Kho khat le kho khat kiboina bouva lahdi (Joujangtek le Sehjang kho...

Kho khat le kho khat kiboina bouva lahdi (Joujangtek le Sehjang kho huhbitna)

70
0
SHARE

Kho khat le kho khat kiboina bouva lahdi
(Joujangtek le Sehjang kho huhbitna)

Noney district hopsunga Joujangtek leh Longsai kho teni kikah a gam kichuna hi sotna pat ana umpeh chu achesa 13 September (2020) ni’n inmun thua song’a kise tona ana um kitne. Hiche thilsoh a chun vangphat umtah in alang langa akitongkha aum vang’in athilom aumpoi. Joujangtek kho hi Old Cachar Road a Noney district, Churachanpur district, Kangpokpi district leh Bishenpur district gamgi kisuhtona mun thupi tah ahi. Bishenpur a pat Khopum lang jotna lampi phabep kisuhtona mun ahijeh a koiman apel theilou kho ahi. Hiche hi chenkhompi milong hon atheida kei u kho khat ahijeh a achesa 1990 langa gal ana umlaija pat melma ten suhmang teija lo/toupha di anati vang uva khomi teng kilung toh tah a ana huhdoh u ahi. Joujangtek kho hi haosa thaneina kivaipohna noija khosa ahivang uva khomi ten agam ngailutna aneisohkei thei u hi haosa ten kitup tah a vai apoh uva khomiten chanvou kitup tah anei uvin akiseije. Hiche jeh a kho le gam hi khomiten thi ngam’a ahuh ngam cheh u ahi akiti. Joujangtek to kiboijing hi Longsai kho kiti sopi Rongmei/Kabui ho chenna ahi. Khatvei veileh inmun thua kiboina leh copy lei, thinglhang lei kibolna thua kiboina hi hiche teni kho kikah a umjing ahi. Court a Case kibol tona jong umjing’a kisei ahi. Longsai ho hi akom avel’a cheng Kabui kho honjong apanpi dehlou uva kisei hi Longsai ho dihlou jeh ahidi tahsan umtah ahi. Tulai thingnoi khang ahitah jeh a thingnoi tosotna’a khat vei veileh Longsai ten Joujangtek te gam ahinchu jiu jong hiteidi ahi. Lampi thum kisuh tona kho ahijeh a inheng louheng hon athang thip uva suhboi teidi atijing u ahi. Hiche tahtah jeh a Joujangtek khomi ten jong kilung toh tah a koima kicha louva numei chapang geijing kho le gam huhna a pan alah jing u ahi.

Joujangtek le Longsai kho teni kikah a kiboina aumjing vanga chi le nam thua achelou jong hi thil phatah ahi. Ahin hitia khatvei veileh song’a kisetona aumjing hi achejoma athi hung umkhaleh ada acham’a chi le nam’a thua hung chethei ahijeh a govt ninjong Joujangtek kho a sepai permanent koidi hi agelkhoh ngai ahi. 14 sept 2020 ni’n Noney district le Kangpokpi district gamgi chin Tupul kom’a Sehjang le Charoipandoiba Rongmei kho kikah a jong kiboina anasohdoh det chet kitne. Hichu Sehjang khomi khat le nin gamlah a gotoi asat uleh Charoipangdoiba kho hon kagam sung uva nasat theilou diu ahi atijeh uva Sehjang hon Charoipangdoiba village authority ho akou uva kihouna ananei uleh Sehjang ten khat ho ahenden uve tia thu kithejalman anahi. Joujangtek le Sehjang kho teni hi gamgi a Kuki kho nunungpen ahilhon jeh a hate huhbit di hi thilkhoh khat ahi. Phailei umlouna gamga le thinglhang lei bola kivahna kho ahilhon vanga National Highway lamlen laitah a um kho ahilhon jeh a athupi lhona len ahi. Joujangtek le Sehjang hi kho len ahilhonlou vanga achesa 1990 lang chi le nam’a gal ana umlaija ana sohcha cheh kho ahilhon hi govt le kho haosa le khomi ten phatah a pan alah jeh ahi. Phat le kum chedung juija inheng louheng kikah a gam le thingphung gophung kichuna hung ha um cheh cheh nalai di ahijeh in gamgi kisuhtup di hi akoi hileh thilkhoh khat ahi.