Kangpokpi district thaneina lhingset akipeh louleh Independence Day ‘boycott’ bol dinga CSO...

Kangpokpi district thaneina lhingset akipeh louleh Independence Day ‘boycott’ bol dinga CSO hon kigotna nei; Nidan 36 bandh umding

316
0
SHARE

Kangpokpi district thaneina lhingset akipeh louleh Independence Day ‘boycott’ bol dinga CSO hon kigotna nei; Nidan 36 bandh umding

Kangpokpi, Aug 6(UNA): BJP lamkaina coalition government in district thu a lungjinna ato kit dinga aumin ahi, ajeh chu Kangpokpi district a CSO hon avel a kigotna aneikit uvin ahi.

Tu masanga Kangpokpi district a civil society organization hon Kangpokpi district tha pehna dinga bandh panna a kiphinna chom chom tu masanga jong ana kouvu ahi’in, ahivanga state sorkar in thumna bulhit peh dinga kitepna aneijeh a avel vel a tohgon alahdoh kit jiu ahi. Monday nilhah a Kangpokpi DHQ mun a Kangpokpi CSO hon kihouna anei nauva kitepna mai maiya sorkar kilhem lhah sah louding, official order akiso kahse a kiphinna bol dinga kihouna lhahna anei uvin ahi. Chule Independence Day kah a thumna sorkar in asan louleh nidan 36 bandh bolding chule Independence Day jong boycott bol dinga jong asei uvin ahi.

Thangminlen Kipgen, spokesperson, CSO, Kangpokpi in thuso miho akimupi na’a CSO Kangpokpi in state sorkar henga district tha lhingset akipeh nadinga ‘ultimatum’ anapeh ahitan, November nisim 8, 2017 masanga achepi diu chule November 15, 2017 a kon NH-2 (Imphal-Dimapur) leh NH-37 (Imphal-Jiribam) a nidan 36 bandh bol dinga aseiyu ahi’in, hiche phat laiya CM in-chare anahi Th Biswajit in sorkar thalheng a November 2017 lha kah a thumna bulhit peh dinga kitepna aneijeh a kiphinna kigong kiladoh ahi, ati.

Kangpokpi in tumasanga kilhepna ho anathoh jing ahi, tin Thangminlen Kipgen in aseiyin, ahivanga kitepna kum khat ache nunga jong athu a bou kitepna aneiyu ahi’in, BJPsorkar in avel vel a kitahna anilou avetsah jeh a tua hi district pumpi a August nisim 9 nikho a kon nidan 36 bandh bol dinga kisei ahi’in, ahivanga Minister Nemcha Kipgen in pan alah’a jeh a ana kinungchon kit ahi. Tuchan a sorkar kitepna hi kitahna umlou ahi, ati.

Thumna kinei holah a Kangpokpi district a ‘development fund’ jouse DC Kangpokpi in achepi ding, sorkar natong jouse lhalo DC Kangpokpi in achepi ding, Kangpokpi district a Police Jurisdiction ho Rationalized bol ding, ZEO Kangpokpi noiya ‘utilized teacher’ jouse lepeh ding chule inter-district utilization chepi be louding, Sub Treasury Office mun Treasury office a upgrade bol ding, CMO office leh district hospital bulhing set a chepi ding, SDO Block jouse leh CHC Saikul bulhing set a ‘function’ sah ding chule DRDA Kangpokpi district jong phatah a manchah ding jong pang ahi.

Thumna abulhit sang uva lhahsamna tamtah aumin, district thah kisemdoh lo natoh kitohlou ahi, tin spokesperson in aseiyin chule Sub division atamjo a SDC umlou ahi’in, alangkhat a DC Office Kangpokpi a SDC lit u naicha transfer abol uva akhel uva SDC ni bou posting apeh u ahi’in, hiche lah a SDC khat hi natoh themlou chule khat hin promotion amu a district adalhah vahding dinmun a um ahi, ati.

SDO Kangpokpi a staff alhinga aumpon, DDO power jong umlou, Fishery panna a Department tamtah district a kisemdoh loulai ahi. Chule District Level Officer tamtah- ICDS/DPO, District Child Protection Officer (DCPO) leh Agriculture Officer hojong Senapati district a kon kimangcha nalai ahi, ati. CMO Kangpokpi in tuchan a office kitup anei loulai ahi’in chule District hospital a doctor leh staff alhahsam jeh a health department a hahsatna tamtah um ahi. Ngehna avel vela akinei vanga action kilalou ahi, tin aseiyin chule Social Welfare Department noiya DPO achom a akikoi loujeh a district sunga welfare scheme tamtah kichepi theilou ahi’in chule JNV Kangpokpi school building jong mundet a sah angaiye, ati.

Thohhatna leh lungneng tah a sottah akium jouva tua hi sorkar in kitepna anei official order a asodoh kahsea san loudinga kilol lhahna kinei ahi, tin Thangminlen Kipgen in aseiyin chule Independence Day masanga thumna ho official order a avetsah lou ule Kangpokpi in August nisim 15 jingkah nidan 6 a kon ajing nikho nilhah nidan 6 chan National Highway 2 (Imphal-Dimapur) leh No 37 (Imphal-Jiribam) a nidan 36 bandh abol ding ahi, tin aseibe in ahi.