KHANKHO NAM GOU – By: ML. Haokip Former President, All Colleges Tribal...

KHANKHO NAM GOU – By: ML. Haokip Former President, All Colleges Tribal Students Organisation, Manipur (ACTSOM) (Dec. 5, 2015)

361
0
SHARE

Khankho Lamdenna :- Pathen sem vannoi jat le nam tampi lah a kukite namchon danle khandan kitup “Khankho” nei atam pon ahi. Pute le pate hon hiche khankho mangchan in khochen, Vengchen, lom, kut adang kilung toh in chamdel anakhosa vin, khankho neilou mi chu kiloi khomna (Society) ama le ama acham in anakipei in alha theipon ahi. Hiche eneiu khankho tun akinung vet leh pakai Jesu thuhil toh akibahna tampi muthei ahi. Hiche chondan mangcha un khosang, Vengsung ah Lutong, Bantong ana jom un, chule sei chammo umlou in pechal anatan un, Amitmo le amit theina dungjui in champi anasat un, “KHANKHO THEORY” Mancha un khosung chamdel in ana kivaipoh un, Hiche jeh chun kilung khatin Vannoi thang sapkangte 1917-19 in Kuki Rebellion gal anasat un, Tunin suhmil theilou ding in India chamlen galsatho lah a galdou sotpen tin thusim bu apang taove. Christiante Thuhil : Pute le pate in khankho pha anei vangun doibom, ju le sa pathen thu toh kitoh lou jeh in 1914 in Kukite in pathen hou patna ehin neitao un, ahin pei ding doibom, ju le sa bou chu hitalou vin Kukite chonna jouse jong kipeitha danin aum tan, Tu hin khankho thu akisei jongle pathen houtoh kikal abang tan, Ahin hiche khankho hi phatah akiche leh pakai Jesu thuhil ejat hamkhat gamsung, hengle kom le ule nao koma kitong doh san kagel e. Christiante khankho man :- Pute le pate khang lai in khankho kiman dan chu khosung meithai chaga, anei le aneilou kikhehna umlou in ana khocheng in phung, chang le houle beh thu akipha poh poi, Tuhin Christian ehikal u kum 100 ahi tan, Adeh in Paokhat tho kihe nam mite lah kiloi khomna houlam (Mission) KBC, KCC, ECA, TBA, Ch. B.A. dang2 tampi kikhenna aum tan. Houlam kai Rev. Dr. etc alunglhai lou chan in houlam kiloikhom na apung cheh2 tan. Ahin pulpita pathen thu asei tengule pumkhat hi pathen dei in asei kit un. Chule khamkho thu aseiphat ule phung lechang, insung thun akai un, eima lang ah meiche kithai gam ahi tan, Pakai Jesu thuhil le echon na dan khankho kaleh a lamkai, vaibol sang in. Tu nam din mun semphat angai chat phat ahi, eihou pathen le chonna dan toh kitoha hou lang (Mission) kipum khat phat in kagel e. ochen dan :- Khomun ding chu Thempu in ahtui phun asan a lonlhah dan avet a hiche phun phat dungjui a khomun asem jiu ahi, kho Haosa hiding chu phung gui leh abom sung uva mi upa khat chu, memo lheh jong leh Haosa ana tunjiu ahi, chule amakithopi din semang pachong ding akilhengin khosung a phungdang changdang chengho jong apang cheh un. Khosung akivo, akithat, gucha, lacha boina ho chonna le khankho in kitup tah in champi anasem un jolal le seilhah lal umlou in khosung vai anahom uve. Tuhin sum neiman, boltheiman ahilou leh Bible a Esau upat Jacob in alah pehe tiki. Eki Benglam under pan sip un. mitampin kho abol un. Neojo tampin jong a upa kho chu un. Haosat bol aki bejeng tan, sum le pai, election politic lunglut jeha kho moh bol2 ding hilou vin, Pute pate khobol, khochem dan veta bol pha hi louham! Pathen hou man a chonna dan le khankho hoitah eneiho moh geldau ding hilou in. Pathen ehou nau toh kitoh chonna ho semhoi cheh2 phat ahi tai. Nadonse lou laise namchonna seh napei lhah hilou in Pathen in namkhata nasem na jong nangle nang kipam pei tabang nahi. Ka namdinga epibol thei ham! ti gel taote. Nam khankho :- Nam khankho le nam khonung gel a Pu le Paten gam le nam huhna a thisan ana phel taovin, Amaho khunung hin jui, nam sepai hon kum tampi manchah choiun ahung kiphin un, Nampin etih leh kitha, kimat apha dem ana kigal dot e. Vangphat umtah in 2004 in Govt. of India noi ah Suspension of Operation (SoO) ahin nei un. Ahin SoO sunga demand kibah lou jeh in namdinga ima pengdoh thei lou vin kum 10 val ahung chetan kito in Govt. a donbutna umthei lou hi mipin in jong akipo na lheh e. Vangset umtah in Manipur Assembly in Bill- 3 pass ahin bol un. Thinglhang gam sukha thei ahiphat in Thinglhang gam adeh in Churachandpur ah galhang hangsan mi 9 gen in gam le namhuh nan hinkho anaphel taovin. Gamsung ima cha umthei talou in lhakhat val chetan, kiboh louna tampi um jongleh Pathen thu toh kitoh le Nam khankho ding gelin 26th Sept. 2015 nikho in nam sepai KNO le UPF in Demand khat (State) neitah ding akiphat sah un. Hiche nikho hi Kuki nampi dingin haimil thei lou nikho in kagel e, Nampi ding milestone Pumkhathi nikho kipa aum lheh e. Ahin gel ding khat chu Nam sepai KNO leh UPF akipunkhom tai tia kipa ding hilou in! kipum khatna ahat chehna dingin Nam chonna le khankho aki ngailutna man chah ding, nam sepai ho model support cheh ding, Tribe thu le adang2 Seitah louva “Nation” Kuki hi State leh National Level gei a hatsah ding ngaichat laitah ahi. Hiche na ding in hou kiloikhomna le Civil Society aumho kibah louna 50/50 lelhah ding, Nam khathi na kipum khat na lampi jot phat hitalou ham! Nang, kei ti kikhan na ho pailha hitin thakhat in pheiphung son taote.