh sepai hon pan alahkhom a Assam-Arunachal gamgi a tu masanga kon operation abol u ahi. NSCN-K hotoh akikapto nau mun hi angaiya ULFA-I ho lhatna ahi. Sepai hon operation abol nauva avom a kivon thalchoi mithum amu u ahi’in, amaho hin AK rifle a sepai ho meithal a akap u ahi, tin army thulhut in aseiyin ahi. Mikhat akhut meichang in akha in, ahivanga ajamdoh man e”, tin thulhut chun aseibe in ahi.

Kikaptona mun a kon meichang akikap chai sa phabp akimu in chule akimvel a jong operation abol tauve, tin thulhut chun aseibe in ahi.

Gampam company hon gamsung akon ai-eng metric ton 500 vel choh ding tiu

Noney, Feb 2(ET): Noney district sung a Nungnung kho mite ai-eng a akivah jing utoh lhon a Manipur Organic Mission Agency (MOMA) in alouga hou ana joh peh jing ban uva gampam akon acho ding amu jing dan thu anaphongdoh uvin ahi. Hetthei chu hiche khosung ahi tu le tua lou bol mi 70 lam in ai-eng farm abol u ahi.

Nungnung kho vilna toh kisai a director  MOMA, K Debadutta in asei na a gampam company phabep akon ai eng metric ton 500 lam chohding a hetsahna ahung kinei dan thu ana sei in ahi.  Achesa 2016 kum akon a hiche project kipat toh lhon a loubol ijat ham in phatchom na a ahin nei jing dan jong director pa in tahlang na ana nei in ahi. Gampam company ho in  metric ton 500 lam ahin thum vang uvin jakhat ham ho vel bep aki thot doh jou ji in athumna u chung a lhingset a pehdoh na thei ding a pan hatah a kila be ding ahi ati.

Nungnung kho akon loubol Panmei Kaisipou James in thuso miho toh akihou limna a MOMA noia hitabang na toh kibol hin khosung mi ho nasatah a aphat chom sah dan thu tahlangna ana nei in ahi. Hiche project noi a loubol ho in kum khat a dangka 90, 000 lam alo doh jou dan u jong hetsah na ana nei in ahi.

Birla Emporium Private Ltd in pachanna nei simlai 108 scholarship hop peh

Imphal, Feb 2(UNA): Birla Emporiums Private Limited (BEPL) tohgon noiya City Convention a Sunday nikhon 1st IRA Foundation Scholarship distribution program achelha in ahi.

BEPL in agom a pachanna neiya simlai jakhat leh get scholarship ape uvin, simlai hohi insung hahsa a kon hiu ahi. Kikhop a guest of honour a pang chule BEPL advisor Yumnam Sharat in ahoulimna’a, tua khangthah atamjo hi phone a alunglut uve, ati. Phone hi adih a imanchah a ahileh hetbe kibelap nading lentah ahi’in, library lentah hi ahi, tin aseiyin ahi.

Simlai ho phatah a puihoui ding, adeh a alhasam simlai ho nu le pate hon phatah a apui diu hi thupi ahi. Chule career counseling hi thupi tah ahi, tin jong aseiyin ahi. Simlai alhasam leh ahatlou ho suh lungneo sanga tilkhou jing a dopsang joh ding ahi. Chule simlai ho dinmun hetthem a, akitilkhou nadiu phatah a kholtoh ding ahi’in, simlai khat in apha ase lhen khenna anei theiya ahile khonung a mi lolhing hung hiding ahi, tin Advisor, BEPL in aseibe in ahi.

CEO, BEPL YUmnam Irabanta Singh in president hina a houlimna anei na’a, Birla Emporium hi angaicha ho kithopi nadinga kisemdoh company ahi, tin aseiyin chule ahung lhung ding kum sunga Birla company in media a natong ho kithopina dinga pan alah ding ahi, ati.

Scholarship hopna kin aneiyu hi ‘human resource’ vetkol nading bidoiya abol u ahi. Birla company in amasapen a jilkung leh simlai ho scholarship ana peh ahi. Company in ‘human resource’ asem bou ahipon, simlai ho dinga dinmun jong asempeh ahi. Chule education sector a simlai ho panlah hetpehna jong ahi.

Scholarship hi high school simlai, higher secondary, college leh university simlai ho ding bou ahipon, mijouse a ding ahi. Scholarship hi simlai 60 percent le achunglang muho (general category) chule school a position chang ho kipe ahi. France, UK, USA, UAE leh Canada kiti United Nation (UN) noiya um gam hon June leh July lha vel teng leh company branch ahondoh vah diu ahitai. Kin gon a simlai, nu-le-pate chule company staff leh official dang dang jong apang uvin ahi.

Tengnoupal Check Post a AR hon WIY tablet Kg 3.196  mandoh

Tengnoupal, Feb. 2 (ET) : HQ IGAR (South) vetsui nanoi’a um 26 Sector Assam Rifle, Tengnoupal Battalion in tunin Tengnoupal Check post kom Sita road junction mun ginmo thei tah’a black color Chevrolet Optra car (bearing registration number MNO7 L 0092) hin tol Moreh akon Lutkholal Vaiphei (19) chu anakham uvin kholchil na anei nao’a gari sung’a kon in WIY tablet 3.196 Kg anamudoh uvin ahi.

Hiche toh lhon’a matdoh’a um WIY tablet hochu Tengnoupal Police Station representative ho panna in kholchil na anei uvin ahi. Chuleh hiche WIY tablet chu Moreh akon Imphal lam’a ahinpoh doh got ahi. Matdoh’a um thilho jouse Police Station Tengnoupal mun’a pehlut ahitoh lhon’a achung thu kholchilbe nading in natoh jong apan tauvin ahi.

Alangkhat’a 10 Sector Assam Rifle, Shangshak Battalion in jong Ukhrul District hopsung Lambui kho mun’a janhi (Feb 1) chun khamnathei’a kivei khat anamandoh uvin ahi. Assam Rifle hon thuguh pole ho’a kon thulhut amu dungjui uvin Lambui kho sung’a kholchil na anei nao’a khamnathei akivei mi khat akon in Heroin Gram 10 anamandoh uvin ahi. Matdoh’a um pa hi Ramit chapa As Wuiwliam (59) ahi akiti. Matdoh’a um thil holeh amapa chu Shangshak Police Station mun’a achungthu kholchilbe nading in anapelut tauvin ahi.