Kani lei kibol thu’a Kangpokpi district akon haosa holeh Police hon kihoukhomna...

Kani lei kibol thu’a Kangpokpi district akon haosa holeh Police hon kihoukhomna nei

190
0
SHARE

Kani lei kibol thu’a Kangpokpi district akon haosa holeh Police hon kihoukhomna nei

Imphal, Sept 15(ET): Tuni chun L.M. Khaute, IPS, Director General of Police lamkaina in Kangpokpi district sung’a kho haosa 16 toh Police HQ mun ah Kani loulho ngahthei nading lampi gelkhomna leh akhel a kivahna thei ding lampi dang thu’a kihoukhomna ana um in ahi.

Hiche kihoukhomna chu L.M. Khaute, Director General of Police in ana lamkaiyin chuleh Senior Police Officer phabep hetthei pan la ho chu Ashutosh Kumar Sinha, IPS, Addl. Director General of Police (Int.), Manipur, Lunsieh Kipgen, IPS, Inspector General of Police, Zone- III, K. Radhashyam Singh, IPS, Inspector General of Police (Int./NAB), Manipur, K. Kabib, IPS, Deputy Inspector General of Police, Range – III, H. Jogeshchandra Singh, IPS, Superintendent of Police, Imphal East District, Manipur, Hemant Pandey, IPS, Superintendent of Police, Kangpokpi District, Manipur chule W. Basu Singh, MPS, Superintendent of Police, Narcotics and Affairs of Border, Manipur ho ahiuve.

Hiche kihoukhom na a chun ahungkhom haosa hotoh lunggil tah a lunggel seikhomna jong ana um in ahi. Manipu Police Department in dan in aphalou hiche Kani leh ganja lei bol angah uva, drug free state hidohna thei ding a police ho a kithopi jing diuvin ahung kikhom haosa ho temna ana neiyun chuleh ND&PS Act leh dan thua kihilna jong ana neiyun ahi.

Hiche phat sung in ahungkhom haosa honjong ahahsat nau thu tampi aseidoh un, hiche toh kilhon a kihinso nathei ding lampi dang khosung mite dinga gon ahi ding angaichat dan u aseiyun ahi. Hitoh kilhon a kho tin a lamchom chom a kihinso nading toh kisaiya agamkai Superintendent of Police toh kijato jing diuvin thumopna jong aneiyun ahi.

Kihoukhomna hi jinglam nidan 11:30 a ana kipan ahin nilhah lam nidan 1:30 chan gei ana chelha in ahi. Hitobang kimuto a kihoulim khomna hi Kani/Ganja lei bol a neh kihol kho tin a haosa jouse toh akibol chai tokah a tanglou hel a kibol jing ding ahi. Chuleh hitong kikhoukhomna hi ahunglhung ding September nisim 17, 2020 jinglam nidan 11.30 leh PHQ, Manipur a umkit ding ahi.

XXXXXXX

India a Covid-19 natvei Lakh 49 lhingta, thina toh athah 1,054 aum toh lhon a agom a mi 80,776 hita

New Delhi, Sep 15: Union Health Ministry thulhut in aseina achun tuni chun India gamsung ah covid-19 case thah 83,809 akimudoh toh lhon in tuhin hiche natna veikha mi 49,30,236 alhingtai ati. Tu dinmun hin mi 38,59,399 ho adamdoh utoh lhon in recovery rate jong 78.28 percent aphatan ahi.  Tuni chun hiche natna jeh a thina toh mi 1,054 aum toh lhon in agom in mi 80,776 hon thina atoh tauvin ahi. Tuhin gamsung ah active case 9,90,061 aum in ahi. August 7 nichun hiche natna vei lakh 20 apha in August 23 nichun lakh 30 apha in September 5 nichun lakh 40 aval in ahi. ICMR in aseidan achun September 14 chan chun sample 5,83,12,273 test akibol tan hiche lah achun 10,72,845 sample chu janhi a test kibol doh jat ahi ati.

Hiche natna jeh a damdoh hi gamdang to tekah in India gamsung a atampen in aban a Brazil athum channa ding a US ahi tin Johns Hopkins University thulhut chun aseiyin ahi. Tuhin India hi hiche natna nei tampen gam ani channa ahi in US hi akhatna in aum in ahi.

Tuni chun India gamsung ah hiche natna jeh in mi 1,054 ho thina atoh uvin hiche lah achun Maharashtra state akon mi 363, Karnakata state akon mi 119, Punjab akon mi 68, Uttar Pradesh akon mi 62, Andhra Pradesh akon mi 60, West Bengal akon mi 58, Tamil Nadu akon mi 53, Madhya Pradesh akon mi 29, Delhi akon mi 26, Haryana akon mi 25, Chhattisgarh akon mi 18, Gujarat le Jammu and Kashmir akon mi 17 cheh, Kerale aleh Uttarakhand akon mi 15 cheh, Rajasthan leh Goa akon mi 14 cheh, Assam akon mi 13, Odisha kaon mi 11, Telangana akon mi 10, Bihar leh Puducherry akon mi 9 cheh, Tripura akon mi 7, Jharkhand akon mi 6, Chandigarh leh Himachal Pradesh akon mi 5 cheh, Sikkim akon mi 2, Andaman and Nicobar Islands, Arunachal Pradesh, Meghalaya le Ladakh akon mi 1 cheh ahiuve.

India gamsung a ding in tuni chan in mi 80,776 hon thina atoh uvin hiche lah achun Maharashtra state sung a mi 29,894 hon thina atoh uvin, Tamil Nadu state sung a mi 8,434, Karnataka state sung a mi 7,384, Andhra Pradesh state sung a mi 4,972, Delhi sung a mi 4,770, Uttar Pradesh state sung a mi 4,491, West Bengal state sung a mi 4,003, Gujarat state sung a mi 3,227, Punjab state sung a mi 2,424 chule Madhya Pradesh state sung a mi 1,791 hon thina atoh uvin India gamsung ading a thina toh tam state ho chu ahiuve.

Xxxxxxxxxxxxxxxxx

CMO Churachandpur in Henglep PHC a natong ding gongdoh ta

B.Lalboi Gangte

CCpur. September 15 (ET): Dr. Vumchinpau Tonsing, Chief Medical Officer (CMO) Churachandpur in ama noiya  Primary Health Centre (PHC) Henglep a tong, Staff 4 ho Covid-19 jalaithang a natgol toh kisei a mopohna ho jouse  aladoh in, PHC Henglep hopsung a kho chom chom hon tahsa damtheina toh kisai a hahsatna ato hou vekol ding leh PHC Henglep mun a kaum  naove ti het nading’a  Hapta seh’a Geotag limlah thot ding in hetsah na ape in, PHC Henglep a tong staffs ho ahileh  Dr. Robinson Lalawmpui, Medical Officer in-charge, PHC Henglep leh PME in-charge, Dr. Kaisiankhai Haokip, Medical Officer, Y. Jibanlata Devi, Female Health Supervisor leh Kimcha Chongloi, ANM ho ahiuve. Amaho chu tuni, September 15, 2020 akipat PHC Henglep  vekol dia Covid-19 toh kisai a mopoh naova kipat lhakang in aum uvin ahi.

Hiche thu’a Kuki Students’ Organization (KSO) Henglep Block in Chief Medical Officer panlah na kipapi ahi dan atahlang uvin, hitobang thil aum thei na dia CMO leh mopoh nanei thunei ho panlah na kipapi nan PHC Henglep a Medical staff hon PHC hopsung’a mipin damtheina toh kisai a ngaichat aneihou kitah tah’a toh bulhung ding in ngehna abol in, Covid-19 hit lang toh  kisai vesui ding in medical staff tamjo amaho posting mun apat lahdoh in aum in, CCpur district headquarter a Covid-19 hit leng vekol dia jah ahi dungjui a thinglhang kochong  mun khenkhat PHC a natong umlou in aum uvin, kijotmat tona lamlhah na lampi hoilou jeh in Henglep gamkai mipin nasatah in genthei hahsat athoh dehset in, tahsa damlou 5 lang mang in mihiem thahatna toh Gari lutthei na chan pohdoh in aum ta in, hijong leh  vangphat umtah  in damlou vetkol dia poh a um jouse, koima thina toh umlou in adamdoh soh kei uvin ahi.

 xxxxxxxxxxxxxxxxxxxx

MLA Leishiyo Keishing  in CM Advisor leh Chairman EC akon haina nei

Imphal, Sept 15(ET): Tule tu a 43-Phungyar constituency (ST), Kamjong district a sitting MLA Leishiyo Keishing in achesa September nisim 11 nikho chun Estimate Committee Chairman leh Advisor to Chief Minister ahina panmun akon haina lekha ana pelut tan ahi. MLA Leishiyo hi advisor to Chief Minister dinga former cabinet minister Th Shyamkumar toh achesa May nisim 15, 2020 nikho a lhendoh a ana umlhon ahi.

Hitoh kilhon chun ruling BJP toh alliance nei Naga People’s Party (NPF) Manipur state unit akon PHED minister L Dikho leh NPF Manipir state president Awangbou Newmai chu achesa May 29, 2020 chun CM N Biren Singh-lamkaina BJP coalition government a minister panmun phabep peh in ana um un ahi.

Alangkhat ah Manipur Legislative Assembly a Hill Area Committee Chairman kilhen nading in ahunglhung ding September 16, jingkah lam nidan 11:30 a um ding ahi tin achesa September 9 nikho a Governor of Manipur thuso chun aseiyin ahi.

Xxxxxxxx

NPP sung boina beilou; Conrad Sangma in NPP Manipur unit kihuitum ago e: Thangminlen Kipgen

IMPHAL, Sept. 15(ET): BJP-led coalition government sunga party poimotah leh mun ong lentah huhbing a pang National People’s Party (NPP) Manipur unit ho kikah a kiboina hin khohsetna ahin manojing tan ahi.

President panmun a athahbeh a lhendoh a um Thangminlien Kipgen min a thusodoh kimun atahlah na achun party national president Conrad Sangma in Manipur gamsunga party hi coup bolding agong e tin ngohna aneiyin ahi.

Party sunga boina hi Sangma in Thangminlien chu party constitution toh kitohlou vin achon e tia ngohna aneitoh kilhon in paidohna ahin nei in coalition government a NPP minister khat N. Kayisii chu state unit president a ahin lhen doh akon in ahung khohse cheh cheh in ahi.

Sangma natoh lethuhna in Kipgen injong N. Kayisii chu party kal na in na atonge tia ngohna aneitoh kilhon in party primary member ahina a kon in ana khalha kit in ahi.

Chuleh achesa September nisim 13 nikho a Sangma in state ni 2 sung vilna ahung neina a chun avel in Kipgen chu party constitution apalkeh e ti in paidohna anei chu avel in namdetna ana nei kit in ahi.

Thangminlien Kipgen, state unit president tia Sangma thusei donbutna thusodoh abolna a chun, Meghalaya chief minister in aum talou apa PA Sangma chu party founder ahi ati hi Manipur a kona National People’s Party acham a ama thuthu a bolding leh cuop bol ding lunggel anei jeh a aum talou apa chu NPP founder a akoi kigot ahi tin Thangminlien Kipgen min a kiso thuphondoh chun aseiyin ahi.

Party hung kisemdan thu aseina ah, NPP, Manipur hi achesa 1989 kuma ana kiphutdoh a K Brajamani Dev Sharma chu amasa pen dingin president anatuh in, Thangkholet Kipgen chu founder vice president leh L Shital chu founder secretary in anapang uve ati. Achesa 1990, 1995, 2007 leh 2017 laiya Manipur Legislative Assembly a election kai keuseh hilouvin minister jong phabep ana kineiyin ahi. Hinla Election Commission of India (ECI) in achesa 2012 chun political party dinga anempen a hinathei ding lhin na ana kinei lou jeh in derecognised ana bol in ahi tin Kipgen in aphongdoh in ahi.

Hinla, party in 2007 general elections chun account aki vel hon kit in, Manipur Legislative Assembly a candidate 5 lah a 3 in lolhinna ahin nei toh kilhon in ECI in NPP chu  Manipur sunga state party khat in recognised chu May 5, 2017 nikho in anabol in ahi ati.

Kipgen in aseibe na ah PA Sangma, NPP founder ahi tia kigel pa hin former Lok Sabha Speaker leh NCP Leader lui khat in NPP leader khat temna abol sanpeh ahitoh kilhon a party a lahlut a ana um bou ahi ati. Hitoh kilhon a Meghalaya a NCP MLA leh party organization leader leh worker phabep ama lamkaina a NPP a August 2012 a chu Shillong, Meghalaya mun a merged ana bol u ahi. Hiche jouva pat party a national president chu September 15, 2012 apat ahin poh a ahin pilhinsah ahi. Ama(PA Sangma) tohphat jal in party in Rajasthan Assembly ah 2013 kum in seat 4 a galjona ana kineiyin, chuleh Meghalaya assembly ah hiche kum mama chun seat 2 ah galjona akinei in ahi.

Chuleh Sangma in party constitution amendment thu a asei Kipgen in adonbut na ah, party constitution amendment kibol aumpoi ati. Draft amended Constitution aminphah ho jong NPP state unit office leh ECI website a mujing thei ahi ati. Party president a avel a akilhen doh na thu hi party constitution toh akikal najong aum poi. NPP Manipur  Presidential election kibol hi party constitution Article No. 22 na a ECI toh kijahmatna kineiya chuleh August 18, 2020 nikho a local newspaper ho a tahdoh ahijouva ana kinei ahi tinjong kipgen thuphon chun aseiyin ahi.

Amahi akitetpi umlou a state unit party president a ana kilhengdoh ahi in, NPP national president Conrad K Sangma in August 14, 2020 nikho a a DO letter a athusei  hin NPP Manipur unit anop chabep alo nom naleh cuop abolgot akilange tinjong atahlang in ahi.

Xxxxxxxx

Sahnit kiman thu’a KIM in Nam mipi heng’a kipathu sei

Imphal, Sept 15(ET): Kukite chonna ngai (custom) le thudih holdohna dia kumseh a ihin manjingu SAHNIT (Kuki Black Day) tukum 13th September nikho a jong muntin le gamtin, khotin, houbung tin chule insung tinna gelkhoh na neitah le lomtah a iman u thulhut kimu tolhonin Kuki Inpi Manipur in Kuki Nam mipite jouse adeh a pan la jouse chunga kipathu seijou lou ahung kiphong e tin Gouminlun Gangte, Secretary, Info & publicity min a kimu thulhut in aseiyin ahi.

Covid-19 hatlai tah hijongle gelkhohna le pohnat na jalla Govt’s SOPs Protocol/guidelines ho juipum a Kuki Inpi Churachandpur (KIC) gontup nanoija Sahnit Monument mun KIC Complex, Tuiboung, Churachandpur district a lomtah le lolhing tah a kingon achelhah nachunga jong KIC lamkai ho chunga kipathu akiseijin chule Tribe leaders Mizo People Convention, Hmar Inpuii, United Zou Organisation, Paite Tribe Council, Simte Tribe Council, Vaiphei People Council le mipi ahung pang ho jouse chunga jong kipathu ahung kiseije ati.

Sahnit kigon Kangpokpi Town, Gelnel vangkho, West Zoupi vangkho, HTC Moreh Town, Khengjang vangkho, Khongsai veng, Chassad vangkho, Saikul Town, Gamnom Camp le mun dang danga jong lomtah a akiman na chunga kipathu ahung kiphong in ahi.

SAHNIT kimang hi Koima chi le nam engkal na a kibol hilouvin sopi galla thiho lainat pile lunghem pi vetsahna, thudih a achungthu u gam vaipo (govt) in aphondoh nadiu chule Kukite ichon nau dihtah vannoi het dia tahlang na ding deisah na jalla ibollu ahi ti ihet soh keiju ahi tolhonin tuban a jong pan lajing dingin Kuki Nam mite jouse ikitem kit uve jong ati.

Aman aseibe na ah KIM in thuphon ana kinei tolhon a SAHNIT nikho a neitokhom (offering) boljousen KIM lamkai ho khut ahilou le noija kipe Finance Secretary pa Bank Account a peh lut na neicheh dign in jong temna aneiyin ahi.

Thongkam Haokip, A/C No. 39537699464, IFSC: SBINOOO6484, SBI Kpi Branch, Contact : KIM Prez : 9402439156; Fin. Secy : 7085820780

XXXXXXXXX

AMHDMEA ngeh na KSO in tosotna nei

Kangpokpi, Sept 15(UNA): Kuki Students’ Organization Chandel District in state Government heng’ah All Manipur Hill Districts MGNREGS Employees Association thil ngeh ho akinthei lam pen a agelkhoh pehding in adeisah dan ana phongdoh un ahi.

Thusodoh in aseina ah All Manipur Hill Districts MGNREGS Employees Association hon government heng’ah MNREGS employees ho service regularization hisah nadin ngehna ana neiyun ahi.

Thusodoh in aseibe na ah, Valley sunga achesa kum 4 akonin MGNREGS employees ho jouse regularized ahi tauvin hinla hill district ho ah hitobanga service regularization hisah nadia tohgon imacha aum naipon ahi. Hitobang sihnei langnei na nei tah a na kitong ho hin thinglhang leh phaicham kikah a kiguijopna ahin suhtan thei ahi tinjong atahlang in ahi.

Chandel District staff hon achesa khum phabep apat in thaselou hel in MGNREGS MIS works ho hihen, chuleh job card neiho adia tohmun umtheina hi ding hijong leh amaho panmun hi apoimo loitah khat ch ahi. Hinla, hill district MGNREGS employees hojong kum sottah hahsatah a natong jing ahiuvin, service regularization a bolpeh ahidiu hi kilomtah ahi. Hitoh kilhon a All Manipur Hill Districts MGNREGS Employees Association ho thilngeh hi ahiding dol tah jong ahi in chuleh kiloikhomna in jong aphat dungjuiya kithopina kipe jinhding ahi tinjong KSO Chandel thuphondoh chun atahlang in ahi.

XXXXXXXXX

Arunachal Pradesh CM Pema Khandu Covid-19 positive kimandoh

Itanagar, Sept 15: Arunachal Pradesh chief minister Pema Khandu chu test akibolna akon in Covid-19 positive ahi hetdoh ahitoh kilhon in amale ama self isolation in ana umpai in ahi.

“Covid-19 test RT-PCR kakibol jouvin positive kahi hetdoh in aum in ahi. Natna leh thogimna imacha kaneipon, katahsa jong adamsel nai” tin CM pan ana phongdoh in ahi.

Chuleh SOP leh midang ho damtheina ding khohsah na jal a self isolation a um ahidan leh koitobang aki tohkhah pi jouse SOP dungjuiya umcheh ding in temna CM Khandu in aneiyin ahi. Khandu hi state health minister Alo Libang positive ahi matdoh ahijou ni 2 jouva positive ahi hung kimandoh ahi.

Hapta masa chun CM Khandu in thinglhang kho gari lutlouna mun nidan 11 sung 24km a gamlha a um kho a mipi ho vil a kenglam a ana kondoh ahi. Achena mun hi sea level akon a 14,500 feet a sang tou ahi. Security khat bouseh leh khomite mi phabep in aki lhonpi a Tawang mun a ama Constituency Mukto hop sunga um Luguthangmun jon a mol le lhang lampi hoilou tahtah leh kol selah leh guom thuh tahtah ana jot a vilna ana nei ahi. Adamdoh 4,531aneiyin chuleh tina toh agomin mi 10 aphatan ahi.

Xxxxxxxxx

Manipur a  COVID-19 Positive case kimube jingtoh kilhon a agoma 8000 lhing ta; athi 47 lhing ta

Imphal, Sept 15(ET): Manipur a Tuesday nikho a mikhat in COVID-19 jeh a thina atuo kit toh kilhon in agoma thina toh mi 47 aphatan ahi. Chuleh natna athahbeh a Central Armed Police Force ho mi 15 panna in mi 239 ana kimudohbe kit in, agomin state sunga positive cases 8,210 alhingtai tin health department thuphon chun atahlangin ahi.

Achesa nidan 24 sung chun Imphal West a um kum 69 vel mipa khat in RIMS munah COVID-19 jeh in thina ana muolliem kit in, hitoh lhon chun COVID-19 jeh a thina toh mi 47 alhit tan ahi tin official thuso chun aseiyin ahi.

Tunia kimandoh mi 224 ho hi milham leh travel history neilou ngen ahiuvin ahi. Mi 148 ho hi Imphal West akon ahiuvin, 43 ho hi Imphal East, 14 ho hi Bishnupur, 5 ho hi Thoubal,  4 ho hi Kakching, Ukhrul Churachandpur akon mi 3 cheh, chuleh 2 Tengnoupal leh Tamenglong a kon mi 2 cheh ahiuvin ahi. Tuhin Covid Care facilities a koi ahitauvin ahi.

Alangkhat ah, CCC mun chom cheh a kon in mi 78 discharged ana kiboldoh in ahi. Amaho chu – CCC lamboikhongnangkhong a kon 54, CCC Morey a kon 15, CAPF a kon 6, CCC Lamding Thoubal a kon mi 2 leh RD wing a kon mi 1 ahiuvin, RT PCR test kibol jouva negative ahiu photchen ahiutoh kilhon a discharged ana kibol ahiuvin ahi.

Tuchan geiya positive cases kimudoh jat agomin mi 8210 (Milham – 6365 leh Central Security Personnel – 1845) apha tan ahi. Adamdoh jat agomin mi 6418 (Milham – 4887 leh Central Security Personnel – 1531) apha tan ahi. Tule tua active cases hi 1745 (Milham – 1434 leh Central Security Personnel – 311) ahi in recovery rate hi 78.17% ahitan ahi.

Anoiya helpline numbers ho hi 24×7 a umjing ahi : Covid Common Control Room Number-1800-345-3818, Psychological Support Number – 8787457035, 9402751364, 7629943596 leh Hospitalisation Number – 1800-103-2015, tinjong thuphondoh chun atahlang in ahi.

Xxxxxxxx

Kichepna meithal a kinapped bol mi 4 kimandoh

Imphal, Sept 15(ET): Tuni nilhah lam nidan 6:30 vel chun Thoubal police hon mi 4 ana mandoh un ahi. Akimandoh hochu – Thangsabam Deepak Singh (41 yrs) s/o Brojendro Singh of Uripok Takhellambam Leikai, Sinam Surjakanta Singh, (20 yrs) s/o Ingocha Singh of Salungpham kangyambem Mayai Leikai,  Maibam Vladimir @ Thoiba (21 yrs) s/o Noren of Salungpham kangthokchao maning leikai, leh  Samurailatpam Bishwanath Sharma, (29 yrs) s/o Parikhit Sharma of Ukhongsang Mayai Leikai from Lamding Khumanthem Leikai ahiuve.

Akimandoh mi 4 ho hin chapang ho kichepna meithal mangcha a Khumanthem Sureshbabu Sungh(36) s/o Kh. Subol Singh of Khumanthem Leikai kidnapped anabol jeh uva matdoh a um ahiuvin ahi. Hitoh lhon chun Thoubal PS ah case jihlut in aum in ahi.

Xxxxxx

AR in khamnathei kivui ana mudoh u

Chandel, Sept 15: Thuguh amu dungjui uvin Chandel Battalion Assam Rifles hon Myanmar lam akon khamnathei hung kipoh lut thu ana jah utoh lhon in New Songyang le P. Chehyang lhang sung a khol chil na le vetchil na ana neina uva khamnathei tamtah kivui an alai doh uvin ahi.

Hiche khamnathei ki laidoh chu dangka lakh 3 lam man ahi akiti. Akilaidoh lah achun Myanmarese Godzilla Anti-Mosquito Coils, kuwa naa kg 700 lam le Myanmarese Diablo beer can ho ahi akiti. Akilai doh thil ho chu Molcham police station a pehlut na ana kinei tan ahi.

Xxxxxxxxxxxxxxxxxxxxxxxxxxx

Minister Dr. Radheshyam in MSCW 14th Foundation nikho a Themjil namun thua hou limna nei

Imphal, Sept. 15(ET): Dr. Thokchom Radheshyam Minister Education, Labour and Employment in tunichun Manipur Commission for Women (MSCW) 14th foundation day kiman na ah mipi hin dan kisem ho mimal cheh a ahet angaiye tin ana seiyin ahi. MSCW kingon hi Kombirei Conference Hall, D. C. Office Complex Imphal mun a chelha ahi e.

Aman asei na ah ipi thu le la hijongleh crime kiti phot phot hi mipi, milham hijongleh police station a lhut thei ahi e, ati. Hinla mipi hohin hitobang lam hi ahe them pon hitolhon a hiti ho thudol mipi het thei a thejal a hetsah teiding hi apoimo pen khat ahung hi tai tinjong aseiyin ahi.

Dr. Radheshyam chun MSCW natoh na ho apachat naban ah Police Department kom a numei chung a khanset na apunna thua ki hilna ana neipeh chung ah akipa pina thujong aseiyin ahi.

Manipur sung ah hin numei leh pasal hihen houthua hihen jat le Nam kikah hijongleh hitobang a kimusit naho hi alhom e, ahin tunai lah kah ah hin numei ho chunga khanset na hi apung lheh jenge tinjong aseiyin ahi.

Tu le tua apoimo pen hi hitobang a khanset na neiho hi kholdoh ding gotna achan diuva lom peh ding hi mipin adeisah pen ahitai tin jong aseiyin ahi.

Gamsung a numei hohin Education Department lampang ah 70% tobang hi tohmun alo jouvin ahi, ati. Hijeh hin numei hohi social, political hihen lang economic lam hijongleh thaneina peh be angai e tinjong aseiyin ahi.

MSCW, Chairperson, Prof. (Dr.) Binota Meinam injong ahoulim na ah numei leh pasal health, education leh thil dang dang a kikheh na nei a aum adeilou thu asei in ahi. Numei hohin gamsung khantou nadia apan lahnau hi moh suhmil jengthei ahipoi, ati.

Lekha bu ‘Women News Horizon’ (Vol. -IV) thenso naleh ‘Gender Policy and Budgeting’ kiti lekha bu jong Minister pa khut ah pehlut ahi e.  Hiche kin a hi judge, district SP leh legal expert holeh civil official phabep jong apang un ahi.

XXXXXXX

Education Ministry in Academic Calendar thah hapta 8 sung adia phongdoh

New Delhi, Sept 15: Union Education Minister Ramesh Pokhriyal ‘Nishank’ in themjil na lam a danthah jui ding tunichun phondohna aneitan ahi.

Hiche hi ahung lhung ding hapta 8 ahop ding ahi. Hiche calendar hi syllabus akon a kiladoh simlai ho hetthei dia kigong ahi e tin Minister chun asei e.

Nishank chun aseina ah simlai ho phatchom na teiding tohgon akinei in minu mipa tenjong panla din temna jong aneijin ahi.

Hiche a calendar thah hi Hindi, English, Urdu leh Sanskrit jaona kisuh halna chom chom jong jaoding ahi. Minister chun aseibena ah mobile phone, radio, television leh sms ho mangcha a kigong ahi tinjong asei e.

Mi tamtah in Social media Whatsapp, Facebook, twitter leh Google ho amang joupoi, hijeh a chu class 9-12 ho hi September 21 a kipan  Standard Operating Procedure (SOP) COVID-19 danjui a kipan ding ahi tin Nishank chun aphondoh ahi.

Xxxxx

Bihar keh kheh jeh a mi 18 thi, 2020 Kum sunga 330 lhingjou

Meteorological Department, Bihar chun mipi ho chele vale moh bol lou din hetsah na anei in ahi. Ni khat ni 2 sung a hi go le hui kitho hatding keh jong khe dia ginchat ahi tin Meteorological Department chun aphong doh e.

District 10 huop sung a tuni keh kheh jeh in mihem 18 in thina ato lo tan ahi. Chule keh khe kihet na manchah hi Madhumanir, Katihar leh Gaya mun a koi ahitai.

Disaster management team ho jong mansa um dinga thupeh ahiuve.

Official thuso khat in aseina ah keh kheh jeh a thi hi june lha chan in mihem 100 avaltai, ati. Official hochun mipi ho tui umna mun lah, thingphung chuleh thih khom ho toh kinai a umlou din hetsahna anei un ahi.

Xxxxxxxxxx

RPF/PLA khat kimandoh

Imphal, Sept 15(ET): Tuni nilhah lam nidan 6:30 chun, CDO-IW team leh 15 AR ho kithokhom in Langol Shija Hospital lutna bul a Auto rickshaw parking komah RPF/PLA kiloikhomna a pang cadre khat ana mandoh un ahi.

Mat a umpa ahileh Yengkhom Gyandas @ Dinku @ Chaningkhom singh(23) s/o Y. Prem kumar singh of Pallel Mamang Leikai ahi in, ama hi RPF/PLA active member khat ahi in, chuleh kiloikhomna a hi achesa June, 2015 a chu Andro kho a melhet lou khat a akon a ana lut ahi in, Eastern Nagaland a SS 2nd Lieutenant Kuku noiya military training lha 3 aneiya chujouva army no. 3299 ana kipe ahi. Ama akiphon dungjuiyin tule tua RPF/PLA a S/S Major Dharmaraj command na noiya S/S Lance corporal panmun tuh ahidan jong aphongdoh in ahi.

Akimandohpa IIT a  R.A.T test a Covid-19 negative ahitoh lhon a Lamphel police station a pehlut ahipai in ahi.

Xxxxxxx

Ccpur a covid-19 case thah 5 kimudoh be agom a mi 771 in veita

B.Lalboi Gangte

CCpur. September 15 (ET): Churachandpur khopi sung’a Covid-19 vei nasatah  in akibe lap jing in, tuni injong Case thah 5 mudoh be ahitoh kilhon in CCpur District sung’a Case kimu doh jouse  771 apha ta in, tuni’a Positive Case thah 5 kimudoh nalah’a  mi 2 returnee ahi in, midang 3 ahileh Local mi kholjin doh na neilou ahiu vin,  Khol jindoh na neilou mi 3 positive case mudoh ahitoh kilhon in  tunichan khotol mi kholjin doh na neilou akipat Case kimudoh jouse abon in 94 aphata in, tuni’a Khotol mi Positive Case thah 3 ho ahileh  Headquarter Veng acheng 1, Koite acheng District Hospital ah ki-vetsah dia che 1 leh Bishnupur mi Samaritan Hospital a kivetsah dia hung jin, hiche lou in tuni’a positive case 5 kimube toh kilhon ah CCpur District sung’a positive case  771 aphata in, Covid-19 positive ho hetdoh nading a kijang Rapid Antigen Testing Kit akon in test 3958 kibol nalah’a  mi 249 positive mudh ahi in, adang ho ahileh RT-PCR akon’a positive ngen ahi.

Xxxxxxx

Khangabok Assembly Constituency a “Sewa Saptah” kiti hondoh na kin ana um

Imphal, Sept, 15(ET) Prime Minister Shri Narendra Modi kum 70 lhinna toh kilhon in hapta khat jen lutding kingon “Sewa Saptah” chu Khangabok Assembly Constituency ah tunichun hondoh ahi tai. Hiche kin hi September 14 a kipan a hapta khat sung chelha ding ahi.

Hiche kin hi BJP Mandal Khangabok leh BJP Karyakata leh Social Worker Khundrakpam Menjor Mangang ho kitho khom a agon u ahi.

BJP Manipur Pradesh Secretary Moirangthem Priyo Kumar Singh, Minority Morcha, Manipur Pradesh Treasurer, Md. Bahauddin, President BJP Thoubal District Yumnam Kumarjit Singh, Secretary BJP Khangabok Mandal Dr. Romenkumar Khundrakpam, General Secretary Organization, BJP Khangabok Mandal Ningthoujam Ramananda Singh hon kho get tah vilna jong anei uvin ahi. Hiche kho get hochu Khangabok Assembly Constituency sunga Athokpam, Nepra Company, Wangbal, Uyal, Sangaiyunpham, Lamding leh Samaram ahi.

Amahon PM Narendra Modi kum 70 lhinna aman nauvah PM pa jabol na in BJP Flag jong ana khaidoh un ahi.

Hiche kahlah chun Seminar a kon a kiladoh PM Modi thusim kijih na MMRC leh Unity Park, Khangabok mun ah SOP COVID 19 dan dungjuiya kisem juipum a chelha ahi.

Hiche kin ah chun Mangang in mipi khat le khat kithopi ngaiho kithopi cheh din temna jong aneijin ahi. PM Modi in mipi adia panpi na hihen lang ipi lampi hijongleh lam chom chom a pan alah hi mipin jong hopson angai e tin ana aseiyin ahi.

Xxxxx

NSA leh SCO kikhopna mun India in Kashmir map jeh a ana dalha

New Delhi, Sept 15: National Security Advisors (NSA) ho Shanghai Cooperation Organisation (SCO) in akou kihou na akon chun  Pakistan khel a hungpang pa chun Kashmir map dihlou a atahlah jeh in kihouna a kon India apotdoh lo tan ahi. Hiche meeting hi Russia in alamkai ahi in NSA Advisor Ajit Doval chun kihou namun chu anuse ahi.

Ministry External Affairs (MEA)  spokesperson Anurag Shrivastava chun aseina ah hitobang hi India douna ahilou leh kinoi sena ahi, ati.

Shrivastava chun aseibe na ah hitobang hi Pakistan akon a ginchat sa ahijinge tin aseiyin ahi.

Pakistan natoh hi SCO member hina le dantoh jong aki lhonpon India in hatah in adem in Russia in jong hiche map chu jang lou dia Pakistan ana thumop sa ahitai tin aseiye. Russian National Security Council of Federation Secretary Nikolai Patrushev chun aseina ah hiche Pakistan te natoh jeh a India in SCO kihou na apel loudin jong temna aneiyin ahi. Kashmir a Article 370 kilah doh jou a pat Pakistan hin Kashmir hi amaho gam dan a ana sei u ahi. Hiche map a chun Jammu leh Kashmir mun phabep jaonan Ladakh ahin Gujarat a Junagarh jong ajao e tinjong aseiye.

Hiche hin avetsah chu Pakistan hin chamna adeilou dan het thei najong ahikit e tin thuso chun aseiye.

Xxxxxxxxxx

Santhei National Park Songphu Andro kho mipin suse

Imphal, Sept 15(ET): Santhei National Park (Public Private Partnership) PPP a kihei doh got na thua Andro mipi hon foundation stone ana kiphut chu ana suse un ahi. Hiche song hi Chief Minister Shri N. Biren leh ex Forest Minister Th. Shyam Kumar in Manipur Tourism Department tohgon na noija ana thenso lhon ahi.

Santhei National Park a General Secretary Kh. Pishak chun thuso miho kom a aseina ah  government in hitobang tohgon nei a mipi dong lou a natoh anei hi alhangsung mipi kinoi sena ahi e, ati.

Hiche Park hi PPP model a heidoh nadia government in lekha anapeh ahi.

Government akon a hiche lekha hunglut hi akipom theipoi tinjong aseiyin ahi. Club chom chom jong aum in Meira Lup jong aum in khat pen pen koma hetsah masat na aumlou thujong aseiyin ahi. Hijeh chun Andro mipin kidou daljing ding ahi tin Pishak chun aseibe in ahi.

Hichea Park kisuh set got hi demna sangtah pepum a action kila ding ahi tin jong aseibei.

Xxxxxx

Ccpur dist a Routine Immunization chelha

B.Lalboi Gangte

CCpur, Sept 15 (ET): Naosen leh naovop ho tahsa damthei na ding’a Routine Immunization tuni jinglam nidan 10:00  in Simte Inn, Simveng a kingon achelha in ahi. Routine immunization hi chapang kum 16 noilang holeh naovop ho natna chom chom akon ahoidoh na ding uva kidonsah leh kikap je ahi in, immunization hoitah’a hin chai leh hinjui chapang chu chapang dang ho sang’a natna akon hoijep ahi.

Hiche Routine Immunization  kibol phat sung in Simveng, College Veng, Lailam Veng, Elim veng, Vengnuam, Hmuaia veng le Simveng sah le lhang ah Area  veng chom chom akon Chapang ho ASHA, Aganwadi Worker leh Medical Staff ho kithopina noiya Routine immunization achelha in ahi.

Hiche kin’a chapang kum 10 leh 16 kikah leh numei nao vop lai Tetanus akap uvin, chapang kum 5 ho DPT akap uvin, Vaitamin-A adonsah uvin, chapang kum 2 leh kum 4 kikah ho  Vitamin-A donsah ahi. Naosen lha 9 ho Vitamin-A donsah ahina ban ah  Measles-Rubella (MR) leh Japanese Encephalitis (JE) apoimo dungjui in akap uvin, Naosen kum khat leh keh ho DPT akap uvin, Vitamin A adonsah naoban’a  JE/MR apoimo bang in akap uvin ahi.

Naosen Lha khat leh akim akipat kum thum leh akim kikah ho OPV donsah ahin, Pentavalent leh IPV jong kap ahiuve. Naosen pengtil leh Lha khat kikah ho  BCG kap ahi ban a  OPV Zero dose donsah ahivin ahi.

Coronavirus Covid-19 lockdown  jeh’a CCpur  district sung’a Routine Immunization kibol na toh kisai  aphat ding kikhel aum jeh’a tuni’a kipan ahidan Droctor hon helchetna anei uvin ahi.

 xxxxxxxxxxxxxx

 AWCA tohgonna noiya Ponkhui dan training chaiho certificate le Ponkhuina kihomdoh

B.Lalboi Gangte

CCpur. September 15 (ET): Action for Women and Child Advancement (AWCA)  tohgon nan tuni sun nidan 12:00 in AWCA Office, Lailam Veng a Ponkhui dan hin jilchai ho Certificate leh Ponkhui na Machine pehdoh na kingon aum in ahi.

Manipur State Women Development Corporation (MSWDC), Government of Manipur sponsor nanoiya hiche kingon chelha ahi in, hiche kin’a  Grace Zamnu, MDC, Secretary, AWCA in  kingon kiman na aseiyin, 2010 kum a kiphutdoh Action for Women and Child Advancement hi Pathen panpi na jeh’a sangtah a dopsanga um ahin, Numei leh chapang natohna ding lungkham ho a dia natoh ahi. CCpur District sung’a Human Trafficking toh kisai vesui dia mopoh na peh ahiban a Childline Sub-Centre khat District Administration in mopoh na  apeh dungjui’a AWCA vetkol ding’a One Stop Centre khat kihongdoh aum ahi ati. AWCA hi  Legal Aid Clinic ahi ban’a Charitable School khat kinei a hiche akon’a Chapang 40 tobang vetkol aum ahi. NERCORMP Project noiya jong Partner khat ahi dan aphongdoh in, hichan hamphatna akimu akon’a AWCA tohgon na noiya Ponkhui dan jil jouse, Legal Awareness kineipi jing ahi in, hiche phatsung ho’a Human leh Child Trafficking, POCSO Act. kiti ho kihilna kipe ahi jong ati.

Hiche kin’a  Pawan Yadav, IAS, Deputy Commissioner, Churachandpur leh N. Binod, District Social Welfare Officer kom’a kipathilpeh na AWCA in anei uvin, Rev. PC Manga, Pastor, Lamka District, ZPCS in Trainee holeh AWCA adia Pathen kom’a vangthum peh na aneipeh in, DSWO, Binod in Ponkhui na Khol hopdoh ding ho government in percent 70 subsidy dan apeh ahi dungjui’a Machine chang  ding hon percent 30 apeh u ngai ding ahi ati.

Training phat sunga jong Lhakhat a stipend Dk. 300 amu u ahidan atahlang in, AWCA in hitobanga Training batch 2-na chan lolhing tah’a chai thei dia aumna chung va kipapi nathu aphongdoh in ahi.

Hiche Training  hinchai ho ahileh embroidery a mi 8 leh Tailoring ah mi 12 akigom ah mi 20 ahiu vin, amaho kom’a  DC leh DSWO hon Certificate pehdoh na aneiyin ahi.

Pawan Yadav IAS, ahoulim na, AWCA lamkai ho kipeh jou najeh’a natoh doh tamtah anei uhi thupi asah thu atahlang in, Training jouse lah’a Ponkhui na Machine pehdoh a um ho, kiman chah na vetlhah ding  agot u akipapi in, AWCA Secretary, MDC pi injong ginchat sang’a tohdoh mitmu thei in tamtah aneiyin ahi. Covid-19 jeh’a khangthah toh na nei tamtah in atoh nao dalhan innlang ahin bel dungjui uva Ponkhui na Machine hopdoh a um hin phatchom na lentah anei  ahi ati. Hiche mun’a Ponkhui dan jilchai a lolhing tah’a  neh hol na a mang ho akon’a numei dinmun dopsang na khat ahi dan aphongdoh in, CCpur District mipi adia maban’a “Blooming” kiti kitet na khat gon hiding ahi ati.

Hiche ading a Category thum aum in, Category  jouse’a First in kipaman Dk. 15,000/- Second in Dk. 12,000/- leh Third in Dk. 10,000/- asan diu ahi. Hiche hi Covid-19 jeh’a Lockdown kiphon ahi sung’a  Muchi leh pahcha bol dan toh kisai hiding ahi ati.

Xxxxx

Lok Sabha in MP ho lhalo 30% a suhlhom ding a bill passed bol

New Delhi, Sep 15: Tuni chun Lok Sabha in Members of Parliament ho lhalo chu April 1, 2020 apat chu 30% a suhlhom ding in bill a passed tauvin ahi. Union Cabinet in Members of Parliament Local Area Development Scheme (MPLADS) Fund 2020-21 chule 2021-22 kikah a ho chomkhat suspend ding in jong phatsahna anei uvin hinlah hiche thu a kinielna ajao Congress lamkai Lok Sabha Adhir Ranjan Chowdhury in MPLADS fund hi akintheipen a umsah kitding in asei in ahi. Adhir in aseina achun MPLADS a 83% sum hi khosung ho semphat na a kimang ahi ati. Amravati akon Independent MP Navneet Ravi Rana in jong MPLADS fund chu suspend bollou ding in apang in hinlah ajou dehpon ahi. Aman aseina achun MPLADS sang in ka lhalo jouse uhi kilah uvin lang development fund vang tongkha hih uvin tin apang in ahi.

Parliamentary Affairs Minister Pralhad Joshi in aseina achun Covid-19 jeh a gamsung neh le chah hihen lang sum le pai dinmun hijong leh ahoilou jeh in thulhutna chuom jep lahding a pha ahi tin asei in MP ho lhalo 30% a suhlhom ding phatsah ho chung a kipathu aphong in chule kithopina hi inmun akon kipan ding ahi tia akisei toh lhon a Rajya Sabha toh Lok Sabha akon akipat hi kakipah ahi ati. Government in Garib Kalyan Yojana noiya manchah ding dk. 20 lakh crore special package chule 1.76 lakh crore package aphong doh tan chule MNGEGA nikhotha jong aki kalsah in chule MPLADS toh kisai a thulhutna kibolho jouse hi kum ni sung hiding ahi ati.

Xxxxxxxxxxxxxxxxxx

Twi pipe kisem na chung a Moreh sung kiloikhomna ho kithopina akingai cha in ahi: AE PHED Tengnoupal

Tengnoupal, Sept 15(ET): Moreh khopi sung a twi hah toh lhon a twi peh na ding pipe ho ahung lhun tah toh lhon a pipe ki lhun an natoh naho ahin Moreh khopi sung a mipi kiloikhomna ho panpai akingaicha in ahi tin Y.Bashanta singh A/E  PHED Tengnoupal division in hetsah na ahin nei in ahi.  Tu le tua hi Moreh ward no. 1 le no. 9 a um tank akon highway chan a kisem akichai tah toh lhon a maban a ward dang ho kilhun na ding ahin panpi na ngaichat ahi tin AE pa chun hetsah na ahin nei in ahi.

Xxxxxxxxxxxxxxxxxxxxxxxxxxxx

China sot tah kidin te pi thei ding a Indian sepai ho in kigotna nei ta

New Delhi, Sept 15: India in China sot tah kidin te pi na ding in kigotna anei tan ahi. Eastern Ladakh sector a sepai 50,000 vaal kikoi ho hi ahunglhungding phal bi sung a jong um dan sah a tosot jing ding in kihou lhah na govt in ana nei uvin ahi. Phal bi hung lhungding toh lhon a arctic tent, heater, military lenna ho neh ding le manchah ding tolding ho phate in kigotna akinei in ahi akiti. Mol sang ho a um na dung a sepai ho phal bi sung  a apan jou thei na ding uvin jong kigotna akinei jing in ahi akiti.

Lok Sabha a Ladakh chung chang a defence minister Rajnath Singh in ahou limna a sepai ho in thanop na anei uvin, agamsung dap ding toh lhon in von le angai cha jouse phate in akivetsui peh jing in ahi tin phondoh na ananei in ahi. Hetthei khat chu achesa nisim 3 nikho a jong Army chief General Manoj Mukund Naravane in Ladakh mun a sepai ho umna mun ho vetlhah na ana nei ahitan ahi. Thuso kimudungjui a China in sepai 50,000 lam akoi a, aircraft jong  150 lam akoi tah toh lhon a tank, artillery, missile le air dfence system ho jong akikoi u a ahitan ahi akiti. China in hitabang manchah ho ahin kikoi utoh lhon in India in jong amaho koi tabang koi jou na ding in pan nasatah in ala uvin ahi akiti.

LAC chung chang thu a hi India le China sepai lamkai hoin chamna um na ding a kihou na nasatah a anei jing u ahi. Gamteni akon Corps commander-ranked officer ho injong kihou na 5 vei lam ana nei u ahitan hinlah tu chan na ima seilhah na anei thei lou u ahi akiti. Hetthei khat chu Pagong Tso lhang sung hi achesa phat phabep masang a China in jaankim a ana lo lut  ahi akiti. Alangkhat a Indian Army injong China ho umna lhang sung kivetsuh na mol phabep ana tou pha uvin ahi akiti.

xxxxxxxxxxxxxxxxxxxxxxxxxxxxxxxxxxx

Nagaland sung a covid case 15 a kibe

Kohima, Sept 15: Nagland sung a COVID-19 case tuni in 15 in ana kibe kit in ahi. Alangkhat a mi 27 lam in damdoh na ana nei toh lhon in lhadoh na ana kinei tan ahi. Tuni a case thah ho chu Dimapur akon 8, Kohima akon 4, Mokokchung, Tuensang le Mon akon khat cheh ahi. Case thah ho chu sample 304 lam tetst kibol na a hetdoh ana hiu ahi. Tuni a adamdoh jouse chu Kohima akon ahiuvin ahi akiti.

Xxxxxxxxxx

Mizoram a covid case 40 kibe

Aizawl, Sept 15: Mizoram sung a tuni in covid case 40 in ana kibe in ahi. Tuni a case kibe hotoh kigom in state sung a covid case hi 1,468 lam alhing tah ahi tin state helath department akon thuso kimu chun asei in ahi.

Health department akon thuso kimu dungjui in achesa nidan 24 sung in sample 1,306 lam test ana kibol doh in ahi. Positive case thah ho lah achun pasal 24 hin chuleh numei 14 ahi akiti. Tuni a case 40 ho chu Aizawl district akon 35, Hnahthial akon 2 chuleh Lunglei, Khawzawl le Lawngtlai district akon khat cheh ahi akiti. Case 40 lah a 23 ho chu alhangsung a kila son u ahi akiti. BSF khat tilou adang se chu milham ahiuvin ahi akiti.

Case 40 ho lah achun mi khat chun diabetes anei toh lhon in Zoram medical college a akikoi in ahi akiti. Health department akon thuso kimu dungjui in jani chan in state sung a sample 51,316 lam tetst akibol doh tan ahi akiti. COvid case khang jing toh lhon in health minister Dr R Lalthangliana in state sung a mipi kiloikhomna le houbung lamkai hotoh kihou na ana nei uvin ahi.