KCA vs KIM hikit ta (Songphu thua akicheh malah kikaltona umbe)

KCA vs KIM hikit ta (Songphu thua akicheh malah kikaltona umbe)

759
0
SHARE

KCA vs KIM hikit ta
(Songphu thua akicheh malah kikaltona umbe)
Kuki haosa ho kiloikhomna – Kuki Chiefs Association (KCA), Manipur hon Anglo-Kuki War lumsong kiphu thua kikhopna ananei naova Kuki Inpi Manipur (KIM) hoto govt kinop tona kahepha pouvin kapom pouve tiloi ahung umkit chu govt to kikah a kiboina khat chung chon’a Kuki ho sung’a kiboina khat hikit ahitai. Achesa October 24 (2019) ni’a KIM le abahkai ho jaona’a kihouna ana aum’a kinop tona thupipen chu October 16 ni’a “nampi lumsong” chung’a thucheng kijih khel ding, lahdoh dinga kisei chu pha akisai ti ahi. Ajing (Oct 25) nikhon KCA hon kikhouna ananeipai kit nun song chunga thu kijihsa kheldi, lahdohdi kiti chu kipom ponte ti ahikitne. KCA ho kihouna leh kilolna chun KIM hi haosa ho kiloikhomna ahi tia kisei chu lahlou aso ahitai. Tua hi Anglo-Kuki War Centenary song kiphut chung’a thucheng kijih dihle dihlou thu jong hahi talouva kiletsahna thu (ego factor) lang joh a chedoh kigodan ahitai. Hichu, Koi ho hamkhat nin thucheng kiladoh hen tia asei man’a kiladoh ponte ti jong khat, KIM hon haosa jousen akho akho cheh uva Centenary song aphu diu keu hilouva athucheng kijih di jong aseithau dung juija haosa hon jong seingai tah a song aphu u chu tua nalahdoh diu, thucheng nakhel diu kiti kit hi thangtomna’a alah udan ahi. Song kiphut ho chung’a thu kijih lahdoh di, kheldi kiti chu State govt leh KIM/Centenary Committee ho kikah a kinop tona khat jeh ahin KIM /Centenary Committee hon amaho macham cham’a asuh atung asei ujong hidehlou ahi tia hilchetna jong aum’e. Hiche thua Kaikong hi hung kiholdoh jongleh lithuh lang’a kikholut jel di ahijeh in hasei jong ngai taponte. Ahin thil khat iboldileh inung ima ijet ivei vet jepna umlouva khat le ni’n atouna a adeidei aseija akisol hon jong ‘Military’ (sepai) kivaipohna bang’a “hiche vang chu” ti umlouva amoh bolphut kitji jeh a asohlou loudi soh a aboilouloudi boiloji ahi.
Centenary song hihen, kapu kapa gam hilai lai ahi tia muntin ah song kiphut jongleh gamtum, kivaipohna tum muna dia gamgi a pangdi jong hinaisai dehlou ahi. Hiche sang’a akhohjo chu itoupha jouna gam le lhang ho iki huhtup jouleh igam kihetna gamgi hijeng ahi. Akhohsahdi joh kiboipi louva angai khoh loulouva kikisalelji hi boina kondohna bep hiji ahi. KIM/Centenary committee honjong doh thei thei adoh uva kihoumatpi thei thei akihoumatpiuva nam thalheng’a govt to kihoulhahna khat anei u ahitahleh mipi’n jong jui jeng thei hilou diham ti ahi. Meilhei leng sepai lamkai holeh Jadonang leh Gaidinliu hetjingna leh jana’a state govt nin Imphal khopi sung’a Park asem’a Holiday jong aumtheileh British te ana kidoupi Kuki haosa ho jana leh hetjingna dia jong govt nin ipihamkhat beh bolpeh hen ti hi hilai mun’a jong kiseijing khat ahi. Tuchung’a govt nin hiche ahinphatsah leh “hichuba ahi akidei chu” tididan ahi. Ahin song chung’a thu kijih ho lahdohdi ti toh kikhutlhehna umdi ahung kiti jeh a kichapang ngolbolna tojong kilou kit ahi. Abul’a pat govt sehseh in achamtah a thucheng kijih ho chung’a deimona ananei hileh kheldi khohsalou tam maithei chu atilse hung umjeh a hung choh jejudan ahijeh a anomlou umlo tina ahi. Ahin thucheng kikhel jongleh igam ikho kichanlodi jong hidehlou ahi.