Khat le khat kivetda tona tam cheh cheh

Khat le khat kivetda tona tam cheh cheh

328
0
SHARE

Khat le khat kivetda tona tam cheh cheh
Chi le nama kivetna, khentum le deitumna (communalism) kiti hi kikhen telna leh thunoh baotam kondohna bulpipen ahijing jeh a tulai muntin’a boina jong tam cheh cheh, tua sang’a hung khoh cheh chehnalai di ahi. India hi Hindu te tamjohna ahijeh in Hindu hou (religion) jui ho hatsahna di leh venbitna di tohgon keu hilouva gampam’a kon India a hung jamlut Hindu ho India mi hina (citizenship) peh a chendetsah di tupna jeh a Assam a NRC (National Registration if Citizens) kiti natoh hung umdoh ahi. Bangadesh, Pakistan leh Afghanistan a kon Muslim tilou hou le beh dang jui ho suhgentheija aumjeh uva India a hung jamlut ho Indian Citizenship pehdi kiti ahitah jongleh ipi dia Assam a bou kibol ham ti hung umdoh kitna tua India State dang dang hoa jong hitobang NRC boldi ti deiloi hung tam kit ahitai. Assam sehseh a ‘foreigner’ mihem Lakh 40 lang um dia ginmo anahi, hijong chu atamjo Bangladesh Muslim ho hidia anakigel jeh a Assam a NRC hung kiboldoh anahin tua hi Assam gam mi dihtah hilou (non-indigenous/Foreigner) a mudoh hi mi lakh 19 vel ahi. Hiche hi alhom’e tina ahidehpoi. Ajeh chu mi Lakh 20 vel kiti hi Manipur mi kehkhat lang val, Mizoram State pumpia mijat to kibang huoi ahi. Assam hi State lenjep ahinai kiti jongleh mi hijatjen ahung kichaolut hija lang ahileh chomkhat jouteng agammi dihtah ho hung mangdoh diuva um ahi ti ahi. Bangladesh a kon India a hung kichaolut Bengali ho hi Bangladesh to kinai Tripura a hung tampen uva tua thinglhang State a kisei Tripura hi jakhat lah a somsagi hiu ahitai. Manipur Jiribam gam’a jong Bengali meilhei pao helou dimlha a Jiribam AC a MLA kisan hung kaidoh jou u ahitai. Assam a Bangladesh mi ijat chet aumtadem ti hi holdoh hahsa tadi ahi.
Assam a NRC (agam mi dihtah min list) kibolna a Nepali/Gorkha jong mi Lakh khat vel mudoh hikit ahi. Mi Lakh 19 vel NRC a jaolou hi adihlou tampi, jaosahdiloi kijaosahlou, ajaoloudi kijaosah kiti bolkhel tam dia Assam govt kisan’in jong atahsan ahi. Ahin hice Lakh 19 sang’a alhomjep hihen atamjo hijongleh alhom tinadi umlou ahi. NRC a jaolou mi hijat hi agam mi dihtah nahipoi tin nodoh in hung umtaleu itobang boina hungsoh di hitam tijong het thei ahijeng’e. Govt nin amatna ahung kondohna gam’a alesol sang’a ama macham’a jamdoh di kigo hung tam di ahi. Hiche jeh a Assam vel’a State umho kikhotopan u ahi. Mi hung jamlut aumdem tia gamgi hoa security akikoi vang’a mihem le sihmi tho akigentheipoi kiti ahijeh in ahung kithollut di ho chu lampi khatna hung kithollut thou thou diu ahi.
Mihem hina’a khat le khat kingailutna khat aumvang’a chi le nam, hou le beh thua kivetdana leh kitumbol tona hi hoilai gam hijongleh um sohkei ahi. Gam khangtoupen leh haosapen America (USA) a jong mikang sapte gam ahi tia alhomjo mivom ho vetdana jat khat hung kihaseipanta, Europe  le Australia a jong chutima hita, Pakistan a jong Hindu ho keu hilouva Muslim lah a jong Shia ‘denomination’ jui ho kivetdana um ahi. India a jong Hindu te gam le tamjohna ahijeh in imajouse atamjo te deidan hidi ahi ti chepi guotna khat hung umdoh ahi. Mizoram Mizo hon jong State sung’a Mizo hilou nam Bru leh Chakma ho athetbol ahi. Manipur a eilah a jong akhamchapbepma ama ama dei nam min chesahdi ti um jeh a kikhenna leh kitomona um ahi.