Khat gam’a chenlutdi ti (ST leh Forest Reserved tohgon nin atup pipen)

Khat gam’a chenlutdi ti (ST leh Forest Reserved tohgon nin atup pipen)

257
0
SHARE

Khat gam’a chenlutdi ti
(ST leh Forest Reserved tohgon nin atup pipen)
   Tengnoupal district a kiloikhomna ana kijakha behlou ‘Tribal Land and Resource Protection Organisation’ (TLRPO) hon Tengnoupal district a thinglhang gam phabep Lokchao Reserved Forest noija govt nin ahinkoi anung lahdoh louleh kiphinna’a Imphal-Moreh lampi August 24 a kon bandh boldiin ahinsei kit taove. Forest Reserved hi hoitah a akichepileh agam alhang’a cheng, agamnei ho tahbah in Reserved Forest sung’a thinglhang lei bol malah thingphung khat le ni tahbah jong asat/aphuh theiloudi, suong le nel leh gamga dang dang chung’a jong agamnei hon thu anei theilou di ahi. Khatvei veileh govt nin gambeh khat khat Reserved Forest a lahlut dia ahinphondohji hi thinglhangmi hon agam sung, ahaosatnao mun’a athaneinau kilahpeh jeng’a agel u hi adih ham, adihlou ham alang lang’a gelna (kinelna) umthei ahi. Phat masa lang jong chun Churachanpur district Thanlon sub division lang’a mun khat le ni Reserved Forest a govt nin anaphondoh chun atohkhah gam haosa hon agam uleh haosa ahinau thaneina (roght) kilahpeh abahsah jeng jeh un noplouna sangtah ananei uve. Forest Reserved gam kiti hi moh phatmo hidehlou, gamsung pumpi phatchomna dileh hintheina dia thingphung ho huhbitna, thing le go (bamboo) ho tu be thei thei tubedi ti ahijeh in aphamo hidehlou, agam alhang’a cheng le khosa ho di tahtah a phatchomna hijodidol ahi. Ahin agam alhang’a cheng gammang’a thil umhoa kihinsona lampang asuhboileh aboijo cheh khat hikit ahi. Akhoh dehset chu Forest gam, govt gam ahi tin agam mi hilou ho chenlutna thei lampi boldohna di tohgon hikha diham ti hi agingmo loi um tina ahi. Thanlon thinglhang kochong lang’a khun phaicham mi ho moh in gam le inmun kipe jongleh aga chengnom umlou maithei ahi. Ahin tua Tengnoupal district a Reserved Forest gam dia kisei mun hi itileh akichenglut theidem ti loi tamdi ahi. Gammang’a thingphung songphung ho huhbitna gambeh themkhat khat aum jong chu ngai mama kit ahi.
Leiset hi atebep ahijing vang’a mihem punbe jing jeh neo cheh cheh a gam kichuna’a boina jatjat umjing ahin phat le nikho che dungjuija hung haboi cheh cheh nalai di ahi. Khat gam iti lahpeh a iti chenlut thei diham ti hi politics thupipen hung hidoh ahi. Phaicham mi hon ST (Scheduled Tribe) hidi adeinao thupipen chu lhangphong’a aseidohlou vang uva thinglhang gam’a chenlutna thei ti ahidan sotna pat doh gehguh anahitan hiche thua tua jong kiphinna di phat ahingaldot pankit u ahi. Tutua Jamu & Kashmir (J&K) boina khucheng jong hi thudang jatjat kisei jongleh ajeh pipen loi hi State dang’a kon India mi hon J&K gam’a inmun achoh theilou, Business jong abol theilou jeh a hitobang kikhana daan hung kisuhmang jeh ahi. Tu Curfew umpet, mi potdoh theilou sung’a hi adondon’a inmun man (price) hung tam di ahitai tia ‘poster’ kitah jong um ahi. Thinglhangmi lah a koi nam mi ho gam joh, inmun loumun joh khohsalou ham ti ivetleh phaicham mi ho thinglhang gam’a cheng thei tadiu, inmun achohthei ahitai ahung kiti ni chu gam joh ija seploute agam u chomkah a hung kichai di ahi.